လံာ်မးသဲ 26:41 - Sgaw Karen Common Bible

⁴¹ ဆိးသီဒီးဃ့ဘါထုကဖၣ်ယွၤ, ဒ်သိးသုသုတလီၤဃံၤလၢတၢ်လ့ပစီအဃိတဂ့ၤန့ၣ်တက့ၢ်. သးအဂံၢ်အဘါမ့ၢ်ဆူၣ်သနာ်က့, နီၢ်ခိအဂံၢ်အဘါစၢ်ဝဲလီၤ.”

လံာ်မးသဲ 26:41 Iomraidhean Croise

စံးထီၣ်ပတြၢၤ 119:1

ပှၤလၢအလဲၤတၢ်လၢယွၤတၢ်သိၣ်တၢ်သီအပူၤ, ဒီးအကျဲတအိၣ်ဘၣ်ဒီးတၢ်ကမၣ်န့ၣ်, ဘၣ်ဆိၣ်ဂ့ၤဝဲလီၤ.

စံးထီၣ်ပတြၢၤ 119:115

ပှၤမၤတၢ်အၢသ့ၣ်တဖၣ်ဧၢ, ဟးဖးဒီးယၤ, ဒ်သိးယကတိၢ်န့ၢ်ဟံးဃာ် ယကစၢ်အတၢ်မၤလိာ်တဖၣ်န့ၣ်တက့ၢ်.

စံးထီၣ်ပတြၢၤ 119:117

မၤစၢၤယၤတက့ၢ်. ဒီးယကတုၤလၢ တၢ်အုၣ်က့ၤခီၣ်က့ၤယၤလီၤ. ဒီးယကတိၢ်နီၣ်နတၢ်မၤလိာ်တဖၣ်တထံၣ်ဃီလီၤ.

စံးထီၣ်ပတြၢၤ 119:32

တုၤနဟ့ၣ်အါထီၣ်ယၤယတၢ်သ့ၣ်ညါနၢ်ပၢၢ်တၢ်န့ၣ်ဒီး ယကစူၢ်နတၢ်မၤလိာ်တဖၣ်လၢ တၢ်သးဆူၣ်အပူၤလီၤ.

လံာ်မးသဲ 24:42

လၢတၢ်န့ၣ်အဃိ, ဆိးသီတက့ၢ်. အဂ့ၢ်ဒ်အံၤ, သုကစၢ်ကဟဲဝဲအနံၤအသီန့ၣ်သုတသ့ၣ်ညါဘၣ်.

လံာ်မးသဲ 25:13

ဒီးယ့ၣ်ၡူးမၤကတၢၢ်က့ၤအတၢ်ကတိၤဒီးစံး, “ဆိးသီတက့ၢ်. အဂ့ၢ်ဒ်အံၤ, မုၢ်နံၤမ့ၢ်ဂ့ၤ, နၣ်ရံၣ်မ့ၢ်ဂ့ၤသုတသ့ၣ်ညါဘၣ်.

လံာ်မးသဲ 26:38

ဒီးအဝဲဒၣ်စံးဘၣ်ပှၤသၢဂၤန့ၣ်, “တၢ်သူၣ်အုးသးအုးလၢယသးပူၤအံၤဒိၣ်မးဝဲတုၤဒၣ်လဲာ် ကမၤသဘှံးယၤလီၤ. အိၣ်ဖဲအံၤဒီးဆိးသီဒီးယၤတက့ၢ်.”

လံာ်မးသဲ 6:13

သုတဒုးလဲၤနုာ်ပှၤဆူတၢ်လ့ပစီအပူၤတဂ့ၤ. မ့မ့ၢ်ထုးထီၣ်ဖျဲးကွံာ်ပှၤလၢတၢ်အၢတၢ်သီအပူၤတက့ၢ်. (အဂ့ၢ်ဒ်အံၤ, ဘီမုၢ်, တၢ်စိတၢ်ကမီၤဒီး တၢ်လၤကပီၤန့ၣ်မ့ၢ်နတၢ်အစိၤစိၤအဃၣ်ဃၣ်လီၤ. အၤမ့ၣ်)’

လံာ်မၢ်ကူး 14:38

ဒီးအဝဲဒၣ်စံးဘၣ်အဝဲသ့ၣ်တဖၣ်န့ၣ်, “ဆိးသီဒီးဃ့ထုကဖၣ်ယွၤဒ်သိးသုဝဲသ့ၣ်အံၤ သုတလီၤနုာ်ဘၣ်ဆူတၢ်လ့ပစီပူၤတဂ့ၤန့ၣ်တက့ၢ်. သုသးအဂံၢ်အဘါဆူၣ်ကစီဒီ, မ့မ့ၢ်သုနီၢ်ခိတခီအဂံၢ်အဘါစၢ်ဝဲလီၤ.”

လံာ်လူၤကၣ် 11:4

ပျၢ်ကွံာ်ပတၢ်ဒဲးတူာ်ဒဲးဘးတဖၣ်တက့ၢ်. အဂ့ၢ်ဒ်အံၤ, ပပျၢ်ကွံာ်ပှၤကိးဂၤဒဲးလၢ အမၤကမၣ်ပှၤတဖၣ်အတၢ်ကမၣ်လီၤ. ဒီးသုတဒုးလဲၤနုာ်ပှၤဆူတၢ်လ့ပစီအပူၤတဂ့ၤ.”

လံာ်လူၤကၣ် 21:36

ဆိးသီဒီးဘါထုကဖၣ်သုဝဲထီဘိဒ်သိးသုကအိၣ်ဒီးတၢ်ဂံၢ်တၢ်ဘါလၢသု ကလဲၤခီဖျိတၢ်လၢအကမၤအသးတဖၣ်အံၤခဲလၢာ်ဂ့ၤဂ့ၤဘၣ်ဘၣ် ဒီးလၢသုကဆၢထၢၣ်လၢပှၤကညီဖိခွါအမဲာ်ညါအဂီၢ်န့ၣ်တက့ၢ်.”

လံာ်လူၤကၣ် 22:40

ဖဲအဝဲဒၣ်ဟဲတုၤတၢ်လီၢ်အဝဲန့ၣ်, စံးဘၣ်အဝဲသ့ၣ်, “ဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤ န့ၣ်တက့ၢ်.”

လံာ်လူၤကၣ် 22:46

ဒီးအဝဲဒၣ်စံးဘၣ်အဝဲသ့ၣ်, “ဘၣ်မနုၤအဃိသုမံလဲၣ်. ဂဲၤဆၢထၢၣ်ဒီးဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤန့ၣ်တက့ၢ်.”

လံာ်လူၤကၣ် 8:13

တၢ်ချံလၢအလီၤလၢလၢၢ်ခိၣ်ပာ်ဖျါထီၣ်ပှၤတဖၣ်လၢအနၢ်ဟူ ဘၣ်တၢ်အကလုၢ်ကထါဒီးတူၢ်လိာ်ဝဲလၢတၢ်သးခုအပူၤလီၤ. ဘၣ်ဆၣ်မၤအသးဒ်တၢ်ချံလၢအဂံၢ်တအိၣ်သူၣ်လီၤအသး ယိာ်ယိာ်ဘၣ်န့ၣ်လီၤ. အဝဲသ့ၣ်စူၢ်တၢ်နာ်တၢ်ထဲတစိၢ်ဖိဧိၤ, ဒီးဖဲတၢ်မၤကွၢ်အဆၢကတီၢ်ဟဲန့ၣ်, အဝဲသ့ၣ်လီၤဃံၤကွံာ်ဝဲလီၤ.

ရိမ့ၤ 8:3

မ့ၢ်လၢပှၤကညီအန့ဆၢၣ်အဂံၢ်စၢ်ဘါစၢ်အဃိ, တၢ်လၢတၢ်သိၣ်တၢ်သီမၤတသ့ဘၣ်န့ၣ်ကစၢ်ယွၤမၤဝဲလီၤ. အဝဲစံၣ်ညီၣ်ဃၣ်တၢ်ဒဲးဘးလၢပှၤကညီအန့ဆၢၣ်အပူၤ, ခီဖျိအတၢ်ဆှၢလီၤအဖိခွါဒၣ်ဝဲအိၣ်ဒီးန့ဆၢၣ်လၢအမ့ၢ် ပှၤကညီအတၢ်ဒဲးဘးအန့ဆၢၣ်ဒ်သိးအကတြူာ် ကွံာ်တၢ်ဒဲးဘးအဂီၢ်န့ၣ်လီၤ.

1 ကရံၣ်သူး 10:13

ကယဲၢ်တၢ်မၤကွၢ်လၢသုလဲၤခီဖျိဘၣ်တ့ၢ်လံဝဲတဖၣ်န့ၣ် မ့ၢ်ဒၣ်တၢ်တကလုာ်ဃီလၢအတုၤအိၣ်ညီနုၢ်ပှၤဟီၣ်ခိၣ်ဖိ တဖၣ်န့ၣ်လီၤ. ဘၣ်ဆၣ်ဒီးကစၢ်ယွၤတီလၢအတၢ်အၢၣ်လီၤ, ဒီးအဝဲတပျဲသုဘၣ်တၢ်လ့ပစီသုအါန့ၢ်သုအိၣ်ဒီးတၢ်ဂံၢ် တၢ်ဘါလၢသုကဆၢထၢၣ်ကျၢၤကျၢၤအဂီၢ်ဘၣ်လီၤ. ဖဲအဆၢကတီၢ်လၢသုဘၣ်တၢ်လ့ပစီသုန့ၣ်အဝဲ ကဟ့ၣ်သုတၢ်ဂံၢ်တၢ်ဘါလၢသုကကွၢ်ဆၢၣ်မဲာ်အီၤဒီးဆၢထၢၣ် ကျၢၤကျၢၤအဂီၢ်ဒီးဒုးထူၣ်ဖျဲးထီၣ်ကွံာ်သုလၢကျဲဒ်န့ၣ်အပူၤလီၤ.

1 ကရံၣ်သူး 16:13

အိၣ်ပလီၢ်သူၣ်ပလီၢ်သး, ဆၢထၢၣ်ကျၢၤကျၢၤလၢတၢ်စူၢ်တၢ်နာ် အပူၤ, အိၣ်ဒီးတၢ်သးဒူ, အိၣ်ဒီးတၢ်ဂံၢ်တၢ်ဘါတက့ၢ်.

1 ကရံၣ်သူး 9:27

ယမၤဆူၣ်မၤကိၤထီၣ်ယနီၢ်ခိခီဖျိတၢ်ထိတၢ်တီၢ်တဖၣ်ဒီး ကတဲာ်ကတီၤအီၤဒ်သိးအကအိၣ်လၢတၢ်ပၢၤဃာ်အီၤဃံးဃံး အဖီလာ်အဂီၢ်, ဒ်သိးဒီးယမၢဃီၤပှၤဆူတၢ်ပြၢဝံၤအလီၢ်ခံဒီး ယသုတဘၣ်တၢ်ညိကွံာ်ယၤတဂ့ၤအဂီၢ်န့ၣ်လီၤ.

ကလၤတံ 5:24

ဒီးပှၤလၢအဘၣ်ဃးဒီးယ့ၣ်ၡူးခရံာ်တဖၣ်န့ၣ်, မၤသံကွံာ်အတၢ်ဖံးတၢ်ညၣ်အသးဆၢန့ၢ်တၢ် ဒီး အတၢ်သူၣ်လီသးကွံခဲလၢာ်လံ.

အ့းဖ့းစူး 6:18

မၤတၢ်ခဲလၢာ်လၢတၢ်ထုကဖၣ်အပူၤဒီးဃ့ကစၢ်ယွၤအတၢ်မၤ စၢၤတက့ၢ်. ထုကဖၣ်ကိးဆၢကိးကတီၢ်ဒဲးဒ်ကစၢ်ယွၤ အသးဆှၢသုအသိးတက့ၢ်. လၢတၢ်အံၤအဂ့ၢ်န့ၣ်, ဆိးသီသုဝဲဒီးတ့ၢ်စၢ်လီၤသုဂံၢ်သုဘါတဂ့ၤ. ထုကဖၣ်ထီဘိလၢယွၤအပှၤစီဆှံခဲလၢာ်အဂီၢ်တက့ၢ်.

၁ ပ့းတရူး 4:7

တၢ်ခဲလၢာ်အကတၢၢ်ဘူးထီၣ်လံ. သုကဘၣ်ပၢၤသုသးဒီးဆိးသီဒ်သိးသုဃ့ဘါထုကဖၣ်တၢ်ကသ့ အဂီၢ်န့ၣ်လီၤ.

၁ ပ့းတရူး 5:8

အိၣ်စီၣ်မဲာ်စီၣ်နါဒီးဆိးသီတက့ၢ်. သုဒုၣ်သုဒါမုၣ်ကီၤလံၢ်ဟးဝ့ၤဝီၤဒ်ခ့ယုၢ်ကညီၤရုၢ်ရုၢ် အသိးဒီးဃုပှၤလၢအကယူၢ်လီၤဝဲလီၤ.

၂ ပ့းတရူး 2:9

လၢတၢ်န့ၣ်အဃိ, ကစၢ်ယွၤသ့ၣ်ညါကျဲလၢအကမၤပူၤဖျဲးပှၤယူးယီၣ်ယွၤလၢ အတၢ်နးတၢ်ဖှီၣ်တဖၣ်အပူၤ, ဒီးကဟံးဃာ်ပှၤအအၢအသီတဖၣ်လၢတၢ်သိၣ်ဃီၣ် အပူၤတုၤလၢမုၢ်စံၣ်ညီၣ်အနံၤ,

လံာ်လီၣ်ဖျါ 16:15

“ဒိကနၣ်တက့ၢ်. ယဟဲယဲဒ်တၢ်ဘျၣ်တဂၤအသိးလီၤ. ပှၤတဂၤလၢအိၣ်စီၣ်မဲာ်စီၣ်နါဒီးကတီၤဃာ်အတၢ်ကူတၢ်သိး တဖၣ်ဒ်သိးအဝဲအသုတဟးဝ့ၤဝီၤအိၣ်ဘ့ၣ်ဆ့ဒီးမဲာ်ဆှး ဘၣ်လၢပှၤဂီၢ်မုၢ်ဂီၢ်ပၤအမဲာ်ညါတဂ့ၤအဂီၢ်န့ၣ်ဘၣ်ဆိၣ်ဂ့ၤဝဲလီၤ.”

လံာ်လီၣ်ဖျါ 3:10

မ့ၢ်လၢသုတိၢ်န့ၢ်ဟံးဃာ်ယကလုၢ်လၢသုကတူၢ်တၢ်အိၣ်ဒီး တၢ်သူၣ်စူၤသးစူၤအဃိယကကဟုကယာ်စ့ၢ်ကီးသုလၢတၢ်ကီ တၢ်ခဲအဆၢကတီၢ်, လၢအကဟဲတုၤအိၣ်ဟီၣ်ခိၣ်ဒ်သိးအကမၤ ကွၢ်ပှၤအိၣ်လၢဟီၣ်ခိၣ်ချၢခဲလၢာ်န့ၣ်လီၤ.