လံာ်လီၣ်ဖျါ 3:14 - Sgaw Karen Common Bible

¹⁴ ဆူဝ့ၢ်လီၤဒံၤကံတၢ်အိၣ်ဖှိၣ်အကလူးအအိၣ်န့ၣ်ကွဲးတၢ်ဒ်အံၤ တက့ၢ်. “အဝဲအံၤမ့ၢ်တၢ်ကစီၣ်ဟဲလၢတၢ်အၤမ့ၣ်, ပှၤလၢအသးတီဒီးအုၣ်အသးတီတီလိၤလိၤတဂၤ, ပှၤလၢအမ့ၢ်ကယဲၢ်ကစၢ်ယွၤအတၢ်ဘၣ်တ့ခဲလၢာ် အခီၣ်ထံးခီၣ်ဘိအအိၣ်န့ၣ်လီၤ.

လံာ်လီၣ်ဖျါ 3:14 Iomraidhean Croise

လံာ်တၢ်ကဲထီၣ်အခီၣ်ထံး 49:3

စီၤရူၤဘ့ၣ်, ယဖိဝဲၢ်ကိ, နမ့ၢ်ယဂံၢ်ယဘါ, ဒီးယတၢ်ဒိၣ်တုာ်ခိၣ်ပှဲၤအဖိအဆိကတၢၢ်, ပှၤဒိၣ်ဝဲထီဝဲကတၢၢ် ဒီးအဂံၢ်ဆူၣ်ကတၢၢ်လၢယဖိခွါတဖၣ်အကျါလီၤ.

တၢ်ကတိၤဒိ. 14:5

ပှၤအုၣ်အသးလၢတၢ်နာ်န့ၢ်အီၤသ့တဲတၢ်မ့ၢ်တၢ်တီထီဘိလီၤ. မ့မ့ၢ်, ပှၤလၢတၢ်နာ်န့ၢ်အီၤတသ့ဘၣ်တဂၤတဲဒၣ်ထဲတၢ်လီတၢ်ဝ့ၤ တဖၣ်ဧိၤလီၤ.

တၢ်ကတိၤဒိ. 8:22

ယွၤတ့လီၤယၤအဆိကတၢၢ်ဒီးလၢပျၢၤလၢကစၢၤယမ့ၢ် တၢ်အဆိကတၢၢ်လၢအတၢ်မၤတဖၣ်အကျါန့ၣ်လီၤ.

လံာ်ယၡါယၤ 55:4

ယဒုးကဲထီၣ်အီၤလၢခိၣ်နၢ်တဂၤဒီးပှၤကလုာ်တဖၣ်အသုးခိၣ်ဖးဒိၣ်, ဒီးခီဖျိအီၤန့ၣ်ယဒုးနဲၣ်အဝဲသ့ၣ်လၢ ယတၢ်စိတၢ်ကမီၤလီၤ.

လံာ်ယၡါယၤ 65:16

ပှၤတဂၤဂ့ၤတဂၤဂ့ၤလၢထံကီၢ်ပူၤ, လၢအဃ့တၢ်ဆိၣ်ဂ့ၤတမံၤ န့ၣ်, ကဃ့ဝဲဒ်သိးတၢ်သူၣ်တီသးရၤအကစၢ်ယွၤကဆိၣ်ဂ့ၤအီၤအဂီၢ် န့ၣ်လီၤ. ပှၤတဂၤလၢ်လၢ်လၢအမၤတၢ်ဆိၣ်တမံၤန့ၣ်, ကဆိၣ်လီၤအသးလၢတၢ်သူၣ်တီသးရၤအကစၢ်ယွၤအမံၤ အပူၤန့ၣ်လီၤ. တၢ်ကီတၢ်ခဲလၢအပူၤကွံာ်တဖၣ် ကလၢာ်ကွံာ်ဒီးကဘၣ်တၢ်သးပ့ၤနီၣ်ကွံာ်အီၤန့ၣ်လီၤ.”

လံာ်ယံးရမံယၤ 42:5

အန့ၣ်ဒီး, “အဝဲသ့ၣ်စံးဘၣ်ယၤ, ပမ့ၢ်တစူၢ်အဝဲအတၢ်မၤလိာ်ခဲလၢာ်လၢယွၤပကစၢ်ယွၤဟ့ၣ်လီၤနၤလၢ ပဂီၢ်ဘၣ်ဒီး, မ်ယွၤမ့ၢ်ပှၤအုၣ်အသးအတီဒီးအကလုၢ်တီတဂၤထီဒါပှၤန့ၣ် တက့ၢ်.

လံာ်ယိၤဟၣ် 1:3

ခီဖျိအီၤန့ၣ်တၢ်ခဲလၢာ်ကဲထီၣ်ဝဲဒီးတၢ်လၢအဘၣ်တၢ်တ့အီၤ ခဲလၢာ်န့ၣ်တကဲထီၣ်လၢအစုပူၤဘၣ်ဒီးတအိၣ်ဘၣ်နီတမံၤဘၣ်.

လံာ်ယိၤဟၣ် 8:14

ယ့ၣ်ၡူးစံးဆၢအဝဲသ့ၣ်, “ယအုၣ်ယသးလၢယကစၢ်ဒၣ်ယဲအဂီၢ် သနာ်က့, တၢ်လၢယစံးန့ၣ်မ့ၢ်ဝဲတီဝဲလီၤ. အဂ့ၢ်ဒ်လဲၣ်န့ၣ်, ယသ့ၣ်ညါယဟဲလၢလဲၣ်ဒီးယကလဲၤဆူလဲၣ်န့ၣ်လီၤ. မ့မ့ၢ်သုဝဲသ့ၣ်အံၤသုတသ့ၣ်ညါယဟဲလၢလဲၣ်ဒီးယကလဲၤဆူလဲၣ် န့ၣ်ဘၣ်.

၂ ကရံၣ်သူး 1:20

အဂ့ၢ်ဒ်အံၤ, အဝဲဒၣ်မ့ၢ်ဝဲ “မ့ၢ်” လၢယွၤတၢ်စံးပာ်ခဲလၢာ် အဂီၢ်လီၤ. လၢတၢ်တမံၤအံၤအဃိ, ခီဖျိယ့ၣ်ၡူးခရံာ်န့ၣ်ပ “အၤမ့ၣ်” ဘၣ်တၢ်ကတိၤထီၣ်ဖျဲးအီၤလၢကစၢ်ယွၤအလၤ ကပီၤအဂီၢ်လီၤ.

လံာ်သိၣ်လီၤသီလီၤတၢ် 21:17

အဝဲကဘၣ်ဟ့ၣ်အတၢ်စုလီၢ်ခီၣ်ခိၣ်အတၢ်ဟ့ၣ်နီၤခံစးဆူဖိခွါဝဲၢ်ကိ, ဖဲအဝဲတမ့ၢ်ဘၣ်အဝဲအမါလၢအအဲၣ်ဒိၣ်ဝဲအဖိခွါဒၣ်လဲာ်န့ၣ်လီၤ. ပှၤတဂၤန့ၣ်ကဘၣ်သ့ၣ်ညါနီၣ်အဖိခွါဝဲၢ်ကိဒီးဟ့ၣ်အီၤတၢ်ဟ့ၣ် နီၤလၢအဝဲကြၢးဒိးန့ၢ်ဝဲအလီၢ်အိၣ်ဒ်တၢ်သိၣ်တၢ်သီအိၣ်ဝဲအသိးန့ၣ်လီၤ.

ကလီးစဲ 1:15

ခရံာ်မ့ၢ်ကစၢ်ယွၤလၢပထံၣ်အီၤတသ့ဘၣ်တဂၤအက့ၢ်အဂီၤလီၤ. အဝဲမ့ၢ်ယွၤအဖိဝဲၢ်ကိလၢအအိၣ်ဆိဒီးအတီၤထီန့ၢ်တၢ်ဘၣ်တ့ အဂုၤအဂၤခဲလၢာ်န့ၣ်လီၤ.

ကလီးစဲ 1:18

ခရံာ်မ့ၢ်တၢ်အိၣ်ဖှိၣ်အခိၣ်ဒီးတၢ်အိၣ်ဖှိၣ်မ့ၢ်ခရံာ်အနီၢ်ခိလီၤ. အဝဲမ့ၢ်နီၢ်ခိအံၤအတၢ်မူအခီၣ်ထံးခီၣ်ဘိလီၤ. ခရံာ်မ့ၢ်ယွၤ အဖိဝဲၢ်ကိလၢအဘၣ်တၢ်ဒုးဂဲၤဆၢထၢၣ်က့ၤအီၤလၢတၢ်သံ အဆိကတၢၢ်, ဒ်သိးဒီးအဝဲကဒိၣ်စိလၢတၢ်ခဲလၢာ်အဖီခိၣ် အဂီၢ်န့ၣ်လီၤ.

ကလီးစဲ 2:1

ပျဲယဒုးသ့ၣ်ညါသုလၢယကျဲးစၢးတၢ်ဆူၣ်ဆူၣ်လၢ သုဂီၢ်, ပှၤအိၣ်လၢဝ့ၢ်လီၤဒံၤကံတဖၣ်အဂီၢ်, ဒီးပှၤလၢအတထံၣ်ဘၣ်တသ့ၣ်ညါဘၣ်ယၤလၢနီၢ် ခိနီၢ်ခီတဖၣ်ခဲလၢာ်အဂီၢ်ထဲလဲၣ်ထဲလဲၣ်န့ၣ်တက့ၢ်.

ကလီးစဲ 4:16

တုၤပှၤဖးလံာ်ပရၢအံၤဝံၤဒီးမၤဒ်သိးဝ့ၢ်လီၤဒံၤကံအတၢ် အိၣ်ဖှိၣ်စ့ၢ်ကီးကဖးဘၣ်ဝဲသပှၢ်ကတၢၢ်တက့ၢ်. သုဝဲစ့ၢ်ကီးဖးဘၣ်လံာ်ပရၢလၢယကွဲးန့ၢ်အဝဲသ့ၣ်လၢအဝဲသ့ၣ် ကဆှၢလီၤန့ၢ်သုတက့ၢ်.

လံာ်လီၣ်ဖျါ 1:11

တၢ်အကလုၢ်န့ၣ်စံးဝဲ, “ကွဲးလီၤတၢ်လၢနထံၣ်ဘၣ်နဲ, လၢလံာ်တဘ့ၣ်အပူၤ, ဒီးဆှၢလီၤလံာ်အဝဲန့ၣ်ဆူတၢ်အိၣ်ဖှိၣ် တဖၣ်လၢဝ့ၢ်နွံဖျၢၣ်အံၤ, ဝ့ၢ်အ့းဖ့းစူး, ဝ့ၢ်စမူရနၤ, ဝ့ၢ်ပ့ၢ်ကမူး, ဝ့ၢ်သူၤအတံရၤ, ဝ့ၢ်စၢ်ဒံ, ဝ့ၢ်ဖံၤလဒ့းလဖံ, ဒီးဝ့ၢ်လီၤဒံၤကံ, အပူၤန့ၣ်တက့ၢ်.”

လံာ်လီၣ်ဖျါ 1:5

ဒီးလၢယ့ၣ်ၡူးခရံာ်, ပှၤအုၣ်အသးလၢအသးတီဝဲတဂၤ အအိၣ်, ပှၤအဆိကတၢၢ်တဂၤလၢအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ လၢတၢ်သံဒီးမ့ၢ်စ့ၢ်ကီးပှၤပၢဘၣ်ဟီၣ်ခိၣ်အစီၤပၤတဖၣ်န့ၣ် တက့ၢ်. အဝဲဒၣ်အဲၣ်ပှၤ, ဒီးခီဖျိအဝဲအတၢ်သံန့ၣ်, မၤထူၣ်ဖျဲးထီၣ်ကွံာ်ပှၤလၢပတၢ်ဒဲးတူၢ်ဒဲးဘးတဖၣ်,

လံာ်လီၣ်ဖျါ 19:11

တုၤနုၤတစုယထံၣ်မူခိၣ်အိးထီၣ်အသး, ဒီးဖဲန့ၣ်ကသ့ၣ်ဖါဝါအိၣ်ဝဲဒၣ် တဒုလီၤ. ပှၤဒိးကသ့ၣ်တဂၤအံၤဘၣ်တၢ်ကိးအီၤလၢ ကလုၢ်တီဒီးတီလိၤန့ၣ်လီၤ. အဝဲဒၣ်စံၣ်ညီၣ်ဒီးဒုးအတၢ်ဒုးသုးတဖၣ်လၢတၢ်တီတၢ်လိၤ အပူၤလီၤ.

လံာ်လီၣ်ဖျါ 2:1

ဆူအ့းဖ့းစူးတၢ်အိၣ်ဖှိၣ်အကလူးအအိၣ်န့ၣ်ကွဲးနဲဒ်အံၤ, “အဝဲအံၤမ့ၢ်တၢ်ကစီၣ်ဟဲလၢပှၤတဂၤလၢအဟံးဃာ်ဆၣ်နွံ ဖျၢၣ်လၢအစုထွဲပူၤ, ဒီးဟးဝဲလၢမ့ၣ်အူဒၢထူနွံဖျၢၣ်အသိး အကျါတဂၤအအိၣ်န့ၣ်လီၤ.

လံာ်လီၣ်ဖျါ 21:6

ဒီးအဝဲဒၣ်စံးဝဲ, “တၢ်မၤအသးဝံၤလံ. ယမ့ၢ် က, ဒီး ဧ, တၢ်အခီၣ်ထံးဒီးတၢ်အကတၢၢ်လီၤ. ဆူပှၤတဂၤလၢ်လၢ်လၢတၢ်သူအသးလၢထံန့ၣ်, ယကဟ့ၣ်အီၤအခွဲးအယာ်လၢအကအီထံဖဲတၢ်မူ အထံထီၣ်ပၢၢ်တအိၣ်ဒီးတၢ်ဟ့ၣ်ဘၣ်အပှ့ၤအကလံၤ န့ၣ်ဘၣ်လီၤ.

လံာ်လီၣ်ဖျါ 22:13

ယမ့ၢ် က ဒီး ဧ, တၢ်အခီၣ်ထံးဒီးတၢ်အကတၢၢ်လီၤ.”

လံာ်လီၣ်ဖျါ 22:6

တုၤနုၤတစုကလူးန့ၣ်စံးဘၣ်ယၤ, “တၢ်ကတိၤသ့ၣ်တဖၣ် အံၤမ့ၢ်ဝဲတီဝဲဒီးဘၣ်တၢ်နာ်န့ၢ်အီၤသ့ဝဲဒၣ်လီၤ. ဒီးကစၢ်ယွၤလၢအဟ့ၣ်အသးစီဆှံဆူဝံတဖၣ်န့ၣ်, ဆှၢလီၤအကလူးဒ်သိးအကဒုးနဲၣ်အဝဲဒၣ်အခ့အပှၤတဖၣ်, တၢ်လၢအကဘၣ်မၤအသးလၢတစိၢ်ဖိအတီၢ်ပူၤန့ၣ်လီၤ.”

လံာ်လီၣ်ဖျါ 3:7

ဆူဝ့ၢ်ဖံၤလဒ့းလဖံတၢ်အိၣ်ဖှိၣ်အကလူးအအိၣ်န့ၣ်, ကွဲးတၢ်ဒ်အံၤတက့ၢ်. “အဝဲအံၤမ့ၢ်တၢ်ကစီၣ်ဟဲလၢပှၤတဂၤလၢအစီဝဲဆှံဝဲ, ဒီးတီဝဲလိၤဝဲအအိၣ်န့ၣ်လီၤ. အဝဲဒၣ်အိၣ်ဒီးနီၣ်ဝံာ်လၢ အမ့ၢ်စီၤဒၤဝံးအတၢ်, ဒီးဖဲအဝဲဒၣ်အိးထီၣ်တြဲၤတဘ့ၣ်န့ၣ်, ပှၤကးတံာ်အီၤတန့ၢ်နီတဂၤဘၣ်, ဒီးဖဲအကးတံာ်ဝဲန့ၣ်ပှၤအိးထီၣ်အီၤတန့ၢ်နီတဂၤဘၣ်.