လံာ်မးသဲ 4:23 - Sgaw Karen Common Bible

²³ ယ့ၣ်ၡူးဟးဝ့ၤဝီၤသကုၤကီၢ်ကၤလံၤလါ, သိၣ်လီၤသီလီၤတၢ်လၢဘူၣ်ဘျီၣ် လၢအမ့ၢ်တၢ်ဘါလီၢ်တဖၣ်အပူၤ, စံၣ်တဲၤတဲလီၤတၢ်သးခုကစီၣ်ဘၣ်ဃးယွၤအဘီအမုၢ် ဒီးမၤဘျါက့ၤပှၤဘၣ်ဆူးဘၣ်ဆါလၢကယဲၢ်မ့ၢ်တၢ်ဆူးတၢ် ဆါခဲလၢာ်လီၤ.

လံာ်မးသဲ 4:23 Iomraidhean Croise

စံးထီၣ်ပတြၢၤ 103:3

အဝဲဒၣ်န့ၣ်, မ့ၢ်ပှၤလၢအပျၢ်နတၢ်သရူးနတၢ်ကမၣ်ခဲလၢာ်, ဒီးမ့ၢ်ပှၤလၢအမၤဘျါက့ၤ နတၢ်ဆူးတၢ်ဆါကိးမံၤဒဲး,

စံးထီၣ်ပတြၢၤ 74:8

အဝဲသ့ၣ် စံးလီၤအသးလၢ အဲၣ်ဒိးမၤဟးဂီၤကွံာ်ပှၤ လၢာ်လၢာ်ဆ့ဆ့လီၤ. အဝဲသ့ၣ်ဒွဲၣ်ကွံာ်ကယဲၢ်မ့ၢ်ယွၤအတၢ်လီၢ်စီဆှံ တဖၣ်လၢထံကီၢ်အပူၤန့ၣ်လီၤ.

လံာ်မးသဲ 11:5

ပှၤအမဲာ်ဘျီၣ်တဖၣ်ထံၣ်ထီၣ်က့ၤတၢ်, ပှၤအခီၣ်ဟးဂီၤတဖၣ်ဟးထီၣ် က့ၤဝဲ, ပှၤဘၣ်တၢ်ဆါအၢတဖၣ်ဘျါက့ၤဝဲ, ပှၤအနၢ်တအၢတဖၣ်နၢ်ဟူထီၣ် က့ၤတၢ်ဒီးပှၤသံတဖၣ်ဘၣ်တၢ်ဒုးဂဲၤဆၢထၢၣ်က့ၤအီၤဒီးတၢ်သးခု ကစီၣ်ဘၣ်တၢ်စံၣ်တဲၤတဲလီၤအီၤဆူပှၤဖှီၣ်ဖိယာ်ဖိအအိၣ်လံ.

လံာ်မးသဲ 12:9

ယ့ၣ်ၡူးဟးထီၣ်ဖဲတၢ်လီၢ်န့ၣ်ဒီးလဲၤဝဲဆူအဝဲသ့ၣ်အဘူၣ်ဘျီၣ်လၢ အမ့ၢ်တၢ်ဘါလီၢ်,

လံာ်မးသဲ 13:19

ပှၤလၢအနၢ်ဟူတၢ်ကစီၣ်ဘၣ်ဃးဒီးဘီမုၢ်ဘၣ်ဆၣ်တနၢ်ပၢၢ်ဝဲ တဖၣ်န့ၣ်, လီၤဂာ်ဒီးတၢ်ချံလၢအလီၤဘၣ်လၢကျဲအသရ့ၤထံးလီၤ. တၢ်အၢတၢ်သီတဂၤန့ၣ်ဟဲဒီးဂုာ်န့ၢ်ကွံာ်တၢ်လၢအဘၣ်တၢ်ဖှံလီၤလၢ အဝဲသ့ၣ်အသးပူၤလီၤ.

လံာ်မးသဲ 13:54

အဝဲက့ၤကဒါဝဲဆူဝ့ၢ်နစၤရ့း, ဒီးသိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ် တၢ်ဘါလီၢ်တဖၣ်အပူၤလီၤ. ပှၤလၢအနၢ်ဟူအတၢ်သိၣ်လီၤသီလီၤတဖၣ် ကမၢကမၣ်ဝဲဒီးစံး, “ပှၤအံၤလဲၤမၤန့ၢ်အတၢ်ကူၣ်ဘၣ်ကူၣ်သ့ ဒီးတၢ်စိတၢ်ကမီၤလၢအကမၤတၢ်လီၤလးတဖၣ်အံၤဖဲလဲၣ်.

လံာ်မးသဲ 14:14

ဖဲယ့ၣ်ၡူးစံၣ်လီၤလၢချံအလိၤဒီးထံၣ်ပှၤဂီၢ်မုၢ်ဖးဒိၣ်န့ၣ်, အသူၣ်ကညီၤသးကညီၤဘၣ်အဝဲသ့ၣ်ဒီး, မၤဘျါက့ၤအဝဲသ့ၣ်အပှၤဆူးပှၤဆါတဖၣ်လီၤ.

လံာ်မးသဲ 24:14

ဒီးတၢ်သးခုအကစီၣ်ဘၣ်ဃးဒီးဘီမုၢ်အံၤ, ကဘၣ်တၢ်စံၣ်တဲၤတဲလီၤအီၤသကုၤဟီၣ်ခိၣ်ချၢ, ဒ်သိးကကဲထီၣ်တၢ်အုၣ်အသးလၢပှၤဟီၣ်ခိၣ်ဖိခဲလၢာ်အဂီၢ်လီၤ. တုၤနုၤတစု, တၢ်အစိၤကကတၢၢ်ဝဲလီၤ.

လံာ်မးသဲ 3:2

အဝဲစံးဝဲ, “ပီၢ်ယၢ်လီၤက့ၤဒီး ဃၣ်လိၤက့ၤသုသးတက့ၢ်. အဂ့ၢ်ဒ်အံၤ, မူခိၣ်အဘီအမုၢ်ကသူၣ်လီၤအသးဘူးထီၣ်လံ.”

လံာ်မးသဲ 9:35

ယ့ၣ်ၡူးလဲၤဝ့ၤဝီၤတၢ်လၢဝ့ၢ်တဖၣ်ဒီးသဝီတဖၣ်လီၤ. အဝဲသိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ်တၢ်ဘါလီၢ်တဖၣ်အပူၤ, စံၣ်တဲၤတဲလီၤတၢ်သးခုကစီၣ်ဘၣ်ဃးဘီမုၢ်, ဒီးမၤဘျါက့ၤပှၤတဖၣ်လၢအအိၣ်ဒီးတၢ်ဆူးတၢ်ဆါတၢ်က့တၢ် ကွဲၣ်ကိးအကလုာ်ဒဲးလီၤ.

လံာ်မၢ်ကူး 1:14

စီၤယိၤဟၣ်ဘၣ်တၢ်ဒၢနုာ်အီၤလၢဃိာ်ပူၤဝံၤအလီၢ်ခံ, ယ့ၣ်ၡူးဟဲဝဲဆူကီၢ်ကၤလံၤလါဒီးစံၣ်တဲၤတဲလီၤကစၢ်ယွၤ အတၢ်သးခုအကစီၣ်,

လံာ်မၢ်ကူး 1:21

ယ့ၣ်ၡူးဒီးအပျဲၢ်အဘီၣ်တဖၣ်လဲၤဝဲဆူဝ့ၢ်ကပ့းရနီၣ်, ဒီးပှၤယူဒၤဖိအမုၢ်အိၣ်ဘှံးနံၤတုၤဃီၤဝဲတဘျီဃီ, အဝဲဒၣ်လဲၤနုာ်ဆူဘူၣ်ဘျီၣ်လၢအမ့ၢ်တၢ်ဘါလီၢ်အပူၤဒီး သိၣ်လီၤသီလီၤတၢ်လီၤ.

လံာ်မၢ်ကူး 1:39

ဒီးလဲၤဝဲသကုၤကီၢ်ကၤလံၤလါ, စံၣ်တဲၤတဲလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖၣ်အပူၤဒီးဟီထီၣ်ကွံာ်တၢ်နါတဖၣ်လီၤ.

လံာ်မၢ်ကူး 3:10

အဝဲဒၣ်မၤဘျါက့ၤတ့ၢ်လံပှၤဆူးပှၤဆါအါဒံအါဂၤသတးဒီး, ကယဲၢ်ပှၤအိၣ်ဒီးတၢ်ဆူးတၢ်ဆါတမံၤလၢ်လၢ်တဖၣ်န့ၣ်ဟဲဆီၣ် သနံးလိာ်အသးဆူအအိၣ်ဒ်သိးကထိးဘၣ်အီၤအဂီၢ်န့ၣ်လီၤ.

လံာ်မၢ်ကူး 6:2

တုၤပှၤယူဒၤဖိအမုၢ်အိၣ်ဘှံးနံၤတုၤဃီၤဒီးအဝဲဒၣ်စးထီၣ် သိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤလီၤ. ပှၤအါဒံအါဂၤလၢအနၢ်ဟူအတၢ်သိၣ်လီၤသီလီၤတဖၣ်ကမၢကမၣ်ဒီး စံးဝဲ, “တၢ်ကူၣ်သ့ကူၣ်ဘၣ်ဒီးတၢ်သ့မၤတၢ်လီၤလးတဖၣ်ခဲလၢာ်အံၤ မ့ၢ်အလဲၤမၤန့ၢ်ဝဲဖဲလဲၣ်. တၢ်ဟ့ၣ်အီၤတၢ်ကူၣ်သ့ကူၣ်ဘၣ်တခါအံၤမ့ၢ်တၢ်ဒ်လဲၣ်. တၢ်လီၤလးတဖၣ်အံၤမၤဝဲဒ်လဲၣ်.

လံာ်မၢ်ကူး 6:6

ဒီးကမၢကမၣ်ဝဲဒိၣ်မးလၢပှၤသ့ၣ်တဖၣ်အတၢ်နာ်အီၤတအိၣ်ဘၣ်အဃိ လီၤ. ယ့ၣ်ၡူးဟးဝ့ၤဝီၤလၢသဝီအိၣ်ဘူးအိၣ်တံၢ်တဖၣ်အပူၤဒီးသိၣ် လီၤသီလီၤတၢ်လီၤ.

လံာ်လူၤကၣ် 10:9

မၤဘျါပှၤဆူးပှၤဆါဖဲဝ့ၢ်တဖျၢၣ်န့ၣ်အပူၤ, ဒီးစံးဘၣ်ပှၤအိၣ်ဖဲန့ၣ်တဖၣ်, ‘ကစၢ်ယွၤအဘီအမုၢ်ဟဲဘူးဒီးသုလံ.’

လံာ်လူၤကၣ် 13:10

ဘၣ်ဖဲမုၢ်အိၣ်ဘှံးနံၤတနံၤန့ၣ်, ယ့ၣ်ၡူးသိၣ်လီၤသီလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖျၢၣ်အပူၤလီၤ.

လံာ်လူၤကၣ် 16:16

စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ်အိၣ်ဝဲဒၣ်တုၤလၢ ပှၤဘျၢတၢ်စီၤယိၤဟၣ်အဆၢကတီၢ်လီၤ. စးထီၣ်ဖဲန့ၣ် တၢ်သးခု အကစီၣ်ဘၣ်ဃးဒီးကစၢ်ယွၤအဘီအမုၢ်ဘၣ်တၢ်စံၣ်တဲၤတဲလီၤအီၤ, ဒီးပှၤကိးဂၤဒဲးဂုာ်လဲၤနုာ်ဝဲဆူကစၢ်ယွၤအဘီအမုၢ်အပူၤလီၤ.

လံာ်လူၤကၣ် 20:1

ဘၣ်မုၢ်တနံၤဖဲယ့ၣ်ၡူးအိၣ်လၢတၢ်လုၢ်ဟံၣ်အပူၤ, သိၣ်လီၤသီလီၤပှၤဂီၢ်မုၢ်တဖၣ်, ဒီးစံၣ်တဲၤတဲလီၤတၢ်သးခု ကစီၣ်အဖၢမုၢ်န့ၣ်, ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဃုာ်ဒီးပှၤယူဒၤဖိကရၢအခိၣ်အနၢ်တဖၣ်ဟဲဝဲ,

လံာ်လူၤကၣ် 4:14

တၢ်န့ၣ်ဝံၤအလီၢ်ခံ, ယ့ၣ်ၡူးဟဲက့ၤကဒါက့ၤဆူကီၢ်ကၤလံၤလါ, ဒီးသးစီဆှံအစိကမီၤအိၣ်ဒီးအီၤလီၤ. တၢ်ကစီၣ်ဘၣ်ဃးအဝဲဒၣ်အဂ့ၢ်အကျိၤဟူထီၣ်သါလီၤဝဲလၢ တၢ်လီၢ်အကဝီၤဖဲန့ၣ်ကိးတီၤဒဲးလီၤ.

လံာ်လူၤကၣ် 5:17

ဘၣ်တနံၤဖဲယ့ၣ်ၡူးသိၣ်လီၤသီလီၤတၢ်အဆၢကတီၢ်န့ၣ်, ပှၤဖၤရံၤၡဲတဖၣ်ဒီးပှၤသိၣ်လိတၢ်သိၣ်တၢ်သီတဖၣ်ဆ့ၣ်နီၤအိၣ်ဖဲ န့ၣ်လီၤ. အဝဲသ့ၣ်ဟဲလၢကယဲၢ်ဝ့ၢ်အိၣ်ဖဲကီၢ်ကၤလံၤလါ ဒီးကီၢ်ယူဒၤဒီးလၢဝ့ၢ်ယရူၤၡလ့ၣ်လီၤ. ကစၢ်အစိကမီၤအိၣ်ဝဲဒီး ယ့ၣ်ၡူးလၢအကမၤဘျါပှၤဆူးပှၤဆါတဖၣ်အဂီၢ်လီၤ.

လံာ်လူၤကၣ် 6:17

ယ့ၣ်ၡူးဟဲက့ၤလီၤဒီးတၢ်မၢဖိတဖၣ်လၢတၢ်လူၢ်ခိၣ်လီၤ. ဒီးဆၢထၢၣ်သကိးဒီးအပျဲၢ်အဘီၣ်ဂီၢ်မုၢ်ဂီၢ်ပၤဖဲတၢ်လီၢ်လၢ အပၢၤတတီၤလီၤ. ပှၤအိၣ်ဝဲဒၣ်ဖဲန့ၣ်အါအါဂီၢ်ဂီၢ်လၢ အဟဲလၢကီၢ်ယူဒၤဒီဘ့ၣ်ညါ, ဒီးလၢယရူၤၡလ့ၣ်ဒီးလၢပီၣ်လဲၣ်ကၢၢ်နံၤအဝ့ၢ်တဖၣ်လၢ အမ့ၢ်ဝဲဝ့ၢ်ထါယၢၣ်ဒီးဝ့ၢ်စံဒိၣ်န့ၣ်လီၤ.

လံာ်လူၤကၣ် 6:6

ဖဲပှၤယူဒၤဖိအမုၢ်အိၣ်ဘှံးနံၤအဂၤတနံၤန့ၣ်, ယ့ၣ်ၡူးလဲၤနုာ်ဆူဘူၣ်ဘျီၣ်လၢအမ့ၢ်တၢ်ဘါအလီၢ်ဒီးသိၣ် လီၤသီလီၤတၢ်လီၤ. ပှၤအိၣ်ဝဲဒၣ်ဖဲန့ၣ်တဂၤလၢအစုထွဲတခီသံဝဲလီၤ.

လံာ်လူၤကၣ် 7:21

တကတီၢ်ဃီဖဲန့ၣ်, ယ့ၣ်ၡူးမၤဘျါက့ၤပှၤအါဒံအါဂၤလၢအအိၣ်ဒီး တၢ်ဆူးတၢ်ဆါတဖၣ်, ပှၤလၢအတူၢ်ဘၣ်တၢ်နးတၢ်ဖှီၣ်တဖၣ်, ပှၤလၢတၢ်နါအိၣ်လၢအလိၤတဖၣ်ဒီးဒုးထံၣ်ထီၣ်က့ၤပှၤမဲာ်ဘျီၣ်အါဂၤလီၤ.

လံာ်လူၤကၣ် 7:22

အဝဲဒၣ်စံးဆၢက့ၤစီၤယိၤဟၣ်အပှၤဆှၢတၢ်ကစီၣ်တဖၣ်, “က့ၤဒီးတဲဘၣ်စီၤယိၤဟၣ်တၢ်လၢသုထံၣ်ဘၣ်ဒီးနၢ် ဟူဘၣ်တ့ၢ်သုဝဲန့ၣ်တက့ၢ်. ပှၤမဲာ်ဘျီၣ်တဖၣ်ထံၣ်ထီၣ်က့ၤတၢ်, ပှၤခီၣ်ဟးဂီၤတဖၣ်ဟးထီၣ်က့ၤဝဲသ့, ပှၤလိၤတဂ့ၤတဖၣ်ဘၣ်တၢ်မၤကဆှီထီၣ်က့ၤအီၤ, ပှၤနၢ်တအၢတဖၣ်နၢ်ဟူထီၣ်က့ၤတၢ်, ပှၤသံတဖၣ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ, ဒီးတၢ်သးခုကစီၣ်ဘၣ်တၢ်စံၣ်တဲၤတဲလီၤန့ၢ်ပှၤဖှီၣ်ဖိယာ်ဖိတဖၣ်လီၤ.

လံာ်လူၤကၣ် 8:1

တၢ်မၤအသးဝံၤအလီၢ်ခံတစိၢ်တလီၢ်န့ၣ်, ယ့ၣ်ၡူးလဲၤတၢ်ဒီးခီဂာ်ဝ့ၢ်တဖၣ်ဒီးသဝီတဖၣ်, ဒီးစံၣ်တဲၤတဲလီၤတၢ်သးခုအကစီၣ်ဘၣ်ဃးကစၢ်ယွၤ အဘီအမုၢ်လီၤ. ပှၤတၢ်မၢဖိတဆံခံဂၤလဲၤဃုာ်ဒီးအီၤ,

လံာ်လူၤကၣ် 9:11

ဖဲပှၤဂီၢ်မုၢ်တဖၣ်နၢ်ဟူတၢ်အံၤန့ၣ်, အဝဲသ့ၣ်လဲၤပိာ်အခံလီၤ. အဝဲဒၣ်တူၢ်လိာ်ခီၣ်ဆၢအဝဲသ့ၣ်, ကတိၤတၢ်ဒီးအဝဲသ့ၣ်ဘၣ်ဃးကစၢ်ယွၤအဘီအမုၢ်, ဒီးမၤဘျါပှၤလၢအလိၣ်ဘၣ်တၢ်မၤဘျါက့ၤအီၤတဖၣ်လီၤ.

လံာ်လူၤကၣ် 9:60

ယ့ၣ်ၡူးစံးဆၢဝဲ, “ပျဲပှၤသံတဖၣ်ခူၣ်လီၤအပှၤသံဒၣ်ဝဲတက့ၢ်. မ့မ့ၢ်နဲတခီ, လဲၤဒီးစံၣ်တဲၤတဲလီၤကစၢ်ယွၤအဘီအမုၢ်အဂ့ၢ်တက့ၢ်.”

လံာ်ယိၤဟၣ် 18:20

ယ့ၣ်ၡူးစံးဆၢတၢ်ဒီးစံးဝဲ, “ယကတိၤတၢ်ထီဘိလၢပှၤအါဂၤ အမဲာ်ညါဒီးလၢပှၤကိးဂၤဒဲးန့ၣ်လီၤ. ယတၢ်သိၣ်လိသီလိခဲလၢာ်ဘၣ်တၢ်မၤအီၤလၢဘူၣ်ဘျီၣ် လၢအမ့ၢ်တၢ်ဘါအလီၢ်အပူၤဒီးတၢ်လုၢ်ဟံၣ်အပူၤ, ဖဲပှၤယူဒၤဖိခဲလၢာ်ဟဲပာ်ဖှိၣ်အသးန့ၣ်လီၤ. ယတစံးကတိၤတၢ်လၢတၢ်ခူသူၣ်အပူၤနီတဘျီဘၣ်.

လံာ်ယိၤဟၣ် 6:59

ယ့ၣ်ၡူးစံးတၢ်တဖၣ်အံၤဖဲအဝဲသိၣ်လီၤသီလီၤတၢ်လၢ ဘူၣ်ဘျီၣ်လၢအမ့ၢ်တၢ်ဘါလီၢ်အပူၤဖဲဝ့ၢ်ကပ့းရနီၣ် န့ၣ်လီၤ.

လံာ်ယိၤဟၣ် 7:1

တၢ်အံၤဝံၤအလီၢ်ခံဒီး, ယ့ၣ်ၡူးဟးဝ့ၤဝီၤဝဲလၢကီၢ်ကၤလံၤလါ အပူၤလီၤ. မ့ၢ်လၢပှၤယူဒၤဖိအခိၣ်အနၢ်တဖၣ်ဃုမၤသံအီၤ အဃိ, အဝဲတသးအိၣ်ဟးဝ့ၤဝီၤလၢကီၢ်ယူဒၤအပူၤန့ၣ်ဘၣ်.

မၤတၢ် 10:38

သုသ့ၣ်ညါဘၣ်ဃးပှၤဝ့ၢ်နစၤရ့းဖိယ့ၣ်ၡူး, လၢကစၢ်ယွၤလူလီၤဂၢ်လီၤသးစီဆှံဒီးတၢ်စိတၢ် ကမီၤလၢအလိၤဒ်လဲၣ်အဂ့ၢ်န့ၣ်လီၤ. အဝဲဒၣ်လဲၤသကုၤဆးဒး, မၤဂ့ၤတၢ်ဒီးမၤဘျါက့ၤကယဲၢ်ပှၤအိၣ်လၢမုၣ်ကီၤလံၢ်အတၢ်စိတၢ် ကမီၤအဖီလာ်, အဂ့ၢ်မ့ၢ်လၢကစၢ်ယွၤအိၣ်ဒီးအီၤအဃိလီၤ.

မၤတၢ် 18:4

ပှၤယူဒၤဖိအမုၢ်အိၣ်ဘှံးနံၤကိးဘျီဒဲးန့ၣ်, အဝဲဒၣ်ကတိၤဂ့ၢ်လိာ်ဘှီလိာ်တၢ်ဖဲဘူၣ်ဘျီၣ်လၢအမ့ၢ်တၢ်ဘါ အလီၢ်, ဒီးဂုာ်ကျဲးစၢးဝဲဒ်သိးပှၤယူဒၤဖိဒီးပှၤကြံးခ်ဖိ ခံဖုလၢာ်ကနာ်တၢ်အဂီၢ်လီၤ.

မၤတၢ် 20:25

ယဟးဝ့ၤဝီၤတ့ၢ်လံလၢသုဝဲခဲလၢာ်အကျါဒီးစံၣ်တဲၤတဲလီၤယွၤ အဘီအမုၢ်န့ၣ်လီၤ. ဒီးခဲကနံၣ်အံၤ, ယသ့ၣ်ညါလၢသုတထံၣ်ဘၣ်လၢၤယၤနီတဂၤဘၣ်.

မၤတၢ် 28:31

အဝဲဒၣ်စံၣ်တဲၤတဲလီၤတၢ်ဘၣ်ဃးကစၢ်ယွၤအဘီအမုၢ်, ဒီးသိၣ်လီၤသီလီၤတၢ်ဘၣ်ဃးကစၢ်ယ့ၣ်ၡူးခရံာ်အဂ့ၢ်ဒီး ကတိၤတၢ်လၢတၢ်သူၣ်ဒူသးဒူအလၢအပှဲၤဒီးလၢတၢ်သဘျ့ နီၢ်နီၢ်အပူၤလီၤ. ပှၤလၢအကတြီအီၤတအိၣ်နီတဂၤဘၣ်.

ရိမ့ၤ 10:15

ဒီးပှၤစိာ်တၢ်ကစီၣ်တဖၣ်မ့ၢ်တဘၣ်တၢ်မၢလီၤအီၤဘၣ်ဒီး, တၢ်ကစီၣ်ဘၣ်တၢ်စံၣ်တဲၤတဲလီၤအီၤကသ့ဒ်လဲၣ်. ဒ်တၢ်ကွဲးအသးစီဆှံစံးဝဲအသိး, “ပှၤလၢအစံၣ်တဲၤတဲလီၤတၢ်သးခုအကစီၣ်တဖၣ် အတၢ်ဟဲမ့ၢ်တၢ်လၢအဂ့ၤဆံးဒိၣ်လဲၣ်” (ၡါ ၅၂:၇)