လံာ်လူၤကၣ် 8:30 - Sgaw Karen Common Bible

³⁰ ယ့ၣ်ၡူးသံကွၢ်အီၤ, “နမံၤဒ်လဲၣ်.” အဝဲစံးဆၢဝဲ, “ယမံၤမ့ၢ်လ့းကူၣ်,” အဂ့ၢ်မ့ၢ်လၢတၢ်နါအါဒုလဲၤနုာ်တ့ၢ်လံလၢအပူၤအဃိန့ၣ်လီၤ.

လံာ်လူၤကၣ် 8:30 Iomraidhean Croise

လံာ်မးသဲ 26:53

မ့ၢ်နတသ့ၣ်ညါလၢယကိးထီၣ်တၢ်မၤစၢၤလၢယပၢ်အအိၣ်သ့ဝဲ, ဒီးတဘျီဃီ ကဆှၢလီၤန့ၢ်ယၤကလူးအသုးမုၢ်အါန့ၢ်ဒံးတဆံခံဖုန့ၣ်ဘၣ်ဧါ.

လံာ်မးသဲ 4:24

ယ့ၣ်ၡူးအကစီၣ်ဟူထီၣ်သါလီၤလၢကီၢ်ဒီဘ့ၣ်ညါပၢၢ်တုၤလၢကီၢ် စူၤရံဒီးပှၤဟဲကိးန့ၢ်အီၤလၢပှၤဆူးပှၤဆါလၢအတူၢ်ဘၣ်တၢ်ဆူး တၢ်ဆါအကလုာ်ကလုာ်လၢအတူၢ်ဘၣ်တၢ်နးနးကျံၤကျံၤတဖၣ်, ဒ်ပှၤလၢတၢ်နါဒိးအီၤ, ပှၤလၢအပျုၢ်ထိးတဖၣ်ဒီးပှၤသံတခီပၤတဖၣ်, ဒီးယ့ၣ်ၡူးမၤဘျါက့ၤအဝဲသ့ၣ်ခဲလၢာ်လီၤ.

လံာ်မးသဲ 8:29

တုၤအထံၣ်ယ့ၣ်ၡူးတဘျီဃီ အဝဲသ့ၣ်ကိးပသူထီၣ်ဒီးစံး, “ကစၢ်ယွၤအဖိခွါနၤဧၢ, နဘၣ်ဃးဒီးပှၤဒ်လဲၣ်. မ့ၢ်နဟဲလၢနကစံၣ်ညီၣ်မၤနးမၤဖှီၣ်ပှၤ တချုးလၢတၢ်အဆၢကတီၢ်ဘၣ်ဝဲန့ၣ်ဧါ.”

လံာ်မၢ်ကူး 16:9

ယ့ၣ်ၡူးဂဲၤဆၢထၢၣ်က့ၤလၢတၢ်သံလၢမုၢ်ခီၣ်ထံးနံၤလၢ ဂီၤဂီၤဝံၤအလီၢ်ခံ, အဝဲဒၣ်လီၣ်ဖျါထီၣ်အသးအဆိကတၢၢ်လၢပှၤမၤကဒါလၣ်မုၣ်နီၢ်မၤရံ, ပိာ်မုၣ်လၢအဝဲဟီထီၣ်ကွံာ်တၢ်နါနွံဒုလၢအလိၤန့ၣ်လီၤ. ပိာ်မုၣ်တဖၣ်လဲၤဆူစီၤပ့းတရူးဒီးအတံၤသကိးတဖၣ်အအိၣ် ဒီးစံးဘၣ်တဲဘၣ်အဝဲသ့ၣ်လၢတၢ်လၢအဝဲသ့ၣ်ဘၣ်တၢ်စံးဘၣ်တဲဘၣ် တ့ၢ်အီၤခဲလၢာ်လၢအဖုၣ်လီၤ.

လံာ်မၢ်ကူး 5:9

အန့ၣ်ဒီးယ့ၣ်ၡူးသံကွၢ်အီၤ, “နမံၤဒ်လဲၣ်.” အဝဲစံးဆၢက့ၤဝဲ, “ယမံၤမ့ၢ်လ့းကူၣ်လီၤ. အဂ့ၢ်မ့ၢ်လၢပအိၣ်အါဒုအဃိလီၤ.”

လံာ်လူၤကၣ် 8:2

ဒီးပိာ်မုၣ်တနီၤလၢယ့ၣ်ၡူးမၤဘျါတ့ၢ်အီၤလၢတၢ်ဝံတၢ်နါဒီး တၢ်ဆူးတၢ်ဆါတဖၣ်, နီၢ်မၤရံ (လၢအဘၣ်တၢ်ကိးစ့ၢ်ကီးအီၤလၢပှၤမၤကဒါလၣ်ဖိ) လၢတၢ်နါနွံဒုဘၣ်တၢ်ဟီထီၣ်ကွံာ်လၢအပူၤ,

လံာ်လူၤကၣ် 8:29

အဝဲဒၣ်စံးတၢ်အံၤန့ၣ်, မ့ၢ်လၢယ့ၣ်ၡူးဟီထီၣ်ကွံာ်တ့ၢ်လံတၢ်နါဒ်သိး အကဟးထီၣ်ကွံာ်လၢအလိၤအဃိန့ၣ်လီၤ. တၢ်နါအံၤဖီၣ်ဃာ်တ့ၢ်အီၤအါစုအါဘျီ, ဒီးအဝဲဒၣ်အစုအခီၣ်ဘၣ်တၢ်စၢဃာ်အီၤလၢထးသွဲသနာ်က့ ဖ့ၣ်တဲာ်ကွံာ်ဝဲဒီးဘၣ်တၢ်နီၣ်ဟးထီၣ်ကွံာ်အီၤလၢ တၢ်နါအဝဲန့ၣ်ဆူပှၢ်မုၢ်ကနၢအပူၤလီၤ.