လံာ်မးသဲ 8:29 - Sgaw Karen Common Bible

²⁹ တုၤအထံၣ်ယ့ၣ်ၡူးတဘျီဃီ အဝဲသ့ၣ်ကိးပသူထီၣ်ဒီးစံး, “ကစၢ်ယွၤအဖိခွါနၤဧၢ, နဘၣ်ဃးဒီးပှၤဒ်လဲၣ်. မ့ၢ်နဟဲလၢနကစံၣ်ညီၣ်မၤနးမၤဖှီၣ်ပှၤ တချုးလၢတၢ်အဆၢကတီၢ်ဘၣ်ဝဲန့ၣ်ဧါ.”

လံာ်မးသဲ 8:29 Iomraidhean Croise

လံာ်စီၤၡမူၤအ့လးခံဘ့ၣ်တဘ့ၣ် 16:10

စီၤပၤစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်, “တၢ်အံၤတဘၣ်ဃးဒီးသုနီတမံၤဘၣ်. အဝဲမ့ၢ်ဆိၣ်အၢယၤလၢ ယွၤတဲဘၣ်အီၤအဃိဒီး, ဘၣ်မနုၤအဝဲမၤတၢ်အံၤလဲၣ်န့ၣ်, မတၤအိၣ်ဒီးတၢ်ခွဲးတၢ်ယာ်လၢ ကသံကွၢ်ဝဲလဲၣ်.”

လံာ်စီၤၡမူၤအ့လးခံဘ့ၣ်တဘ့ၣ် 19:22

ဘၣ်ဆၣ်ဒီး, စီၤဒၤဝံးစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်ဒ်အံၤ, “မတၤတဂၤဃ့သုတၢ်ဟ့ၣ်ကူၣ်န့ၣ်လဲၣ်. မ့ၢ်သုအဲၣ်ဒိးဟ့ၣ်ယၤတၢ်ကီတၢ်ခဲဧါ. ခဲအံၤယမ့ၢ်ပှၤတဂၤလၢ အကဲကီၢ်အံၣ်စရ့လးအစီၤပၤလီၤ. ဒီးတနံၤအံၤပှၤတဘၣ်မၤသံပှၤအံၣ်စရ့လးဖိနီတဂၤဘၣ်.”

လံာ်စီၤပၤအခီၣ်ထံးတဘ့ၣ် 17:18

အဝဲစံးဘၣ်စီၤအ့ၤလံယၤ, “ကစၢ်ယွၤအပှၤကညီတဂၤဧၢ, နမၤဘၣ်ယၤတၢ်အံၤဘၣ်မနုၤအဃိလဲၣ်. မ့ၢ်နဟဲဖဲအံၤဒ်သိး နကဒုးသ့ၣ်နီၣ်ကစၢ်ယွၤလၢယတၢ်ဒဲးဘးတဖၣ်ဒီးလၢတၢ်န့ၣ်အဃိ ကဒုးအိၣ်ထီၣ်ယဖိခွါအတၢ်သံန့ၣ်ဧါ.”

လံာ်စီၤပၤခံဘ့ၣ်တဘ့ၣ် 3:13

စီၤအလံၤၡါစံးဘၣ်ကီၢ်အံၣ်စရ့လးအစီၤပၤ, “ဘၣ်မနုၤလၢယကဘၣ်မၤစၢၤနၤန့ၣ်လဲၣ်. လဲၤဒီးသံကွၢ်တၢ်လၢ ဝံတဖၣ်လၢနပၢ်မ့ၢ်ဂ့ၤ, နမိၢ်မ့ၢ်ဂ့ၤသံကွၢ်တ့ၢ်အီၤတၢ်တက့ၢ်.” စီၤယဟိရၣ်စံးဆၢအီၤ “တမ့ၢ်ဘၣ်, ပှၤလၢအကိးဖှိၣ်ပဝဲ စီၤပၤသၢဂၤဆူကီၢ်မိၤအးအစီၤပၤအတၢ်သူၣ်ကညီၤသးကညီၤအပူၤ န့ၣ်မ့ၢ်ယွၤလီၤ.”

လံာ်ကွဲးနီၣ်တၢ်ခံဘ့ၣ်တဘ့ၣ် 35:21

ဘၣ်ဆၣ်စီၤပၤနကိၤဆှၢလီၤန့ၢ်စီၤယိၤၡံယၤလၢတၢ်ကစီၣ်အံၤ စံးဝဲ, “တၢ်ဒုးလၢယဒုးအံၤ, တဘၣ်ထွဲဒီးနၤ, ကီၢ်ယူဒၤအစီၤပၤဘၣ်. မ့မ့ၢ်ယဟဲဒ်သိးယကဒုးယဒုၣ်ယဒါတဖၣ်, ဒီးကစၢ်ယွၤတဲဘၣ်တ့ၢ်ယၤလၢယကဘၣ်မၤချ့ချ့န့ၣ်လီၤ. ကစၢ်ယွၤအိၣ်လၢယအိၣ်တကပၤလီၤ. လၢတၢ်န့ၣ်အဃိ ထီဒါယၤတဂ့ၤ. မ့တမ့ၢ်ဘၣ်ဒီးအဝဲကမၤဟးဂီၤနၤန့ၣ်လီၤ.”

လံာ်ယိၤအ့လး 3:4

ဝ့ၢ်ထါယၢၣ်, ဝ့ၢ်စံဒိၣ်ဒီးကယဲၢ်လီၢ်ကဝီၤလၢကီၢ်ဖလ့ၡသးသ့ၣ်ဧၢ, သုကမၤယၤဒ်လဲၣ်. သုကျဲးစၢးလၢသုကမၤဆၢကဒါက့ၤယၤလၢ တၢ်တမံၤမံၤအဂီၢ်န့ၣ်ဧါ. သုမ့ၢ်မၤဒီး, ယကမၤဆၢကဒါက့ၤသုချ့ချ့ ကလဲာ်လီၤ.

လံာ်မးသဲ 4:3

အန့ၣ်တဘျီမုၣ်ကီၤလံၢ်ဟဲဝဲဒီးစံးဘၣ်အီၤ, “နမ့မ့ၢ်ကစၢ်ယွၤအဖိခွါဒီးခါလီၤနကလုၢ်လၢလၢၢ်သ့ၣ်တဖၣ် အံၤကကဲထီၣ်လၢကိၣ်အလိၣ်တဖၣ်တက့ၢ်.”

လံာ်မးသဲ 8:30

ဖဲတၢ်လီၢ်တယံၤတဘူးဒီးအဝဲသ့ၣ်အိၣ်ဝဲအလီၢ်န့ၣ်, ထိးတဖုအီၣ်အဆၣ်လီၤ.

လံာ်မၢ်ကူး 1:24

အဝဲဒၣ်ကိးပသူထီၣ်ဒီးစံး, “ပှၤနစၤရ့းဖိယ့ၣ်ၡူးဧၢ, နတၢ်ဘၣ်ဃးဒီးပှၤအိၣ်မနုၤလဲၣ်. နဟဲလၢနကမၤဟးဂီၤကွံာ် ပှၤအဂီၢ်ဧါ. နမ့ၢ်မတၤတဂၤလဲၣ်န့ၣ်ယသ့ၣ်ညါနမ့ၢ်ပှၤစီဆှံ လၢကစၢ်ယွၤမၢလီၤအီၤတဂၤန့ၣ်လီၤ.”

လံာ်မၢ်ကူး 3:11

ဒီးတဘျီလၢ်လၢ်ဖဲပှၤလၢတၢ်နါဒိးအီၤတဖၣ်ထံၣ်ဘၣ်အီၤန့ၣ်, အဝဲသ့ၣ်ထိၣ်လီၤဃံၤအသးလၢအဝဲဒၣ်အမဲာ်ညါဒီးကိးပသူထီၣ်ဝဲ, “နဲဒၣ်အံၤနမ့ၢ်ကစၢ်ယွၤအဖိခွါန့ၣ်လီၤ.”

လံာ်မၢ်ကူး 5:7

ဒီးကိးပသူထီၣ်လၢအကလုၢ်ဖးဒိၣ်ဒီးစံးဝဲ, “ယွၤလၢအဒိၣ်ကတၢၢ်ထီကတၢၢ်တဂၤအဖိခွါယ့ၣ်ၡူးဧၢ, မ့ၢ်နဘၣ်ဃးဒီးယၤဒ်လဲၣ်. ယဃ့ကညးနၤလၢယွၤအမဲာ်ညါမၤအၢမၤနးယၤတဂ့ၤ.”

လံာ်လူၤကၣ် 4:34

“အၣ်လါ, နအဲၣ်ဒိးမၤပှၤဒ်လဲၣ်. ပှၤနစၤရ့းဖိယ့ၣ်ၡူးဧၢ. နဟဲဖဲအံၤဒ်သိးနကမၤဟးဂီၤကွံာ်ပှၤဧါ. နမ့ၢ်မတၤလဲၣ်န့ၣ်ယသ့ၣ်ညါယဲလီၤ. နမ့ၢ်ယွၤအပှၤစိာ်တၢ်ကစီၣ်အစီအဆှံတဂၤလီၤ.”

လံာ်လူၤကၣ် 4:41

တၢ်နါဟးထီၣ်ကွံာ်စ့ၢ်ကီးလၢပှၤအါဒံအါဂၤအလိၤ, အိၣ်ဒီးတၢ်ကိးပသူထီၣ်, “နမ့ၢ်ကစၢ်ယွၤအဖိခွါလီၤ.” ယ့ၣ်ၡူးဒူတၢ်နါတဖၣ်အလိၤဒီးတပျဲအဝဲသ့ၣ်ကတိၤတၢ်ဘၣ်. အဂ့ၢ်မ့ၢ်လၢအဝဲသ့ၣ်သ့ၣ်ညါလၢအဝဲဒၣ်မ့ၢ်ခရံာ်အဃိလီၤ.

လံာ်လူၤကၣ် 8:28

ဖဲအဝဲဒၣ်ထံၣ်ယ့ၣ်ၡူးန့ၣ်ကိးထီၣ်ဝဲလၢအကလုၢ်ဖးဒိၣ်, ထိၣ်လီၤပှီၤအသးလၢအမဲာ်ညါ, ဒီးကတိၤတၢ်လၢအကလုၢ်ဖးဒိၣ်, “တၢ်ထီကတၢၢ်ကစၢ်ယွၤအဖိခွါယ့ၣ်ၡူးဧၢ, နဘၣ်ဃးဒီးယၤဒ်လဲၣ်. ယဃ့ကညးနၤ, တဘၣ်စံၣ်ညီၣ်ယၤတဂ့ၤ.”

လံာ်ယိၤဟၣ် 2:4

ဒီးယ့ၣ်ၡူးစံးဘၣ်အီၤ, “ပိာ်မုၣ်ဧၢ, ဘၣ်မနုၤအဃိနမၢယမၤဘၣ်ဃး ယသးလဲၣ်. တၢ်ဆၢကတီၢ်လၢယဂီၢ်တဘၣ်ဒံးဘၣ်.”

မၤတၢ် 16:17

အဝဲဒၣ်ပိာ်ထီၣ်စီၤပီလူးဒီးပဝဲသ့ၣ်တဖၣ်အခံ, အိၣ်ဒီးတၢ်ကိး ပသူထီၣ်ဝဲ, “ပှၤသ့ၣ်တဖၣ်အံၤမ့ၢ်ကစၢ်ယွၤလၢအဒိၣ်ကတၢၢ် အထီကတၢၢ်တဂၤအခ့အပှၤလီၤ. အဝဲသ့ၣ်ဘိးဘၣ်သ့ၣ်ညါသုလၢသုကဘၣ်တၢ်အုၣ်က့ၤခီၣ် က့ၤသုဒ်လဲၣ်အဂ့ၢ်န့ၣ်လီၤ.”

ယၤကိာ် 2:19

မ့ၢ်နနာ်လၢကစၢ်ယွၤအိၣ်ထဲတဂၤဧိၤန့ၣ်ဧါ. ဂ့ၤလီၤ. တၢ်နါတဖၣ်စ့ၢ်ကီးနာ်ဝဲဒ်န့ၣ်, ဒီးကနိးကစုာ်လၢတၢ်ပျံၤတၢ်ဖုး အပူၤလီၤ.

၂ ပ့းတရူး 2:4

ကလူးလၢအမၤတၢ်ဒဲးဘးတဖၣ်န့ၣ်, ကစၢ်ယွၤတပျၢ်ဖျဲး အီၤဘၣ်ဒီးတ့ၢ်လီၤကွံာ်အဝဲသ့ၣ်ဆူလရာ်အပူၤ, ဒီးဖဲန့ၣ်အဝဲသ့ၣ်ဘၣ်တၢ်စၢဃာ်အီၤလၢတၢ်ခံးတၢ်နၤ အပူၤဒီးအိၣ်ခိးမုၢ်စံၣ်ညီၣ်အနံၤန့ၣ်လီၤ.

ယူဒၤ 1:6

သ့ၣ်နီၣ်ထီၣ်က့ၤကလူးတဖၣ်လၢအတအိၣ်လၢအတၢ်စိကမီၤ အဘၢၣ်ကဝီၤအပူၤ, မ့မ့ၢ်ဟးထီၣ်ကွံာ်လၢအတၢ်အိၣ်တၢ်ဆိးအလီၢ်ဒၣ်ဝဲန့ၣ် တက့ၢ်. အဝဲသ့ၣ်ဘၣ်တၢ်စၢဃာ်အီၤလၢပျံၤထးအထူအယိာ် လၢတၢ်ခံးတၢ်နၤအပူၤလၢလာ်, ဖဲကစၢ်ယွၤပာ်ဃာ်အဝဲသ့ၣ်လၢတၢ်ကစံၣ်ညီၣ်ဃၣ် အီၤဖဲမုၢ်နံၤဖးဒိၣ်န့ၣ်အဂီၢ်လီၤ.

လံာ်ပှၤစံၣ်ညီၣ်ကွီၢ် 11:12

တုၤနုၤတစု, စီၤယံးဖသၤဆှၢလီၤပှၤစိာ်တၢ်ကစီၣ်တဖၣ်ဆူဧၣ်မိၣ် အစီၤပၤအအိၣ်ဒ်သိးကစံးဝဲ, “တၢ်ဂ့ၢ်လၢနဃုတၢ်ထီဒုၣ်ဒါလိာ်နသးဒီးပှၤမ့ၢ်မနုၤတမံၤလဲၣ်. ဘၣ်မနုၤနဘၣ်ဟဲနုာ်ဒုးပထံပကီၢ်န့ၣ်လဲၣ်.”