လံာ်လူၤကၣ် 16:16 - Sgaw Karen Common Bible

¹⁶ စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ်အိၣ်ဝဲဒၣ်တုၤလၢ ပှၤဘျၢတၢ်စီၤယိၤဟၣ်အဆၢကတီၢ်လီၤ. စးထီၣ်ဖဲန့ၣ် တၢ်သးခု အကစီၣ်ဘၣ်ဃးဒီးကစၢ်ယွၤအဘီအမုၢ်ဘၣ်တၢ်စံၣ်တဲၤတဲလီၤအီၤ, ဒီးပှၤကိးဂၤဒဲးဂုာ်လဲၤနုာ်ဝဲဆူကစၢ်ယွၤအဘီအမုၢ်အပူၤလီၤ.

လံာ်လူၤကၣ် 16:16 Iomraidhean Croise

လံာ်မးသဲ 10:7

လဲၤဒီးစံၣ်တဲၤတဲလီၤတၢ်ဒီးစံး, ‘မူခိၣ်အဘီအမုၢ်ဘူးထီၣ် လံ.’

လံာ်မးသဲ 15:11

တၢ်လၢအလဲၤနုာ်ဆူပှၤအကိာ်ပူၤန့ၣ်, တမ့ၢ်ဘၣ်တၢ်လၢအမၤတကဆှီဘၣ်ပှၤကညီဘၣ်. မ့မ့ၢ်တၢ်လၢအဟဲထီၣ်လၢပှၤအကိာ်ပူၤန့ၣ်, မ့ၢ်တၢ်လၢအမၤတကဆှီဘၣ်ပှၤကညီန့ၣ်လီၤ.”

လံာ်မးသဲ 21:32

အဂ့ၢ်ဒ်အံၤ, ပှၤဘျၢတၢ်စီၤယိၤဟၣ်ဟဲဒုးနဲၣ်သုလၢတၢ်တီတၢ်လိၤ အကျဲလၢသုကပိာ်အီၤအဂီၢ်, ဒီးသုတနာ်အီၤဘၣ်. မ့မ့ၢ်ပှၤဃ့သွဲတဖၣ်ဒီးပိာ်မုၣ်ဟးဂီၤတဖၣ်နာ်အီၤလီၤ. သုထံၣ်တၢ်အံၤဝံၤအလီၢ်ခံဒၣ်လဲာ်, သုသးတလဲလိာ်အသးဒီးနာ်အီၤဘၣ်.”

လံာ်မးသဲ 3:2

အဝဲစံးဝဲ, “ပီၢ်ယၢ်လီၤက့ၤဒီး ဃၣ်လိၤက့ၤသုသးတက့ၢ်. အဂ့ၢ်ဒ်အံၤ, မူခိၣ်အဘီအမုၢ်ကသူၣ်လီၤအသးဘူးထီၣ်လံ.”

လံာ်မးသဲ 4:17

စးထီၣ်ဖဲန့ၣ်ယ့ၣ်ၡူးစံၣ်တဲၤတဲလီၤတၢ်ဒီးစံး, “ပီၢ်ယၢ်လီၤက့ၤဒီးဃၣ်လိၤက့ၤသုသးတက့ၢ်. အဂ့ၢ်ဒ်အံၤမူခိၣ်အဘီအမုၢ်ကသူၣ်လီၤအသးဘူးထီၣ်လံ.”

လံာ်မးသဲ 4:23

ယ့ၣ်ၡူးဟးဝ့ၤဝီၤသကုၤကီၢ်ကၤလံၤလါ, သိၣ်လီၤသီလီၤတၢ်လၢဘူၣ်ဘျီၣ် လၢအမ့ၢ်တၢ်ဘါလီၢ်တဖၣ်အပူၤ, စံၣ်တဲၤတဲလီၤတၢ်သးခုကစီၣ်ဘၣ်ဃးယွၤအဘီအမုၢ် ဒီးမၤဘျါက့ၤပှၤဘၣ်ဆူးဘၣ်ဆါလၢကယဲၢ်မ့ၢ်တၢ်ဆူးတၢ် ဆါခဲလၢာ်လီၤ.

လံာ်မၢ်ကူး 1:14

စီၤယိၤဟၣ်ဘၣ်တၢ်ဒၢနုာ်အီၤလၢဃိာ်ပူၤဝံၤအလီၢ်ခံ, ယ့ၣ်ၡူးဟဲဝဲဆူကီၢ်ကၤလံၤလါဒီးစံၣ်တဲၤတဲလီၤကစၢ်ယွၤ အတၢ်သးခုအကစီၣ်,

လံာ်မၢ်ကူး 1:45

ဘၣ်ဆၣ်ဒီးပှၤအံၤဟးထီၣ်ဒီးရၤလီၤတၢ်ဂ့ၢ်အံၤသကုၤဆးဒး ဒီးတဲတၢ်အါဒိၣ်မးတုၤဒၣ်လဲာ်ယ့ၣ်ၡူးလဲၤနုာ်ဖျိဖျိဖျါဖျါ ဆူဝ့ၢ်ပူၤတသ့လၢၤဘၣ်. မ့မ့ၢ်ဘၣ်အိၣ်ဝဲလၢတၢ်လီၢ်လၢပှၤ တအိၣ်နီတဂၤ, ဒီးပှၤလၢတၢ်လီၢ်ကိးပူၤဒဲးဟဲဆူအအိၣ်လီၤ.

လံာ်လူၤကၣ် 10:11

‘ဖၣ်ကမူၣ်ဖၣ်ဆါလၢသုဝ့ၢ်ပူၤလၢအအိၣ်ထီဝဲလၢပခီၣ်လၣ် အလိၤတဖၣ်ဒၣ်လဲာ်န့ၣ်, ပတြူာ်ကွံာ်ပဝဲထီဒါသုလီၤ. ဘၣ်ဆၣ်ဒီး, သ့ၣ်နီၣ်ထီၣ်တၢ်အဝဲအံၤတက့ၢ်. ကစၢ်ယွၤအဘီအမုၢ်ဟဲဘူးဒီးသုလံ.’

လံာ်လူၤကၣ် 10:9

မၤဘျါပှၤဆူးပှၤဆါဖဲဝ့ၢ်တဖျၢၣ်န့ၣ်အပူၤ, ဒီးစံးဘၣ်ပှၤအိၣ်ဖဲန့ၣ်တဖၣ်, ‘ကစၢ်ယွၤအဘီအမုၢ်ဟဲဘူးဒီးသုလံ.’

လံာ်လူၤကၣ် 16:29

စီၤအၤဘြၣ်ဟၣ်စံးဝဲ, ‘နဒီပုၢ်ဝဲၢ်ပိာ်ခွါတဖၣ်အိၣ်ဒီးစီၤမိၤၡ့ ဒီးဝံအတၢ်ကွဲးတဖၣ်လၢအကဟ့ၣ်ပလီၢ်အဝဲသ့ၣ်အဂီၢ်လီၤ. မ်နဒီပုၢ်ဝဲၢ်ပိာ်ခွါတဖၣ်ဒိကနၣ်အဝဲသ့ၣ်အတၢ်ကတိၤတက့ၢ်.’

လံာ်လူၤကၣ် 16:31

ဘၣ်ဆၣ်ဒီးစီၤအၤဘြၤဟၣ်စံးဝဲ, ‘အဝဲသ့ၣ်မ့ၢ်တစူၢ်စီၤမိၤၡ့ဒီးဝံတဖၣ်အတၢ်ကွဲးန့ၣ်, ပှၤတဂၤမ့ၢ်ဂဲၤဆၢထၢၣ်က့ၤလၢတၢ်သံသနာ်က့, တမ့ၢ်အဝဲသ့ၣ်ကစူၢ်ကနာ်တၢ်ဘၣ်.’ ”

လံာ်လူၤကၣ် 9:2

အန့ၣ်ဝံၤဒီးအဝဲဒၣ်မၢလီၤအဝဲသ့ၣ်ဒ်သိးအကစံၣ်တဲၤတဲလီၤ တၢ်ဘၣ်ဃးကစၢ်ယွၤအဘီအမုၢ်ဒီးအကမၤဘျါပှၤဆူးပှၤဆါတဖၣ် အဂီၢ်န့ၣ်လီၤ.

လံာ်ယိၤဟၣ် 1:45

စီၤဖံလံးပူးထံၣ်န့ၢ်စီၤနၤသန့လးဒီးစံးဘၣ်အီၤ, “ပထံၣ်န့ၢ်လံပှၤလၢစီၤမိၤၡ့ကွဲးလၢအဂ့ၢ်လၢလံာ် တၢ်သိၣ်တၢ်သီအပူၤဒီးဝံသ့ၣ်တဖၣ်ကွဲးစ့ၢ်ကီးလၢ အဂ့ၢ်တဂၤလံန့ၣ်လီၤ. အဝဲမ့ၢ်ပှၤနစၤရ့းဖိယ့ၣ်ၡူးလၢ အမ့ၢ်စီၤယိၤသးအဖိခွါန့ၣ်လီၤ.”

လံာ်ယိၤဟၣ် 11:48

ပမ့ၢ်ပျဲအမၤတၢ်ဒ်အံၤတဖၣ်ဆူညါဒီး, ပှၤခဲလၢာ်ကစူၢ်က့ၤနာ်က့ၤအီၤဒီးပှၤရိမ့ၤဖိ အပဒိၣ်ပပှၢ်တဖၣ်ကဟဲဒီးမၤဟးဂီၤကွံာ် ပတၢ်လုၢ်ဟံၣ်ဒီးပပှၤဒီကလုာ်ညါန့ၣ်လီၤ.”

လံာ်ယိၤဟၣ် 12:19

တုၤနုၤတစု, ပှၤဖၤရံၤၡဲတဖၣ်ကတိၤလိာ်အသးတဂၤဒီးတဂၤ, “သုထံၣ်လံ. ပမၤတၢ်တကဲထီၣ်လိၣ်ထီၣ်နီတမံၤဘၣ်. ကွၢ်ကွၢ်, ပှၤခဲလၢာ်ပိာ်အခံလံ.”

လံာ်ယိၤဟၣ် 5:4

(အဝဲသ့ၣ်အိၣ်ခိးဝဲထံကဟူးဝးထီၣ်မ့ၢ်လၢ တဘျီဘၣ်တဘျီဖဲကစၢ်အကလူးဟဲလီၤဒီးမၤဟူးဝးထီၣ်နိၣ်အံၤ အထံန့ၣ်, ပှၤဆူးပှၤဆါလၢအလဲၤနုာ်လီၤဆူ ထံကျါအဆိကတၢၢ်တဂၤန့ၣ်, ဘျါက့ၤလၢအတၢ်ဆါလၢအအိၣ်ဒီးအီၤအဃိန့ၣ်လီၤ.)

မၤတၢ် 3:18

တၢ်လၢကစၢ်ယွၤကတိၤဆိပာ်တ့ၢ်ဝဲခီဖျိဝံခဲလၢာ်လၢခရံာ် ကဘၣ်တူၢ်တၢ်နးတၢ်ဖှီၣ်န့ၣ်, ဒုးလၢထီၣ်ပှဲၤထီၣ်ဝဲလၢကျဲဒ်အံၤလီၤ.