လံာ်လူၤကၣ် 22:36 - Sgaw Karen Common Bible

³⁶ အဝဲသ့ၣ်စံးဆၢဝဲ, “တအိၣ်နီတမံၤဘၣ်.” “ဘၣ်ဆၣ်ဒီးခဲကနံၣ်အံၤ,” ယ့ၣ်ၡူးစံးဆၢဝဲ, “ပှၤတဂၤလၢ်လၢ်လၢအအိၣ်ဒီးစ့ထၢၣ်တဖျၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, မ်အကဟံးန့ၢ်အီၤတက့ၢ်. ဒီးပှၤတဂၤဂၤလၢအတအိၣ်ဒီးနးတဘ့ၣ်န့ၣ် မ်အကဆါကွံာ်အဆ့ကၤဖီခိၣ်ဒီးပှ့ၤန့ၢ်အီၤတက့ၢ်.

လံာ်လူၤကၣ် 22:36 Iomraidhean Croise

လံာ်မးသဲ 10:10

လၢသုတၢ်လဲၤအဂီၢ်န့ၣ်, တဘၣ်စိာ်ထၢၣ်မ့ၢ်ဂ့ၤ, ဆ့ကၤအဂၤတဘ့ၣ်မ့ၢ်ဂ့ၤ, ခီၣ်ဖံးအဂၤတစူၣ်မ့ၢ်ဂ့ၤ, နီၣ်ထိးအဂၤတဘိမ့ၢ်ဂ့ၤန့ၣ်တဂ့ၤ. ပှၤမၤတၢ်ဖိန့ၣ်ကြၢးဘၣ်တၢ်ဟ့ၣ်အီၤလၢတၢ်လၢအလိၣ်ဘၣ်ဝဲတဖၣ် န့ၣ်လီၤ.

လံာ်လူၤကၣ် 22:35

အန့ၣ်ဝံၤအလီၢ်ခံ, ယ့ၣ်ၡူးစံးဘၣ်အဝဲသ့ၣ်, “တဘျီဖဲယမၢလီၤသု, တအိၣ်ဒီးစ့ထၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးမ့ၢ်ဂ့ၤန့ၣ်, တၢ်တလၢတပှဲၤလၢသုဂီၢ်အိၣ်ဝဲတမံၤမံၤဒံးဧါ.”

လံာ်လူၤကၣ် 22:37

အဂ့ၢ်ဒ်အံၤ, ယစံးဘၣ်တဲဘၣ်သုတၢ်တမံၤအံၤ, တၢ်ကွဲးအသးလၢအစံးဝဲ, ‘အဝဲဘၣ်တၢ်ဂံၢ်ဃုာ်အီၤလၢပှၤလုၣ်သ့ၣ်ခါပတာ်ထံကီၢ် အတၢ်သိၣ်တၢ်သီတဖၣ်အသိးအကျါ,’ တတီၤန့ၣ်, ကဘၣ်ဟဲလၢထီၣ်ပှဲၤထီၣ်ဝဲလၢယၤလီၤ. အဂ့ၢ်ဒ်အံၤ, တၢ်လၢအဘၣ်တၢ်ကွဲးတ့ၢ်အီၤလၢယဂ့ၢ်န့ၣ် ဟဲလၢထီၣ်ပှဲၤထီၣ်ဝဲဒၣ်လီၤ.”

လံာ်လူၤကၣ် 22:38

အပျဲၢ်အဘီၣ်တဖၣ်စံးဝဲ, “ကွၢ်လၢအံၤ, ကစၢ်ဧၢ, နးအိၣ်ဝဲဒၣ်ဖဲအံၤခံဘ့ၣ်လီၤ.” ဒီးအဝဲဒၣ်စံးဝဲ, “ဘၣ်လံ.”

လံာ်ယိၤဟၣ် 15:20

သ့ၣ်နီၣ်ထီၣ်က့ၤလၢယစံးဘၣ်တ့ၢ်သု, ‘ကုၢ်တဒိၣ်န့ၢ်အကစၢ်နီတဂၤဘၣ်.’ အဝဲသ့ၣ်မ့ၢ်မၤအၢမၤနးယၤဒီး, ကမၤအၢမၤနးစ့ၢ်ကီးသုလီၤ. အဝဲသ့ၣ်မ့ၢ်ဒိကနၣ်ယကလုၢ်ကထါဒီး, ကဒိကနၣ်သုကလုၢ်ကထါစ့ၢ်ကီးလီၤ.

လံာ်ယိၤဟၣ် 16:33

ယစံးဘၣ်တ့ၢ်သုတၢ်အံၤဒ်သိးသုကအိၣ်ဒီးတၢ်ဃူတၢ်ဖိးလၢ ယပူၤအဂီၢ်လီၤ. ဟီၣ်ခိၣ်ကမၤနးမၤဖှီၣ်သုလီၤ. ဘၣ်ဆၣ်ဒီး, ပာ်သုသးဒူဒူတက့ၢ်. ယမၤနၢၤလံဟီၣ်ခိၣ်လံ.

၁ သ့းစၤလနံ 3:4

အဂ့ၢ်ဒ်အံၤ, ဖဲပအိၣ်ဒံးဒီးသုအဖၢမုၢ်န့ၣ်, ပစံးဘၣ်တ့ၢ်သုလၢပကဘၣ်တၢ်မၤအၢမၤနးပှၤ, ဒီးဒ်သုသ့ၣ်ညါသုဝဲဂ့ၤဂ့ၤအသိးတၢ်မၤအသးဒ်န့ၣ်အသိး သပှၢ်ကတၢၢ်လီၤ.

၁ ပ့းတရူး 4:1

မ့ၢ်လၢခရံာ်တူၢ်ဘၣ်တၢ်လၢနီၢ်ခိနီၢ်ခီအဃိ, သုဝဲသ့ၣ်စ့ၢ်ကီးသုကဘၣ်မၤဆူၣ်ထီၣ်သုဂံၢ်သုဘါလၢ တၢ်ပာ်လီၤသးတမံၤဃီဒ်အီၤအသိးန့ၣ်လီၤ. အဂ့ၢ်ဒ်အံၤ, ပှၤတဂၤဂ့ၤတဂၤဂ့ၤလၢအတူၢ်ဘၣ်တၢ်လၢနီၢ်ခိ နီၢ်ခီန့ၣ်, တဘၣ်ဃးဒီးတၢ်ဒဲးဘးလၢၤဘၣ်.