လံာ်မၢ်ကူး 7:17 - Sgaw Karen Common Bible

¹⁷ တုၤမ့ၢ်အဟးထီၣ်ကွံာ်လၢပှၤဂီၢ်မုၢ်အအိၣ်ဒီးက့ၤနုာ်ဝဲဆူဟံၣ်ပူၤန့ၣ်, အပျဲၢ်အဘီၣ်တဖၣ်သံကွၢ်အီၤတၢ်ကတိၤဒိအခီပညီန့ၣ်လီၤ.

လံာ်မၢ်ကူး 7:17 Iomraidhean Croise

လံာ်မးသဲ 13:10

တုၤနုၤတစုအပျဲၢ်အဘီၣ်တဖၣ်ဟဲဆူယ့ၣ်ၡူးအအိၣ်ဒီးသံကွၢ်အီၤ, “နမ့ၢ်ကတိၤတၢ်ဒီးပှၤတဖၣ်န့ၣ်, ဘၣ်မနုၤလၢနသူတၢ်ကတိၤဒိတဖၣ်လဲၣ်.”

လံာ်မးသဲ 13:36

တုၤနုၤတစုယ့ၣ်ၡူးဟးဖးဒီးပှၤဂီၢ်မုၢ်ဒီးက့ၤဝဲဆူဟံၣ်ပူၤန့ၣ်လီၤ. အပျဲၢ်အဘီၣ်တဖၣ်လဲၤဆူအအိၣ် ဒီးစံးဘၣ်အီၤ, “တဲဖျါန့ၢ်ပှၤလၢတၢ်ကတိၤဒိဘၣ်ဃးဒီး နီၣ်စံစၣ်လၢပျီပူၤအခီပညီတက့ၢ်.”

လံာ်မးသဲ 15:15

စီၤပ့းတရူးစံး, “တဲဘၣ်ပှၤလၢတၢ်ကတိၤဒိအံၤအခီ ပညီတက့ၢ်.”

လံာ်မၢ်ကူး 2:1

စှၤနံၤစှၤသီပူၤကွံာ်ဝံၤအလီၢ်ခံဒီး, ယ့ၣ်ၡူးက့ၤကဒါက့ၤဝဲဆူဝ့ၢ် ကပ့းရနီၣ်ဒီးတၢ်ကစီၣ်ဟူထီၣ်သါလီၤလၢအဝဲဒၣ်အိၣ်လၢဟံၣ်ပူၤလီၤ.

လံာ်မၢ်ကူး 3:20

အန့ၣ်ဝံၤဒီး ယ့ၣ်ၡူးက့ၤဝဲဆူဟံၣ်လၢအလဲၤအိၣ်တ့ၢ်ဝဲန့ၣ်လီၤ. ပှၤဂီၢ်မုၢ်ဟဲပာ်ဖှိၣ်ထီၣ်ကဒီးအသးတုၤဒၣ်လဲာ် ယ့ၣ်ၡူးဒီးအပျဲၢ်အဘီၣ်တဖၣ်ကအီၣ်တၢ်အဂီၢ် တၢ်ဆၢကတီၢ်တအိၣ်လၢၤဘၣ်န့ၣ်လီၤ.

လံာ်မၢ်ကူး 4:10

ဖဲယ့ၣ်ၡူးအိၣ်ဝဲထဲတဂၤဧိၤအခါ, ပှၤတနီၤလၢအနၢ်ဟူတ့ၢ်အတၢ်စံးတၢ်ကတိၤန့ၣ် ဟဲဆူအအိၣ်ဃုာ်ဒီးတၢ်မၢဖိတဆံခံဂၤဒီးသံကွၢ်အီၤတၢ် ကတိၤဒိတဖၣ်အခီပညီအိၣ်ဝဲဒ်လဲၣ်န့ၣ်လီၤ.

လံာ်မၢ်ကူး 4:34

မ့တမ့ၢ်ဘၣ်လၢတၢ်ကတိၤဒိတဖၣ်ဘၣ်ဒီး, အဝဲဒၣ်တသိၣ်လီၤသီလီၤအဝဲသ့ၣ်လၢတၢ်နီတမံၤဘၣ်. မ့မ့ၢ်တုၤအအိၣ်ဒၣ်ထဲအဝဲဒၣ်ဒီးအပျဲၢ်အဘီၣ်တဖၣ်န့ၣ်, ကတိၤဖျါထီၣ်တၢ်အခီပညီတဖၣ်ခဲလၢာ်လၢအဝဲသ့ၣ်လီၤ.

လံာ်မၢ်ကူး 7:16

(ပှၤလၢအအိၣ်ဒီးအနၢ်လၢအနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.)”

လံာ်မၢ်ကူး 7:18

ယ့ၣ်ၡူးစံးဘၣ်အဝဲသ့ၣ်, “သုတၢ်သ့ၣ်ညါနၢ်ပၢၢ်တထီၣ်ဘးဒ်ပှၤဂၤတဖၣ်အသိးလီၤမးလဲၣ်. တၢ်အိၣ်လၢတၢ်ချၢလၢအလဲၤနုာ်ဆူပှၤတဂၤအပူၤ ဒီးကမၤတကဆှီအီၤတအိၣ်နီတမံၤဘၣ်န့ၣ်, သုတနၢ်ပၢၢ်ဘၣ်ဧါ.

လံာ်မၢ်ကူး 9:28

တုၤယ့ၣ်ၡူးလဲၤနုာ်ဆူဟံၣ်ပူၤဖဲပှၤတအိၣ်နီတဂၤဘၣ်အခါ န့ၣ်, အပျဲၢ်အဘီၣ်တဖၣ်သံကွၢ်အီၤကစုဒု, “ဘၣ်မနုၤပဝဲဒၣ်တဖၣ်ပဟီထီၣ်ကွံာ်တၢ်နါတသ့ဘၣ်န့ၣ်လဲၣ်.”