လံာ်လီၣ်ဖျါ 9:21 - Sgaw Karen Common Bible

²¹ ဒ်န့ၣ်အသိး, အဝဲသ့ၣ်တပီၢ်ယၢ်လီၤအသးလၢအတၢ်မၤသံမၤဝီတၢ် အဃိမ့ၢ်ဂ့ၤ, အတၢ်ဟိၣ်တၢ်ယီအဃိမ့ၢ်ဂ့ၤ, အတၢ်မၤကမၣ်မုၣ်ကမၣ်ခွါအဃိမ့ၢ်ဂ့ၤ, ဒီးအတၢ်ဟုၣ်တၢ်ဘျၣ်တၢ်အဃိမ့ၢ်ဂ့ၤန့ၣ်ဘၣ်.

လံာ်လီၣ်ဖျါ 9:21 Iomraidhean Croise

လံာ်ယၡါယၤ 47:12

ပၢၤဃာ်ကယဲၢ်နတၢ်မၤကဒါပှၤအမဲာ်, ဒီးနတၢ်အူတၢ်သမူတၢ်တဖၣ်တက့ၢ်. နသူတ့ၢ်တၢ်တဖၣ်န့ၣ်စးထီၣ်လၢနသးစၢ်အကတီၢ်လံၤလံၤန့ၣ်လီၤ. ဘၣ်သ့ၣ်သ့ၣ်, တၢ်တဖၣ်န့ၣ်ကမ့ၢ်တၢ်မၤစၢၤလၢနဂီၢ်တနီၤနီၤဒီး နမၤပျံၤမၤဖုးနဒုၣ်နဒါတဖၣ်ကသ့န့ၣ်လီၤ.

လံာ်ယၡါယၤ 47:9

ဘၣ်ဆၣ်လၢတစိၢ်ဖိအတီၢ်ပူၤ, လၢတနံၤဃီအပူၤန့ၣ်, တၢ်ခံမံၤလိာ်အံၤကမၤအသးလီၤ. နသူတၢ်မၤကဒါမဲာ်, တၢ်အူတၢ်သမူတဖၣ်ဒၣ်လဲာ်န့ၣ်, နဝၤဒီးနဖိတဖၣ်ကလီၤမၢ်န့ၢ်နၤလီၤ.

လံာ်ယၡါယၤ 57:3

သုဝဲပှၤတၢ်ဒဲးဘးဖိသ့ၣ်ဧၢ, ဟဲဖဲအံၤလၢတၢ်ကစံၣ်ညီၣ်သု အဂီၢ်တက့ၢ်. သုတဂ့ၤန့ၢ်ဒံးပှၤသ့အူတၢ်သမူတၢ်တဖၣ်, ပှၤမၤကမၣ်မုၣ်ကမၣ်ခွါတဖၣ်, ဒီးပိာ်မုၣ်ဟးဂီၤတဖၣ်န့ၣ်ဘၣ်.

လံာ်ဒၤနံးယ့လး 11:33

ဒီးပှၤခိၣ်ပှၤနၢ်လၢအကူၣ်သ့ကူၣ်ဘၣ်တဖၣ်လၢပှၤဂီၢ်မုၢ်အကျါန့ၣ် ကဟ့ၣ်နီၤလီၤအတၢ်ကူၣ်ဘၣ်ကူၣ်သ့ဆူပှၤအါဂၤလီၤ. ပှၤတနီၤလၢအဝဲသ့ၣ်အကျါကဘၣ်တၢ်မၤသံအီၤလၢတၢ်ဒုး တၢ်ယၤအပူၤမ့တမ့ၢ်ကဘၣ်တၢ်ဆူးကဲၤသံအီၤလၢမ့ၣ်အူဒီး တနီၤကဘၣ်တၢ်ဂုာ်ဆူၣ်ပျီဆူၣ်အီၤဒီးဒုးကဲထီၣ်အီၤလၢပှၤဘၣ် တၢ်စၢဃာ်တဖၣ်လီၤ. ဘၣ်ဆၣ်ဒီးကမ့ၢ်ဝဲစှၤနံၤစှၤသီလီၤ.

လံာ်မၤလကံ 3:5

ယွၤသ့တၢ်လၢာ်စံးဝဲ, “ယကလီၣ်ဖျါထီၣ်ယသးလၢသုကျါလၢယကစံၣ်ညီၣ်တၢ်, ဒီးယကအုၣ်ယသးတကီၢ်ခါထီဒါပှၤလၢအမၤကဒါပှၤမဲာ်, ထီဒါပှၤအဲၣ်ဘၢမါအဲၣ်ဘၢဝၤ, ထီဒါပှၤအုၣ်အသးကဘျံးကဘျၣ်, ပှၤလၢအလီန့ၢ်ပှၤမၤတၢ်ဖိလၢအဘူးအလဲတဖၣ်အပူၤ, ဒီးပှၤလၢအဟံးန့ၢ်တၢ်ခွဲးတၢ်ယာ်လၢပှၤမုၣ်ကမဲ, ပှၤဖိၣ်ဃဲတဖၣ်ဒီးပှၤတခီဘီမုၢ်ဖိတဖၣ် အဖီခိၣ်ဒီးထီဒါကယဲၢ်ပှၤလၢအတယူးယီၣ်ပာ်ကဲဘၣ်ယၤတဖၣ် န့ၣ်လီၤ.

လံာ်မးသဲ 15:19

အဂ့ၢ်ဒ်အံၤ, တၢ်ဆိကမိၣ်အအၢအသီလၢအဆှၢပှၤဆူတၢ်မၤသံပှၤ, တၢ်အဲၣ်ဘၢမါအဲၣ်ဘၢဝၤ, တၢ်မၤကမၣ်မုၣ်ကမၣ်ခွါ, တၢ်ဟုၣ်တၢ်ဘျၣ်တၢ်, တၢ်အုၣ်အသးကဘျံးကဘျၣ်, ဒီးတၢ်ဒုၣ်ဒွဲၣ်စံးအၢတၢ်တဖၣ်န့ၣ်, ဟဲထီၣ်ဒၣ်လၢပှၤကညီအသးကံၢ်ပူၤလီၤ.

၂ ကရံၣ်သူး 12:21

ယဘၣ်ယိၣ်လၢ, ခဲကိာ်တဘျီ, ဖဲယဟဲန့ၣ်ယကစၢ်ယွၤ ကဒုးမဲာ်ဆှးယၤလၢသုမဲာ်ညါ, ဒီးယကဟီၣ်ကယၢၤလၢပှၤအါဒံအါဂၤလၢအမၤတ့ၢ်တၢ်ဒဲးဘးလၢ အပူၤကွံာ်တဖၣ်အဃိ, ပှၤလၢအတပီၢ်ယၢ်လီၤဒံးအသးလၢတၢ်မၤတဂ့ၤတဝါလၢ အမၤတ့ၢ်ဝဲ, တၢ်ဒဲးဘးဘၣ်ဃးမုၣ်ခွါ, တၢ်မုာ်ဖံးမုာ်ညၣ်, တၢ်သးကွံအတၢ်ဖံးတၢ်မၤတဖၣ်အဃိန့ၣ်လီၤ.

ကလၤတံ 5:20

တၢ်ဘါတၢ်ဂီၤတၢ်ဖီၣ်, တၢ်ဟိၣ်တၢ်ယီ, တၢ်ထီဒုၣ်ထီဒါ, တၢ်အ့ၣ်လိာ် ဆိးက့လိာ်, တၢ်သူၣ်က့ၣ်သးကါ, တၢ်သူၣ်ဒိၣ်သးထီၣ်, တၢ်သးဆူၣ်ဆၢမၤန့ၢ်တၢ်, တၢ်လီၤမုၢ်လီၤဖး, တၢ်စုတလီၤဃုာ်ဘၣ်,

လံာ်လီၣ်ဖျါ 13:13

တၢ်ဒူတၢ်ဃိၤခံဒုတဒုအံၤမၤတၢ်လီၤလးအဒိၣ်အမုၢ် တဖၣ်, အဝဲဒၣ်ဒုးဟဲလီၤမ့ၣ်အူလၢမူခိၣ်ဆူဟီၣ်ခိၣ် လၢပှၤကိးဂၤဒဲးအမဲာ်ညါန့ၣ်လီၤ.

လံာ်လီၣ်ဖျါ 13:15

တၢ်ဒူတၢ်ဃိၤခံဒုတဒုအံၤ, တၢ်ပျဲအအူနုာ်တၢ်မူဆူတၢ်ဒူတၢ်ဃိၤတၢတဒုအက့ၢ်အဂီၤ အပူၤ, ဒ်သိးက့ၢ်ဂီၤအဝဲန့ၣ်ကတိၤတၢ်ကသ့ဝဲ, ဒီးကမၤသံကယဲၢ်ပှၤလၢအတဘါထီၣ်အီၤတဂၤလၢ်လၢ် န့ၣ်လီၤ.

လံာ်လီၣ်ဖျါ 13:7

တၢ်ဟ့ၣ်အီၤအခွဲးလၢအကဒုးတၢ်ထီဒါကစၢ်ယွၤ အပှၤဂီၢ်မုၢ်, ဒီးမၤနၢၤကွံာ်အဝဲသ့ၣ်, ဒီးတၢ်ဟ့ၣ်အီၤတၢ်စိတၢ်ကမီၤလၢကယဲၢ်ဒူၣ် ထၢ, ထံကီၢ်, ပှၤကတိၤကျိာ်တကျိာ်လၢ်လၢ်ဒီးပှၤကလုာ် တကလုာ်လၢ်လၢ်, အဖီခိၣ်န့ၣ်လီၤ.

လံာ်လီၣ်ဖျါ 14:8

ကလူးခံဂၤတဂၤပိာ်ထီၣ်တၢတဂၤအခံဒီးစံးဝဲ, “အဝဲ ဒၣ်လီၤပှီၢ်ကွံာ်ဝဲလံ, ဝ့ၢ်ဘၤဘူၤလိၣ်ဖးဒိၣ်လီၤပှီၢ်ကွံာ်ဝဲလံ. အဝဲဒၣ်မၢတ့ၢ်ပှၤကိးကလုာ်ဒဲးအီစပံးထံ, စပံးထံအဆူၣ်ဘၣ်ဃးဒီးအတၢ်ကလုာ်ကလိၤအတဂ့ၤ တဝါန့ၣ်လီၤ.”

လံာ်လီၣ်ဖျါ 16:6

အဝဲသ့ၣ်လူလီၤဂၢ်လီၤကစၢ်ယွၤအပှၤစီဆှံဒီးအဝံတဖၣ် အသွံၣ်, ဒီးလၢတၢ်န့ၣ်အဃိနဟ့ၣ်တ့ၢ်အဝဲသ့ၣ်တၢ်သွံၣ်လၢ အကအီဝဲအဂီၢ်လီၤ. အဝဲသ့ၣ်ဒိးန့ၢ်ဘၣ်တၢ်လၢအကြၢးဝဲဒီး အီၤလီၤ.”

လံာ်လီၣ်ဖျါ 17:2

ဟီၣ်ခိၣ်အစီၤပၤတဖၣ်မၤကမၣ်မုၣ်ကမၣ်ခွါဒီးအီၤ, ဒီးပှၤဟီၣ်ခိၣ်ဖိတဖၣ်အီမူၤအသးလၢစပံးထံဘၣ်ဃးဒီး အဝဲအလုၢ်အၢလၢ်သီန့ၣ်လီၤ.”

လံာ်လီၣ်ဖျါ 17:4

ပိာ်မုၣ်န့ၣ်ကူသိးဝဲလၢတၢ်အလွဲၢ်လုးတကုာ်ဒီးတၢ်အလွဲၢ်ဂီၤဆှုၣ်ကလာ်, ဒီးကယၢကယဲအသးလၢထူ, လၢၢ်လုၢ်ဒိၣ်ပှ့ၤဒိၣ်ဒီး တၢ်မျၢ်ပလဲတဖၣ်လီၤ. လၢအဝဲဒၣ်အစုပူၤန့ၣ်, ဟံးဃာ်ဝဲလီခီထူတဘ့ၣ်လၢအပှဲၤဒီးတၢ်လီၤသးဘၣ်အၢတကြၢး တဘၣ်တဖၣ်, လၢအအိၣ်ထီၣ်ဝဲခီဖျိအတၢ်အိၣ်မူတဂ့ၤတဝါအဃိ န့ၣ်လီၤ.

လံာ်လီၣ်ဖျါ 17:5

လၢအဝဲဒၣ်အခိၣ်တိသၣ်အလိၤန့ၣ်, မံၤတဖျၢၣ်လၢအအိၣ်ဒီးအခီပညီခူသူၣ်အိၣ်ကွဲးအသးဒ်အံၤလီၤ. ဘၤဘူၤလိၣ်ဖးဒိၣ်, ကယဲၢ်ဃဲသဲမုၣ်ဒီးဟီၣ်ခိၣ်အတၢ်လီၤသးဘၣ် အၢခဲလၢာ်အမိၢ်

လံာ်လီၣ်ဖျါ 18:3

အဂ့ၢ်ဒ်အံၤ, ထံကီၢ်ကိးဘ့ၣ်ဒဲးအီတ့ၢ်အဝဲဒၣ်အစပံးထံ, စပံးထံလၢအဆူၣ်ဝဲ, စပံးထံလၢအဘၣ်ဃးဒီးအဝဲအတၢ်ကလုာ်ကလိၤအလုၢ် အၢလၢ်သီန့ၣ်လီၤ. ဟီၣ်ခိၣ်ဒီဘ့ၣ်အစီၤပၤတဖၣ်မၤကမၣ်မုၣ် ကမၣ်ခွါဒီးအီၤဒီးဟီၣ်ခိၣ်အပှၤပနံာ်တၢ်ကၤတၢ်ဖိတဖၣ် ထူးထီၣ်တီၤထီၣ်ဝဲဒၣ်ခီဖျိအဝဲအတၢ်ကလုာ်ကလိၤလၢ အတပၢၤဃာ်ဝဲဘၣ်အဃိန့ၣ်လီၤ.”

လံာ်လီၣ်ဖျါ 19:2

အဝဲအတၢ်စံၣ်ညီၣ်တဖၣ်မ့ၢ်ဝဲတီဝဲ, ဒီးတီဝဲလိၤဝဲလီၤ. အဝဲစံၣ်ညီၣ်ဃၣ်တ့ၢ်လံဃဲသဲမုၣ်လၢအမၤဟးဂီၤဟီၣ်ခိၣ်လၢ အလုၢ်အၢလၢ်သီန့ၣ်လီၤ. ကစၢ်ယွၤစံၣ်ညီၣ်တ့ၢ်လံအီၤမ့ၢ်လၢအဝဲဒၣ်မၤသံတ့ၢ် ကစၢ်ယွၤအခ့အပှၤတဖၣ်အဃိလီၤ.”

လံာ်လီၣ်ဖျါ 21:8

မ့မ့ၢ်ပှၤလၢအသးသုၣ်, ပှၤသးတတီတဖၣ်, ပှၤတဖၣ်လၢအသးဘၣ်တၢ်ဘိးဃၣ်ကွံာ်အီၤဆူတၢ် အၢတၢ်သီ, ပှၤမၤသံတၢ်ဖိတဖၣ်, ပှၤမၤကမၣ်မုၣ်ကမၣ်ခွါ တဖၣ်, ပှၤသ့ၣ်တဖၣ်လၢအဟိၣ်တၢ်ယီတၢ်, ပှၤသ့ၣ်တဖၣ်လၢအဘါတၢ်ဂီၤတၢ်ဖီၣ်, ဒီးပှၤလီတၢ်ဖိကိးဂၤ ဒဲးတၢ်လီၢ်တၢ်ကျဲလၢအဝဲသ့ၣ်အဂီၢ်မ့ၢ်ဝဲနိၣ်မ့ၣ် အူအီၣ်ဃုာ်တၢ်ဒီးကး, လၢအမ့ၢ်ဝဲတၢ်သံခံစုတစုန့ၣ်လီၤ.”

လံာ်လီၣ်ဖျါ 22:15

မ့မ့ၢ်, ဖဲဝ့ၢ်အချၢန့ၣ်, ပှၤလၢအဘၣ်တၢ်ဘိးဃၣ်အီၤဆူတၢ် အၢတၢ်သီတဖၣ်, ဒီးပှၤသ့ၣ်တဖၣ်လၢအဟိၣ်တၢ်ယီတၢ်, ပှၤမၤကမၣ်မုၣ်ကမၣ်ခွါဒီးပှၤမၤသံမၤဝီတၢ်တဖၣ်, ပှၤလၢအဘါတၢ်ဂီၤတၢ်ဖီၣ်တဖၣ်ဒီးပှၤသ့ၣ်တဖၣ်လၢ အလီတၢ်, လၢတၢ်စံးတၢ်ကတိၤ, ဒီးတၢ်ဖံးတၢ်မၤခံမံၤလၢာ်န့ၣ်, အိၣ်ဝဲဒၣ်လီၤ.

လံာ်လီၣ်ဖျါ 9:20

ပှၤဟီၣ်ခိၣ်ဖိလၢအအိၣ်လီၤတဲာ်တ့ၢ်တဖၣ်ဒီးကယဲၢ်ပှၤလၢ အတဘၣ်တၢ်မၤသံအီၤလၢတၢ်သံသတြိာ်တဖၣ်န့ၣ်, တပီၢ်ယၢ်လီၤအသးလၢတၢ်လၢအဝဲသ့ၣ်အနီၢ်ကစၢ်ဒၣ်ဝဲမၤတ့ၢ်ဝဲ တဖၣ်အဃိန့ၣ်ဘၣ်. အဝဲသ့ၣ်တဆိကတီၢ်ကွံာ်အတၢ်ဘူၣ်ထီၣ် ဘါထီၣ်တၢ်ဝံတၢ်နါတဖၣ်မ့ၢ်ဂ့ၤ, တၢ်ဂီၤထူ, တၢ်ဂီၤစ့, တၢ်ဂီၤတိၢ်, တၢ်ဂီၤလၢၢ်, တၢ်ဂီၤသ့ၣ်လၢအထံၣ်တၢ်တသ့, အနၢ်ဟူတၢ်တသ့, ဟးတသ့တဖၣ်မ့ၢ်ဂ့ၤန့ၣ်ဘၣ်.