လံာ်မၢ်ကူး 9:50 - Sgaw Karen Common Bible

⁵⁰ အံသၣ်မ့ၢ်တၢ်လၢအဂ့ၤလီၤ. ဘၣ်ဆၣ်ဒီးမ့ၢ်တဟီလၢၤဘၣ်န့ၣ်, သုကမၤဟီထီၣ်က့ၤအီၤဒ်လဲၣ်. လၢသုတၢ်ရ့လိာ်သကိးသုသးအပူၤန့ၣ်, အိၣ်ဒီးတၢ်အသဟီၣ်ဒ်အံသၣ် အသိးဒီးအိၣ်ဃူအိၣ်ဖိးလိာ်သုသးတဂၤဒီးတဂၤတက့ၢ်.”

လံာ်မၢ်ကူး 9:50 Iomraidhean Croise

လံာ်စီၤယိၤဘး 6:6

ဘၣ်ဆၣ်ဒီးတၢ်အီၣ်အဘျါလၢတအိၣ်ဒီးအံသၣ်န့ၣ်မတၤအီၣ် ကဝံၣ်လဲၣ်. လၢထိၣ်ဒံၣ်အကပိၤဝါပူၤန့ၣ်တၢ်အဝံၣ်အဘဲမနုၤ တမံၤအိၣ်လဲၣ်.

စံးထီၣ်ပတြၢၤ 133:1

ဒီပုၢ်ဝဲၢ်အိၣ်ဝဲဆိးဝဲလၢအသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ်ဆံးဒိၣ်လဲၣ်န့ၣ် ကွၢ်ကွၢ်တက့ၢ်.

စံးထီၣ်ပတြၢၤ 34:14

ဟးဆှဲးတၢ်မၤတၢ်အၢတၢ်သီဒီးမၤတၢ်ဂ့ၤတက့ၢ်. ဃုတၢ်ဃူတၢ်ဖိးဒီးလူၤပိာ်ထွဲအခံတက့ၢ်.

လံာ်ယဃ့းစက့လး 43:24

ဒီးဟဲစိာ်အီၤဆူယအိၣ်တက့ၢ်. ပှၤလုၢ်တၢ်အခိၣ်တဖၣ်ကဖှံလီၤ အံသၣ်လၢအဝဲသ့ၣ်အဖီခိၣ်ဒီးဆိၣ်ကဲၤထီၣ်အီၤဒ်တၢ်လုၢ်တၢ်ပာ် တမံၤအသိးဆူယအိၣ်န့ၣ်လီၤ.

လံာ်မးသဲ 5:13

သုဝဲသ့ၣ်အံၤ သုမ့ၢ်ဒ်အံသၣ်အသိးလၢပှၤဟီၣ်ခိၣ်ဖိခဲလၢာ်အဂီၢ်လီၤ. ဘၣ်ဆၣ်ဒီး အံသၣ်မ့ၢ်တဟီလၢၤဘၣ်ဒီးတၢ်မၤဟီထီၣ်က့ၤအီၤတသ့ဘၣ်. အဘျုးတအိၣ်လၢၤဘၣ်ဒီးဂ့ၤဒၣ်ထဲလၢကဘၣ်တၢ်စူးကွံာ် အီၤလၢကျဲခိၣ်ကျဲလိၤဒီးဘၣ်တၢ်ယီၢ်အီၤခါအီၤအဂီၢ်လီၤ.

လံာ်မၢ်ကူး 9:34

အဝဲသ့ၣ်အိၣ်ဘှီၣ်ကလာ်ဒီးတစံးဆၢတၢ်နီတမံၤဘၣ်. အဂ့ၢ်ဒ်အံၤ, ဖဲအဝဲသ့ၣ်ဟဲလၢကျဲအခါဂ့ၢ်လိာ်ဘှီလိာ်အသးဘၣ်ဃးပှၤ အိၣ်ဒီးအလီၢ်အလၤဒိၣ်ကတၢၢ်လၢအဝဲသ့ၣ်အကျါ မ့ၢ်မတၤတဂၤလဲၣ်န့ၣ်လီၤ.

လံာ်မၢ်ကူး 9:49

ပှၤကိးဂၤဒဲးကဘၣ်တၢ်မၤကဆှီထီၣ်အီၤလၢမ့ၣ်အူ, ဒ်တၢ်လုၢ်တၢ်ပာ်ဘၣ်တၢ်မၤကဆှီထီၣ်အီၤလၢအံသၣ်အသိးန့ၣ်လီၤ.

ရိမ့ၤ 12:18

မ့မ့ၢ်သုဝဲတခီ, ဖဲသုသ့န့ၣ်အိၣ်ဃူလိာ်ဖိးလိာ်သုသး ဒီးပှၤခဲလၢာ်တက့ၢ်.

၂ ကရံၣ်သူး 13:11

ဒီးခဲကနံၣ်အံၤဒီပုၢ်ဝဲၢ်သ့ၣ်ဧၢ, ပလီၤဖးမုာ်မုာ်လီၤ. ဂဲၤပျုၢ်ဂဲၤဆှးလၢ တၢ်လၢတၢ်ပှဲၤအဂီၢ်တက့ၢ်. ဒိကနၣ်ယတၢ်သကွံၢ်ကညးတဖၣ်အိၣ်ဒီးတၢ်သူၣ်လီၤ ပလိာ်သးလီၤပလိာ်လၢတဂၤဒီးတဂၤအဘၢၣ်စၢၤဒီး အိၣ်မူလၢတၢ်ဃူတၢ်ဖိးအပူၤတက့ၢ်. ဒီးကစၢ်ယွၤလၢအဘၣ်ဃးဒီးတၢ်အဲၣ်တၢ်ကွံဒီး တၢ်ဃူတၢ်ဖိးတဂၤန့ၣ်ကအိၣ်ဒီးသုလီၤ.

ကလၤတံ 5:22

မ့မ့ၢ်ယွၤအသးန့ၣ်, ဒုးအိၣ်ထီၣ်တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်ကညီၤသးကညီၤ, တၢ်မၤဂ့ၤတၢ်, တၢ်သးတီ,

အ့းဖ့းစူး 4:29

တၢ်ကတိၤအအၢအသီန့ၣ်ဒုးထီၣ်ဖျဲးအီၤလၢသုထးခိၣ် တဂ့ၤ. ကတိၤထဲတၢ်ကတိၤအဂ့ၤလၢအမၤထီၣ်မၤထီတၢ်, လၢအဘၣ်ဘျီးဘၣ်ဒါတဖၣ်, ဒ်သိးဒီးပှၤလၢအနၢ်ဟူအီၤတဖၣ်ကန့ၢ်ဘျုးန့ၢ်ဖှိၣ်အဂီၢ်န့ၣ်တက့ၢ်.

ဖံလံးပံၤ 1:27

အခဲအံၤ, တၢ်လၢအကါဒိၣ်န့ၣ်မ့ၢ်ဝဲသုတၢ်အိၣ်မူအကျဲကြၢးမ့ၢ်ဝဲဒ် ခရံာ်အတၢ်သးခုကစီၣ်လိၣ်ဘၣ်ဝဲအသိး, ဒ်သိးယလဲၤထံၣ်လိာ် သုသ့မ့ၢ်ဂ့ၤ, တသ့မ့ၢ်ဂ့ၤ, ယကနၢ်ဟူဘၣ်ယဲလၢသုဆၢထၢၣ်ဂၢၢ်ကျၢၤအိၣ်ဒီးတၢ်တိာ်ပာ် တမံၤဃီဒီးလၢတၢ်အဲၣ်ဒိးတမံၤဃီအပူၤ, သုဒုးသကိးတၢ်လၢတၢ်စူၢ်တၢ်နာ်ဘၣ်ဃးဒီးတၢ်သးခုကစီၣ် အဂီၢ်န့ၣ်လီၤ.

ကလီးစဲ 3:12

သုမ့ၢ်ကစၢ်ယွၤအပှၤဂီၢ်မုၢ်ပှၤလၢယွၤအဲၣ်ဒိးဃုထၢထီၣ်အီၤ လၢအကမ့ၢ်အတၢ်ဒၣ်ဝဲလီၤ. လၢတၢ်န့ၣ်အဃိ, ကူထီၣ်သိးထီၣ်တၢ်သူၣ်ကညီၤသးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်ပာ်သးကပုာ်လုး, တၢ်ဝံသးစူၤတဖၣ်တက့ၢ်.

ကလီးစဲ 4:6

သုတၢ်စံးတၢ်ကတိၤန့ၣ်, မ်အကမ့ၢ်တၢ်လၢအမုာ်ဝဲဒီးထုးန့ၢ် ပှၤအသးဒီးသုကြၢးသ့ၣ်ညါစံးဆၢက့ၤပှၤကိးဂၤဒဲးသ့သ့ ဘၣ်ဘၣ်န့ၣ်လီၤ.

၁ သ့းစၤလနံ 5:13

အဝဲသ့ၣ်တဖၣ်န့ၣ်, ယူးယီၣ်ပာ်ဒိၣ်ဒီးအဲၣ်အီၤကွံအီၤဒိၣ်ဒိၣ် ကလဲာ်, မ့ၢ်လၢတၢ်ခဲလၢာ်လၢအမၤဝဲအဃိန့ၣ်တက့ၢ်. အိၣ်ဃူအိၣ်ဖိးလိာ်သုသးသကိးသကိးတက့ၢ်.

၂ တံၤမသ့း 2:22

ဟးဆှဲးပှၤသးစၢ်အတၢ်သူၣ်လီသးကွံတဖၣ်ဒီးဂဲၤပျုၢ် လၢတၢ်တီတၢ်လိၤ, တၢ်စူၢ်တၢ်နာ်, တၢ်အဲၣ်တၢ်ကွံ, ဒီးတၢ်ဃူတၢ်ဖိးအဂီၢ်, ဃုာ်ဒီးပှၤသ့ၣ်တဖၣ်လၢ အကိးထီၣ်ကစၢ်လၢတၢ်မၤစၢၤအဂီၢ်လၢတၢ်သးကဆှီ အပူၤန့ၣ်တက့ၢ်.

ဧ့ၤဘြံၤ 12:14

ဂုာ်ကျဲးစၢးဟံးဃာ်တၢ်အိၣ်ဃူအိၣ်ဖိးဒီးပှၤခဲလၢာ်တက့ၢ်. ဂုာ်ဟံးဃာ်စ့ၢ်ကီးတၢ်စီဆှံတက့ၢ်. တၢ်စီဆှံတအိၣ်ဘၣ်ဒီးပှၤတထံၣ်ဘၣ်ကစၢ်ယွၤနီတဂၤဘၣ်.

ယၤကိာ် 1:20

အဂ့ၢ်ဒ်အံၤ, ပှၤကညီအတၢ်သးဒိၣ်ထီၣ်န့ၣ်, တမၤန့ၢ်ကစၢ်ယွၤအတၢ်တိာ်ပာ်အတီအလိၤန့ၣ်ဘၣ်.

၁ ပ့းတရူး 3:8

လၢခံကတၢၢ်န့ၣ်, သုဝဲခဲလၢာ်သုကဘၣ်အိၣ်ဒီးတၢ်ပာ်သူၣ်ပာ် သးဒီးတၢ်ဆိကမိၣ်ဆိကမးတမံၤဃီလီၤ. အဲၣ်လိာ်သုသးတဂၤဒီးတဂၤဒ်ဒီပုၢ်ဝဲၢ်တဖၣ်အသိး, ဒီးအိၣ်ဒီးတၢ်သးကညီၤဒီးတၢ်ဆီၣ်လီၤသးလၢတဂၤဒီးတဂၤ အဖီလာ်န့ၣ်တက့ၢ်.