လံာ်မၢ်ကူး 14:31 - Sgaw Karen Common Bible

³¹ စီၤပ့းတရူးစံးဆၢက့ၤအီၤဆူၣ်ဆူၣ်ကလဲာ်, “ယမ့ၢ်ဘၣ်တၢ်မၤသံဃုာ်ဒီးနၤဒၣ်လဲာ်န့ၣ်, ယတသမၢနၤနီတစုဘၣ်.” ဒီးအပျဲၢ်အဘီၣ်အဂၤတဖၣ်စံးစ့ၢ်ကီးတၢ်တမံၤဃီဒ်သိးန့ၣ်ကိး ဂၤဒဲးလီၤ.

လံာ်မၢ်ကူး 14:31 Iomraidhean Croise

လံာ်စီၤပၤအခီၣ်ထံးတဘ့ၣ် 11:22

စီၤပၤသံကွၢ်အီၤ, “ဘၣ်မနုၤအဃိလဲၣ်. မ့ၢ်ယတဟ့ၣ်ဘၣ်နၤလၢ တၢ်တမံၤမံၤလၢနကြၢးဒိးန့ၢ်အီၤအဃိဧါ. လၢတၢ်အံၤအဃိမ့ၢ်နအဲၣ်ဒိးက့ၤကဒါက့ၤဆူနဟံၣ်နဃီန့ၣ်ဧါ.” စီၤဟၤဒးစံးဆၢစီၤပၤ, “တမ့ၢ်ဘၣ်, မ့မ့ၢ်, ထဲပျဲယၤလၢယကက့ၤတက့ၢ်.” ဒီးအဝဲက့ၤကဒါက့ၤဆူအထံအကီၢ်န့ၣ်လီၤ. ဒ်ကီၢ်အဒိၣ်စီၤပၤအသိး, စီၤဟၤဒးမ့ၢ်ကီၢ်အံၣ်စရ့လးအဒုၣ် အဒါအအၢအသီနးနးကလဲာ်တဂၤန့ၣ်လီၤ.

လံာ်စီၤပၤခံဘ့ၣ်တဘ့ၣ် 8:13

စီၤဃစ့လးသံကွၢ်ဝဲ, “ယအိၣ်ဒီးတၢ်စိတၢ်ကမီၤထဲထဲန့ၣ် ကသ့တဘျီဘျီဧါ. ယတမ့ၢ်တၢ်နီတမံၤဘၣ်.” စီၤအလံၤၡါစံးဆၢဝဲ, “ယွၤဒုးနဲၣ်တ့ၢ်ယၤလၢနကကဲထီၣ်ကီၢ် စူၤရံအစီၤပၤန့ၣ်လီၤ.”

စံးထီၣ်ပတြၢၤ 30:6

ဖဲယဘၣ်မုာ်ဘၣ်ခုၣ်အခါယစံးလီၤယသး, “ယတဘၣ်တၢ်မၤနၢၤမၤဃၣ်ယၤ နီတဘျီလၢၤဘၣ်.”

လံာ်တၢ်ဟးထီၣ်ကွံာ် 19:8

အန့ၣ်ဒီးပှၤဂီၢ်မုၢ်ခဲလၢာ်စံးဆၢသကိးဝဲ, “ပကမၤတၢ်ကိးမံၤလၢယွၤစံးဝဲလီၤ.” ဒီးစီၤမိၤၡ့ပာ် ဖျါထီၣ်က့ၤတၢ်ဂ့ၢ်အံၤဆူယွၤအအိၣ်လီၤ.

တၢ်ကတိၤဒိ. 16:18

တၢ်ပာ်ထီၣ်ထီသးန့ၣ်ဆှၢပှၤဆူတၢ်ဟးဂီၤ, ဒီးတၢ်ပာ်ကဖိသးန့ၣ်ဆူတၢ်လီၤပှီၢ်လီၤ.

တၢ်ကတိၤဒိ. 18:24

တၢ်ရ့တံၤရ့သကိးတနီၤနီၤန့ၣ်တဂၢၢ်တကျၢၤဘၣ်. ဘၣ်ဆၣ်ဒီးတံၤသကိးတနီၤနီၤမ့ၢ်ပှၤသးတီအါန့ၢ်ဒီပုၢ်ဝဲၢ် တဖၣ်တက့ၢ်လီၤ.

တၢ်ကတိၤဒိ. 29:23

တၢ်ပာ်ထီၣ်ထီသးကဟဲစိာ်န့ၢ်နၤနတၢ်ဟးဂီၤလီၤ. ဘၣ်ဆၣ်နမ့ၢ်ဆီၣ်လီၤနသးဒီး, နကဘၣ်တၢ်ပာ်ကဲနၤန့ၣ်လီၤ.

လံာ်ယံးရမံယၤ 10:23

ယွၤဧၢ, ယသ့ၣ်ညါလၢပှၤကညီတပၢဘၣ်အနီၢ်ကစၢ်ဒၣ်ဝဲ အတၢ်အိၣ်မူအကျဲနီတဂၤဘၣ်. ပှၤတပၢၤဃာ်ဘၣ်အနီၢ်ကစၢ်ဒၣ်ဝဲအသးသမူ နီတဂၤဘၣ်.

လံာ်ယံးရမံယၤ 17:9

မတၤသ့ၣ်ညါနၢ်ပၢၢ်ပှၤကညီအသးကသ့တဂၤလဲၣ်. တၢ်အဂၤလၢအလီန့ၢ်တၢ်သ့ထဲထဲန့ၣ်တအိၣ်ဘၣ်. အၢဝဲသီဝဲကဲၣ်ဆိးလၢတၢ်ကမၤဘျါက့ၤအီၤ အဂီၢ်န့ၣ်လီၤ.

လံာ်မးသဲ 10:33

ဘၣ်ဆၣ်ပှၤတဂၤလၢ်လၢ်လၢအသမၢယၤလၢပှၤကညီအမဲာ်ညါန့ၣ်, ယကသမၢစ့ၢ်ကီးအီၤလၢယပၢ်အိၣ်လၢမူခိၣ်အမဲာ်ညါလီၤ.

လံာ်မၢ်ကူး 10:39

အဝဲသ့ၣ်စံးဆၢက့ၤ, “ပမၤကဲလီၤ.” ယ့ၣ်ၡူးစံးဘၣ်အဝဲသ့ၣ်, “သပှၢ်ကတၢၢ်လီခီလၢယကဘၣ်အီယဲန့ၣ်သုကအီဘၣ်သုဝဲ, ဒီးဒ်ယကဘၣ်ဒိးဘျၢယသးအသိးန့ၣ်သုကဒိးဘျၢဘၣ်သုသးလီၤ.

လံာ်မၢ်ကူး 14:30

ယ့ၣ်ၡူးစံးဘၣ်စီၤပ့းတရူး, “ယစံးဘၣ်နၤသပှၢ်ကတၢၢ်, တနၤအံၤတချုးဆီဖါကီၢ်အိၣ်အိဒံးဘၣ်ခံဘျီန့ၣ်, နဲဒၣ်နကသမၢယၤသၢဘျီလၢနတသ့ၣ်ညါယၤဘၣ်န့ၣ်လီၤ.”

လံာ်မၢ်ကူး 14:32

အဝဲသ့ၣ်လဲၤတုၤတၢ်လီၢ်တကဝီၤလၢတၢ်ကိးအမံၤလၢက့ၤသစ့းမ နၤ, ဒီးယ့ၣ်ၡူးစံးဘၣ်အပျဲၢ်အဘီၣ်တဖၣ်, “ဆ့ၣ်နီၤသုဝဲဖဲအံၤ, ဖဲယဃ့ဘါထုကဖၣ်တၢ်အကတီၢ်န့ၣ်တက့ၢ်.”

လံာ်လူၤကၣ် 23:23

ဘၣ်ဆၣ်ဒီးအဝဲသ့ၣ်ကိးပသူထီၣ်ဒံးဝဲလၢအကလုၢ်အဒိၣ်ကတၢၢ်, လၢယ့ၣ်ၡူးကဘၣ်တၢ်ပျၤထီအီၤလၢထူၣ်စုညါအလိၤအဂီၢ်န့ၣ်လီၤ. ဒီးလၢခံကတၢၢ်န့ၣ်အဝဲသ့ၣ်အကလုၢ်မၤနၢၤတၢ်ခဲလၢာ်လီၤ.

လံာ်ယိၤဟၣ် 13:37

စီၤပ့းတရူးသံကွၢ်အီၤ, “ကစၢ်ဧၢ, ယလဲၤပိာ်နခံခဲအံၤတသ့ န့ၣ်ဘၣ်မနုၤလဲၣ်. ယအိၣ်ကတဲာ်ကတီၤယသးလၢယကဟ့ၣ် လီၤယသးသမူလၢနဂီၢ်လီၤ.”