လံာ်လူၤကၣ် 6:49 - Sgaw Karen Common Bible

⁴⁹ မ့မ့ၢ်ပှၤတဂၤလၢအနၢ်ဟူယကလုၢ်ဒီးတစူၢ်ဝဲန့ၣ်, လီၤဂာ်ဒီးပှၤတဂၤလၢ အသူၣ်ထီၣ်အဟံၣ်လၢဟီၣ်ခိၣ်လိၤ, တအိၣ်ဒီးတၢ်ပာ်လီၤဃာ်အခီၣ်ထံးခီၣ်ဘိနီတမံၤဘၣ်န့ၣ်လီၤ. ဖဲထံလုၣ်ဘၢတၢ်ဒီးဘၣ်ဒိဟံၣ်အဝဲန့ၣ်န့ၣ်, လီၤပှီၢ်ကွံာ်ဝဲတဘျီဃီ, ဒီးအတၢ်လီၤပှီၢ်န့ၣ်မ့ၢ်တၢ်နးမးန့ၣ်လီၤ.”

လံာ်လူၤကၣ် 6:49 Iomraidhean Croise

တၢ်ကတိၤဒိ. 28:18

အိၣ်မူတီတီလိၤလိၤတက့ၢ်ဒီးနကပူၤဖျဲးလီၤ. နမ့ၢ်တတီတလိၤဘၣ်ဒီး, နကလီၤဃံၤတကီၢ်ခါလီၤ.

လံာ်ယဃ့းစက့လး 33:31

လၢတၢ်န့ၣ်အဃိ, ယပှၤဂီၢ်မုၢ်ပာ်ဖှိၣ်ထီၣ်အသးဒ်သိးကနၢ်ဟူ တၢ်လၢနကစံးအီၤ, ဘၣ်ဆၣ်အဝဲသ့ၣ်တမၤတၢ်လၢနတဲဘၣ် အဝဲသ့ၣ်လၢကဘၣ်မၤဝဲန့ၣ်ဘၣ်. တၢ်ကတိၤတဖၣ်လၢအလီၤ အဲၣ်လီၤကွံန့ၣ်အိၣ်ဝဲလၢအနိးဖံးတဖၣ်အလိၤ, ဘၣ်ဆၣ်အဝဲသ့ၣ် မၤထွဲဒံးဒၣ်အတၢ်သူၣ်လီသးကွံအကျဲတဖၣ်န့ၣ်လီၤ.

လံာ်ဟိၤၡ့ 4:14

လၢတၢ်အံၤအဃိဒၣ်လဲာ်, ယတစံၣ်ညီၣ်အဝဲသ့ၣ်ဘၣ်. အဂ့ၢ်ဒ်အံၤ, သုဝဲဒၣ်, သုကစၢ်ဒၣ်ဝဲ, သုလဲၤသကိးတၢ်ဒီးတၢ်လုၢ်ထီၣ်ဃုာ်တၢ်ဘါတၢ်ဂီၤတၢ်ဖီၣ် အတၢ်လုၢ်တၢ်ပာ်တဖၣ်ဒီးအဝဲသ့ၣ်န့ၣ်လီၤ. ဒ်တၢ်ကတိၤဒိစံးဝဲအသိးပှၤဂီၢ်မုၢ်လၢအတအိၣ်ဒီးစ့ၣ်ဘၣ်န့ၣ်, တၢ်မၤဟးဂီၤကွံာ်အီၤလီၤ.

လံာ်မးသဲ 23:3

လၢတၢ်န့ၣ်အဃိ, သုဘၣ်စူၢ်ဒီးတိၢ်န့ၢ်တၢ်ကိးမံၤဒဲးလၢအဝဲသ့ၣ်တဲသုလၢ သုကဘၣ်မၤန့ၣ်လီၤ. ဘၣ်ဆၣ်ဒီး, တၢ်လၢအဝဲသ့ၣ်မၤဝဲတဖၣ်န့ၣ်တဘၣ်မၤဒိးတဂ့ၤ. အဂ့ၢ်ဒ်အံၤ, အဝဲသ့ၣ်တမၤထွဲတၢ်လၢအဝဲသ့ၣ်စံၣ်တဲၤတဲလီၤဝဲန့ၣ်ဘၣ်.

လံာ်မးသဲ 24:10

တုၤနုၤတစု, ပှၤအါဂၤကညိကွံာ်အတၢ်စူၢ်တၢ်နာ်ဖဲအကတီၢ်န့ၣ်လီၤ. အဝဲသ့ၣ်ကဆါလီၤအီၣ်ကွံာ်အသးတဂၤဒီးတဂၤဒီးကသးဟ့လိာ် အသးသကိးသကိးလီၤ.

လံာ်မၢ်ကူး 4:17

ဘၣ်ဆၣ်ဒီးယွၤအကလုၢ်ကထါန့ၣ်တပျဲနုာ်ဝဲယိာ်ယိာ်လၢ အပူၤဘၣ်သတးဒီး, တအိၣ်ကၢအိၣ်ခိးယံာ်ယံာ်ဘၣ်. တုၤမ့ၢ်တၢ်မၤကွၢ်ဒီးတၢ်မၤအၢမၤနးဟဲတုၤအိၣ်အဝဲသ့ၣ် လၢတၢ်တူၢ်လိာ်ယွၤအကလုၢ်ကထါအဃိဒီး, အဝဲသ့ၣ်ညိကွံာ်တၢ်ကစီၣ်န့ၣ်တဘျီဃီလီၤ.

လံာ်လူၤကၣ် 12:47

တၢ်ခ့တၢ်ပှၤလၢအသ့ၣ်ညါအကစၢ်အဲၣ်ဒိးအမၤတၢ်မနုၤ, ဘၣ်ဆၣ်ဒီး တအိၣ်ကတဲာ်ကတီၤအသးဒီးမၤတၢ်လၢအကစၢ်အဲၣ်ဒိးဝဲန့ၣ်, ကဘၣ်တၢ်စံၣ်ညီၣ်ဒီးဖျ့အီၤနးနးကလဲာ်လီၤ.

လံာ်လူၤကၣ် 19:14

တၢ်မၤအသးလၢ, အဝဲဒၣ်အထံဖိကီၢ်ဖိတဖၣ်သးဟ့အီၤ, သတးဒီးအဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဒ်သိးအကစံးဝဲ, ‘ပတအဲၣ်ဒိးလၢပှၤတဂၤအံၤကကဲပစီၤပၤဘၣ်’ န့ၣ်လီၤ.

လံာ်လူၤကၣ် 19:27

မ့မ့ၢ်, ယဒုၣ်ယဒါတဖၣ်အံၤလၢအတအဲၣ်ဒိးယကဲအစီၤပၤန့ၣ်, ဆှၢအဝဲသ့ၣ်တဖၣ်ဆူအံၤ, ဒီးမၤသံအီၤလၢယမဲာ်ညါတက့ၢ်.’ ”

လံာ်လူၤကၣ် 6:46

“ဘၣ်မနုၤအဃိသုကိးယၤ, ‘ကစၢ်ဧၢ, ကစၢ်ဧၢ,’ ဒီးသုတမၤတၢ်လၢယတဲသုန့ၣ်လဲၣ်.

လံာ်လူၤကၣ် 6:48

အဝဲဒၣ်လီၤဂာ်ဒီးပှၤတဂၤလၢအသူၣ်ထီၣ်ဟံၣ်, ခူၣ်တၢ်ပူၤယိာ်ယိာ်, ဒီးပာ်လီၤဝဲအခီၣ်ထံးခီၣ်ဘိလၢလၢၢ်ခိၣ်န့ၣ်လီၤ. ထံလုၣ်ဘၢကွံာ်ထံကျိအကၢၢ်ခိၣ်ဒီးဘၣ်ဒိဟံၣ်တဖျၢၣ်န့ၣ်, ဘၣ်ဆၣ်ဒီးမၤဟူးမၤဝးအီၤတန့ၢ်ဘၣ်. အဂ့ၢ်မ့ၢ်လၢတၢ်သူၣ်အီၤကျၢၤကျၢၤအဃိလီၤ.

လံာ်လူၤကၣ် 7:1

ဖဲယ့ၣ်ၡူးစံးကတိၤတၢ်သ့ၣ်တဖၣ်အံၤခဲလၢာ်လၢပှၤဂီၢ်မုၢ်ဝံၤဝဲန့ၣ်, အဝဲဒၣ်လဲၤဆူဝ့ၢ်ကပ့းရနီၣ်လီၤ.

လံာ်ယိၤဟၣ် 15:2

ကယဲၢ်ဒ့လၢယလိၤလၢအတသၣ်ထီၣ်ဘၣ်ဝဲန့ၣ်, အဝဲကျီကွံာ်ဝဲ, ဒီးကယဲၢ်ဒ့လၢအသၣ်ထီၣ်ဝဲန့ၣ်, အဝဲပဲာ်ဟိကဆှီထီၣ်ဝဲဒ်သိးအကကဆှီထီၣ်ဒီး ကသၣ်အါထီၣ်ဝဲအဂီၢ်လီၤ.

မၤတၢ် 20:29

ယသ့ၣ်ညါယဲဒၣ်လၢယဟးထီၣ်ဝံၤအလီၢ်ခံန့ၣ်, ထွံၣ်မံၤအဒူတဖၣ်ကဟဲနုာ်လီၤဆူသုကျါ, ဒီးတပျဲပူၤသိတဖၣ် န့ၣ်ဘၣ်.

မၤတၢ် 26:11

အဆၢကတီၢ်အိၣ်ဝဲအါဘျီဖဲယဒုးဘၣ်အဝဲသ့ၣ်တၢ်စံၣ်ညီၣ် လၢဘူၣ်ဘျီၣ်တဖၣ်အပူၤဒီးဂုာ်ကျဲးစၢးမၤယဲဒ်သိးအဝဲသ့ၣ် ကညိကွံာ်အတၢ်စူၢ်တၢ်နာ်န့ၣ်လီၤ. ယသးထီၣ်ဘၣ်အဝဲသ့ၣ်တုၤဒၣ်လဲာ်ယလဲၤဆူဝ့ၢ်အဂၤတဖၣ် ဒ်သိးယကမၤအၢမၤနးအဝဲသ့ၣ်န့ၣ်လီၤ.

၁ သ့းစၤလနံ 3:5

လၢတၢ်န့ၣ်အဃိ, ယဘၣ်ဆှၢလီၤစီၤတံၤမသ့းလီၤ. ယအိၣ်တကဲလၢၤအဃိယဆှၢလီၤအဝဲဒၣ်ဒ်သိးအကဃု သ့ၣ်ညါတၢ်ဘၣ်ဃးသုတၢ်စူၢ်တၢ်နာ်အဂ့ၢ်န့ၣ်လီၤ. ယဘၣ်ယိၣ်လၢမုၣ်ကီၤလံၢ်ကလ့ပစီန့ၢ်သု, ဒီးပတၢ်ဖံးတၢ်မၤခဲလၢာ်ကကဲထီၣ်တၢ်ကလီကလီန့ၣ်လီၤ.

၂ ပ့းတရူး 2:20

ပှၤမ့ၢ်ထူၣ်ဖျဲးထီၣ်ကွံာ်လၢဟီၣ်ခိၣ်အတၢ်သံၣ်သူမီၢ်ကျာ် တဖၣ်ခီဖျိအတၢ်သ့ၣ်ညါပကစၢ်ဒီးပှၤအုၣ်က့ၤခီၣ်က့ၤပှၤ ယ့ၣ်ၡူးခရံာ်ဝံၤဒီး, မ့ၢ်ဘၣ်တၢ်ဖီၣ်န့ၢ်ဒီးမၤနၢၤက့ၤကဒီး အီၤလၢအဝဲသ့ၣ်န့ၣ်, ပှၤဒ်သိးအံၤတဖၣ်အတၢ်မ့ၢ်တၢ်လၢ အကတၢၢ်န့ၣ်, အၢဒိၣ်န့ၢ်ဒံးအတၢ်မ့ၢ်တၢ်လၢအခီၣ်ထံး တက့ၢ်န့ၣ်လီၤ.

၁ ယိၤဟၣ် 2:19

ပှၤတဖၣ်အံၤတဘၣ်ဃးဒီးပတၢ်ရ့လိာ်မုာ်လိာ်နီၢ်နီၢ်ဘၣ် အဃိ, ဟးထီၣ်ကွံာ်လၢပကျါန့ၣ်လီၤ. အဝဲသ့ၣ်မ့ၢ်ဘၣ်ဃး တ့ၢ်လံဒီးပှၤနီၢ်နီၢ်ဒီး, ကအိၣ်ကဆိးတ့ၢ်ဒီးပှၤန့ၣ်လီၤ. ဘၣ်ဆၣ်ဒီး, အဝဲသ့ၣ်ဟးထီၣ်ကွံာ်လၢပကျါဒ်သိးအကအိၣ်ဖျါဝဲဒၣ်လၢအဝဲသ့ၣ် တဘၣ်ဃးဒီးပှၤနီၢ်နီၢ်နီတဂၤဘၣ် အဂီၢ်န့ၣ်လီၤ.