ရိမ့ၤ 6:16 - Sgaw Karen Common Bible

¹⁶ သုသ့ၣ်ညါသပှၢ်ကတၢၢ်လၢ ဖဲသုဟ့ၣ်လီၤသုသးဒ်ကုၢ် တဖၣ်အသိးလၢသုကစူၢ်ပှၤတဂၤဂၤန့ၣ်ဒီး, သုမ့ၢ်နီၢ်နီၢ်ကစၢ်လၢသုစူၢ်အီၤတဂၤအံၤအကုၢ် တဖၣ်န့ၣ်လီၤ. တဘျီဃီဖဲသုကဲတၢ်ဒဲးဘး လၢအဆှၢသု ဆူတၢ်သံအကုၢ်န့ၣ်, သုကဲတၢ်ဒိကနၣ်လၢအဆှၢသုဆူ တၢ်ပာ်တီပာ်လိၤသုအကုၢ်န့ၣ်တသ့ဘၣ်.

ရိမ့ၤ 6:16 Iomraidhean Croise

လံာ်တၢ်ကဲထီၣ်အခီၣ်ထံး 4:7

နမ့ၢ်မၤတ့ၢ်တၢ်အဘၣ်ဒီးနကနံၤကမှံထီၣ်နဲလီၤ. ဘၣ်ဆၣ်နမၤတ့ၢ်တၢ်အၢအဃိဒီးတၢ်ဒဲးဘးကိာ်လီၤလၢနတြဲၤအခီၣ် ထံးလီၤ. တၢ်န့ၣ်အဲၣ်ဒိးပၢနၤ, ဘၣ်ဆၣ်ဒီး, နကဘၣ်မၤနၢၤအီၤလီၤ.”

လံာ်မးသဲ 20:4

အဝဲစံးဘၣ်အဝဲသ့ၣ်, ‘လဲၤစ့ၢ်ကီးသုဝဲဆူစပံးလီၢ်ဒီးမၤတၢ်ဖဲန့ၣ်တက့ၢ်. ဒီးတၢ်အဘူးအလဲဖဲအကြၢးအဘၣ်န့ၣ်, ယကဟ့ၣ်သုလီၤ.’ တုၤနုၤတစုအဝဲသ့ၣ်လဲၤဝဲလီၤ.

လံာ်မးသဲ 6:24

ပှၤမၤတၢ်အခ့အပှၤအတၢ်မၤလၢကစၢ်ခံဂၤအဂီၢ်တသ့နီတဂၤဘၣ်. ကအဲၣ်ဝဲတဂၤဒီးကသးဟ့ဝဲတဂၤလီၤ. ကတီဝဲဒီးကစၢ်တဂၤဒီးကကွၢ်တလီၤဝဲအတဂၤန့ၣ်လီၤ. သုမၤကစၢ်ယွၤအတၢ်မၤဒီးကျိၣ်စ့အတၢ်မၤခံမံၤလၢာ်တသ့ဘၣ်.

လံာ်ယိၤဟၣ် 8:34

ယ့ၣ်ၡူးစံးဘၣ်အဝဲသ့ၣ်, “ယစံးဘၣ်သုတီတီလိၤလိၤလီၤ. ပှၤတဂၤလၢ်လၢ်လၢအမၤတၢ်ဒဲးဘးန့ၣ်, မ့ၢ်တၢ်ဒဲးဘးအကုၢ် အပှၤလီၤ.”

ရိမ့ၤ 11:2

ကစၢ်ယွၤတညိကွံာ်အပှၤကလုာ်လၢအဃုထၢပာ်ဝဲလၢအခီၣ်ထံး လံၤလံၤန့ၣ်ဘၣ်. သုသ့ၣ်ညါတၢ်ကွဲးအသးစီဆှံဘၣ်ဃးဝံအ့ၤလံယၤ အတၢ်ဃ့သကွံၢ်ကညးကစၢ်ယွၤထီဒါအံၣ်စရ့လးလၢအစံးဝဲ,

ရိမ့ၤ 12:1

လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, မ့ၢ်လၢကစၢ်ယွၤအတၢ်သးကညီၤဒိၣ်ဝဲအါဝဲလၢပဖီခိၣ်အဃိ, ယဃ့ကညးသုလၢသုကလုၢ်ထီၣ်သုသး ဒ်တၢ်လုၢ်မူစီဆှံ ဆူကစၢ်ယွၤအအိၣ်အသိး, ပာ်စီဆှံသုသးလၢအတၢ်မၤအဂီၢ်, ဒီးမၤသးမုာ်သးခုအီၤတက့ၢ်. တၢ်အံၤမ့ၢ်တၢ်ဘူၣ်ထီၣ်ဘါထီၣ်အမ့ၢ်အတီလၢသုကြၢးမၤ အီၤန့ၣ်လီၤ.

ရိမ့ၤ 6:17

ဘၣ်ဆၣ်ဒီးပစံးဘျုးကစၢ်ယွၤဒိၣ်မးလီၤ. အဂ့ၢ်ဒ်လဲၣ်န့ၣ်, တဘျီသုမ့မ့ၢ်တ့ၢ်တၢ်ဒဲးဘးအကုၢ်တဖၣ်နာ်သက့, လၢသုသးဒီဖျၢၣ်ညါန့ၣ်သုဒိကနၣ်တ့ၢ်တၢ်မ့ၢ်တၢ်တီ တဖၣ်လၢအဘၣ်တၢ်ထံၣ်န့ၢ်အီၤလၢတၢ်သိၣ်လိလၢ သုဒိးန့ၢ်အီၤအပူၤန့ၣ်လံ.

1 ကရံၣ်သူး 3:16

သုသ့ၣ်ညါသပှၢ်တၢၢ်လၢသုမ့ၢ်ယွၤအတၢ်လုၢ်ဟံၣ်, ဒီးယွၤအသးစီဆှံအိၣ်ဝဲဆိးဝဲလၢသုပူၤကစီဒီလီၤ တမ့ၢ်ဘၣ်ဧါ.

1 ကရံၣ်သူး 5:6

သုပာ်ကဖၢလၢသုသးန့ၣ်, တမ့ၢ်တၢ်လၢအကြၢးဝဲဘၣ်ဝဲ ဘၣ်. သုသ့ၣ်ညါတၢ်ကတိၤတထံၣ်လၢအစံးဝဲ, “ကိၣ်မံၣ်ထဲတစဲးဖိဧိၤမၤဖးထီၣ်ကိၣ်ကမူၣ်ကျဲအသးဒီးထံ ဒီကိၢ်လိၣ်ညါ” န့ၣ်လီၤ.

1 ကရံၣ်သူး 6:2

မ့ၢ်သုတသ့ၣ်ညါလၢယွၤအပှၤဂီၢ်မုၢ်ကစံၣ်ညီၣ်ဟီၣ်ခိၣ်ဘၣ်ဧါ. မ့မ့ၢ်ဒ်န့ၣ်ဒီး, သုမ့ၢ်ဘၣ်စံၣ်ညီၣ်ဟီၣ်ခိၣ်န့ၣ်, မ့ၢ်သုတအိၣ်ဒီး တၢ်သ့တၢ်ဘၣ်လၢသုကစံၣ်ညီၣ်တၢ်ဂ့ၢ်ဆံးကံာ်ဆံးကိာ်ဖိ တဖၣ်ဘၣ်ဧါ.

1 ကရံၣ်သူး 6:3

မ့ၢ်သုတသ့ၣ်ညါလၢပကဘၣ်စံၣ်ညီၣ်မူခိၣ်ကလူးတဖၣ် ဘၣ်ဧါ. မ့မ့ၢ်ဒ်န့ၣ်ဒီးတၢ်ဘၣ်ဃးလၢတၢ်အိၣ်မူတစိၤအံၤန့ၣ်, ကအါန့ၢ်အန့ၣ်တက့ၢ်ဆံးဒိၣ်လဲၣ်.

1 ကရံၣ်သူး 6:9

သပှၢ်ကတၢၢ်, သုသ့ၣ်ညါသုဝဲလၢပှၤအၢပှၤသီတဖၣ်တဒိး န့ၢ်ဘၣ်ယွၤအဘီအမုၢ်ဘၣ်န့ၣ်လီၤ. သုတလီလီၤက့ၤသုသး တဂ့ၤ. ပှၤလၢအမၤကမၣ်မုၣ်ကမၣ်ခွါတဖၣ်, မ့တမ့ၢ်ဘါတၢ်ဂီၤ တၢ်ဖီၣ်တဖၣ်, မ့တမ့ၢ်အဲၣ်ဘၢတၢ်, မ့တမ့ၢ်အဲၣ်ပကၢၤတၢ်,

1 ကရံၣ်သူး 9:13

သုကသ့ၣ်ညါကစီဒီလီၤ. ပှၤလၢအမၤတၢ်လၢတၢ်လုၢ်ဟံၣ်အပူၤ တဖၣ်ဒိးန့ၢ်ဘၣ်အတၢ်အီၣ်လၢတၢ်လုၢ်ဟံၣ်အပူၤ, ဒီးပှၤလၢအလုၢ်ထီၣ်တၢ်လုၢ်တၢ်ပာ်လၢတၢ်လုၢ်လီၢ်တဖၣ် ဒိးန့ၢ်ဘၣ်တၢ်နီၤဟ့ၣ်အီၤလၢတၢ်လုၢ်တၢ်ပာ်တဖၣ်န့ၣ်လီၤ.

1 ကရံၣ်သူး 9:24

သုသ့ၣ်ညါသုဝဲကစီဒီလီၤ. လၢတၢ်ဃ့ၢ်ပြၢတဘျီအပူၤန့ၣ်, ပှၤပြၢတၢ်ဖိအိၣ်ဝဲအါဂၤ, ဘၣ်ဆၣ်ဒီးပှၤဒိးန့ၢ်ဘၣ်ခိၣ်ဖးအိၣ်ဝဲထဲ တဂၤဧိၤလီၤ. မ့မ့ၢ်ဒ်န့ၣ်ဒီး ဃ့ၢ်သုဝဲဒ်သိးသုဒိးန့ၢ်ခိၣ်ဖးကသ့ဝဲ အဂီၢ်တက့ၢ်.

လံာ်စီၤယိၤၡူ 24:15

သုမ့ၢ်တသးအိၣ်မၤအတၢ်ဘၣ်ဒီး, ဃုထၢလၢမုၢ်မဆါတနံၤအံၤပှၤ လၢသုကမၤအတၢ်န့ၣ်တက့ၢ်. သုကဃုထၢကစၢ်တဖၣ်လၢသုမိၢ်ပၢ်ဖံဖုလၢပျၢၤတဖၣ်မၤအတၢ်လၢ ထံမိၢ်ပှၢ်ဝၢ်ဘးခီ, မ့တမ့ၢ်ပှၤအမိၢ်ဖိလၢသုအိၣ်သုဆိး လၢအကီၢ်ပူၤအကစၢ်တဖၣ်ဧါ. မ့မ့ၢ်ယဲဒၣ်အံၤဒီးယပှၤဟံၣ်ဖိ, ပကမၤယွၤအတၢ်လီၤ.”

၂ ပ့းတရူး 2:19

သရၣ်အဘျၣ်တဖၣ်အံၤအၢၣ်လီၤအဝဲသ့ၣ်လၢကဟ့ၣ် အီၤတၢ်သဘျ့, မ့မ့ၢ်အဝဲသ့ၣ်အကစၢ်ဒၣ်ဝဲတခီကဲကုၢ်လၢလုၢ်လၢ် အၢသီလၢအမၤဟးဂီၤတၢ်တဖၣ်အဖီလာ်, အဂ့ၢ်ဒ်လဲၣ်န့ၣ်, ပှၤတဂၤဂၤမ့ၢ်ဒိးမၢအသးလၢတၢ်တမံၤမံၤဒီးအဝဲဒၣ် ကဲထီၣ်တၢ်တမံၤန့ၣ်အကုၢ်လီၤ.