လံာ်လီၣ်ဖျါ 19:7 - Sgaw Karen Common Bible

⁷ မ်ပကသူၣ်ဖှံသးညီ ဒီးသူၣ်ခုသးခုတက့ၢ်. မ်ပကစံးထီၣ်ပတြၢၤအဝဲအတၢ်ဒိၣ်တၢ်မုၢ်တက့ၢ်. အဂ့ၢ်ဒ်အံၤ, သိဖိအတၢ်တ့တၢ်ဖျီအဆၢကတီၢ်တုၤအိၣ်ဝဲလံ. ဒီးအဝဲဒၣ်အတလးမူးပိာ်မုၣ်အိၣ်ကတဲာ်ကတီၤလံအသးလၢတၢ်န့ၣ် အဂီၢ်လံ.

လံာ်လီၣ်ဖျါ 19:7 Iomraidhean Croise

စံးထီၣ်ပတြၢၤ 107:42

ပှၤအတီအလိၤထံၣ်တၢ်အံၤဒီးသးခုဝဲ, မ့မ့ၢ်ပှၤအၢပှၤသီခဲလၢာ်ကျၢၢ်တံၢ်အထးခိၣ်လီၤ.

စံးထီၣ်ပတြၢၤ 48:11

မ်စံယိၣ်အပှၤဂီၢ်မုၢ်တဖၣ်ကသးခုဝဲဒၣ်န့ၣ်တက့ၢ်. နဟ့ၣ်တၢ်စံၣ်ညီၣ်တီလီၤ. မ်တၢ်သးခုကအိၣ်ဝဲဒၣ်လၢယူဒၤအဝ့ၢ် တဖၣ်အပူၤန့ၣ်တက့ၢ်.

စံးထီၣ်ပတြၢၤ 9:14

ဒ်သိးယကဆၢထၢၣ်ဘၣ်ယဲလၢ ဝ့ၢ်ယရူၤၡလ့ၣ်အပှၤဂီၢ်မုၢ်အမဲာ်ညါ ဒီးစံးဘၣ်အဝဲသ့ၣ်ခဲလၢာ်လၢ ယဘၣ်စံးထီၣ်ပတြၢၤ နၤအဂ့ၢ်န့ၣ်တက့ၢ်. ယကသူၣ်ဖှံသးညီလၢနအုၣ်က့ၤခီၣ်က့ၤယၤအဃိလီၤ.

တၢ်ကတိၤဒိ. 29:2

ဒုးနဲၣ်ယၤပှၤပၢတၢ်အတီအလိၤတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအသူၣ်ဖှံသးညီတဖုလီၤ. ဒုးနဲၣ်ယၤပှၤပၢတၢ်အအၢအသီတဂၤတက့ၢ်. ဒီးယကဒုးနဲၣ်နၤပှၤဂီၢ်မုၢ်လၢအဘၣ်ကိၢ်ဘၣ်ဂီၤတဖုန့ၣ်လီၤ.

လံာ်တၢ်သးဝံၣ်တဖၣ်အတၢ်သးဝံၣ် 3:11

ဝ့ၢ်စံယိၣ်အဖိမုၣ်သ့ၣ်ဧၢ, ဟဲဒီးကွၢ်စီၤပၤၡလိၤမိၤတက့ၢ်. အဝဲအိၣ်ဒီးခိၣ်သလုးလၢအမိၢ်ဒုးကုာ်ထီၣ်အီၤလၢအခိၣ်လိၤ, ဖဲအဒိးတ့ဒိးဖျီအသးအနံၤ, အမုၢ်နံၤလၢအပှဲၤဒီးတၢ်သူၣ်ခုသးခုဒီးတၢ်သူၣ်ဖှံသးညီ န့ၣ်လီၤ.

လံာ်ယၡါယၤ 52:1

ဝ့ၢ်ယရူၤၡလ့ၣ်ဧၢ, ဂံၢ်ဆူၣ်ဘါဆူၣ်ဒီး ဒိၣ်ကဒီးက့ၤနဲတက့ၢ်. ကစၢ်ယွၤအဝ့ၢ်စီဆှံဧၢ, ကူသိးထီၣ်နဲတၢ်ဃံဒိၣ်လၤဒိၣ်တ က့ၢ်. ပှၤတသ့ၣ်ညါယွၤတဟဲနုာ်ဘၣ်ကဒီး လၢနတြဲၤတဖၣ်အပူၤနီတစုဘၣ်.

လံာ်ယၡါယၤ 62:5

ဒ်ပိာ်ခွါသးစၢ်တဂၤဟံးန့ၢ်မုၣ်လိၤဘိတဂၤဒ် တလးမူးပိာ်မုၣ်အသိးန့ၣ်, ပှၤလၢအတ့လီၤတ့ၢ်နၤကဖျီအသးဒီးနၤလီၤ. ဒ်တလးမူးပိာ်ခွါတဂၤသူၣ်ဖှံသးညီဒီး တလးမူးပိာ်မုၣ်အသိးန့ၣ်, နကစၢ်ယွၤကသူၣ်ဖှံသးညီလၢနပူၤလီၤ.

လံာ်ယၡါယၤ 66:10

သူၣ်ခုသးခုဃုာ်ဒီးဝ့ၢ်ယရူၤၡလ့ၣ်, သူၣ်ဖှံသးညီလၢအဃိသု ဝဲပှၤလၢအအဲၣ်ဘၣ်ဝ့ၢ်အံၤခဲလၢာ်သ့ၣ်ဧၢ သူၣ်ခုသးခုဃုာ်ဒီးအီၤခဲအံၤ, သုဝဲပှၤလၢအသူၣ်အုးသးအုး လၢအဃိခဲလၢာ်သ့ၣ်ဧၢ.

လံာ်ယၡါယၤ 66:14

ဖဲသုထံၣ်ဘၣ်တၢ်အံၤမၤအသးဒီး, သုကသူၣ်ဖှံသးညီဝဲလီၤ. တၢ်အံၤကဒုးဆူၣ်ထီၣ်သုဂံၢ် သုဘါဒီးဒုးအိၣ်ဆူၣ်အိၣ်ချ့သုလီၤ. အန့ၣ်ဒီးသုကသ့ၣ်ညါလၢယၤ, ယွၤအံၤ, မၤစၢၤပှၤတဖၣ်လၢအစူၢ်ယၤ, ဒီးယဒုးနဲၣ်ယတၢ်သးဒိၣ် ထီၣ်ထီဒါယဒုၣ်ယဒါတဖၣ်န့ၣ်လီၤ.”

လံာ်စကၤရယၤ 9:9

ဝ့ၢ်စံယိၣ်အပှၤဂီၢ်မုၢ်သ့ၣ်ဧၢ, သူၣ်ဖှံသးညီဒီးသူၣ်ခုသးခုတက့ၢ်. ယရူၤၡလ့ၣ်အပှၤဂီၢ်မုၢ်သုဝဲသ့ၣ်ဧၢ, ကိးပသူထီၣ်လၢတၢ်သးခု အပူၤတက့ၢ်. ကွၢ်ကွၢ်, နစီၤပၤဟဲဆူနအိၣ်လံ. အဝဲဟဲဝဲအိၣ်ဒီးတၢ်သးခုအတၢ်မၤနၢၤ, ဒီးဒ်ပှၤလၢအမၤနၢၤတၢ်အသိးလီၤ. ဘၣ်ဆၣ်လၢတၢ်ဆီၣ်လီၤသးအပူၤ ဒိးကသ့ၣ်ယီၤတဒုလၢအမ့ၢ်, ကသ့ၣ်ယီၤသးစၢ်, ကသ့ၣ်ယီၤအဖိဒၣ်လဲာ်လီၤ.

လံာ်မးသဲ 1:20

ဘၣ်ဆၣ်ဒီး ဖဲအဝဲဆိကမိၣ်တၢ်ဂ့ၢ်အံၤအဖၢမုၢ်န့ၣ်, ယွၤအကလူးတဂၤလီၣ်ဖျါထီၣ်အသးလၢတၢ်မံမီၢ်အပူၤဒီးစံးဘၣ် အီၤ, “စီၤဒၤဝံးအဖိခွါစီၤယိၤသးဧၢ, တဘၣ်ပျံၤလၢနကဟံးန့ၢ်နီၢ်မၤရံဒ်နမါအသိးတဂ့ၤ. အဂ့ၢ်ဒ်အံၤအဝဲဒၢထီၣ်ဒၣ်လၢသးစီဆှံအစိကမီၤလီၤ.

လံာ်မးသဲ 22:2

“မူခိၣ်အဘီအမုၢ်န့ၣ်မၤအသးဒ်အံၤလီၤ. တဘျီစီၤပၤတဂၤကတဲာ်ကတီၤတၢ်ဖျီအမူးလၢအဖိခွါအဂီၢ်လီၤ.

လံာ်လူၤကၣ် 12:36

ဒ်တၢ်ခ့တၢ်ပှၤတဖၣ်လၢအအိၣ်ခိးအကစၢ်အတၢ်ဟဲက့ၤလၢတၢ်တ့တၢ်ဖျီ အမူးအဂီၢ်အသိးန့ၣ်တက့ၢ်. ဖဲအဝဲဒၣ်ဟဲဒီးဒိတကျိာ်တၢ်န့ၣ်, အဝဲသ့ၣ်ကအိးထီၣ်တြဲၤလၢအဂီၢ်တဘျီဃီလီၤ.

လံာ်ယိၤဟၣ် 3:29

ပှၤလၢအဘၣ်ဃးဒီးတလးမူးပိာ်ခွါန့ၣ်မ့ၢ်တလးမူးပိာ်မုၣ်လီၤ. ဘၣ်ဆၣ်ဒီး, တလးမူးပိာ်ခွါအတံၤသကိးလၢအဆၢထၢၣ်ဒီးဒိ ကနၣ်တၢ်တဂၤန့ၣ်, တုၤအနၢ်ဟူတလးမူးပိာ်ခွါအကလုၢ်ဒီး သးခုဒိၣ်မးလီၤ. ယတၢ်သးခုန့ၣ်လၢထီၣ်ပှဲၤထီၣ်လၢကျဲဒ်အံၤလီၤ.

၂ ကရံၣ်သူး 11:2

ယသးက့ၣ်တၢ်လၢသုဂီၢ်ဒ်ကစၢ်ယွၤသးက့ၣ်ဝဲအသိးန့ၣ်လီၤ. သုလီၤဂာ်ဒီးမုၣ်ကနီၤနီၢ်နီၢ်တဂၤ လၢယအၢၣ်လီၤအီလီၤတ့ၢ် ယဲလၢယကဒိးတ့ဒိးဖျီအီၤဒီးပိာ်ခွါထဲတဂၤဧိၤ, ခရံာ်အနီၢ်ကစၢ်ဒၣ်ဝဲန့ၣ်လီၤ.

အ့းဖ့းစူး 5:23

အဂ့ၢ်ဒ်အံၤ, ဝၤမ့ၢ်မါအခိၣ်ဒ်ခရံာ်မ့ၢ်တၢ်အိၣ်ဖှိၣ်အခိၣ်အသိး န့ၣ်လီၤ. ခရံာ်အနီၢ်ကစၢ်ဒၣ်ဝဲမ့ၢ်ပှၤလၢအအုၣ်က့ၤခီၣ်က့ၤတၢ် အိၣ်ဖှိၣ်, လၢအမ့ၢ်အနီၢ်ခိန့ၣ်လီၤ.

အ့းဖ့းစူး 5:32

လၢတၢ်အံၤအပူၤတၢ်မ့ၢ်တၢ်တီခူသူၣ်ဘၣ်တၢ်လီၣ်ဖျါထီၣ်အီၤ လီၤ. ယနၢ်ပၢၢ်လၢတၢ်အံၤမ့ၢ်တၢ်ဘၣ်ဃးဒီးခရံာ်ဒီးတၢ်အိၣ်ဖှိၣ် အဂ့ၢ်လီၤ.

လံာ်သိၣ်လီၤသီလီၤတၢ် 32:43

ပှၤကလုာ်တဖၣ်ဧၢ, သုကဘၣ်စံးထီၣ်ပတြၢၤယွၤအပှၤဂီၢ်မုၢ်, အဝဲစံၣ်ညီၣ်ကယဲၢ်ပှၤလၢအမၤသံအဝဲသ့ၣ်န့ၣ်လီၤ. အဝဲဟ့ၣ်ကၣ်တၢ်လၢအဒုၣ်အဒါတဖၣ်အလိၤ ဒီးပျၢ်ကွံာ်အဝဲအပှၤဂီၢ်မုၢ်အတၢ်ဒဲးဘးတဖၣ်န့ၣ်လီၤ.”

ဖံလံးပံၤ 3:3

ပှၤလၢအဒိးတ့ၢ်တၢ်ကူးတရံးနီၢ်နီၢ်န့ၣ်မ့ၢ်ပဝဲသ့ၣ်တဖၣ်လီၤ. တမ့ၢ်အဝဲသ့ၣ်ဘၣ်. အဂ့ၢ်ဒ်အံၤ, ပဘူၣ်ထီၣ်ဘါထီၣ်ကစၢ်ယွၤခီဖျိယွၤအသးဒီးပသူၣ်ခုသးခုလၢ ပအိၣ်မူပဝဲလၢယ့ၣ်ၡူးခရံာ်အပူၤအဃိန့ၣ်လီၤ. ပတပာ်ပတၢ်နာ်လၢတၢ်အလုၢ်အလၢ်လၢအအိၣ်ဖျါလၢခိတဖၣ်န့ၣ် အလိၤနီတစဲးဘၣ်.

လံာ်လီၣ်ဖျါ 11:13

တကတီၢ်ဃီဖဲန့ၣ်ဟီၣ်ခိၣ်ဟူးဝးဝဲဒၣ်ဆူၣ်ဆူၣ်ကလဲာ်, ဝ့ၢ်အဆံဆဲၣ်ပူဘၣ်တၢ်မၤဟးဂီၤကွံာ်အီၤ, ဒီးပှၤအဂၤနွံကထိ သံကွံာ်ဝဲဒၣ်လီၤ. ပှၤအိၣ်လီၤတဲာ်တ့ၢ်တဖၣ်အသူၣ်ပျံၤသးဖုး ဒီးစံးထီၣ်ပတြၢၤကစၢ်ယွၤလၢမူခိၣ်တဂၤအတၢ်ဒိၣ်တၢ်မုၢ် န့ၣ်လီၤ.

လံာ်လီၣ်ဖျါ 19:9

တုၤနုၤတစုကလူးန့ၣ်စံးဘၣ်ယၤ, “ကွဲးလီၤတၢ်အဝဲအံၤတက့ၢ်. ပှၤတဖၣ်လၢအဘၣ်တၢ်ကွဲတ့ၢ်လံအီၤဆူသိဖိအတၢ်တ့တၢ်ဖျီ အမူးပူၤန့ၣ်ဘၣ်ဆိၣ်ဂ့ၤဝဲဒၣ်လီၤ.” ဒီးကလူးန့ၣ်တဲအါထီၣ်ဝဲ, “တၢ်သ့ၣ်တဖၣ်အံၤမ့ၢ်ဝဲကစၢ်ယွၤအကလုၢ်ကထါအမ့ၢ်အတီ တဖၣ်လီၤ.”

လံာ်လီၣ်ဖျါ 21:2

ဒီးယထံၣ်ဝ့ၢ်စီဆှံ, ဝ့ၢ်ယရူၤၡလ့ၣ်အသီတဖျၢၣ်န့ၣ်, ဟဲလီၤလၢမူခိၣ်လၢကစၢ်ယွၤအအိၣ်, ဘၣ်တၢ်ကတဲာ်ကတီၤအီၤဒီးအိၣ်ကတဲာ်ကတီၤပာ်အသး, ဒ်တလးမူးပိာ်မုၣ်တဂၤဘၣ်တၢ်ဒုးကူဒုးသိးပာ်အီၤလၢ အကသဂၢၢ်အဝၤအဂီၢ်အသိးန့ၣ်လီၤ.

လံာ်လီၣ်ဖျါ 21:9

ကလူးနွံဂၤလၢအအိၣ်ဒီးသလၢနွံဖျၢၣ်လၢအပှဲၤဒီးတၢ်နး တၢ်ဖှီၣ်လၢခံကတၢၢ်နွံမံၤန့ၣ်အကျါတဂၤဟဲဆူယအိၣ် ဒီးစံးဝဲ, “ဟဲ, ဒီးယကဒုးနဲၣ်နၤတလးမူးပိာ်မုၣ်လၢအမ့ၢ် သိဖိတဒုန့ၣ်အမါလီၤ.”

လံာ်စီၤၡမူၤအ့လးအခီၣ်ထံးတဘ့ၣ် 2:1

နီၢ်ဃးနၤဘါထုကဖၣ်ဝဲ, “ယွၤမၤပှဲၤတ့ၢ်ယသးဒီးတၢ်သူၣ်ခုသးခု လၢတၢ်လၢအမၤတ့ၢ်ဝဲအဃိန့ၣ်ယသူၣ်ဖှံသးညီ ဆံးဒိၣ်လဲၣ်. ယနံၤဘၣ်ယဒုၣ်ယဒါတဖၣ်, ယသူၣ်ခုသးခုဒိၣ်မးလဲၣ်. အဂ့ၢ်ဒ်အံၤ, ကစၢ်ယွၤမၤစၢၤတ့ၢ်ယၤလီၤ.