လံာ်စကၤရယၤ 11:17 - Sgaw Karen Common Bible

¹⁷ ပှၤကွၢ်သိလၢအတဂိာ်တသီၣ်အံၤဘၣ်တၢ်စံၣ်ညီၣ်ဃါမနၤလီၤ. အဝဲဒၣ်လဲၤသဒၣ်ကွံာ်အသိတဖုလီၤ. တၢ်ဒုးတၢ်ယၤကမၤဟးဂီၤကွံာ်အတၢ်စိတၢ်ကမီၤလီၤ. အစုဒုၣ်ကသံတခီပၤ, ဒီးအမဲာ်ချံထွဲကဘျီၣ်ကွံာ်ဝဲဒၣ်န့ၣ်လီၤ.”

လံာ်စကၤရယၤ 11:17 Iomraidhean Croise

လံာ်စီၤပၤအခီၣ်ထံးတဘ့ၣ် 13:4

တုၤစီၤပၤယၤရၤဘၣ်နၢ်ဟူတၢ်အံၤန့ၣ်, ယူာ်ဃီၤအစုဆူအီၤဒီး ဟ့ၣ်လီၤအကလုၢ်, “ဖီၣ်ပှၤတဂၤန့ၣ်တက့ၢ်.” တစုဃီၤဖဲန့ၣ်စီၤပၤအစုဘၣ်ကလံၤအဃိအဝဲထုးကဒါက့ၤအီၤ တန့ၢ်လၢၤဘၣ်န့ၣ်လီၤ.

လံာ်ယၡါယၤ 29:10

ယွၤမၤဃၢတ့ၢ်သုမဲာ်ဖံးတုၤသုကလီၤဆူတၢ်မံယိာ်အပူၤလီၤ. ဝံတဖၣ်ကြၢးမ့ၢ်ပှၤဂီၢ်မုၢ်အမဲာ်ချံတဖၣ်, ဘၣ်ဆၣ်ကစၢ်ယွၤ ကးဘၢတ့ၢ်အဝဲသ့ၣ်အမဲာ်ချံလီၤ.

လံာ်ယၡါယၤ 44:10

တၢ်တ့ထီၣ်တၢ်အက့ၢ်အဂီၤလၢတိၢ်ဧိၤထးဧိၤလၢတၢ်ဘူၣ်ထီၣ်ဘါ ထီၣ်အီၤဒ်ကစၢ်တဂၤအသိးန့ၣ်အဘျုးတအိၣ်ဘၣ်.

လံာ်ယၡါယၤ 9:15

ပှၤသးပှၢ်ဒီးပှၤအိၣ်ဒီးအလၤကပီၤတဖၣ်မ့ၢ်အခိၣ်, ဒီးဝံတဖၣ်လၢအတၢ်သိၣ်လိသီလိမ့ၢ်တၢ်လီတၢ်ဝ့ၤတဖၣ်, မ့ၢ်အမဲၢ်လီၤ.

လံာ်ယံးရမံယၤ 22:1

ယွၤတဲဘၣ်ယၤလၢယကလဲၤဆူစီၤဒၤဝံးအစၢၤအသွဲၣ်, ကီၢ်ယူဒၤအစီၤပၤ, အနူၢ်အစီၤန့ၣ်လီၤ.

လံာ်ယံးရမံယၤ 23:1

ပှၤပၢတၢ်ပြးတၢ်တဖၣ်လၢအမၤဟးဂီၤဒီးမၤလီၤပြံလီၤပြါအပှၤ ဂီၢ်မုၢ်န့ၣ်, ယွၤအတၢ်စံၣ်ညီၣ်အီၤကလီၤပျံၤလီၤဖုးဆံးဒိၣ်လဲၣ်.

လံာ်ယံးရမံယၤ 23:32

ဒိကနၣ်တၢ်လၢယၤ, ယွၤအံၤ, စံးဝဲတက့ၢ်. ယထီဒါဝံတဖၣ်လၢအတဲအတၢ်မံမီၢ်တဖၣ်လၢ အပှဲၤဒီးတၢ်လီတၢ်ဝ့ၤတဖၣ်န့ၣ်လီၤ. အဝဲသ့ၣ်တဲတၢ်မံမီၢ်တဖၣ်အံၤဒီးဆှၢဟးဖျိးကွံာ်ယပှၤဂီၢ်မုၢ်ခီဖျိ အတၢ်လီတၢ်ဝ့ၤတဖၣ်ဒီးအတၢ်ပာ်ကဖၢလၢအသးန့ၣ်လီၤ. ယတမၢလီၤအဝဲသ့ၣ်မ့ၢ်ဂ့ၤ, ဒီးဟ့ၣ်လီၤယကလုၢ်လၢအဝဲသ့ၣ် ကလဲၤတၢ်အဂီၢ်မ့ၢ်ဂ့ၤန့ၣ်ဘၣ်. ဒီးအဝဲသ့ၣ်တကဲထီၣ်တၢ်မၤစၢၤ လၢယပှၤဂီၢ်မုၢ်အဂီၢ်နီတမံၤဘၣ်. ယၤ, ယွၤအံၤ, ကတိၤလံတၢ်လံ.”

လံာ်ယဃ့းစက့လး 13:3

အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “ဝံအမၢးတဖၣ်အံၤဘၣ်တၢ်စံၣ်ညီၣ်ဃါမနၤလီၤ. အဝဲသ့ၣ်ဟ့ၣ်ထီၣ်တၢ်သူၣ်ဆူၣ်သးဂဲၤဒၣ်ဝဲတဖၣ်ဒီးဒုးအိၣ်ထီၣ် တၢ်ထံၣ်လၢညါခီဒၣ်ဝဲတဖၣ်န့ၣ်လီၤ.

လံာ်စကၤရယၤ 10:2

ပှၤဂီၢ်မုၢ်ဃ့တၢ်ဟ့ၣ်ကူၣ်လၢတၢ်ဂီၤတၢ်ဖီၣ်တဖၣ်ဒီးပှၤဖးတၢ် ဟဲဝံဟဲစိာ်တဖၣ်အအိၣ်ဘၣ်ဆၣ်ဒီးတၢ် စံးဆၢတဖၣ်လၢအမၤန့ၢ်ဝဲန့ၣ်မ့ၢ်ဒၣ်တၢ်ကဘျံးကဘျၣ် ဒီးတၢ်ကလီကလီလီၤ. ပှၤတနီၤဖးတၢ်မံမီၢ်တဖၣ်အခီပညီ, ဘၣ်ဆၣ်မ့ၢ်ဒၣ်တၢ်ဆှၢကမၣ်သုလီၤ. တၢ်မၤမုာ်ထီၣ်လၢအဝဲသ့ၣ်ဟ့ၣ်သုန့ၣ်မ့ၢ်ဒၣ်တၢ်ကလီကလီလီၤ. လၢတၢ်န့ၣ်အဃိပှၤဂီၢ်မုၢ်ဟးဝ့ၤဝီၤဒ်သိလၢအဟးဖျိးကျဲအသိးန့ၣ်လီၤ. အဝဲသ့ၣ်အိၣ်လၢတၢ်ကိၢ်တၢ်ဂီၤအပူၤမ့ၢ်လၢအခိၣ်အနၢ် တအိၣ်ဘၣ်နီတဂၤအဃိန့ၣ်လီၤ.

လံာ်စကၤရယၤ 11:15

ဒီးယွၤစံးဘၣ်ယၤ, “အအံၤတစုမၤပှၤကွၢ်သိလၢအတဂီာ်တသီၣ်တဂၤအတၢ်မၤတက့ၢ်.

လံာ်မးသဲ 23:13

ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ, ဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုကးတံာ်ဃာ်မူခိၣ်အဘီအမုၢ်အတြဲၤဒ်သိးပှၤဂၤ အသုတလဲၤနုာ်ဘၣ်တဂ့ၤအဂီၢ်လီၤ. သုနီၢ်ကစၢ်ဒၣ်သုဝဲသုတလဲၤနုာ်ဘၣ်ဒီး, သုတပျဲနုာ်စ့ၢ်ကီးပှၤလၢအကျဲးစၢးလဲၤနုာ်ဝဲတဖၣ်ဘၣ်.

လံာ်မးသဲ 23:16

သုဘၣ်အဖှီၣ်လီၤ. ပှၤဆှၢတၢ်လၢအမဲာ်ဘျီၣ်သ့ၣ်ဧၢ, သုစံးလၢပှၤမ့ၢ်ဆိၣ်လီၤပှၤအသးလၢတၢ်လုၢ်ဟံၣ်အမံၤန့ၣ်, အသယၢၢ်တအိၣ်ဘၣ်. မ့မ့ၢ်သုစံးလၢပှၤလၢအဆိၣ်လီၤအသးလၢ တၢ်လုၢ်ဟံၣ်အထူအလွဲအမံၤန့ၣ်, အတၢ်ဆိၣ်လီၤအသးအံၤအိၣ်ဒီး အသယၢၢ်လၢအဟံးဃာ်အီၤလီၤ.

လံာ်ယိၤဟၣ် 12:40

“ကစၢ်ယွၤမၤဘျီၣ်အဝဲသ့ၣ်အမဲာ်ချံတဖၣ် ဒီးမၤကိၤထီၣ်အဝဲသ့ၣ်အသး, ဒ်သိးအမဲာ်ချံတဖၣ်သုတထံၣ်တၢ်တဂ့ၤ ဒီးအသးအသုတနၢ်ပၢၢ်တၢ်တဂ့ၤ, ဒီးအဝဲသ့ၣ်အသုတဃၣ်အသးဆူအအိၣ် လၢအကမၤဘျါက့ၤအဝဲသ့ၣ်အဂီၢ်တဂ့ၤန့ၣ်လီၤ” (ၡါ ၆:၁၀).

လံာ်ယိၤဟၣ် 9:39

ယ့ၣ်ၡူးစံးဝဲဒၣ်, “ယဟဲဆူဟီၣ်ခိၣ်အံၤလၢယကစံၣ်ညီၣ်တၢ် အဂီၢ်, ဒ်သိးပှၤလၢအတထံၣ်တၢ်တဖၣ်ကထံၣ်ထီၣ်က့ၤတၢ်, ဒီးပှၤလၢအထံၣ်တၢ်တဖၣ်အမဲာ်ကဘျီၣ်အဂီၢ်န့ၣ်လီၤ.”

ရိမ့ၤ 11:7

မ့မ့ၢ်ဒ်န့ၣ်ဒီးပကစံးဒ်လဲၣ်. ပှၤအံၣ်စရ့လးဖိတဖၣ်တထံၣ်န့ၢ်တၢ်လၢအဝဲသ့ၣ်ဃုဝဲဘၣ်. ပှၤလၢအထံၣ်န့ၢ်တၢ်တခီမ့ၢ်ပှၤစှၤဂၤလၢကစၢ်ယွၤဃုထၢ ဝဲမ့မ့ၢ်ပှၤအဂၤတဖၣ်အနၢ်တအၢထီၣ်ဒီးတနၢ်ဟူကစၢ်ယွၤ အတၢ်ကိးဘၣ်.

1 ကရံၣ်သူး 8:4

လၢတၢ်န့ၣ်အဃိ, ဘၣ်ဃးဒီးတၢ်အီၣ်လၢအဘၣ်တၢ်လုၢ်ထီၣ် ပာ်ထီၣ်အီၤဆူတၢ်ဂီၤတၢ်ဖီၣ်အအိၣ်န့ၣ်, ပသ့ၣ်ညါလၢတၢ်ဂီၤတဒုပာ်ဖျါထီၣ်တၢ်တမံၤလၢအတအိၣ်နီၢ်နီၢ်ဘၣ် န့ၣ်လီၤ. ပသ့ၣ်ညါပဝဲလၢကစၢ်ယွၤအိၣ်ဝဲထဲတဂၤဧိၤလီၤ.

လံာ်စီၤၡမူၤအ့လးအခီၣ်ထံးတဘ့ၣ် 2:31

ဒိကနၣ်တက့ၢ်. တၢ်ဆၢကတီၢ်လၢယကမၤသံကွံာ်ပှၤသးစၢ်တဖၣ်လၢ နဟံၣ်ဖိဃီဖိ, နဒူၣ်ဖိထၢဖိအပူၤန့ၣ်ဟဲတုၤလံ. မၤသးဒ်န့ၣ်ဒီး, လၢနဒူၣ်ဖိထၢဖိအကျါန့ၣ်ပှၤကအိၣ်မူတုၤအသး ပှၢ်န့ၣ်တအိၣ်နီတဂၤဘၣ်.