လံာ်လူၤကၣ် 23:2 - Sgaw Karen Common Bible

² ဖဲအဝဲသ့ၣ်ပာ်တၢ်ကမၣ်လၢအဝဲဒၣ်အလိၤဒီးစံး, “ပဖီၣ်န့ၢ်ပှၤတဂၤအံၤလၢအဆှၢကမၣ်ပပှၤကလုာ်, တြီအဝဲသ့ၣ်လၢအသုတဟ့ၣ်တၢ်ခိတၢ်သွဲဆူစီၤပၤဖးဒိၣ် အအိၣ်တဂ့ၤ, ဒီးစံးလီၤအသးလၢအနီၢ်ကစၢ်ဒၣ်ဝဲမ့ၢ်ခရံာ်, စီၤပၤတဂၤန့ၣ်လီၤ.”

လံာ်လူၤကၣ် 23:2 Iomraidhean Croise

လံာ်စီၤပၤအခီၣ်ထံးတဘ့ၣ် 18:17

ဖဲစီၤအၤဃာ်ထံၣ်ဘၣ်အီၤန့ၣ်အဝဲစံးဝဲ, “အိမ့ၢ်နၤ, ပှၤမၤကိၢ်မၤဂီၤတၢ်အဒိၣ်ကတၢၢ်လၢကီၢ်အံၣ်စရ့လးအပူၤန့ၣ်ဧါ.”

စံးထီၣ်ပတြၢၤ 35:11

ပှၤအုၣ်အသးကဘျံးကဘျၣ်ဂဲၤဆၢထၢၣ်ထီဒါယၤ ဒီးပာ်တၢ်ကမၣ်လၢယလိၤလၢတၢ်လၢ ယတသ့ၣ်ညါအဂ့ၢ်နီတမံၤဘၣ်န့ၣ်လီၤ.

စံးထီၣ်ပတြၢၤ 62:4

သုသးအိၣ်ဒၣ်ထဲလၢသုကပာ်လီၤအီၤလၢ တၢ်လၤကပီၤအလီၢ်, သုမုာ်လၤလၢတၢ်လီတၢ်ဝ့ၤတဖၣ်အပူၤလီၤ. သုဆိၣ်ဂ့ၤတၢ်လၢသုတၢ်ကတိၤတဖၣ်, ဘၣ်ဆၣ်သုဆိၣ်အၢအီၤလၢသုသးပူၤလီၤ. စ့လၤ

လံာ်ယံးရမံယၤ 20:10

ယနၢ်ဟူဘၣ်ပှၤကိးဂၤဒဲးကတိၤကသွံကသွါတၢ်ဒီးစံး, “တၢ်လီၤပျံၤလီၤဖုးအိၣ်ဝဲလၢတၢ်လီၢ်ကိးပူၤဒဲးလီၤ. အဃိဒီးမ်ပလဲၤဘိးဘၣ်သ့ၣ်ညါအဝဲအဂ့ၢ်ဆူပှၤ န့ၢ်စိန့ၢ်ကမီၤတဖၣ်အအိၣ်တက့ၢ်.” ယတံၤသကိးလၢအဘူးကတၢၢ်ဒီးယၤတဖၣ်ဒၣ်လဲာ် အိၣ်ခိးကွၢ်လၢ်ယတၢ်ဟးဂီၤန့ၣ်လီၤ. အဝဲသ့ၣ်စံးဝဲ, “ဘၣ်သ့ၣ်သ့ၣ်ပလီန့ၢ်ဝ့ၤန့ၢ်အတၢ်ကန့ၢ်လီၤ. အန့ၣ်ဒီးပကဖီၣ်န့ၢ်အီၤဒီးမၤကၣ်က့ၤအီၤန့ၣ်လီၤ.”

လံာ်ယံးရမံယၤ 38:4

အန့ၣ်ဒီး, ပဒိၣ်ပပှၢ်တဖၣ် လဲၤဆူစီၤပၤအအိၣ်ဒီး စံးဝဲ, “ပှၤတဂၤအံၤ ကြၢးဘၣ်တၢ်မၤသံအီၤလီၤ. မ့ၢ်လၢအဝဲဒၣ် ကတိၤတၢ်ဒ်သိးအံၤအဃိန့ၣ်, အဝဲမၤလီၤမၢ်ကွံာ် ပှၤသုးဖိလၢအအိၣ်လၢ ဝ့ၢ်ပူၤတဖၣ် အတၢ်သးဒူန့ၣ်လီၤ. ဒီးအဝဲမၤတၢ်တမံၤအံၤဆူ ပှၤအဂၤခဲလၢာ်လၢ အအိၣ်လီၤ တဲာ်လၢ ဝ့ၢ်အံၤအပူၤန့ၣ်လီၤ. အဝဲတကျဲးစၢးမၤစၢၤပှၤဂီၢ်မုၢ် ဘၣ်. အဝဲအဲၣ်ဒိးမၤဘၣ်ဒိဘၣ်ထံး ထဲအဝဲသ့ၣ်တခီန့ၣ်လီၤ.”

လံာ်ဧၤမိၣ် 7:10

ဒီးစီၤအမၤစယါ, ဝ့ၢ်ဘ့ၤသ့လးအပှၤလုၢ်တၢ်အခိၣ်ဆှၢလီၤတၢ် ကစီၣ်ဆူအံၣ်စရ့လးအစီၤပၤစီၤယၤရၤဘၣ်အအိၣ်ဒီးစံးဝဲဒၣ်, စီၤဧၤမိၣ်ကူၣ်ထီၣ်တၢ်အၢထီဒါနၤလၢအံၣ်စရ့လးဖိအကျါလီၤ. အတၢ်ကတိၤတဖၣ်ကမၤဟးဂီၤကွံာ်ထံကီၢ်န့ၣ်လီၤ.

လံာ်စကၤရယၤ 11:8

ပှၤကွၢ်သိအဂၤသၢဂၤလၢအသးဟ့ယၤန့ၣ်, ယဝံသးစူၤအီၤတကဲဘၣ်ဒီးလၢတလါဃီဧိၤအတီၢ်ပူၤ ယဒီၣ်တဲာ်ကွံာ်အဝဲသ့ၣ်လီၤ.

လံာ်မးသဲ 17:27

ဘၣ်ဆၣ်ဒီး, ဒ်သိးပသုတမၤတမုာ်ဘၣ်အဝဲသ့ၣ်အသးတဂ့ၤအဂီၢ်န့ၣ်, လဲၤဆူပီၣ်လဲၣ်, ဒီးစဲၤလီၤနတခွဲဘိတက့ၢ်. ဟံးန့ၢ်ညၣ်အဆိကတၢၢ်လၢနတခွဲန့ၢ်အီၤတဘ့ၣ်, ဒီးအိးထီၣ်အကိာ်ပူၤ, ဒီးနကထံၣ်န့ၢ်စ့တဘ့ၣ်လၢအကလၢဝဲလၢတၢ်လုၢ်ဟံၣ်အခိအသွဲလၢနဂီၢ်, ဒီးလၢယဂီၢ်လီၤ. ဟံးန့ၢ်စ့အဝဲန့ၣ်ဒီး, ဟ့ၣ်လီၤတၢ်လုၢ်ဟံၣ်အခိအသွဲလၢယၤဒီးနၤအဂီၢ်တက့ၢ်.”

လံာ်မးသဲ 22:21

အဝဲသ့ၣ်စံးဆၢဝဲ, “မ့ၢ်ရိမ့ၤအစီၤပၤဖးဒိၣ်အခိၣ်အဂီၤဒီးအမံၤလီၤ.” တုၤနုၤတစု, ယ့ၣ်ၡူးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, တၢ်လၢအဘၣ်ဃးဒီးရိမ့ၤအစီၤပၤဖးဒိၣ်န့ၣ်, ဟ့ၣ်ရိမ့ၤအစီၤပၤဖးဒိၣ်, ဒီးတၢ်လၢအဘၣ်ဃးဒီးကစၢ်ယွၤန့ၣ်, ဟ့ၣ်ကစၢ်ယွၤတက့ၢ်.”

လံာ်မးသဲ 27:11

ယ့ၣ်ၡူးအိၣ်ဆၢထၢၣ်လၢပှၤရိမ့ၤဖိအပဒိၣ်ဖးဒိၣ်အမဲာ်ညါ, ဒီးပဒိၣ်ဖးဒိၣ်သမံသမိးအီၤဒီးစံး, “နမ့ၢ်ပှၤယူဒၤဖိ အစီၤပၤဧါ.” ယ့ၣ်ၡူးစံးဆၢအီၤ, “နစံးတ့ၢ်လံနဲလံ.”

လံာ်မၢ်ကူး 12:17

ယ့ၣ်ၡူးစံးဘၣ်အဝဲသ့ၣ်, “ဂ့ၤလံ, မ့မ့ၢ်ဒ်န့ၣ်ဒီး ရိမ့ၤအစီၤပၤဖးဒိၣ် အတၢ်န့ၣ်ဟ့ၣ်ရိမ့ၤအစီၤပၤဖးဒိၣ်, ဒီးကစၢ်ယွၤအတၢ်န့ၣ်ဟ့ၣ်ကစၢ်ယွၤတက့ၢ်.” ယ့ၣ်ၡူးစံးတၢ်အံၤဒုးကမၢကမၣ်အဝဲသ့ၣ်ဒိၣ်ဒိၣ်ကလဲာ်လီၤ.

လံာ်မၢ်ကူး 15:2

စီၤပံၤလးသံကွၢ်ယ့ၣ်ၡူး, “နမ့ၢ်ပှၤယူဒၤဖိအစီၤပၤဧါ.” အဝဲဒၣ်စံးဆၢက့ၤအီၤ, “နစံးတ့ၢ်လံနဲလံ.”

လံာ်လူၤကၣ် 23:14

ဒီးစံးဘၣ်အဝဲသ့ၣ်, “သုဟဲဆှၢပှၤတဂၤအံၤဆူယအိၣ်, ဒီးစံးလၢအဝဲဒၣ်ဆှၢကမၣ်ပှၤဂီၢ်မုၢ်တဖၣ်လီၤ. ခဲကနံၣ်အံၤ, ယသမံသမိးလံအီၤဖဲအံၤလၢသုမဲာ်ညါ, ဒီးယတထံၣ်တ့ၢ်ယဲ တၢ်ကမၣ်လၢသုပာ်လၢအလိၤတဖၣ်နီတမံၤဘၣ်.

လံာ်လူၤကၣ် 23:5

ဘၣ်ဆၣ်ဒီး, အဝဲသ့ၣ်စံးကဒီးဝဲဆူၣ်န့ၢ်အလီၢ်, “အဝဲဒၣ်မၤတၢထီၣ်တၢလီၤတၢ်လၢပှၤဂီၢ်မုၢ်တဖၣ်အကျါ လၢကီၢ်ယူဒၤဒီကီၢ်ညါခီဖျိအတၢ်သိၣ်လီၤသီလီၤတဖၣ်လီၤ. အဝဲဒၣ်စးထီၣ်မၤဝဲလၢကီၢ်ကၤလံၤလါ, ဒီးခဲအံၤဟဲတုၤဝဲဖဲအံၤလံ.”

လံာ်ယိၤဟၣ် 18:29

လၢတၢ်န့ၣ်အဃိ, စီၤပံၤလးဟးထီၣ်ဆူတၢ်ချၢဆူအဝဲသ့ၣ် အအိၣ်ဒီးသံကွၢ်အီၤ, “သုပာ်တၢ်ကမၣ်မနုၤတမံၤလၢပှၤ တဂၤအံၤအလိၤလဲၣ်.”

လံာ်ယိၤဟၣ် 18:30

အဝဲသ့ၣ်စံးဆၢတၢ်ဒီးစံးဝဲ, “အဝဲမ့ၢ်တမၤကမၣ်ထံကီၢ်တၢ်သိၣ်တၢ်သီ တမံၤမံၤဘၣ်ဒီး, တမ့ၢ်လၢပကဟဲဆှၢအီၤဆူနအိၣ်န့ၣ်ဘၣ်.”

လံာ်ယိၤဟၣ် 19:12

တုၤစီၤပံၤလးနၢ်ဟူတၢ်အံၤဒီး, အဝဲဃုဝဲကျဲလၢကမၤထူၣ်ဖျဲးယ့ၣ်ၡူးအဂီၢ်န့ၣ်လီၤ. ဘၣ်ဆၣ်ဒီးပှၤယူဒၤဖိတဖၣ်ကိးပသူထီၣ်ဒီးစံးဝဲ, “နမ့ၢ်ပျၢ်ဖျဲးကွံာ်အီၤဒီး, အခီပညီနတမ့ၢ်ရိမ့ၤအစီၤပၤဖးဒိၣ် အတံၤသကိးဘၣ်. ပှၤတဂၤဂ့ၤတဂၤဂ့ၤလၢအစံးလီၤအသး လၢအမ့ၢ်စီၤပၤတဂၤန့ၣ်, မ့ၢ်ပှၤလၢအပူထီၣ်တၢ်ထီဒါရိမ့ၤအစီၤပၤဖးဒိၣ်န့ၣ်လီၤ.”

မၤတၢ် 24:13

ဒ်န့ၣ်အသိး, တၢ်ကမၣ်လၢအဝဲသ့ၣ်ပာ်ထီၣ်လၢယလိၤန့ၣ်, အဝဲသ့ၣ်ဟ့ၣ်တၢ်အုၣ်အသးတသ့ဘၣ်.

မၤတၢ် 24:5

ပထံၣ်ဘၣ်ပှၤတဂၤအံၤလၢအမ့ၢ်ပှၤမၤတံာ်တာ်တၢ်လၢ အလီၤပျံၤလီၤဖုးတဂၤန့ၣ်လီၤ. အဝဲဒုးအိၣ်ထီၣ်တၢ်တၢထီၣ်တၢလီၤလၢပှၤယူဒၤဖိတဖၣ် အသိးအကျါသကုၤဟီၣ်ခိၣ်ဒီဘ့ၣ်ညါဒီးမ့ၢ်ဝဲပှၤနစၤရ့းဖိကရၢ အခိၣ်တဂၤလီၤ.

ရိမ့ၤ 13:7

မ့မ့ၢ်ဒ်န့ၣ်ဒီး, ဟ့ၣ်တၢ်လၢသုကဘၣ်ဟ့ၣ်အဝဲသ့ၣ်န့ၣ်တက့ၢ်. ကယဲၢ်တၢ်ခိတၢ်သွဲလၢအလီၤဘၣ်သုတမံၤလၢ်လၢ်န့ၣ်ဟ့ၣ် အီၤတက့ၢ်. ဒီးဒုးနဲၣ်တၢ်ယူးယီၣ်ဒီးတၢ်မၤလၤကပီၤလၢ အဝဲသ့ၣ်ခဲလၢာ်အဂီၢ်တက့ၢ်.