Hebrǔ 1:3 - Kawyaw New Testament

³ Kòyò gǔ kè̌shǐ tutṳ̌ Cǒmara a ta̤bwǐdû̌sîrîhtû dǒ akû pě. A mî̌ a sô̌sô̌ bòmǔtegle kû̌ Cǒmara. Pô̤̌khô hǎkhû̌ kû̌ mǒkhû̌ kû̌mî̌ ta̤bô̌lò̤ lǒ̤꤮ bò tokhlǒ gǔ ô̌ gutṳ̌ hènè pô̤̌ pěnu, a pṳ̂̌mějè̌ kû̌ ta̤bô̌lò̤ lǒ̤bònu kû̌ ayô̤̌ dǒ apô̤phǎ shû̌sho nutokhlǒ. Bǎ a ma̤phlǔma̤hto ta̤plûkè kòyòhǎkhû̌phû̌ ata̤sǔ sîtokhlǒ akhanu, a gehtò̌ dǒ mǒkhû̌ dě a htò̌hǎnòò̌ bǎ Cǒmara dǒ apô̤aphǎ adû̌htû gutṳ̌ nutôpwa̤ acǔde cǔtômû tôkhô pě.

Kawyaw RC

³ Kò kè̌shǐ tṳtṳ Cǒmara a ta̤sîrîdû̌sîrîhtû dě akû pě. A mî̌ asǒsǒ bòmṳ̂sîglî ta Cǒmara hǒ. Ma̤pûhǐ hǎkhû̌ ta mǒkhû̌ ta ta̤bǒlò̤ lǒ̤꤮ bò toǒ ǒ hèsělěpo̤nu, a pṳ̂měǐjè ta̤bǒlò̤ lǒ̤꤮ bò htǒonu ta ayo̤ htě apo̤aphǎ shû̌sho htǒotoǒ. Bǎ a ma̤htoma̤phlǔhto ta̤bòlû̌kèbò kòyòhǎkhû̌phû̌ ata̤sǔ toǒ akhanu, a gekihtò̌ mǒkhû̌ dě a htò̌hǎnòò̌ Cǒmara htě apo̤aphǎ adû̌ayǒgutṳ̌ htǒotapwa̤ acǔdemû tokho.

Hebrǔ 1:3 Iomraidhean Croise

Htû̌sò̌htò̌ 110:1

Cǒmara tûjû̌pwa̤ hî̌lṳ̌lò̤ he Běcǎdû̌ kû̌, “Bǎ he ma̤pè̤̌ bòmǔtegle pwa̤sǎkhě na nutokhlǒ dě he bè̌bò asî dǒ na khǎlǎ khôtô̤̌nu, hǎnòò̌ dǒ he cǔtûmû nutôkhô.”

Htû̌sò̌htò̌ 75:3

“Bǎ hǎkhû̌ guyṳ̌ akhanu bǎbǎ, kòyò kû̌ ta̤phû̌ta̤li̤ ô̌ dǒ lû̌lô̤ pṳ̂̌ tôcǒ gònò̤̌gòglè bò bǎbǎ, he ma̤tònò ma̤wô̌ tû̌ akòshî̌ pě.

Matěo 22:24

Dě asî gwè̌ Běcǎ Yeshǔ kû̌, “Saradû̌꤮, Khûmṳ̂shě hî̌ bǎ pa kû̌ pwa̤khû tôpwa̤pwa̤ kè̌ si dě aphû̌ kè̌ ô̌kè tôpwǎ̤꤮ tô̤̌ hî̌nu, pô̤̌khô akhlialè gǔ ô̌kè kû̌ kò nudě, a pṳ̌pwa̤khû bǎ phî̌wô̌ akhi ô̌kènu, a hî̌ pô̤̌nu.

Mǎ̤riko 16:19

Běcǎ Yeshǔ hî̌bǎhto kû̌ akhôphijǎ tokhlǒ dě Cǒmara kaǎ gehtò̌kè yǎ dǒ mǒkhû̌ dě a htò̌hǎnòò̌ dǒ Cǒmara cǔtômû tôkhô.

Jowǎ̤ni̤ 1:14

Kòyò dǒ kòyò kaǎ a kû̌ ta̤lě̤ta̤yô̤̌ tôpwa̤nu, a hèhtû ma̤pô̤̌ kòyòhǎkhû̌phû̌nu dě a hè ô̌htûpwa̤ dǒ pakla hǒ. Dě pa kè̌shǐ a ta̤bwǐdû̌sîrîhtû. Cǒmara aphû̌khû ô̌pwǎ tôpwa̤nô̤̌ akhû̌akhî, a nǐ̤bǎ bò ta̤bwǐdû̌sîrîhtû dǒ aphaô̌ a mî̌ kòyò dǒ a lǒbe kû̌ ta̤bwǐta̤sîrî kû̌ ta̤tě̤ta̤mè̤̌ tôpwa̤.

Jowǎ̤ni̤ 1:29

Dǒ nô̌kò tôni̤nu, Khûyṳ̂ha kè̌shǐ Yeshǔ hè dǒ a ô̌ dě a hî̌ kû̌, “Kè̌mò̌, Cǒmara a sû̌phû̌ dǒ a phî̌kè hǎkhû̌phû̌ a ta̤sǔta̤plěsî nutôpwa̤.

Jowǎ̤ni̤ 1:4

A mî̌ ta̤htûpwa̤ a kòshî̌ dě ta̤htûpwa̤ nî̌ a ǐ kò ta̤lî dǒ kòyò pṳ̂̌꤮ tôpwa̤ aya.

Pwa̤nophû̌ 2:33

Cǒmara bè̌dû̌bè̌htû Yeshǔ dě a dǐô̌ lû̌û dǒ acǔtômû tôkhô. Dě pô̤̌ apha Cǒmara olò̤ hto kû̌ a gǔ ǐ lû̌û Yôla Plò̌shǐ Běcǎ nu a ǐhto lû̌û hǒ. Dě Yeshǔ glǒlò̤lò̌lò̤ hto ta̤ dǒ na kè̌shǐ ganǎ̤de hto khònò̤̌ nutokhlǒ hǒ.

Pwa̤nophû̌ 7:56

Dě Khûsôtibe hî̌ asî kû̌, “Kè̌mò̌! he kè̌shǐ mǒkhû̌ ô̌môhtò̌ dě Kòyòphû̌khû ihtǒô̌ dǒ Cǒmara a cǔtômû nutôkhô.”

Rṳ̂̌me̤ 1:16

Dǒ ta̤sǎlě̤we̤kènu akhû̌akhî, he sòwò̤̌tô̤̌, ma̤titèhî̌dě, lǒ̤꤮ bò kòyò dǒ a yṳ̌ǎ ta̤sǎlě̤we̤kè tokhlǒnu, Cǒmara ma̤hǎplǎge bò asî kû̌ a ta̤pô̤ta̤phǎ hǒ. A ma̤hǎplǎge wǐ Yǔdaphû̌ tokhlǒ, htodě a ma̤hǎplǎge pô̤̌ Yǔdaphû̌ mè̤̌tô̤̌ tokhlǒ.

Rṳ̂̌me̤ 8:34

Pô̤̌nudě, mò̌pè glè̌ cî̌htò̌ asî ya? Kòyò cî̌htò̌ jò asî tôpwǎ̤꤮ tô̤̌. Ma̤titèhî̌dě, Yeshǔ Khrǐ mî̌ pwa̤ dǒ a si bǎ pa ta̤sǔ aya tôpwa̤, htokhôtô̤̌ Cǒmara ma̤htûpwa̤ getîkhî lû̌û dǒ ta̤si tôpwa̤. Dě Cǒmara ǐ lû̌û gûlǎ̤ dǒ acǔtômû tôkhô. Pô̤̌khô Cǒmara gǔ ma̤jè̌ panu, Yeshǔ nṳ̌ kwisǎyṳ bǎ pa gûlǎ̤ hǒ.

Kôritu ginǐ̤bǎ tôbǎ 4:4

Hǎkhû̌tana dǒ a pǒnǐ̤ hǎkhû̌ hǒtôdonu, a ma̤khǐ ma̤shôpe̤kè asî mǐ̤sǎ akhû̌akhî, asî kè̌shǐ gû̌ kòyò ta̤sǎlě̤we̤kè ata̤lînu tô̤̌. Pô̤̌khô kòyò hǎkhû̌phû̌ tokhlǒ gǔ sî̌yaphlô tǎ̤ Khrǐ a ta̤sǎlě̤we̤kè dǒ a shôbǐǐlṳ̌ bǎ kòyò kû̌ Khrǐ a ta̤bwǐdû̌sîrîhtû awe̤akè tǎ̤mǎ̤nu, a ma̤kiti̤kaa ǒò̌pè̌kè asî pô̤̌nu hǒ. Pwa̤ dǒ a dǔlè̌lṳ̌ tě̤tě̤mè̤̌mè̤̌ pa kû̌ Cǒmara mî̌ Khrǐ hǒ.

Kòlòtè̌ 3:1

Pô̤̌ Cǒmara ma̤ ihtǒhtûpwa̤ getîkhî Khrǐ dǒ ta̤sinu, Cǒmara ma̤ ihtǒhtûpwa̤ getîkhî sî dǒ ta̤si hǒ dě a ǐ sî ta̤htûpwa̤ asanu kû̌ Khrǐ hǒ. Pô̤̌nudě lǒ̤bò sî sǎphlǒ a ta̤sǎyṳ tokhlǒnu, bè̌ô̌ lô̌khô dǒ mǒkhû̌ bǎ Khrǐ lǎ̤hǎnòò̌ ǐtûû̌ agûlǎ̤ dǒ Cǒmara acǔtômû nutôkhô nî̌꤮.

Tǐtǔ 2:14

Pô̤̌khô a gǔ ma̤hǎplǎge pa dǒ ta̤phû̌mò̤̌shǐhtô lǒ̤꤮ bò tokhlǒ akû, htokhôtô̤̌ pô̤̌khô a gǔ ma̤ mṳ̂̌plî ge sô̌ pa dě pa gǔ htûhtò̌ a kòyò, kǎtô̤̌ pa gǔ sǎphlǒshû̌ ma̤ta̤ dǒ awô̌ tokhlǒ ayanu, a tṳ̌sikhòsi bǎ anǎ̤ dǒ paya hǒ.

Hebrǔ 1:13

“Hǎnòò̌ô̌ dǒ he cǔde cǔtômû nutôkhô, dě hǎnòò̌ tǒ̤dǒ he nopǒ na kû̌ pwa̤dǔdǎ na nutokhlǒ hè cabahtò̌ na dǒ na khò̌lôpô̤̌ kòshî̌ pě,” Cǒmara hî̌bǎnǒ amǒkhû̌ tanaphû̌ tokhlǒ pô̤̌onu tômṳ̂̌꤮ tô̤̌.

Hebrǔ 10:12

Bǎbǎkǎlè Khrǐ lṳhtò̌ bǎ pa ta̤sǔ aya tokhlǒnu, a lṳhtò̌ tôplǎnô̤̌pwǎ dě a hto phlǔbò tûjû̌pwa̤ hǒ. Dě a ge hǎnòò̌ô̌ dǒ Cǒmara a cǔtômû tôkhô hǒ.

Hebrǔ 12:2

Asô̌sô̌kû̌ kòyò khlè̌ tokhlǒ kè̌tôtǐ hètô pwǎ ta̤ma̤pè̤̌ bò̌htò̌htǔ nuhǒ, pô̤̌nudě pa kè̌hè tôtǐ pwǎtǒ̤ Yeshǔ nô̤̌ tǎ꤮. Ma̤titèhî̌dě a mî̌ pa ta̤yṳ̌ta̤nǎ̤ a kòshî̌gutṳ̌ tôpwa̤. Htokhôtô̤̌, a mî̌ pwa̤ dǒ a ma̤lǒma̤be bǎ pa ta̤yṳ̌ta̤nǎ̤ tôpwa̤. A khòsi htopědě, a sî̌ganǎ̤ nǎ hto kû̌ a gǔ nǐ̤bǎ ta̤sǎlě̤sǎlò̤ pě akhû̌akhî, a tôbǎ khòsi dǒ nò̌dò̌htǔlô̤ bǎbǎkǎlè a sòwò̤̌ tôcǒ꤮ tô̤̌. Khònò̤̌dě a hǎnòò̌ dǒ Cǒmara a lǎ̤hǎnòò̌ htò̌yô̤̌ dǒ cǔtômû nutôkhô hǒ.

Hebrǔ 4:14

Pô̤̌nudě, pa pṳ̂̌mě̤tegle wô̌ lô̌khô pa ta̤yṳ̌ta̤nǎ̤ dǒ pa olò̤ bǎnu tǎ꤮, ma̤titèhî̌dě, pa ô̌ ǐtûû̌ kû̌ pa pwa̤shû̌gǎ ikǒdû̌lǒ nutôpwa̤, dě a cû̌nṳ̌ hto paya dǒ mǒkhû̌ hǒ. A mî̌ Cǒmara a phû̌pwa̤khû Yeshǔ nuhǒ.

Hebrǔ 7:27

A mî̌ asô̌sô̌kû̌ pwa̤shû̌gǎ ikǒdû̌lǒ dǒ ashǔshawa̤ nutokhlǒ mè̤̌tô̤̌. Pṳ̂̌ni̤ni̤ a lǎ̤lṳ̂ lṳhtò̌ wǐ tûû̌ ata̤sǔ tokhlǒ, htodě a lṳhtò̌ nô̌ bǎ kòyò dǒ ashǔshawa̤ tokhlǒ ata̤sǔ tokhlǒ pô̤̌nu mè̤̌tô̤̌. Bǎ a lṳhtò̌ anǎ̤ dǒ nò̌dò̌htǔlô̤ akhanu, a lṳhtò̌ pwǎ tôplǎ dě a htophlǔkè tûjû̌pwa̤ hǒ.

Hebrǔ 8:1

Khònò̤̌, ta̤ dǒ a lṳ̂dû̌lǒ tôcǒ dǒ he sǎyṳ nosî̌yaphlô sî numî̌ amè̤̌kû̌ pa pwa̤shû̌gǎ ikǒdû̌lǒ nutôpwa̤ hǒ. A mî̌ Yeshǔ hǒ. Khònò̤̌ a hǎnòò̌ô̌ dǒ mǒkhû̌ dě a hǎnòò̌ô̌ dǒ Cǒmara dǒ alîata̤kakha, apô̤aphǎ nutôpwa̤ lǎ̤nòò̌ acǔde cǔtômû nutôkhô hǒ.

Hebrǔ 9:16

Hî̌kûmṳ̂̌ lî̤ tôbǎ dǒ kòyò tôpwa̤pwa̤ kè̌ wě̤nǎ kû̌ kòyò nutôpwa̤ gǔ bè̌ kòyòsi nutôpwa̤ a û̌tě̤û̌ca numî̌, pô̤̌khô a gǔ nǐ̤bǎ û̌tě̤û̌canu, a bǎ dǔlè̌lṳ̌ kû̌ kòyò wě̤nǎ lî̤nu tôpwa̤ mî̌ a bǎ si htohǒ, pô̤̌nu.

Hebrǔ 9:26

Kè̌ Khrǐ lǎ̤lṳ̂nṳ̌ sǎla̤la̤ pô̤̌nu kè̌hî̌dě, a tôbǎ khòlṳ̌ sǎla̤la̤ asǎphlǒ dǒ hǎkhû̌ htûhtò̌lû̌ akha pe a lǎ̤lṳ̂ khòlṳ̌ pô̤̌nutô̤̌. Khònò̤̌ bǎ hǎkhû̌ glè̌ phǔ꤮ gutṳ̌hǒ akhanu, a hè khòlṳ̌ pwǎ tôplǎ dě a htophlǔ bòhǒ. Dǒ a lṳhtò̌ anǎ̤glǒ kû̌ anǎ̤nu akhû̌akhî, a phî̌cû̌ tephekè kòyòhǎkhû̌phû̌ tokhlǒ ata̤sǔ tokhlǒ hǒ.

Petru awǐlǒ tabǎ 1:21

Dǒ Khrǐ akhû̌akhî, sî yṳ̌nǐ̤nǎ̤nǐ̤ Cǒmara dǒ a ma̤ ihtǒhtûpwa̤ getîkhî sô̌ Khrǐ dǒ ta̤si dě a bè̌dû̌bè̌htû gutṳ̌ lû̌û nutôpwa̤ hǒ. Pô̤̌nudě sî ta̤yṳ̌ kû̌ sî ta̤kè̌shuǐnu, a ô̌ dǒ Cǒmara alô̤hǒ.

Petru awǐlǒ tabǎ 3:22

Yeshǔ Khrǐ ge ihtǒ dǒ mǒkhû̌ dě a ge hǎnòò̌ô̌ dǒ Cǒmara acǔde cǔtômû tôkhô hǒ. Dě a pǒǐ lǒ̤bò tanaphû̌ tokhlǒ kû̌ ta̤shû̌ta̤sho tokhlǒ, kû̌ ta̤pô̤ta̤phǎ tokhlǒ hǒ.

Petru ginǐ̤bǎ tabǎ 1:16

Bǎ pa ǐsî̌ganǎ̤ bǎ sî kû̌ pa Běcǎ Yeshǔ Khrǐ a ta̤pô̤ta̤phǎ kû̌ ata̤hè awe̤akè akhanu, ta̤dô̌kènè dǒ amè̤̌tô̤̌ bǎbǎkǎlè kòyò sî̌jò̌ lòhô tokhlǒ dô̌bǎ sî tokhlǒnu, pa gû̌dô̌ kû̌ kòyò tô̤̌. Pa kè̌shǐ a ta̤lîta̤kakha tokhlǒ kû̌ pamǐ̤sǎ tûû̌.

Petru ginǐ̤bǎ tabǎ 1:17

Bǎ pha Cǒmara ǐlò̤ a ta̤bè̌dubè̌nǎ̤ kû̌ a ta̤bwǐdû̌sîrîhtû dǒ Yeshǔlô̤ akhanu, pa ô̌cu bǎnu. Cǒmara dǒ apô̤aphǎ adû̌ahtûlǒkhlo kû̌ ta̤lǒ̤꤮ bò hǒtôpwa̤nu, a hî̌ kû̌, “Hǒnumî̌ hephû̌pwa̤khû dǒ he mô̤ ǐtûû̌ a dě atô he sǎphlǒ tôpwa̤.”

Yṳ̂ha awǐlǒ tôbǎ 1:7

Bǎbǎkǎlè pa kè̌ ô̌htûpwa̤ dǒ ta̤lî akû pô̤̌ Cǒmara ô̌ dǒ ta̤lî akû hǒnumî̌, pa ô̌ kû̌ ta̤bǒsû̌khǎkhô kè̌khîlû̌û tôpwa̤ kû̌ tôpwa̤, htodě Cǒmara aphû̌khû Yeshǔ Khrǐ asǐnu a gǔ cǔbò lǒ̤bò hǒ pa ta̤sǔta̤phû̌mò̤̌ tokhlǒ.

Yṳ̂ha awǐlǒ tôbǎ 3:5

Bǎbǎkǎlè pô̤̌khô Khrǐ gǔ phî̌cû̌kè pa ta̤sǔta̤phû̌mò̤̌ tokhlǒ ayanu, a hèlò̤ htohǒ dǒ hǎkhû̌ numî̌ sî sî̌ganǎ̤ htotû̌ hǒ. Htokhôtô̤̌ sî sî̌yahto kû̌ Yeshǔ Khrǐ numî̌ a ta̤sǔta̤phû̌mò̤̌ ô̌kû̌ kòyò tôcǒ tô̤̌.

Yṳ̌da 1:25

Comara mî̌ ta̤bwǐdû̌sîrîhtû. Cǒmara mî̌ a ô̌ tôpwa̤ nô̤̌ pwǎ. Kòyò dǒ a ma̤hǎplǎge pa mî̌ tǒ̤ a tôpwa̤ nô̤̌ pwǎ. Dǒ Yeshǔ Khrǐ akhû̌akhî, dě ta̤bwǐdû̌sîrîhtû, ta̤dû̌ta̤htû awî̤awô̌, ta̤pô̤ta̤phǎ kû̌ ta̤siwi̤sòwò̤ hǒtokhlǒnu, a ô̌cu pû kû̌ Cǒmara sahtò̌ dǒ ta̤tôcǒ ô̌ htûhtò̌ khôtô̤̌ akha, tǒ̤lò̤ khònò̤̌, hènè ajû̌jû̌ apwa̤pwa̤ nî̌꤮, Ame̤.

Ta̤dǔlè̌nǎ 3:21

“He ma̤pè̤̌ hto dě he hǎnòò̌ kû̌ hepha dǒ tòcòhta akhû̌ hǒ. Pô̤̌nudě kòyò dǒ a ma̤pè̤̌ta̤ tokhlǒnu, he nohǎnòò̌ asî kû̌ he dǒ he tòcòhta akhû̌ nupě.

Ta̤dǔlè̌nǎ 4:11

“Ǒ pa Běcǎ Cǒmara, na gwǎgwè nǐ̤bǎ ta̤bwǐdû̌sîrîhtû, bè̌dû̌bè̌htû kû̌ ta̤pô̤ta̤pwǎ̤ hǒ, ma̤titèhî̌dě na bô̌lò̤ ta̤ lǒ̤꤮ bò dě na bô̌lò̤ asî dě na bè̌ htûpwa̤ asî jû̌ tûû̌ na sǎphlǒnu.”