လံာ်စကၤရယၤ 8:23 - Sgaw Karen Common Bible

²³ လၢမုၢ်နံၤတဖၣ်အပူၤန့ၣ်, တခီဘီမုၢ်ဖိအဂၤတဆံကဟဲဆူပှၤယူဒၤဖိတဂၤအအိၣ်ဒီးစံး, ပအဲၣ်ဒိးလဲၤသကိးဃုာ်တၢ်ဒီးသု, ဆူတၢ်လီၢ်လၢသုကလဲၤတုၤဃီၤသပှၢ်ကတၢၢ်, မ့ၢ်လၢပနၢ်ဟူတ့ၢ်လၢကစၢ်ယွၤအိၣ်ဒီးသုအဃိန့ၣ်လီၤ.”

လံာ်စကၤရယၤ 8:23 Iomraidhean Croise

လံာ်တၢ်ကဲထီၣ်အခီၣ်ထံး 31:41

တၢ်မၤအသးဒ်န့ၣ်အသိးဖဲယအိၣ်ဒီးနၤအနံၣ်ခံဆံန့ၣ်လီၤ. ဒ်သိးယကဒိးန့ၢ်နဖိမုၣ်ခံဂၤအဂီၢ်ယမၤနတၢ်တဆံလွံၢ်နံၣ်ဒီး လၢနဆၣ်ဖိကီၢ်ဖိအဂီၢ်ယမၤနတၢ်ဃုနံၣ်လီၤ. ဒီးလၢတၢ်အံၤအပူၤဒၣ်လဲာ်နလဲလိာ်ကဒံကဒါယဘူးယလဲ အဘျီတဆံလီၤ.

လံာ်တၢ်ကဲထီၣ်အခီၣ်ထံး 31:7

အန့ၣ်ဒၣ်လဲာ်အဝဲလီန့ၢ်ယၤဒီးလဲလိာ်ယဘူးယလဲအဘျီတဆံလီၤ. ဘၣ်ဆၣ်ဒီးကစၢ်ယွၤတပျဲအမၤဆါယၤဘၣ်.

လံာ်စီၤပၤခံဘ့ၣ်တဘ့ၣ် 2:6

အန့ၣ်ဝံၤဒီး, စီၤအ့ၤလံယၤစံးဘၣ်စီၤအလံၤၡါ, “ခဲအံၤအိၣ်တ့ၢ်ဖဲအံၤတက့ၢ်, ယွၤမၤလိာ်တ့ၢ်ယၤလၢယကဘၣ် လဲၤဆူထံကျိယၢ်ဒ့ၣ်န့ၣ်လီၤ.” ဘၣ်ဆၣ်စီၤအလံၤၡါစံးဆၢအီၤ, “လၢယတၢ်သးတီအပူၤယဆိၣ်တၢ် ဒီးယွၤလၢအမူဝဲတဂၤဒီးနၤလၢယတဟးဖးဒီးနၤန့ၣ်ဘၣ်.” လၢတၢ်န့ၣ်အဃိအဝဲသ့ၣ်လဲၤတၢ်ဆူညါ,

လံာ်ကွဲးနီၣ်တၢ်အခီၣ်ထံးတဘ့ၣ် 12:18

ကစၢ်ယွၤအသးဟဲလီၤဘၣ်လၢပှၤလၢအဝဲသ့ၣ်အကျါတဂၤ, စီၤဧၤမၤစဲအလိၤလီၤ. ပှၤအံၤလၢခံကဲထီၣ်ပှၤသၢဆံအသုး ခိၣ်, ဒီးအဝဲဒၣ်ကိးထီၣ်ဝဲ, “စီၤယံးၡဲအဖိခွါစီၤဒၤဝံးဧၢ, ပမ့ၢ်နပှၤတဖၣ်လီၤ. မ်နၤဒီးပှၤလၢအမၤစၢၤနၤတဖၣ်မၤန့ၢ်မၤနၢၤတၢ်တက့ၢ်. ကစၢ်ယွၤအိၣ်လၢနအိၣ်တခီလီၤ.” စီၤဒၤဝံးတူၢ်လိာ်မုာ်အဝဲသ့ၣ်ဒီးဒုးကဲထီၣ်အဝဲသ့ၣ်လၢသုး ခိၣ်တဖၣ်လၢအသုးမုၢ်အပူၤန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 15:9

ပှၤဂီၢ်မုၢ်အါမးလၢအ့ဖရဲၣ်, မနၤၡ့ၤဒီးစူးမ့းအိၣ်, ဟဲခီဃီၤဆူစီၤအၤစါအအိၣ်တကပၤဒီးအိၣ်ဝဲဆိးဝဲလၢအဘီအမုၢ်အပူၤ, မ့ၢ်လၢအဝဲသ့ၣ်ထံၣ်တ့ၢ်ဝဲလၢယွၤအိၣ်ဒီးအီၤအဃိန့ၣ်လီၤ. စီၤအၤစါကိးဖှိၣ်အဝဲသ့ၣ်ခဲလၢာ်ဃုာ်ဒီးပှၤဂီၢ်မုၢ်လၢယူ ဒၤဒီးဘံၣ်ယၤမံၣ်တဖၣ်န့ၣ်လီၤ.

လံာ်နီၢ်အ့ၤစတၢ် 8:17

ဖဲဒၣ်စီၤပၤအတၢ်ဘိးဘၣ်သ့ၣ်ညါဘၣ်တၢ်ဖးအီၤလၢကီၢ်ဆၣ် တဘ့ၣ်လၢ်လၢ်အပူၤဒီးဝ့ၢ်တဝ့ၢ်လၢ်လၢ်အပူၤန့ၣ်ပှၤယူဒၤဖိ မၤတၢ်သူၣ်ခုသးခုအနံၤသဘျ့လၢအအိၣ်ဒီးတၢ်အီၣ် တၢ်အီဒီးတၢ်သူၣ်ဖှံသးညီန့ၣ်လီၤ. အန့ၣ်ဒီးပှၤဂီၢ်မုၢ်အဂၤအါဂၤကဲထီၣ်ပှၤယူဒၤဖိလီၤ. အဂ့ၢ်ဒ်အံၤ, ခဲအံၤအဝဲသ့ၣ်ပျံၤပှၤယူဒၤဖိန့ၣ်လီၤ.

လံာ်စီၤယိၤဘး 19:3

သုကတိၤတရီတပါယၤတဘျီဝံၤတဘျီဒီးမ့ၢ်သုတမဲာ်ဆှးဘၣ် လၢသုမၤကမၣ်ယၤအဃိဘၣ်န့ၣ်ဧါ.

လံာ်ပှၤစံၣ်တဲၤတဲလီၤတၢ် 11:2

ဟ့ၣ်နီၤဖးတၢ်လၢကျဲနွံဘိမ့တမ့ၢ်ဃိးဘိအပူၤဒၣ်လဲာ်တ က့ၢ်. အဂ့ၢ်ဒ်အံၤ, တၢ်အၢမနုၤအကမၤအသးလၢဟီၣ်ခိၣ်ချၢလဲၣ်န့ၣ်နတသ့ၣ်ညါဘၣ်.

လံာ်ယၡါယၤ 3:6

တၢ်ဆၢကတီၢ်ကဟဲဝဲဖဲပှၤတဒူၣ်တကရူၢ်အဒူၣ်ဖိထၢဖိတဖၣ် ကဃုထၢပှၤလၢအဝဲသ့ၣ်အကျါတဂၤဒီးစံးဘၣ်အီၤ, “နဲဒၣ်အစှၤကတၢၢ်နအိၣ်ဒီးတၢ်လၢနကကူသိးအီၤ, အဃိသတးဒီးကဲထီၣ်ပခိၣ်ပနၢ်လၢတၢ်ကီတၢ်ခဲအဆၢကတီၢ် အပူၤအံၤတက့ၢ်,” န့ၣ်လီၤ.

လံာ်ယၡါယၤ 4:1

ဖဲတၢ်ဆၢကတီၢ်အဝဲန့ၣ်ဟဲတုၤဝဲဒီး, ပိာ်မုၣ်နွံဂၤကစှီၤဃာ် ပိာ်ခွါတဂၤဒီးစံး, “ပလုၢ်အီၣ်လုၢ်အီ ပသးဒီးမၤကူမၤကၤဒၣ်ပဝဲသ့လီၤ. ဘၣ်ဆၣ်ပျဲပစံးလၢနမ့ၢ် ပဝၤဒ်သိးပသုတတူၢ်ဘၣ်တၢ်မဲာ်ဆှးလၢပဝၤတအိၣ်ဘၣ် အဃိတဂ့ၤန့ၣ်တက့ၢ်.”

လံာ်ယၡါယၤ 45:14

ယွၤစံးဘၣ်ကီၢ်အံၣ်စရ့လး, “ကီၢ်အဲၤကူပတူးဒီးကီၢ်ကူၤၡးအတၢ်ထူးတၢ်တီၤတဖၣ်ကမ့ၢ်နတၢ်, ဒီးပှၤစဘၤဖိလၢအနီၢ်ဒိၣ်ထီတဖၣ်ကမ့ၢ်နကုၢ်နပှၤတဖၣ်လီၤ. အဝဲသ့ၣ်ကပိာ်နခံလၢတၢ်စၢဃာ်အထးသွဲတဖၣ်အပူၤလီၤ. အဝဲသ့ၣ်ကတီၤလီၤကဒွံကျိာ်လၢနမဲာ်ညါဒီး အၢၣ်လီၤဝဲလၢ, ကစၢ်ယွၤအိၣ်ဒီးနၤ, အဝဲမ့ၢ်ကစၢ်ယွၤထဲတဂၤဧိၤန့ၣ်လီၤ.

လံာ်ယၡါယၤ 45:24

အဝဲသ့ၣ်ကစံးဝဲလၢ, တၢ်မၤနၢၤဒီးတၢ်ဂံၢ်တၢ်ဘါန့ၣ်တၢ်ထံၣ် န့ၢ်အီၤခီဖျိဒၣ်ထဲလၢယၤတဂၤဧိၤန့ၣ်လီၤ. မ့မ့ၢ်ပှၤလၢအသးဟ့ယၤခဲလၢာ် ကတူၢ်ဘၣ်တၢ်မဲာ်ဆှးလီၤ.

လံာ်ယၡါယၤ 55:5

ခဲအံၤ, သုကကိးဖှိၣ်ထံဂုၤကီၢ်ဂၤအပှၤကလုာ်တဖၣ်လီၤ. တဘျီန့ၣ်, အဝဲသ့ၣ်တသ့ၣ်ညါသုဘၣ်. ဘၣ်ဆၣ်ဒီးခဲအံၤ, အဝဲသ့ၣ်ကဟဲဃ့ၢ် ပာ်ဖှိၣ်အသးဒီးသုလီၤ. ယၤ, ယွၤ, သုကစၢ်ယွၤ, အံၣ်စရ့လးအကစၢ်ယွၤစီဆှံ ကမၤကဲထီၣ်လိၣ်ထီၣ်တၢ်သ့ၣ်တဖၣ်အံၤခဲလၢာ်လီၤ. ယကဟ့ၣ်လီၤသုလၢတၢ်ဒိးဘၣ်တၢ်ယူးယီၣ် ဒီးတၢ်လၤကပီၤလီၤ.”

လံာ်ယၡါယၤ 60:14

ပှၤလၢအမၤအၢမၤနးနၤအဖိခွါတဖၣ်ကဟဲဝဲ ဒီးသကူးဖုၣ်လီၤအသးဒ်သိးကဒုးနဲၣ်အဝဲသ့ၣ်အ တၢ်ယူးယီၣ်ပာ်ကဲနၤအဂီၢ်လီၤ. ကယဲၢ်ပှၤလၢတဘျီ, အသးဘၣ်အၢတ့ၢ်နၤ ကဘူၣ်ထီၣ်ဘါထီၣ်တၢ်လၢနခီၣ်ထံးလီၤ. အဝဲသ့ၣ်ကကိးနၤလၢ, ယွၤအမူအဝ့ၢ်, ဝ့ၢ်စံယိၣ်, ပှၤအံၣ်စရ့လးဖိအကစၢ်ယွၤစီဆှံအခူအဝ့ၢ်န့ၣ်လီၤ.

လံာ်ယၡါယၤ 60:3

ပှၤကလုာ်တဖၣ်ကဘၣ်တၢ်ထုးန့ၣ်အီၤဆူနတၢ်ကပီၤအပူၤ, ဒီးစီၤပၤတဖၣ်ဆူနမုၢ်နံၤအသီအမုၢ်ဆ့ၣ်ဝါထီၣ်န့ၣ်လီၤ.

လံာ်ယၡါယၤ 66:18

ယသ့ၣ်ညါအဝဲသ့ၣ်အတၢ်ဆိကမိၣ်တဖၣ်ဒီးအတၢ်မၤတဖၣ် န့ၣ်လီၤ. ယဟဲယဲဒ်သိးယကပာ်ဖှိၣ်ကယဲၢ်ပှၤကလုာ်တဖၣ် အပှၤဂီၢ်မုၢ်န့ၣ်လီၤ. ဖဲအဝဲသ့ၣ်ဟဲပာ်ဖှိၣ်အသးခဲလၢာ်န့ၣ်, အဝဲသ့ၣ်ကထံၣ်ယတၢ်စိကမီၤမၤတၢ်မနုၤသ့,

လံာ်မံကၤ 5:5

ဒီးအဝဲကဟဲစိာ်တၢ်ဃူတၢ်ဖိးလီၤ. ဖဲပှၤကီၢ်အၤၡူၢ်ဖိတဖၣ်ဘၢၣ်ဖျိပတိာ်ဧိၤ တာ်ဧိၤတဖၣ်ဒီးဟဲနုာ်လီၤဒုးပထံပကီၢ်န့ၣ်, ပကမၢလီၤပခိၣ်ပနၢ်လၢအဂံၢ်အဘါဆူၣ်ကတၢၢ်တဖၣ်လၢ အကဒုးအဝဲသ့ၣ်န့ၣ်လီၤ.

လံာ်စဖါနယၤ 3:19

ကွၢ်ကွၢ်, အကတီၢ်ဖဲန့ၣ် ယကစံၣ်ညီၣ်ပှၤမၤအၢမၤနးနၤတဖၣ်, ယကအုၣ်က့ၤခီၣ်က့ၤကယဲၢ်ပှၤခီၣ်ဟးဂီၤ, ဒီးဟဲက့ၤစိာ်ပှၤဘၣ်တၢ်စိာ်မၢကဲကုၢ်အီၤ တဖၣ်ဆူဟံၣ်န့ၣ်လီၤ. ယကလဲလိာ်ကွံာ်အတၢ်မဲာ်ဆှးဆူတၢ်လၤတၢ်ကပီၤ, ဒီးကယဲၢ်ပှၤဟီၣ်ခိၣ်ဖိခဲလၢာ်ကစံးထီၣ်ပတြၢၤ အဝဲသ့ၣ်လီၤ.

လံာ်တၢ်ဂံၢ် 14:22

ပှၤဂီၢ်မုၢ်အံၤတလဲၤနုာ်ဘၣ်ဆူကီၢ်တဘ့ၣ်န့ၣ်အပူၤနီ တဂၤဘၣ်. အဝဲသ့ၣ်ထံၣ်ဘၣ်တ့ၢ်ယတၢ်အိၣ်ယဲအတၢ်ကပြုၢ်ကပြီၤဒီး တၢ်လီၤလးတဖၣ်လၢယမၤတ့ၢ်ယဲလၢကီၢ်အဲၤကူပတူးအပူၤဒီးလၢ ပှၢ်မုၢ်ကနၢအပူၤ, ဘၣ်ဆၣ်ဒီးအဝဲသ့ၣ်မၤကွၢ်တ့ၢ်ယတၢ်သးစူၤ တဘျီဝံၤတဘျီဒီးဂ့ၢ်လိာ်ဝဲလၢကစူၢ်ယၤအဂီၢ်န့ၣ်လီၤ.

လံာ်လူၤကၣ် 8:44

အဝဲဒၣ်ဟဲထီၣ်လၢကမျၢၢ်အကျါလၢယ့ၣ်ၡူးအလီၢ်ခံဒီးထိးယ့ၣ်ၡူး အဆ့ကၤအနွံဒီးအတၢ်သွံၣ်လီၤန့ၣ်ဆိကတီၢ်ကွံာ်ဝဲတဘျီဃီလီၤ.

မၤတၢ် 19:12

တၢ်စှၢၤဖိဒီးတၢ်ယီၢ်တကိးလၢအဝဲဒၣ်သူတ့ၢ်ဝဲတဖၣ်ဒၣ်လဲာ်, ဘၣ်တၢ်လဲၤစိာ်အီၤဆူပှၤဆါအအိၣ်, ဒီးဖဲန့ၣ်တၢ်ဆူးတၢ်ဆါတဖၣ်ဘျါက့ၤဝဲဒီးတၢ်ဝံတၢ်နါတဖၣ် ဟးထီၣ်ကွံာ်လၢအဝဲသ့ၣ်အပူၤလီၤ.

1 ကရံၣ်သူး 14:25

အဝဲဒၣ်အတၢ်ဆိကမိၣ်ခူသူၣ်တဖၣ်ကဘၣ်တၢ်ဒုးအိၣ်ဖျါထီၣ်အီၤလၢ ခိ, ဒီးအဝဲဒၣ်ကသကူးလီၤအသးဒီးဘူၣ်ထီၣ်ဘါထီၣ်ယွၤဒီးအၢၣ်လီၤ အီလီၤဝဲ, “ကစၢ်ယွၤအိၣ်မးဝဲဖဲအံၤလၢသုသိးသုကျါနီၢ်နီၢ်လီၤ.”

လံာ်စီၤယိၤၡူ 8:35

စီၤယိၤၡူဖးထီၣ်စီၤမိၤၡ့အတၢ်မၤလိာ်ကိးထံၣ်ကိးဘီဒဲး လၢပှၤလၢအပာ်ဖှိၣ်သးခဲလၢာ်အမဲာ်ညါ, လၢအပၣ်ဃုာ်ဒီးပိာ်မုၣ်တဖၣ်ဒီးဖိသၣ်တဖၣ်, ဃုာ်ဒီးပှၤတခီဘီမုၢ်ဖိတဖၣ်လၢအအိၣ်လၢအဝဲသ့ၣ်အကျါန့ၣ်လီၤ.