လံာ်မၢ်ကူး 8:31 - Sgaw Karen Common Bible

³¹ အန့ၣ်ဝံၤယ့ၣ်ၡူးသိၣ်လိအပျဲၢ်အဘီၣ်တဖၣ်ဒီးစံးဝဲ, “ပှၤကညီဖိခွါအံၤကဘၣ်တူၢ်တၢ်နးတၢ်ဖှီၣ်အကလုာ်ကလုာ် ဒီးပှၤယူဒၤဖိကရၢအခိၣ်အနၢ်တဖၣ်, ပှၤလုၢ်တၢ်အခိၣ်အဒိၣ်တဖၣ် ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ကညိကွံာ်အီၤလီၤ. ကဘၣ်တၢ်မၤသံအီၤဘၣ်ဆၣ်ဒီးသၢသီတသီန့ၣ်ကဂဲၤ ဆၢထၢၣ်က့ၤလၢတၢ်သံလီၤ.”

လံာ်မၢ်ကူး 8:31 Iomraidhean Croise

စံးထီၣ်ပတြၢၤ 118:22

လၢၢ်လၢပှၤသူၣ်ထီၣ်တၢ်ဖိတဖၣ်ညိကွံာ် ဝဲဒ်တၢ်ကလီကလီအသိးန့ၣ်, ကဲထီၣ်လၢၢ်လၢအကါဒိၣ်ကတၢၢ်န့ၣ်လံ.

လံာ်ယၡါယၤ 53:3

ပသးဘၣ်အၢအီၤဒီးပညိကွံာ်အီၤလီၤ. အဝဲတူၢ်ဘၣ်တၢ်နးတၢ်ဖှီၣ်ဒီးတၢ်ဆူးတၢ်ဆါန့ၣ်လီၤ. ပှၤတကွၢ်ဃီၤအီၤဒၣ်လဲာ်နီတဂၤဘၣ်. ပကွၢ်ကပာ်ကွံာ်အီၤဒ်အဝဲတမ့ၢ်တၢ်နီတမံၤဘၣ်အသိးန့ၣ်လီၤ.

လံာ်ဟိၤၡ့ 6:2

လၢခံနံၤမ့ၢ်ဂ့ၤ, သၢနံၤမ့ၢ်ဂ့ၤ, အဝဲကမၤမူထီၣ်က့ၤပှၤဒီး ပကအိၣ်ဆိးလၢအဝဲအမဲာ်ညါန့ၣ်လီၤ.

လံာ်ယိၤနါ 1:17

ဒီးယွၤမၤလိာ်ညၣ်ဖးဒိၣ်တဘ့ၣ်လၢကယူၢ်လီၤကွံာ်စီၤ ယိၤနါလီၤ. ဒီးစီၤယိၤနါအိၣ်ဝဲလၢညၣ်ဖးဒိၣ်အဟၢဖၢပူၤ န့ၣ်သၢနံၤဒီးသၢနၤလီၤ.

လံာ်မးသဲ 12:40

အဂ့ၢ်ဒ်အံၤ, ဒ်စီၤယိၤနါအိၣ်လၢညၣ်ဖးဒိၣ်အဟၢဖၢပူၤသၢနံၤသၢနၤ အသိးန့ၣ်, ပှၤကညီဖိခွါအံၤကအိၣ်လၢဟီၣ်ခိၣ်အသးကံၢ်ပူၤသၢနံၤသၢနၤ စ့ၢ်ကီးလီၤ.

လံာ်မးသဲ 21:42

ယ့ၣ်ၡူးစံးဘၣ်အဝဲသ့ၣ်, “တၢ်ကွဲးအသးစီဆှံလၢအစံး, ‘လၢၢ်တဖျၢၣ်လၢပှၤသူၣ်ထီၣ်ဟံၣ်တဖၣ်ညိကွံာ်အီၤဒ် တၢ်လၢအလုၢ်အပှ့ၤတအိၣ်ဘၣ်အသိးန့ၣ်, ကဲထီၣ်က့ၤလၢၢ်ခိၣ်စိလၢ အကါဒိၣ်ကတၢၢ်တဖျၢၣ်လီၤ. အအံၤမ့ၢ်ကစၢ်အတၢ်မၤ, ဒီးမ့ၢ်တၢ်လီၤလးဒိၣ်မးလၢပမဲာ်ညါလီၤ’ န့ၣ်, မ့ၢ်သုတဖးဘၣ်ဘၣ်ဧါ” (စံး. ၁၁၈:၂၂-၂၃).

လံာ်မးသဲ 27:63

ဒီးစံး, “တၢ်ဒိၣ်ဧၢ, ပသ့ၣ်နီၣ်ထီၣ်လၢပှၤလီတၢ်ဖိတဂၤန့ၣ်, ဖဲအမူဒံးအခါစံးတ့ၢ်ဝဲ, ‘သၢသီတသီန့ၣ်ယကဂဲၤဆၢထၢၣ်သမူထီၣ်က့ၤလီၤ.’

လံာ်မၢ်ကူး 12:10

တၢ်ကွဲးအသးအံၤမ့ၢ်သုတဖးဘၣ်ဒံးဘၣ်ဧါ. ‘လၢၢ်တဖျၢၣ်လၢပှၤဘှီထီၣ်ဟံၣ်တဖၣ်ညိကွံာ်ဝဲ ဒ်တၢ်လၢအဘျုးတအိၣ်နီတမံၤဘၣ်န့ၣ်, ကဲထီၣ်တ့ၢ်လံဟံၣ်သနၢၣ်အလၢၢ် လၢအဘျုးအဖှိၣ်အိၣ်ဒိၣ်ကတၢၢ်န့ၣ်လီၤ.

လံာ်လူၤကၣ် 17:25

ဘၣ်ဆၣ်ဒီးအဆိကတၢၢ်န့ၣ်, အဝဲကဘၣ်တူၢ်တၢ်အါမံၤအါကလုာ်, ဒီးကဘၣ်တၢ်ညိကွံာ်အီၤလၢပှၤတစိၤအံၤန့ၣ်လီၤ.

လံာ်လူၤကၣ် 24:26

မ့ၢ်အလီၢ်တအိၣ်လၢခရံာ်ကတူၢ်တၢ်သ့ၣ်တဖၣ်အံၤ, ဒီးနုာ်လီၤဆူအတၢ်လၤကပီၤအပူၤဘၣ်ဧါ.”

လံာ်လူၤကၣ် 24:44

အန့ၣ်ဝံၤဒီး စံးဘၣ်အဝဲသ့ၣ်, “တၢ်သ့ၣ်တဖၣ်အံၤမ့ၢ်ဒၣ်တၢ်တဖၣ်လၢ ယစံးဘၣ်တ့ၢ်သုဖဲယအိၣ်ဒံးယဲဒီးသုအဆၢကတီၢ်န့ၣ်လီၤ. တၢ်ခဲလၢာ်လၢအဘၣ်တၢ်ကွဲးတ့ၢ်အသးလၢယဂ့ၢ်ဖဲစီၤမိၤၡ့အတၢ်သိၣ်တၢ်သီ အလံာ်တဖၣ်အပူၤ, ဝံအတၢ်ကွဲးတဖၣ်, ဒီးလံာ်စံးထီၣ်ပတြၢၤတဖၣ်အပူၤန့ၣ်, ကဘၣ်လၢထီၣ်ပှဲၤထီၣ်ဝဲဒၣ်လီၤ.”

လံာ်ယိၤဟၣ် 12:48

ပှၤတဂၤလၢ်လၢ်လၢအညိကွံာ်ယၤဒီးတတူၢ်လိာ်ယတၢ် ကစီၣ်ဘၣ်န့ၣ်, တၢ်လၢအကစံၣ်ညီၣ်အီၤအိၣ်ဝဲန့ၣ်လီၤ. တၢ်ကတိၤလၢယကတိၤတ့ၢ်လံတဖၣ်ကကဲထီၣ်တၢ်လၢ အကစံၣ်ညီၣ်အီၤလၢမုၢ်နံၤခံကတၢၢ်န့ၣ်လီၤ.

လံာ်ယိၤဟၣ် 2:19

ယ့ၣ်ၡူးစံးဆၢဝဲ, “မၤလီၤပှီၢ်ကွံာ်တၢ်လုၢ်ဟံၣ်အံၤ တက့ၢ်. ဒီးလၢသၢသီအတီၢ်ပူၤန့ၣ်ယကသူၣ်ထီၣ်ကဒါ က့ၤအီၤန့ၣ်လီၤ.”

မၤတၢ် 7:35

စီၤမိၤၡ့မ့ၢ်ပှၤတဂၤဃီလၢအဘၣ်တၢ်ညိကွံာ်အီၤလၢပှၤ အံၣ်စရ့လးဖိခီဖျိတၢ်ကတိၤလၢအစံးဝဲ, ‘မ့ၢ်မတၤတဂၤဟ့ၣ်စိဟ့ၣ်ကမီၤနၤလၢနကပၢဘၣ်ဒီးစံၣ်ညီၣ်ပဝဲ ဒၣ်အံၤန့ၣ်လဲၣ်’ လီၤ. အဝဲမ့ၢ်ပှၤတဂၤဃီလၢကစၢ်ယွၤမၢလီၤအီၤလၢအကပၢဘၣ်ပှၤဂီၢ် မုၢ်ဒီးမၤထူၣ်ဖျဲးထီၣ်အီၤခီဖျိကလူးလၢအလီၣ်ဖျါထီၣ်အသး လၢတပှီာ်လၢမ့ၣ်အူအီၣ်အီၤတလိၣ်အပူၤတဂၤအတၢ်မၤစၢၤအီၤန့ၣ် လီၤ.

1 ကရံၣ်သူး 15:4

လၢအဝဲဒၣ်ဘၣ်တၢ်ခူၣ်လီၤအီၤဒီးဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဖဲသၢသီဝံၤအလီၢ်ခံ, ဒ်အအိၣ်ကွဲးအသးလၢတၢ်ကွဲးအသးစီဆှံအပူၤအသိးန့ၣ်,

လံာ်စီၤၡမူၤအ့လးအခီၣ်ထံးတဘ့ၣ် 10:19

ယမ့ၢ်သုကစၢ်ယွၤ, ပှၤတဂၤလၢအအုၣ်က့ၤခီၣ်က့ၤသုလၢကယဲၢ်သုတၢ်ကိၢ်တၢ်ဂီၤဒီး တၢ်ကီတၢ်ခဲတဖၣ်အပူၤန့ၣ်လီၤ. ဘၣ်ဆၣ်တနံၤအံၤသုညိကွံာ်ယၤဒီးဃ့တ့ၢ်ယၤလၢယကဟ့ၣ်သု စီၤပၤတဂၤလီၤ. ဂ့ၤလံ. မ့မ့ၢ်ဒ်န့ၣ်ဒီး, ပာ်ဖှိၣ်ထီၣ်သုသး လၢယွၤအမဲာ်ညါဒ်ဒူၣ်, တဒူၣ်ဘၣ်တဒူၣ်ဒီးဒူၣ်ထၢတဒူၣ်တထၢဘၣ် တဒူၣ်တထၢအသိးတက့ၢ်.”

လံာ်စီၤၡမူၤအ့လးအခီၣ်ထံးတဘ့ၣ် 8:7

ဒီးယွၤစံးဘၣ်အီၤ, “ဒိကနၣ်တၢ်ကိးမံၤဒဲးလၢပှၤဂီၢ်မုၢ် စံးဘၣ်နၤတက့ၢ်. ပှၤတဂၤလၢအဝဲသ့ၣ်သမၢဂ့ၢ်လိာ်အီၤန့ၣ်တမ့ၢ်နၤဘၣ်. ယမ့ၢ်ပှၤတဂၤလၢအဝဲသ့ၣ်သမၢဂ့ၢ်လိာ်အီၤဒ်အစီၤပၤအသိးန့ၣ် လီၤ.