လံာ်မၢ်ကူး 4:5 - Sgaw Karen Common Bible

⁵ တၢ်ချံတနီၤလီၤဘၣ်ဝဲလၢလၢၢ်ကျါလ့ကျါဖဲဟီၣ်ခိၣ်အိၣ်ဒၣ်ထဲ လၢတၢ်ဖံးခိၣ်တစဲးဧိၤန့ၣ်လီၤ. ဟီၣ်ခိၣ်ညၣ်ထ့ၣ်အဂ့ၤအိၣ်ဘူတလါအဃိဒီးတယံာ်ဘၣ်န့ၣ် တၢ်ချံတဖၣ်ဟဲမဲထီၣ်ဝဲဒၣ်န့ၣ်လီၤ.

လံာ်မၢ်ကူး 4:5 Iomraidhean Croise

လံာ်ယဃ့းစက့လး 11:19

ယကဟ့ၣ်လီၤအဝဲသ့ၣ်လၢသးအကံၢ်အလဲအသီဒီးသးလၢ အသ့ၣ်ညါဒၣ်တၢ်အသီလီၤ. ယကဟံးထီၣ်ကွံာ်အဝဲသ့ၣ်အသးလၢအကိၤဒ်လၢၢ်အသိးဒီးဟ့ၣ်လီၤ အဝဲသ့ၣ်လၢသးလၢအစူၢ်တၢ်တဖျၢၣ်န့ၣ်လီၤ.

လံာ်ယဃ့းစက့လး 36:26

ယကဟ့ၣ်လီၤသုလၢသးအသီတဖျၢၣ်ဒီးတၢ်ပာ်သူၣ်ပာ်သးအသီ တမံၤန့ၣ်လီၤ. ယကဟံးထီၣ်ကွံာ်သုသးလၢအကိၤဒ်လၢၢ်အသိး ဒီးဟ့ၣ်လီၤသုသးလၢအစူၢ်တၢ်တဖျၢၣ်န့ၣ်လီၤ.

လံာ်ဟိၤၡ့ 10:12

ယစံးယဲ, ထဲၣ်ဟီၣ်ခိၣ်အသီလၢနကစၢ်ဒၣ်နဲအဂီၢ်, သူၣ်လီၤတၢ်မ့ၢ်တၢ်တီ, ဒီးကူးက့ၤတၢ်ဆိၣ်ဂ့ၤတဖၣ်လၢနတၢ်ဟ့ၣ်လီၤနသးဆူယၤ, ကဟ့ၣ်ထီၣ်ဝဲန့ၣ်တက့ၢ်. အအံၤမ့ၢ်တၢ်ဆၢကတီၢ်လၢနဂီၢ်လၢနဘၣ်ဃၣ်ကဒါက့ၤနသးဆူယၤ, နယွၤအအိၣ်ဒီးယကဟဲဒီးလူလီၤဂၢ်လီၤတၢ်ဆိၣ်ဂ့ၤတဖၣ်လၢနလိၤ န့ၣ်လီၤ.

လံာ်ဧၤမိၣ် 6:12

ကသ့ၣ်တဖၣ်ကဃ့ၢ်လၢလၢၢ်အလိၤစ့ၢ်ကီးဧါ. ပှၤကထဲၣ်ပီၣ်လဲၣ်လၢဂီၤဖံးစ့ၢ်ကီးဧါ. ဘၣ်ဆၣ်သုဘိးကဒါကွံာ်တၢ်စံၣ်ညီၣ်တီဆူတၢ်စုၣ်တၢ်ပျၢ်ဒီးတၢ် အဘၣ်ဆူတၢ်ကမၣ်လီၤ.

လံာ်မးသဲ 13:20

တၢ်ချံလၢအလီၤဘၣ်လၢဟီၣ်ခိၣ်လၢလၢၢ်အိၣ်ဝဲအါမးအလီၢ် တဖၣ်န့ၣ်, မ့ၢ်ပှၤလၢအနၢ်ဟူတၢ်ကစီၣ် ဒီးတဘျီဃီတူၢ်လိာ်ဝဲလၢ တၢ်သူၣ်ဖှံသးညီအပူၤန့ၣ်လီၤ.

လံာ်မၢ်ကူး 4:4

ဖဲအဝဲဖှံလီၤတၢ်ချံအကတီၢ်န့ၣ်, တၢ်ချံတနီၤလီၤဘၣ်ဝဲလၢကျဲသရ့ၤ ထံးဒီးထိၣ်ဖိလံၣ်ဖိတဖၣ်ဟဲဒီးအီၣ်ကွံာ်တၢ်ချံတဖၣ်န့ၣ်လီၤ.

လံာ်မၢ်ကူး 4:6

တုၤမုၢ်ဟဲထီၣ်ထီထီၣ်ဒီးတၢ်ကိၢ်ဆူၣ်ထီၣ်န့ၣ်, တၢ်အမုၢ်ဖိလၢအဟဲမဲထီၣ်တဖၣ်အဂံၢ်စဲၤလီၤအသးတယိာ်ဘၣ်အဃိ, ဃ့ထီကွံာ်ဝဲဒၣ်လီၤ.

လံာ်လူၤကၣ် 8:13

တၢ်ချံလၢအလီၤလၢလၢၢ်ခိၣ်ပာ်ဖျါထီၣ်ပှၤတဖၣ်လၢအနၢ်ဟူ ဘၣ်တၢ်အကလုၢ်ကထါဒီးတူၢ်လိာ်ဝဲလၢတၢ်သးခုအပူၤလီၤ. ဘၣ်ဆၣ်မၤအသးဒ်တၢ်ချံလၢအဂံၢ်တအိၣ်သူၣ်လီၤအသး ယိာ်ယိာ်ဘၣ်န့ၣ်လီၤ. အဝဲသ့ၣ်စူၢ်တၢ်နာ်တၢ်ထဲတစိၢ်ဖိဧိၤ, ဒီးဖဲတၢ်မၤကွၢ်အဆၢကတီၢ်ဟဲန့ၣ်, အဝဲသ့ၣ်လီၤဃံၤကွံာ်ဝဲလီၤ.

လံာ်လူၤကၣ် 8:6

တနီၤလီၤဘၣ်လၢလၢၢ်ခိၣ်, ဒီးဖဲတၢ်မုၢ်တၢ်ဘိတဖၣ်မဲထီၣ်န့ၣ်, မ့ၢ်လၢဟီၣ်ခိၣ်တစုၣ်စီၣ်ဘၣ်အဃိ, အဝဲသ့ၣ်ဃ့ထီကွံာ်ဝဲဒၣ်လီၤ.