ရိမ့ၤ 8:3 - Sgaw Karen Common Bible

³ မ့ၢ်လၢပှၤကညီအန့ဆၢၣ်အဂံၢ်စၢ်ဘါစၢ်အဃိ, တၢ်လၢတၢ်သိၣ်တၢ်သီမၤတသ့ဘၣ်န့ၣ်ကစၢ်ယွၤမၤဝဲလီၤ. အဝဲစံၣ်ညီၣ်ဃၣ်တၢ်ဒဲးဘးလၢပှၤကညီအန့ဆၢၣ်အပူၤ, ခီဖျိအတၢ်ဆှၢလီၤအဖိခွါဒၣ်ဝဲအိၣ်ဒီးန့ဆၢၣ်လၢအမ့ၢ် ပှၤကညီအတၢ်ဒဲးဘးအန့ဆၢၣ်ဒ်သိးအကတြူာ် ကွံာ်တၢ်ဒဲးဘးအဂီၢ်န့ၣ်လီၤ.

ရိမ့ၤ 8:3 Iomraidhean Croise

လံာ်တၢ်ဂံၢ် 21:9

မၤသးဒ်န့ၣ်ဒီး, စီၤမိၤၡ့မၤထီၣ်ဂုၢ်တိၢ်ဘီတဘိဒီးပာ်ထီၣ် အီၤလၢသ့ၣ်တထူၣ်အလိၤလီၤ. ပှၤတဂၤဂ့ၤတဂၤဂ့ၤလၢအဘၣ်တၢ်အ့ၣ်အီၤလၢဂုၢ်သ့ၣ်န့ၣ်ကကွၢ်ထီၣ် ဝဲဂုၢ်တိၢ်ဘီန့ၣ်ဒီးကဘျါက့ၤန့ၣ်လီၤ.

လံာ်တၢ်ဂံၢ် 28:22

လုၢ်ထီၣ်စ့ၢ်ကီးမဲာ်တဲးလဲးအဖါတဒုဒ်တၢ်လုၢ်တၢ်ပျၢ်တၢ်ဒဲးဘး တမံၤအသိး, ဒီးလၢကျဲဒ်အံၤန့ၣ်မၤတၢ်ဘူၣ်တၢ်ဘါအတၢ်မၤကဆှီထီၣ်အလုၢ် အလၢ်လၢပှၤဂီၢ်မုၢ်အဂီၢ်တက့ၢ်.

လံာ်မၢ်ကူး 15:27

အဝဲသ့ၣ်ပျၤထီစ့ၢ်ကီးတမျာ်ခံဂၤတပူၤဃီဒီးယ့ၣ်ၡူး, တဂၤလၢအစုထွဲဒီးတဂၤလၢအစုစ့ၣ်လီၤ.

လံာ်ယိၤဟၣ် 1:14

တၢ်ကလုၢ်န့ၣ်ကဲထီၣ်ပှၤကညီ, ဒီးလၢပှဲၤဝဲဒီးတၢ်ဘျုးတၢ်ဖှိၣ် ဒီးတၢ်မ့ၢ်တၢ်တီဒီးအိၣ်ဝဲဆိးဝဲလၢပကျါန့ၣ်လီၤ. ဒီးပထံၣ်ဘၣ်အလၤကပီၤလၢအဒိးန့ၢ်ဝဲဒ်ပၢ်အဖိခွါတဂၤဃီ အသိးန့ၣ်လီၤ.

လံာ်ယိၤဟၣ် 9:24

ပှၤယူဒၤဖိအခိၣ်အနၢ်တဖၣ်ကိးကဒါက့ၤပှၤလၢအမဲာ်ထံၣ်ထီၣ် က့ၤတၢ်တဂၤန့ၣ်ခံဘျီတဘျီဒီးစံးဘၣ်အီၤ, “အၢၣ်လီၤနသးလၢကစၢ်ယွၤအမဲာ်ညါလၢနကတဲတၢ်မ့ၢ် တၢ်တီန့ၣ်တက့ၢ်. ပသ့ၣ်ညါလၢပှၤလၢအမၤဘျါနၤအံၤ မ့ၢ်ပှၤတၢ်ဒဲးဘးဖိတဂၤန့ၣ်လီၤ.”

မၤတၢ် 13:39

ဒီးလၢပှၤစူၢ်က့ၤနာ်က့ၤအီၤကိးဂၤဒဲးန့ၣ်, ဘၣ်တၢ်ဒုးထူၣ်ဖျဲးထီၣ်ကွံာ်အီၤလၢတၢ်ဒဲးဘးခဲလၢာ်လၢစီၤ မိၤၡ့အတၢ်သိၣ်တၢ်သီဒုးထူၣ်ဖျဲးထီၣ်ကွံာ်အီၤတသ့ဘၣ်အဂ့ၢ် န့ၣ်လီၤ.

ရိမ့ၤ 3:20

မ့ၢ်အဂ့ၢ်ဒ်လဲၣ်န့ၣ်, ပှၤကညီတဘၣ်တၢ်ပာ်တီပာ်လိၤအီၤလၢ ကစၢ်ယွၤအမဲာ်ညါလၢအမၤထွဲတၢ်သိၣ်တၢ်သီအခံအဃိနီ တဂၤဘၣ်. မ့မ့ၢ်တၢ်လၢတၢ်သိၣ်တၢ်သီမၤဝဲန့ၣ်, မ့ၢ်တၢ်ဒုးသ့ၣ်ညါပှၤဟီၣ်ခိၣ်ဖိလၢအဝဲမၤတၢ်ဒဲးဘးလံန့ၣ်လီၤ.

ရိမ့ၤ 6:6

ဒီးပသ့ၣ်ညါတၢ်အံၤလီၤ. ပနီၢ်လီၢ်လံၤအံၤဘၣ်တၢ်မၤသံတ့ၢ်လံအီၤဃုာ်ဒီးခရံာ်လၢ အထူၣ်စုညါအလိၤ, ဒ်သိးတၢ်ဒဲးဘးအနီၢ်ခိနီၢ်ကစၢ်အစိကမီၤ ကဘၣ်တၢ်မၤဟးဂီၤကွံာ်အီၤ, ဒီးဒ်သိးပသုတကဲလၢၤတၢ်ဒဲးဘးအကုၢ်အပှၤတဖၣ်တဂ့ၤအဂီၢ်န့ၣ်လီၤ.

ရိမ့ၤ 7:18

ဒ်ယအိၣ်ဒီးပှၤကညီအန့ဆၢၣ်အသိး, ယသ့ၣ်ညါလၢတၢ်ဂ့ၤတၢ်ဝါတမူလၢယပူၤဘၣ်. အဂ့ၢ်ဒ်လဲၣ်န့ၣ်, သးလၢအဆၢမၤဂ့ၤတၢ်အိၣ်လၢယပူၤသနာ်က့, ယမၤထွဲအီၤ တသ့ဘၣ်.

ရိမ့ၤ 8:32

အဝဲတဟံးဃာ်က့ၤအဖိခွါဒၣ်ဝဲဒၣ်လဲာ်ဘၣ်, မ့မ့ၢ်လုၢ်ထီၣ် အီၤဒ်တၢ်လုၢ်အသိးလၢပဝဲခဲလၢာ်အဂီၢ်န့ၣ်လီၤ. အဝဲဒၣ်ဟ့ၣ်လီၤပှၤအဖိခွါဒၣ်ဝဲလံသတးဒီး, မ့ၢ်အတဟ့ၣ်ကလီစ့ၢ်ကီးပှၤလၢတၢ်အဂၤခဲလၢာ်န့ၣ်ဘၣ်ဧါ.

ရိမ့ၤ 9:3

လၢအဝဲသ့ၣ်အဃိ, ယဆၢယဲဒၣ်လၢယကအိၣ်လၢကစၢ်ယွၤ အတၢ်ဆိၣ်အၢအဖီလာ်ဒီးအိၣ်လီၤဖးဒီးခရံာ်န့ၣ်လီၤ.

၂ ကရံၣ်သူး 5:21

ခရံာ်အတၢ်ဒဲးဘးတအိၣ်ဘၣ်. ဘၣ်ဆၣ်ဒီးလၢပဂီၢ်ယွၤဒုးတူၢ်ဃုာ်အီၤလၢပတၢ်ဒဲးဘး, ဒ်သိးဒီးလၢပတၢ်ပာ်ဖှိၣ်ဃုာ်ပသးဒီးအီၤအပူၤန့ၣ်, ပကဒိးန့ၢ်ဃုာ်ကစၢ်ယွၤအတၢ်တီတၢ်လိၤအဂီၢ်န့ၣ်လီၤ.

ကလၤတံ 3:13

ဘၣ်ဆၣ်ဒီး, ခီဖျိခရံာ်ဒိးတၢ်စံၣ်ညီၣ်လၢပဂီၢ်န့ၣ်အဝဲဒၣ်ဒုး ထူၣ်ဖျဲးထီၣ်ကွံာ်ပှၤလၢတၢ်စံၣ်ညီၣ်လၢတၢ်သိၣ်တၢ်သီဒုး အိၣ်ထီၣ်ဝဲန့ၣ်လီၤ. အဂ့ၢ်ဒ်အံၤတၢ်ကွဲးအသးစံးဝဲ, “ပှၤတဂၤလၢ်လၢ်လၢအဘၣ်တၢ်ဘျးထီၣ်အစိၣ် လၢသ့ၣ်ထူၣ်တထူၣ်အလိၤန့ၣ်, အိၣ်လၢကစၢ်ယွၤအတၢ်စံၣ်ညီၣ်အဖီလာ်န့ၣ်လီၤ” (သိၣ်သီ ၂၁:၂၃).

ကလၤတံ 3:21

မ့မ့ၢ်ဒ်န့ၣ်ဒီး, တၢ်သိၣ်တၢ်သီထီဒါကစၢ်ယွၤအတၢ်အၢၣ်လီၤ အီလီၤတဖၣ်ဧါ. တမ့ၢ်လ့ၤတက့ၤဘၣ်. အဂ့ၢ်ဒ်အံၤပှၤဟီၣ်ခိၣ်ဖိ မ့ၢ်ဒိးန့ၢ်တၢ်သိၣ်တၢ်သီလၢအဟ့ၣ်တၢ်မူသ့ဒီး, ပှၤကိးဂၤဒဲးကဘၣ်တၢ်မၤလိၤမၤဘၣ်အီၤဒီးကစၢ်ယွၤခီဖျိတၢ် ဒိကနၣ်တၢ်သိၣ်တၢ်သီန့ၣ်လီၤ.

ဖံလံးပံၤ 2:7

မ့မ့ၢ်, လၢအဝဲအတၢ်သးဆူၣ်ဒၣ်ဝဲအပူၤ, ညိကွံာ်တၢ်လၢအအိၣ်ဒီးအီၤခဲလၢာ် ဒီးဟံးထီၣ်ကုၢ်တဂၤအက့ၢ်အဂီၤလီၤ. အဝဲဒၣ်ကဲထီၣ်ပှၤကညီတဂၤ ဒီးလီၣ်ဖျါထီၣ်အသးဒ်ပှၤကညီတဂၤအသိးလီၤ.

ဧ့ၤဘြံၤ 10:12

မ့မ့ၢ်ခရံာ်လုၢ်ထီၣ်တၢ်လုၢ်တမံၤလၢတၢ်လုၢ်တၢ်ဒဲးဘးအဂီၢ်, တၢ်လုၢ်တမံၤလၢအဒုးကဲထီၣ်တၢ်ဘျုးလီၤထူလီၤယိာ်, ဝံၤဒီးဆ့ၣ်နီၤဝဲလၢ ကစၢ်ယွၤအစုထွဲတခီလီၤ.

ဧ့ၤဘြံၤ 10:14

အဂ့ၢ်ဒ်အံၤခီဖျိတၢ်လုၢ်ထီၣ်ပာ်ထီၣ်တဘျီဧိၤန့ၣ်အဝဲဒၣ် မၤလၢထီၣ်ပှဲၤထီၣ်လံပှၤလၢအဘၣ်တၢ်မၤစီဆှံအီၤ တဖၣ်န့ၣ်လံ.

ဧ့ၤဘြံၤ 2:14

ဒ်အကိးဝဲအသိး, ဖိတဖၣ်အံၤမ့ၢ်ပှၤဘၣ်ဃးဒီးနီၢ်ခိနီၢ်ခီလၢဖံး လၢညၣ်သတးဒီးယ့ၣ်ၡူးအနီၢ်ကစၢ်ဒၣ်ဝဲဟံးန့ၢ်ပှၤဟီၣ်ခိၣ်ဖိ အက့ၢ်အဂီၤအန့ဆၢၣ်လီၤ. မၤဝဲဒ်အံၤမ့ၢ်ဒ်သိးဒီးခီဖျိအတၢ် သံန့ၣ်, ကမၤဟးဂီၤကွံာ်ပှၤလၢအအိၣ်ဒီးတၢ်စိတၢ်ကမီၤလၢ တၢ်သံအဖီခိၣ်တဂၤဒ်ပစံးတၢ်အသိးမုၣ်ကီၤလံၢ်,

ဧ့ၤဘြံၤ 2:17

လၢတၢ်န့ၣ်အဃိအဝဲဘၣ်ကဲထီၣ်ဒ်အဒီပုၢ်ဝဲၢ်တဖၣ်အသိး လၢတၢ်ကိးမံၤဒဲးအပူၤဒ်သိးလၢအတၢ်မၤကစၢ်ယွၤအတၢ်မၤ အပူၤန့ၣ်ကမ့ၢ်ပှၤလုၢ်တၢ်အခိၣ်အဒိၣ်ကတၢၢ်လၢအသူၣ် ကညီၤသးကညီၤတၢ်ဒီးအကလုၢ်တီဝဲတဂၤသတးဒီးကမၤ ပူၤဖျဲးတၢ်လၢပှၤကညီအတၢ်ဒဲးဘးအဂီၢ်န့ၣ်လီၤ.

ဧ့ၤဘြံၤ 4:15

ပပှၤလုၢ်တၢ်အခိၣ်အဒိၣ်ကတၢၢ်အံၤ တမ့ၢ်ပှၤလၢအနၢ် ပၢၢ်စၢၤပတၢ်ဂံၢ်စၢ်ဘါစၢ်တသ့ဘၣ်တဂၤန့ၣ်ဘၣ်. မ့ၢ်ပှၤတဂၤလၢအဘၣ်တၢ်လ့ပစီအီၤလၢကျဲကိးဘိဒဲးဒ်ပဝဲဒၣ် အသိးဘၣ်ဆၣ်အတၢ်ဒဲးဘးတအိၣ်ဘၣ်.

၁ ပ့းတရူး 2:24

ခရံာ်အကစၢ်ဒၣ်ဝဲစိာ်ထီၣ်ပတၢ်ဒဲးဘးတဖၣ်လၢအနီၢ်ခိ အပူၤဆူထူၣ်စုညါအလိၤ, ဒ်သိးပကသံကွံာ်လၢတၢ်ဒဲးဘးဒီးမူလၢတၢ်တီတၢ်လိၤ အဂီၢ်န့ၣ်လီၤ. ဒီးသုဘျါက့ၤလၢအဝဲဒၣ်ဘၣ်တီၢ်အပူၤလီၢ် တဖၣ်အဃိလီၤ (ၡါ ၅၃:၅).