လံာ်လူၤကၣ် 21:7 - Sgaw Karen Common Bible

⁷ အဝဲသ့ၣ်သံကွၢ်ဝဲ, “သရၣ်ဧၢ, တၢ်အဝဲအံၤကမၤအသးဖဲဆၢကတီၢ်မတၤလဲၣ်. ဒီးတၢ်မနုၤတမံၤကမၤအသးလၢအကဒုးနဲၣ်ဝဲလၢဆၢ ကတီၢ်တုၤလီၤလံလၢတၢ်တမံၤအံၤကမၤအသးန့ၣ်လဲၣ်.”

လံာ်လူၤကၣ် 21:7 Iomraidhean Croise

လံာ်ဒၤနံးယ့လး 12:6

လၢအကျါတဂၤသံကွၢ်တ့ၢ်မူခိၣ်ကလူးလၢအဆၢထၢၣ်စီၤစုၤ ဒီးအီၤလၢထံခံန့ၣ်ဒီးစံး, “တုၤတၢ်မၤအသးလီၤလိၢ်လီၤလး တဖၣ်ကတၢၢ်ဝဲတစုန့ၣ်မ့ၢ်ကယံာ်ဆံးယံာ်ဒံးလဲၣ်.”

လံာ်ဒၤနံးယ့လး 12:8

ယနၢ်ဟူတ့ၢ်တၢ်လၢအစံးဝဲတဖၣ်လီၤ. ဘၣ်ဆၣ်ဒီးယတနၢ် ပၢၢ်အီၤဘၣ်. ဒီးယသံကွၢ်, “တၢ်ဒိၣ်ဧၢ, တၢ်ခဲလၢာ်န့ၣ် ကကတၢၢ်ဝဲဒ်လဲၣ်.”

လံာ်မးသဲ 24:3

ဖဲယ့ၣ်ၡူးဆ့ၣ်နီၤဝဲလၢကစၢၢ်သ့ၣ်စၤယံးအဒီခိၣ်န့ၣ်, အပျဲၢ်အဘီၣ်တဖၣ်ဟဲဆူအအိၣ်ကစုဒုဒီးစံးဘၣ်အီၤ, “တဲဘၣ်ပှၤတက့ၢ်. တၢ်အံၤတဖၣ်ကမၤအသးအခါဖဲလဲၣ်. ဒီးတၢ်မနုၤကမၤအသးလၢအကဒုးနဲၣ်ပှၤလၢနတၢ်ဟဲက့ၤဒီးတၢ် အစိၤအကတၢၢ်န့ၣ်လဲၣ်.”

လံာ်မၢ်ကူး 13:14

သုဝဲသ့ၣ်သုကထံၣ်ဘၣ်တၢ်မၤလီၤပျံၤလီၤဖုးတၢ်လၢအလီၤ သးဘၣ်အၢဒိၣ်ဒိၣ်ကလဲာ်န့ၣ်အိၣ်ဝဲလၢတၢ်လီၢ်လၢအတကြၢး အိၣ်ဝဲဘၣ်န့ၣ်လီၤ. (ပှၤဖးတၢ်ဖိတဂၤကဘၣ်နၢ်ပၢၢ်တၢ်တမံၤအံၤ အခီပညီသပှၢ်ကတၢၢ်လီၤ.) အန့ၣ်တစုပှၤအိၣ်လၢကီၢ်ယူဒၤပူၤ တဖၣ်ကဘၣ်ဃ့ၢ်ပူၤဖျဲးအသးဆူကစၢၢ်ကလိတဖၣ်အကျါလီၤ.

လံာ်လူၤကၣ် 21:32

သ့ၣ်နီၣ်ထီၣ်တၢ်အံၤတက့ၢ်. တၢ်သ့ၣ်တဖၣ်အံၤခဲလၢာ်ကမၤအသး တချုးပှၤတစိၤအံၤလဲၤပူၤကွံာ်ဒံးဘၣ်န့ၣ်လီၤ.

လံာ်လူၤကၣ် 21:6

“တၢ်သ့ၣ်တဖၣ်အံၤခဲလၢာ်န့ၣ်, သုထံၣ်ဘၣ်သုဝဲလီၤ. တၢ်ဆၢကတီၢ်ကဟဲတုၤအိၣ်ဝဲဖဲလၢၢ်ထဲတဖျၢၣ်ဧိၤဒၣ်လဲာ် တဘၣ်တၢ်ပာ်လီၤတဲာ်တ့ၢ်အီၤလၢအလီၢ်လၢၤဘၣ်. လၢၢ်ကိးဖျၢၣ်ဒဲးကဘၣ်တၢ်တ့ၢ်လီၤကွံာ်အီၤလၢအလီၢ်န့ၣ်လီၤ.”

လံာ်လူၤကၣ် 21:8

ယ့ၣ်ၡူးစံးဝဲ, “အိၣ်ပလီၢ်သူၣ်ပလီၢ်သးတက့ၢ်. တဘၣ်ပျဲပှၤလီန့ၢ်သုတဂ့ၤ. အဂ့ၢ်ဒ်အံၤ, ပှၤအါဒံအါဂၤကဟဲလၢယမံၤဒီးစံးဝဲ, ‘ယမ့ၢ်အဝဲဒၣ်လီၤ.’ ဒီး ‘တၢ်ဆၢကတီၢ်ဟဲတုၤလံ’ န့ၣ်လီၤ. ဘၣ်ဆၣ်ဒီးတဘၣ်ပိာ်အဝဲသ့ၣ်အခံတဂ့ၤ.