လံာ်စကၤရယၤ 10:6 - Sgaw Karen Common Bible

⁶ “ယကဒုးဂံၢ်ဆူၣ်ဘါဆူၣ်ကီၢ်ယူဒၤအပှၤဂီၢ်မုၢ်, ယကမၤပူၤမၤဖျဲးကီၢ်အံၣ်စရ့လးအပှၤဂီၢ်မုၢ်လီၤ. ယကအိၣ်ဒီးတၢ်သးကညီၤဘၣ်အဝဲသ့ၣ်, ဒီးဟဲက့ၤစိာ်ကဒါက့ၤအဝဲသ့ၣ်ခဲလၢာ်ဆူဟံၣ်လီၤ. အဝဲသ့ၣ်ကမၤအသးဒ်ပှၤလၢယတညိကွံာ်တ့ၢ်ဘၣ်အီၤနီတဘျီအသိး န့ၣ်လီၤ. ယမ့ၢ်ယွၤ, အဝဲသ့ၣ်အကစၢ်ယွၤ, ယကစံးဆၢအဝဲသ့ၣ်အတၢ်ထုကဖၣ်တဖၣ် လီၤ.

လံာ်စကၤရယၤ 10:6 Iomraidhean Croise

စံးထီၣ်ပတြၢၤ 89:21

ဒ်သိးယစုကအိၣ်ဂၢၢ်ဆိးကျၢၤဒီးအီၤထီဘိ, ဒီးယစုဒုၣ်ကဒုးဆူၣ်ထီၣ်အီၤစ့ၢ်ကီးန့ၣ်လီၤ.

လံာ်ယၡါယၤ 11:12

ယွၤကယူာ်ထီၣ်တၢ်ပနီၣ်, နီၣ်တယၢ်လၢကဒုးနဲၣ်ပှၤကလုာ်တဖၣ် လၢအဝဲပာ်ဖှိၣ်က့ၤကဒီးကီၢ်အံၣ်စရ့လးဒီးကီၢ်ယူဒၤအပှၤဂီၢ်မုၢ် လၢအလီၤပြံလီၤပြါတဖၣ်ဒီးဟဲက့ၤစိာ်ကဒါက့ၤအဝဲသ့ၣ် လၢဟီၣ်ခိၣ်အသနၢၣ်လွံၢ်နၢၣ်န့ၣ်လီၤ.

လံာ်ယၡါယၤ 14:1

ယွၤကသးကညီၤကဒီးအပှၤဂီၢ်မုၢ်အံၣ်စရ့လးတဘျီဒီးဃု ထၢအီၤဒ်အတၢ်ဒၣ်ဝဲအသိးလီၤ. ကပျဲကဒီးအဝဲသ့ၣ်အိၣ်က့ၤလၢအ ထံအကီၢ်ဒၣ်ဝဲတဘျီ, ဒီးပှၤတခီဘီမုၢ်ဖိတ ဖၣ်ကဟဲအိၣ်ဆိးသကိးဒီးအဝဲသ့ၣ်ဖဲန့ၣ်, န့ၣ်လီၤ.

လံာ်ယၡါယၤ 41:10

ပျံၤတၢ်တဂ့ၤ. ယအိၣ်ဒီးသုလီၤ. ယမ့ၢ်သုကစၢ်ယွၤလီၤ. ပျဲတၢ်မၤပျံၤမၤဖုးသုနီတမံၤတဂ့ၤ. ယကဒုးကဲထီၣ်သုပှၤအဂံၢ်ဆူၣ်ဘါဆူၣ်ဒီးမၤစၢၤသုလီၤ. ယကဒီဒၣ်အိၣ်ပှိၤသုဒီးအုၣ်က့ၤခီၣ်က့ၤသုလီၤ.

လံာ်ယၡါယၤ 54:4

ပျံၤတၢ်တဂ့ၤ. နတဘၣ်တၢ်မၤမဲာ်ဆှးကဒီးနၤလၢၤဘၣ်. နလၤကပီၤတဘၣ်တၢ်မၤဆံးလီၤစှၤလီၤအီၤလၢၤဘၣ်. နတၢ်သးတတီဒ်မါသးစၢ်တဂၤအသိး ဒီးနတၢ်အိၣ်သယုၢ်သညိဒ်မုၣ်က မဲတဂၤအသိးန့ၣ်နကသးပ့ၤနီၣ်ကွံာ်အီၤလီၤ.

လံာ်ယၡါယၤ 54:8

ယဃၣ်ကွံာ်ယသးလၢတၢ်သးဒိၣ်အပူၤတစိၢ်ဖိနာ်က့, ယကဒုးနဲၣ်နၤယတၢ်အဲၣ်လီၤထူလီၤယိာ်န့ၣ်လီၤ.” ယွၤလၢအအုၣ်က့ၤခီၣ်က့ၤသုစံးဝဲဒ်န့ၣ်လီၤ.

လံာ်ယံးရမံယၤ 23:6

ဖဲအဝဲမ့ၢ်စီၤပၤန့ၣ်, ကီၢ်ယူဒၤအပှၤဂီၢ်မုၢ်ကပူၤဖျဲးဒီးတၢ်ဘၣ်ယိၣ်, ဒီးကီၢ်အံၣ်စရ့လးအပှၤဂီၢ်မုၢ်ကအိၣ်မူဘၣ်လၢတၢ်မုာ်တၢ်ခုၣ်အပူၤလီၤ. အဝဲကဘၣ်တၢ်ကိးအီၤလၢ, ယွၤ, ပတၢ်အုၣ်က့ၤခီၣ်က့ၤ’ လီၤ.”

လံာ်ယံးရမံယၤ 3:18

ကီၢ်အံၣ်စရ့လးကပာ်ဖှိၣ်ဃုာ်အသးဒီးကီၢ်ယူဒၤဒီးအဝဲသ့ၣ်ကဟဲဝဲ တပူၤဃီလၢတၢ်စိာ်မၢကဲကုၢ်အလီၢ်လၢကလံၤစိးတခီဒီးအဝဲသ့ၣ် ကဟဲက့ၤကဒါက့ၤဆူထံကီၢ်လၢယဟ့ၣ်န့ၢ်သါတ့ၢ်အမိၢ်ပၢ်ဖံဖု လၢပျၢၤတဖၣ်ဒ်အမ့ၢ်အတၢ်န့ၢ်သါအဂၢၢ်အကျၢၤအသိးန့ၣ်လီၤ.”

လံာ်ယံးရမံယၤ 30:18

ယွၤစံးဝဲဒၣ်, “ယကပာ်ကဒါက့ၤ ယပှၤဂီၢ်မုၢ်လၢ အကီၢ်ဒၣ်ဝဲ, ဒီးအိၣ်ဒီး တၢ်သးကညီၤလၢ ဒူၣ်ဖိထၢဖိကိးဒူၣ်ဒဲးအဖီခိၣ်န့ၣ်လီၤ. ဝ့ၢ်ယရူၤၡလ့ၣ် ကဘၣ်တၢ်ဘှီထီၣ်က့ၤအီၤ, ဒီးအနူၢ်အစီၤကဘၣ် တၢ်ပာ်ထီၣ်ကဒါက့ၤအီၤန့ၣ်လီၤ.

လံာ်ယံးရမံယၤ 30:20

ယကဟ့ၣ်ကဒါက့ၤ ပှၤကလုာ်လၢ အတၢ်စိတၢ် ကမီၤဒ် လၢပျၢၤအသိး, ဒီးဒုးအိၣ်ဂၢၢ်ဆိးကျၢၤက့ၤကဒီးအီၤန့ၣ်လီၤ. ကယဲၢ်ပှၤခဲလၢာ်လၢ အမၤအၢမၤနးအဝဲသ့ၣ် န့ၣ်ယကစံၣ်ညီၣ်အီၤလီၤ.

လံာ်ယံးရမံယၤ 31:1

ယွၤစံးဝဲဒၣ်, “တၢ်ဆၢကတီၢ်ဟဲဝဲလၢ ယကကဲထီၣ် ကီၢ်အံၣ်စရ့လး အဒူၣ်တဖၣ်ခဲလၢာ် အကစၢ်ယွၤဒီး အဝဲသ့ၣ်ကကဲထီၣ် ယပှၤဂီၢ်မုၢ် န့ၣ်လံ.

လံာ်ယံးရမံယၤ 31:20

ကီၢ်အံၣ်စရ့လးဧၢ, နမ့ၢ်ယဖိခွါသးဘိ, ဖိလၢ ယအဲၣ်ဘၣ်အီၤအဂ့ၤကတၢၢ်လီၤ. တဘျီလၢ်လၢ်ဖဲ ယယၢၤထီၣ်ဘၣ်နမံၤန့ၣ်, ယဆိကမိၣ်ထီၣ်နၤလၢ တၢ်အဲၣ်အပူၤလီၤ. ယသးစဲဘူးဒီးနၤလီၤ. ယကအိၣ်ဒီး တၢ်သူၣ်ကညီၤသးကညီၤလီၤ.

လံာ်ယံးရမံယၤ 31:31

ယွၤစံးဝဲဒၣ်, “တၢ်ဆၢကတီၢ်ဟဲလံဝဲလၢ ယကမၤတၢ်အၢၣ်လီၤ အီလီၤအသီဒီး ကီၢ်အံၣ်စရ့လးအပှၤဂီၢ်မုၢ်, ဒီးကီၢ်ယူဒၤအပှၤဂီၢ်မုၢ်န့ၣ်လီၤ.

လံာ်ယဃ့းစက့လး 36:11

ယကမၤအါထီၣ်ပှၤဂီၢ်မုၢ်ဒီးဂီၤဘုၣ်ဂီၤဖံးအနီၣ်ဂံၢ်န့ၣ်လီၤ. သုနီၣ်ဂံၢ်ကအါထီၣ်န့ၢ်ဒံးအအိၣ်တ့ၢ်ဝဲလၢညါတက့ၢ်ဒီးသုကအိၣ် ဒီးဖိတဖၣ်အါအါဂီၢ်ဂီၢ်န့ၣ်လီၤ. ယကဒုးအိၣ်ဆိးသုဖဲန့ၣ်ဒ်သုအိၣ်ညီနုၢ်တ့ၢ်လၢညါအသိး, ဒီးယကမၤဘီၣ်ထီၣ်ညီထီၣ်သုအါန့ၢ်ဒံးလၢညါတက့ၢ်န့ၣ်လီၤ. အန့ၣ်တစု, သုကသ့ၣ်ညါလၢယမ့ၢ်ယွၤန့ၣ်လီၤ.

လံာ်ယဃ့းစက့လး 36:37

ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကပျဲပှၤအံၣ်စရ့လးဖိ တဖၣ်ဃ့ကဒီးတၢ်မၤစၢၤလၢယၤ, ဒီးယကဒုးအါထီၣ်အဝဲသ့ၣ် အနီၣ်ဂံၢ်ဒ်သိတဖုအသိးန့ၣ်လီၤ.

လံာ်ယဃ့းစက့လး 39:25

ယွၤ, ပၢဘၣ်တၢ်ခဲလၢာ်ကစၢ်စံးဝဲဒၣ်, “မ့မ့ၢ်ခဲကနံၣ်အံၤ, ယကသူၣ်ကညီၤသးကညီၤစီၤယၤကိာ်အစၢၤအသွဲၣ်တဖၣ်, ကီၢ်အံၣ်စရ့လးအပှၤဂီၢ်မုၢ်, ဒီးမၤဘီၣ်ထီၣ်ညီထီၣ်ကဒီးအဝဲ သ့ၣ်န့ၣ်လီၤ. ယကဒီဒၣ်အိၣ်ပှိၤယမံၤစီဆှံန့ၣ်လီၤ.

လံာ်ဟိၤၡ့ 1:11

ကီၢ်ယူဒၤအပှၤဂီၢ်မုၢ်ဒီးကီၢ်အံၣ်စရ့လးအပှၤဂီၢ်မုၢ်သ့ၣ်တဖၣ် ကပာ်ဖှိၣ်က့ၤကဒီးအသးန့ၣ်လီၤ. အဝဲသ့ၣ်ကဃုထၢပှၤအခိၣ်တ ဂၤလၢအဂီၢ်ဒၣ်ဝဲဒီးအဝဲသ့ၣ်ကဒိၣ်ထီၣ်အါထီၣ်ကဒီးအသီတ ဘျီဒီးကဘီၣ်ထီၣ်ညီထီၣ်လၢအထံအကီၢ်အပူၤန့ၣ်လီၤ. မ့ၢ်လီၤ, ယံးစရ့လးအမုၢ်တနံၤကမ့ၢ်မုၢ်နံၤအဒိၣ်တနံၤန့ၣ်လီၤ.

လံာ်ဟိၤၡ့ 1:7

ဘၣ်ဆၣ်ယကဒုးနဲၣ်တၢ်အဲၣ်ဆူကီၢ်ယူဒၤအပှၤဂီၢ်မုၢ်န့ၣ်လီၤ. ယၤ, ယွၤအဝဲသ့ၣ်အကစၢ်ယွၤ, ကအုၣ်က့ၤခီၣ်က့ၤအဝဲသ့ၣ်လီၤ. ဘၣ်ဆၣ်ယတမၤတၢ်အံၤလၢတၢ်ဒုးတၢ်ယၤဒီးလၢဘီမ့ၢ်ဂ့ၤ, လၢချံၣ်ဒီးပျၢ်တဖၣ်မ့တမ့ၢ်, လၢကသ့ၣ်တဖၣ်မ့ၢ်ဂ့ၤ, ပှၤဒိးကသ့ၣ်တဖၣ်မ့ၢ်ဂ့ၤန့ၣ်ဘၣ်.

လံာ်ဟိၤၡ့ 14:9

မ်ပှၤလၢအကူၣ်သ့ကိးဂၤဒဲးနၢ်ပၢၢ်တၢ်လၢအကွဲးအသးဖဲအံၤ ဒီးမ်အတိၢ်န့ၢ်ဝဲလၢအသးပူၤန့ၣ်တက့ၢ်. ယွၤအကျဲန့ၣ်မ့ၢ်အဘၣ်ဒီးပှၤဂီၢ်မုၢ်လၢအတီဝဲလိၤဝဲကမူလၢ တၢ်ပိာ်ထွဲအီၤအဃိ, မ့မ့ၢ်ပှၤတၢ်ဒဲးဘးဖိတဖၣ်အခီၣ် ကဘၣ်တိၢ်ဒီးကလီၤဃံၤဝဲမ့ၢ်လၢအဝဲသ့ၣ်လဲၤကပာ်အီၤအဃိန့ၣ် လီၤ.

လံာ်ဟိၤၡ့ 2:23

ယကဒုးအိၣ်ဂၢၢ်ဆိးကျၢၤယပှၤဂီၢ်မုၢ်လၢထံကီၢ်အပူၤဒီးဒုး ဘီၣ်ထီၣ်ညီထီၣ်အီၤန့ၣ်လီၤ. ယကဒုးနဲၣ်ယတၢ်အဲၣ်ဆူပှၤတဖၣ်လၢအဘၣ်တၢ်ကိးအီၤလၢ “တၢ်တအဲၣ်အီၤ” အအိၣ်ဒီးဆူပှၤတဖၣ်လၢအဘၣ်တၢ်ကိးအီၤလၢ “တမ့ၢ်ယွၤအပှၤဂီၢ်မုၢ်ဘၣ်” အအိၣ်န့ၣ်လီၤ. ယကစံး, “သုမ့ၢ်ယပှၤဂီၢ်မုၢ်” ဒီးအဝဲသ့ၣ်ကစံးဆၢ, “နမ့ၢ်ပကစၢ်ယွၤ” န့ၣ်လီၤ.

လံာ်ဧိၤဘါဒယၤ 1:18

စီၤယၤကိာ်အပှၤဟံၣ်ဖိကမၤအသးဒ်မ့ၣ်အူအသိး, စီၤယိၤသးအပှၤဟံၣ်ဖိဒ်မ့ၣ်အူလၣ်အသိး, ဒီးစီၤဧ့ၡီၤအပှၤဟံၣ်ဖိဒ်လီၢ်ခိၣ်ဆၢၣ်အသိးဒီးမ့ၣ်အူကအီၣ် ကွံာ်အီၤတုၤပှၤအမူ တအိၣ်တီၢ်လၢၤဘၣ်လၢစီၤဧ့ၡီၤအပှၤဟံၣ်ဖိအကျါနီတဂၤဘၣ်န့ၣ်လီၤ. အဂ့ၢ်ဒ်အံၤယၤ, ယွၤစံးတ့ၢ်လံတၢ်လံ.

လံာ်မံကၤ 4:13

ယွၤစံးဝဲဒၣ်, “ဝ့ၢ်ယရူၤၡလ့ၣ်အပှၤဂီၢ်မုၢ်ဧၢ, လဲၤဒီးစံၣ်ညီၣ်သုဒုၣ်သု ဒါတဖၣ်တက့ၢ်. ယကဒုးဆူၣ်ထီၣ်သုဒ်ထးတဖၣ်ဂီၤဖံးတဒုလၢ အအိၣ်ဒီးအနၢၤ, အခီၣ်မ့ၣ်မ့ၢ်တိၤဘီတဖၣ်အသိးလီၤ. သုကမၤလီၤကလဲကွံာ်ပှၤအါကလုာ်ဒီးတၢ်ထူးတၢ်တီၤလၢအဝဲသ့ၣ်မၤ န့ၢ်ဝဲခီဖျိတၢ်ဂုာ်ဆူၣ်ပျီဆူၣ်န့ၣ်သုကဘၣ်ဟ့ၣ်ထီၣ်ဆူယၤ, ဟီၣ်ခိၣ်ဒီဘ့ၣ်အကစၢ်လီၤ.”

လံာ်မံကၤ 4:6

ယွၤစံးဝဲဒၣ်, “အကတီၢ်တုၤဝဲလၢယကပာ်ဖှိၣ်က့ၤပှၤဂီၢ်မုၢ်တ ဖၣ်လၢယစံၣ်ညီၣ်တ့ၢ်အီၤဒီးပှၤလၢအတူၢ်ဘၣ်တၢ်လၢတၢ်စိာ်မၢကဲ ကုၢ်အပူၤတဖၣ်လီၤ.

လံာ်မံကၤ 5:3

မၤသးဒ်န့ၣ်ဒီး, ယွၤကဒုးစူးကွံာ်ညိကွံာ်အပှၤဂီၢ်မုၢ်ဆူအဒုၣ်အဒါတဖၣ် အစုပူၤတုၤပိာ်မုၣ်လၢအကဆံးစၢ်တဂၤန့ၣ်န့ၢ်ဘၣ်အဖိခွါလီၤ. တုၤနုၤတစု, အထံဖိကီၢ်ဖိကဒဲကဒဲလၢအဘၣ်တၢ်စိာ်မၢကဲကုၢ်အီၤတဖၣ်န့ၣ်, ကဘၣ်တၢ်ပာ်ဖှိၣ်က့ၤဃုာ်အီၤဒီးအပှၤဂီၢ်မုၢ်ဒၣ်ဝဲလီၤ.

လံာ်မံကၤ 5:8

ဒီးကီၢ်အံၣ်စရ့လးအပှၤဂီၢ်မုၢ်လၢအအိၣ်လီၤတဲာ်ဒံးလၢ ပှၤကလုာ်တဖၣ်အကျါန့ၣ်ကလီၤဂာ်ဒီးခ့ယုၢ်တဒုလၢအဃုကွၢ်တၢ် အိၣ်လၢပှၢ်လၢ်ကျါမ့တမ့ၢ်လၢတၢ်အီၣ်ဆၣ်အလီၢ်န့ၣ်လီၤ. ဟဲနုာ်ဆူသိတဖၣ်အကျါ, စံၣ်ပှီၤအဝဲသ့ၣ်ဒီးအ့ၣ်ဖှီလီၤကလဲ ကွံာ်အီၤဒီးတၢ်မုၢ်လၢ်လၢကပူၤဖျဲးတအိၣ်ဘၣ်.

လံာ်မံကၤ 7:16

ပှၤကလုာ်တဖၣ်ကထံၣ်တၢ်အံၤဒီးလၢအတၢ်ဂံၢ်ဆူၣ်ဘါဆူၣ်အပူၤဒၣ် လဲာ်အသးကဘၣ်တံာ်တာ်လီၤ. လၢတၢ်သးဟးဂီၤအပူၤန့ၣ်ကကးတံာ်ဃးအထးခိၣ်တဖၣ်ဒီးမၤဘၢ အနၢ်တဖၣ်လီၤ.

လံာ်စကၤရယၤ 1:16

လၢတၢ်န့ၣ်အဃိ, ယဟဲက့ၤကဒါက့ၤဆူဝ့ၢ်ယရူၤရှလ့ၣ်လၢယကဒုး နဲၣ်တၢ်သးကညီၤဘၣ်ဝ့ၢ်အံၤန့ၣ်လီၤ. ယတၢ်လုၢ်ဟံၣ်ကဘၣ်တၢ်ပာ်ကဒါက့ၤအီၤ, ဖဲအအိၣ်တ့ၢ်ဝဲ အလီၢ်ဒီးဝ့ၢ်ကဘၣ်တၢ်ဘှီထီၣ်ကဒါက့ၤအီၤလီၤ.”

လံာ်စကၤရယၤ 10:12

ယကဒုးဂံၢ်ဆူၣ်ဘါဆူၣ်ထီၣ်ယပှၤဂီၢ်မုၢ်, ဒီးအဝဲသ့ၣ်ကဘါထီၣ်ယၤဒီးစူၢ်ယၤလီၤ,” ယွၤကတိၤလံတၢ်လံ.

လံာ်စကၤရယၤ 13:9

ဒီးယကမၤကွၢ်ပှၤသၢပူတပူလၢအအိၣ်လီၤတဲာ်ဒီးမၤကဆှီ အဝဲသ့ၣ်ဒ်စ့ဘၣ်တၢ်မၤကဆှီအီၤလၢမ့ၣ်အူအသိးန့ၣ်လီၤ. ယကမၤကွၢ်အဝဲသ့ၣ်ဒ်ထူဘၣ်တၢ်မၤကွၢ်အီၤအသိးန့ၣ်လီၤ. အန့ၣ်ဒီးအဝဲသ့ၣ်ကဘါထုကဖၣ်တၢ်ဆူ ယအိၣ်ဒီးယကစံးဆၢအဝဲသ့ၣ်လီၤ. ယကတဲဘၣ်အဝဲသ့ၣ်လၢမ့ၢ်ယပှၤဂီၢ်မုၢ်, ဒီးအဝဲသ့ၣ်ကအၢၣ်လီၤလၢယမ့ၢ်အဝဲသ့ၣ်အကစၢ်ယွၤန့ၣ်လီၤ.”

လံာ်စကၤရယၤ 8:11

မ့မ့ၢ်ခဲကနံၣ်အံၤ, ပှၤကလုာ်အံၤအပှၤအိၣ်လီၤတဲာ်တဖၣ်, ယတမၤအီၤဒ်လၢညါအသိးဘၣ်.

လံာ်စကၤရယၤ 9:16

ဖဲမုၢ်နံၤဝဲန့ၣ်တုၤဃီၤန့ၣ်, ယွၤကအုၣ်က့ၤခီၣ်က့ၤ အပှၤဂီၢ်မုၢ်, ဒ်ပှၤကွၢ်သိတဂၤအုၣ်က့ၤခီၣ်က့ၤအသိတဖုလၢ တၢ်အၢတၢ်သီအပူၤအသိးန့ၣ်လီၤ. အဝဲသ့ၣ်ကကပီၤထီၣ်လၢယွၤအထံအကီၢ်အပူၤ ဒ်ခိၣ်သလုးတဖျၢၣ်အတၢ်မျၢ်ပလဲတဖၣ် အသိးန့ၣ်လီၤ.