फिलिप्‍पी 3:19 - पुना गच्छरना NT (BSI)

¹⁹ आर ही छेद्द नठारना हवे। आर ही धर्मेस कूल हवे। आर तम्है लजरना ही कत्था गुट्ठी नू फुलई मन्नर। अरा आर ई ख़ॆख़ेल ता आलॊ गुट्ठी नू लेका सोच नू र'अनर।

फिलिप्‍पी 3:19 Iomraidhean Croise

मत्तायोस 16:23

तहाँ आस किर्र ईरियस ती पतरसिन बाचस, “अना सैतान, एंग्‍है मुन्‍दहारे ती तरकूटी मना। नीन मूड़ना ही अड्डा हिकदय, नीन धर्मेसी सोचना लेक्‍खा मल सोचदय, आलर ही सोचना लेक्‍खा सोचदय।”

मत्तायोस 25:41

आ बारी ऎन बॆलन डेब्‍बा पक्‍खे ता आलारिन ब'ओन, ‘अना सरपारका आलारो, एंग्‍है मुन्‍द ती आ मल तेभ्रना चिच्‍ची नू किर्रिम बि'आ, एकदा नाद अरा अदही पैकर गे सपड़ाचका र'ई।

लू‍कस 12:19

अरा ऎन एंग्‍‍है जियन ब'ओन, ‘निंगा गे नगदे चान गुट्ठी गे बग्‍गे जिनिस उइरकी र'ई, नीन ख़न्न ऎख़य, ओनय, मॊख़य अरा रिझ्र'अय।’

लू‍कस 16:19

ओर्त उरुब आलस रहचस। आस लेपलेप अरा बग्‍गे दामी किचरी गुट्ठिन अत्तालियस ती उर्मी उल्‍ला सुख-सौंरत गने उज्‍जालियस।

लू‍कस 18:4

जोक्‍क उल्‍ला गूटी गा आस अदिन मल मेंजस, लिकिन ख़ॊख़ा तान तानिम बाचस, ‘ऎन धर्मेसिन मल एल्‍चदन अरा आलारिन हूँ मल गदन'अदन।

रोमी 16:18

एन्‍देरगेका का एन्ने आलर नम्‍है उर्बस मसीसी मला तम्‍है कूल ब'ई ही तेतर-सुसर नन्नर। अरा एम्‍बा एम्‍बा अरा भुरिय'अना कत्‍था ती बोको जिया आलारिन बेड़ाब'अनर चि'अनर।

रोमी 6:21

नीम मलदौ नलख गुट्ठी नंजकर अरा अक्‍कु अदही चड्डे निमा लज्‍जे मनी। अबड़ा कत्‍था खे'अना लेका ओन्‍द्र'ई।

1 कोरिन्‍थ 3:3

एन्‍देरगेका नीम अक्‍कु गूटी निम्‍है कया सुबहा ही तबे नू र'अदर। अरा अक्‍कु गूटी निम्‍है नू इस्‍गहा अरा नग्‍गानख्रना मनी, ख़ने नीम कया सुबहा ही आलर दिम हिकदर। नीम ख़ॆख़ेल ता आलर लेक्‍खा दिम उज्‍जदर।

1 कोरिन्‍थ 5:2

अन्नु हूँ नीम गा फुल‍ई ननुर हिकदर। इदगे नीम जिया दोलख़्रना ती एन्ने नलख नंजका आलासिन निम्‍है मझी ती ओथ्रना रहचा।

1 कोरिन्‍थ 5:6

निम्‍है फुल‍ई मन्ना दौ मल्‍ला हिके। नीम एन्‍देर बलदर का कटी गुना तिस्‍सा ओर्मा लिंडका गुंडन तिस्‍सा ननी चि'ई?

2 कोरिन्‍थ 11:12

ऎम एकासे सुसर नलख नन्दम, अन्नेम आर हूँ सुसर नलख नन्नर एन्ने आर फुलाई मन्नर। अन्ने आर नना पोल्ला गे ऎन ई लेक्खम नन्तेम र'ओन।

2 कोरिन्‍थ 11:15

औंगे अदही जॊंख़र हूँ उजगो ही जॊंख़र लेक्‍खा भॆंस नन्ना कोहाँ कत्था मल्ला। लिकिन एकासे आर ही नलख र'ई अन्नेम आर ही मुंज्रना र'ओ।

गलातिया 6:13

खतना नंजका आलर हूँ गा ओर्मा नॆग नू मल ऎकनर। अन्नु हूँ आर निम्‍है कया ही पत्त ती फुल‍ई नना गे निमन खतना नन्‍त'आ बेद्दनर।

फिलिप्‍पी 2:21

अउर नन्ना ओर्मर तम्है तम्है पत्त ता कत्था गुट्ठी गे लेका घोख नन्नर, येसु मसीसी कत्था गुट्ठी गे घोख मल नन्नर।

कोलोस्से 3:2

ख़ॆख़ेल ता आलॊ गुट्ठी नू मला, लिकिन मेर्ख़ा ता आलॊ गुट्ठी नू जिया ओड़'आ।

2 थेस्‍सलोनिकॆयर 1:9

आर जनमजुग गे नठारना ही दंडे ख़क्‍खोर। आर उर्बासी मुन्‍दहारे ती अरा आसी सवंग ही महबा ती तरकूटी मनोर।

2 थेस्‍सलोनिकॆयर 2:12

ई लेक्‍खा मानी आबोन मल पत्त'अनर अरा मलदौ नलख नू रिझ्र'ऊ आलर ओर्मर भगती मलका आलर लेक्‍खा दंडे ख़क्‍खोर।

2 थेस्‍सलोनिकॆयर 2:8

होले आ नॆग मलका दहदर मनो। लिकिन उर्बा येसुस तंग्‍है बई ता सांस ती अदिन पिटोस अरा तंग्‍है बरना नू तंग्‍है लौकारना ती अदिन नठाब'ओस।

1 तीमोथियुस 6:5

अरा रेन्‍द नग्गानखरना नन्‍तेम र'अना मनी। एन्ने आर ही बुधी बगड़ारकी किरकी र'ई। अरा आर मानी ती खत्रका केरका र'अनर। आर घोकनर का महबा अर्ज'अना ही डहरे।

2 तीमोथियुस 3:4

अरा आर दगा चि'ऊ, हुड्ड ननू, मनचड़हा, अरा धर्मेसिन मला लिकिन सुख-सौंरतन दिम बिद्दू मनोर।

याकॊब 4:16

लिकिन अक्‍कु नीम हकना नू फुलई मन्दर, अरा ई लेक्खा उर्मी फुलई मन्ना मलदौ हवे।

2 पतरस 2:1

इस्राऎल आलर ही मझी नू ठकवा धर्मेसी कत्था तिंगुर रहचर। अन्नेम निम्है मझी नू हूँ ठकवा सिखाब'उर चो'ओर। आर नठारनन ओन्द्रना ठकवा सिखाब'अनन नूख़ुर नूख़ुर ओन्द्र'ओर। अरा आर तमन मूल्ली चि'अरकी ख़ीन्दका कोड़हे सवंगिय उर्बासिन हूँ बलदम ब'ओर। ई लेक्खम आर तमा गे चाँड़हेम नठारनन ओन्द्र'ओर।

2 पतरस 2:13

आर नंजका उजगो मलका नलख गुट्ठी ही ऊजी नू धर्मेस आर गे दंडे चि'ओस। आर उल्ला बेड़ा नू हूँ मलदौ मदी गुट्ठी ती रिरयार'आ गे कोड़हे बेद्दनर। आर टिकला अरा लज्जे मलका लेक्खा हिकनर का आर निम्है गने मदी गुट्ठी नू ओन्ना उर्मी बेड़ा नू निमन लज्जे मॊख़त'ओर।

2 पतरस 2:3

अरा आर तम्है कोड़हे चिबाख़ारना ती ताम कमचका ख़ीरी गुट्ठिन तेंगरकी निम्है गुस्ते फफड़'ओर मॊख़ोर। अरा आर मइय्याँ बरना दंडे पॆसका नगदे उल्ला ही मुन्द तिम धर्मेस ती सपड़ारकी र'ई, अदही बरना ही दिरी मलकी, आर ही नठाब'अना चाड़हेम अंड़सो।

यहूदा 1:10

लिकिन इबड़ा ठकवा सिखाब'उर गा अख़'अम बलनर अबड़ा कत्था ही बिड़दो नू निंदा नन्नर। अरा सोच'आ पोलना मेक्खो लेक्खा तम्है सुबहा ही लेक्खा एन्द्रन अख़'आ ओंगनर, अबड़न दिम नन्नर, अरा अत्रु तिम नठारनर कानर।

यहूदा 1:16

ईर कुटमुटर'ऊ हिकनर, अरा नन्नर ही मइय्याँ गुन्हा बिद्दू हिकनर। अरा आर तम्है मलदौ चिबाख़ारना ही लेक्खम ऎकनर। अरा आर तम्है पत्त नू फुलई ही कत्थन मन्नर। अरा आर तम्है फयदा गे नन्नारिन हक'आ कुद्दनर।

यहूदा 1:4

ऎन इदगेम एन्ने लिखदन का जोक्क ठकवा सिखाब'उर निम्है मझी नू कलेकसे कोरचका र'अनर। आर धर्मेसिन नटनर। आर नम्है धर्मेसी मया आबोन मलदौ उज्जना ऎकना ही ओदहा नू बदलनर। आर नम्है ओन्टे लेका उर्बस येसु मसीसिन नटनर। आर ही नठारना चिरान नुम नेम्हा पुथी नू लिखिर ख़च्चकी र'ई।

दहदर मंजका कत्‍था 18:7

एवंदा आद तंगन मईन नंजा ती सुख-सौंरत गने उज्जकी र'ई, औंदम अदगे डाहरना अरा ख़ोदख़रना चि'आ, एन्‍देरगेका आद तंग्‍है जिया नू ब'ई, ‘ऎन बॆलनी मंजकी र'एन, ऎन रड़ियाही मल्लेन, ख़ोदख़रना नू इकला हूँ मल खत्र'ओन।’

दहदर मंजका कत्‍था 19:20

लिकिन आ मेक्‍खो गा धरतारा केरा, अरा अदही गने आ मेक्खो ही ऊजी नू अजगुत नलख गुट्ठी नंजका ठकवा धर्मेसी कत्था तिंगुस हूँ धरतारस केरस। ई अजगुत नलख गुट्ठी ती दिम ई ठकवा धर्मेसी कत्था तिंगुस आ मेक्खो ही छपा होच्चका ती अदही मूर्तिन ऒड़ लग्गुरिन ठकचस। इबड़ा इरबारिम उज्‍जनुम उज्जनुम गन्धक लघरना चिच्‍ची ही समुदर नू हेबड़तारर केरर।

दहदर मंजका कत्‍था 21:8

लिकिन इल्‍चुर, अरा मल पत्त'उर, अरा कदरहर, अरा आल पिटुर, अरा पेहरन ही सोतरा नलख ननुर, अरा टोनहर, अरा मूर्तिन ऒड़ लग्‍गुर अरा उर्मी ठकवा आलर ही अड्डा गन्धक लघरना चिच्‍ची ही समुदर हवे। ईद दुसर खे'अना हवे।”

दहदर मंजका कत्‍था 22:15

लिकिन अल्‍ला लेक्खा नेम्हा मलका आलर, अरा टोनहर, अरा पेहरन ही सोतरा नलख ननुर, अरा आल पिटुर, अरा मूर्तिन ऒड़ लग्गुर, अरा ठकवा कत्‍था गुट्ठिन पत्त'अरकी अबड़ा नू ईकू ओर्मर नगरे ही बहरी र'ओर।