တၢ်ကတိၤဒိ. 29:18 - Sgaw Karen Common Bible

¹⁸ တၢ်ထံၣ်လၢညါမ့ၢ်တအိၣ်နီတမံၤဘၣ်ဒီးပှၤဂီၢ်မုၢ်ဟးဂီၤဝဲ လီၤ. မ့မ့ၢ်ပှၤလၢအတိၢ်န့ၢ်ကစၢ်ယွၤအတၢ်သိၣ်တၢ်သီန့ၣ်, ဘၣ်ဆိၣ်ဂ့ၤဝဲလီၤ.

တၢ်ကတိၤဒိ. 29:18 Iomraidhean Croise

လံာ်ကွဲးနီၣ်တၢ်ခံဘ့ၣ်တဘ့ၣ် 28:19

မ့ၢ်လၢကီၢ်ယူဒၤအစီၤပၤအၤဃးမၤတရီတပါကွံာ်အပှၤဂီၢ်မုၢ် အတၢ်ခွဲးတၢ်ယာ်တဖၣ်ဒီးခီၣ်ဆၢဝဲယွၤအဃိ, ယွၤဟဲစိာ်တၢ်ကိၢ်တၢ်ဂီၤလၢကီၢ်ယူဒၤအလိၤန့ၣ်လီၤ.

စံးထီၣ်ပတြၢၤ 106:3

ပှၤလၢအတိၢ်န့ၢ်အဝဲအတၢ်မၤလိာ်တဖၣ်, ဒီးပှၤလၢအမၤတၢ်တီတၢ်လိၤ ကိးဆၢကိးကတီၢ်ဒဲးန့ၣ်ဘၣ်ဆိၣ်ဂ့ၤဝဲလီၤ.

စံးထီၣ်ပတြၢၤ 119:1

ပှၤလၢအလဲၤတၢ်လၢယွၤတၢ်သိၣ်တၢ်သီအပူၤ, ဒီးအကျဲတအိၣ်ဘၣ်ဒီးတၢ်ကမၣ်န့ၣ်, ဘၣ်ဆိၣ်ဂ့ၤဝဲလီၤ.

စံးထီၣ်ပတြၢၤ 119:2

ပှၤလၢအတိၢ်န့ၢ်ဖံးဃာ်အတၢ်အုၣ်အသး ဒီးဃုယွၤလၢအသးဒီဖျၢၣ်ညါန့ၣ်, ဘၣ်ဆိၣ်ဂ့ၤဝဲလီၤ.

စံးထီၣ်ပတြၢၤ 19:11

နခ့နပှၤဒိးတၢ်ဒုးပလီၢ်အသးစ့ၢ်ကီးလၢအီၤ, ပှၤလၢအတိၢ်န့ၢ်အီၤန့ၣ် ဒိးန့ၢ်အဘျုးဖးဒိၣ်လီၤ.

စံးထီၣ်ပတြၢၤ 74:9

ပတထံၣ်ဘၣ်ပတၢ်ပနီၣ်စီဆှံတဖၣ်လၢၤဘၣ်, ဝံတအိၣ်လၢၤနီတဂၤဘၣ်, ဒီးတၢ်အံၤကယံာ်ဆံးယံာ်လဲၣ်န့ၣ် ပှၤလၢပကျါတသ့ၣ်ညါနီတဂၤဘၣ်.

လံာ်တၢ်ဟးထီၣ်ကွံာ် 32:25

စီၤမိၤၡ့ထံၣ်ဝဲလၢစီၤအၤဟရိၣ်ပျဲပှၤဂီၢ်မုၢ်လူၤဘၣ်အသး ဒီးမၤဟးဂီၤလီၤအသးဒၣ်ဝဲလၢအဒုၣ်အဒါတဖၣ်အမဲာ်ညါလီၤ.

တၢ်ကတိၤဒိ. 19:16

တိၢ်န့ၢ်ကစၢ်ယွၤအတၢ်သိၣ်တၢ်သီတဖၣ်ဒီးနကအိၣ်မူယံာ်ထီၣ် လီၤ. နမ့ၢ်ကွၢ်ကပာ်ကွံာ်အီၤဒီးနကသံလီၤ.

တၢ်ကတိၤဒိ. 29:19

နသိၣ်ဂ့ၤသီဘၣ်တၢ်ခ့တၢ်ပှၤတဂၤထဲလၢတၢ်ကတိၤတဖၣ်ဧိၤန့ၣ်တသ့ ဘၣ်. ဘၣ်သ့ၣ်သ့ၣ်ကနၢ်ပၢၢ်ဝဲလီၤ. ဘၣ်ဆၣ်ဒီးတပာ်လ့ၤပာ်ကါဝဲဘၣ်.

တၢ်ကတိၤဒိ. 8:32

ဒီးခဲကနံၣ်အံၤပှၤသးစၢ်သ့ၣ်ဧၢ, ကနၣ်ယကလုၢ်တက့ၢ်. မၤဒ်ယစံးဘၣ်သုအသိးဒီးသုကဘၣ်ဆိၣ်ဂ့ၤလီၤ.

လံာ်ဟိၤၡ့ 4:6

ယပှၤဂီၢ်မုၢ်ဘၣ်တၢ်စံၣ်ညီၣ်ဃါမနၤလီၤ. အဂ့ၢ်ဒ်အံၤ, အဝဲသ့ၣ်, တသ့ၣ်ညါအၢၣ်လီၤယၤဘၣ်. သုဝဲပှၤလုၢ်တၢ်အခိၣ်တဖၣ်ဂ့ၢ်လိာ်သ့ၣ်ညါအၢၣ်လီၤတ့ၢ်ယၤ, ဒီးညိကွံာ်တ့ၢ်ယတၢ်သိၣ်လိလီၤ. ဒီးလၢတၢ်န့ၣ်အဃိ, ယကညိကွံာ်သုဒီးတသ့ၣ်ညါအၢၣ်လီၤဘၣ်သုဖိခွါတဖၣ် ဒ်ပှၤလုၢ်တၢ်အခိၣ်တဖၣ်အသိးဘၣ်န့ၣ်လီၤ.

လံာ်မးသဲ 9:36

တုၤအဝဲထံၣ်ပှၤဂီၢ်မုၢ်တဖၣ်ဒီးအသးပှဲၤဒီးတၢ်သးကညီၤဘၣ် အဝဲသ့ၣ်လီၤ. အဂ့ၢ်ဒ်အံၤ, အဝဲသ့ၣ်အသူၣ်ကိၢ်သးဂီၤဒီးပှၤမၤစၢၤအီၤတအိၣ်ဘၣ်ဒီး လီၤဂာ်ဒ်သိလၢအပှၤကွၢ်သိတအိၣ်ဘၣ်တဖၣ်အသိးလီၤ.

လံာ်လူၤကၣ် 11:28

ဘၣ်ဆၣ်ဒီးယ့ၣ်ၡူးစံးဆၢဝဲ, “ပှၤလၢအဘၣ်ဆိၣ်ဂ့ၤဝဲတဖၣ်န့ၣ်, အနီၢ်နီၢ်, မ့ၢ်ပှၤလၢအနၢ်ဟူကစၢ်ယွၤအကလုၢ်ကထါဒီးစူၢ်ဝဲန့ၣ်လီၤ.”

လံာ်ယိၤဟၣ် 13:17

ခဲအံၤမ့ၢ်လၢသုသ့ၣ်ညါတၢ်မ့ၢ်တၢ်တီအံၤလံဒီး, သုမ့ၢ်မၤအီၤန့ၣ်, သုကဘၣ်ဆိၣ်ဂ့ၤနီၢ်နီၢ်လီၤ.

ယၤကိာ် 1:25

ဘၣ်ဆၣ်ဒီးပှၤတဂၤဂ့ၤတဂၤဂ့ၤလၢအကွၢ်ထံတၢ်သိၣ်တၢ်သီ အလၢအပှဲၤလၢအမၤထူၣ်ဖျဲးပှၤကညီ, လၢအကွၢ်ထံမၤလိဝဲ တထံၣ်ဃီ, ဒီးတမ့ၢ်ထဲအဒိကနၣ်ဝဲဒီးသးပ့ၤနီၣ်ကွံာ်အီၤန့ၣ်ဘၣ်, မ့မ့ၢ်အိၣ်မူမၤထွဲဝဲန့ၣ်, ကစၢ်ယွၤကဆိၣ်ဂ့ၤအီၤလၢအတၢ်ဖံး တၢ်မၤအပူၤန့ၣ်လီၤ.

လံာ်လီၣ်ဖျါ 22:14

ပှၤသ့ၣ်တဖၣ်လၢအသ့စီကွံာ်အဆ့ကၤဖးထီသတးဒီး အိၣ်ဒီးအခွဲးအယာ်လၢအကအီၣ်သ့ၣ်တၢ်မူအသၣ် ဒီးလဲၤခီဂာ်တြဲၤဖးဒိၣ်တဖၣ်ဆူဝ့ၢ်တဖျၢၣ်န့ၣ်အပူၤန့ၣ်, ဘၣ်ဆိၣ်ဂ့ၤဝဲလီၤ.

လံာ်စီၤၡမူၤအ့လးအခီၣ်ထံးတဘ့ၣ် 3:1

လၢမုၢ်နံၤတဖၣ်အပူၤ, ဖဲဖိသၣ်စီၤၡမူၤအ့လးမၤယွၤအတၢ်မၤ လၢစီၤဧ့လံၤအတၢ်နဲၣ်ကျဲအဖီလာ်အခါန့ၣ်, တၢ်ကစီၣ်ဟဲလၢယွၤစှၤဒိၣ်မးလီၤ. ဒီးတၢ်ထံၣ်လၢညါခီတဖၣ် လၢအဟဲလၢအအိၣ်န့ၣ်ကၤဒိၣ်မးလီၤ.