လံာ်တၢ်ဘူၣ်ထီၣ်ဘါထီၣ် 26:25 - Sgaw Karen Common Bible

²⁵ ဒီးယကဟဲစိာ်တၢ်ဒုးတၢ်ယၤလၢအမ့ၢ်တၢ်စံၣ်ညီၣ်သုလၢသု လုၢ်သ့ၣ်ခါပတာ်ယတၢ်အၢၣ်လီၤအီလီၤအဃိန့ၣ်လီၤ. ဒီးသုမ့ၢ်ပာ်ဖှိၣ်ထီၣ်သုသးလၢသုဝ့ၢ်တဖၣ်အပူၤလၢ တၢ်ပူၤဖျဲးအဂီၢ်ဒီးယကဆှၢလီၤတၢ်ဆါသံသတြိာ်လၢသုကျါဒီး သုကဘၣ်တၢ်မၤဆူၣ်သုဒီးဟ့ၣ်လီၤကွံာ်သုဆူသုဒုၣ်သုဒါအစုပူၤန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:25 Iomraidhean Croise

လံာ်စီၤၡမူၤအ့လးခံဘ့ၣ်တဘ့ၣ် 24:15

လၢတၢ်န့ၣ်အဃိယွၤဆှၢလီၤတၢ်သံသတြိာ်လၢကီၢ်အံၣ်စရ့လးအဖီခိၣ်, လၢအအိၣ်ယံာ်ဝဲစးထီၣ်လၢမုၢ်တဂီၤန့ၣ် တုၤလီၤလၢတၢ်ဆၢကတီၢ်လၢအဝဲဒၣ်ဃုထၢဝဲအသိးန့ၣ်လီၤ. စးထီၣ်လၢထံကီၢ်အအံၤတခီတုၤဆူထံကီၢ်အဂၤတခီန့ၣ် ပှၤအံၣ်စရ့လးဖိသံဝဲအဂၤနွံကလးန့ၣ်လီၤ.

လံာ်စီၤပၤအခီၣ်ထံးတဘ့ၣ် 8:33

တုၤနပှၤဂီၢ်မုၢ်အံၣ်စရ့လးဘၣ်တၢ်မၤနၢၤအီၤလၢအဝဲသ့ၣ်အဒုၣ် အဒါတဖၣ်မ့ၢ်လၢအဝဲသ့ၣ်မၤတ့ၢ်တၢ်ဒဲးဘးထီဒါနၤအဃိဒီး, တုၤအဃၣ်က့ၤအသးဆူနအိၣ်ဒီးဟဲက့ၤဆူ ယွၤအတၢ်လုၢ်ဟံၣ်အံၤဒီးဘါထုကဖၣ်ဆူနၤလၢတၢ်ဆီၣ်လီၤသး အပူၤလၢတၢ်ပျၢ်တၢ်ကမၣ်အဂီၢ်န့ၣ်,

လံာ်စီၤပၤအခီၣ်ထံးတဘ့ၣ် 8:37

လၢကီၢ်အံၤအပူၤဖဲတၢ်သၣ်ဝံၤလီၤဒိအိၣ်ထီၣ်အံၤမ့ၢ်ဂ့ၤ, တၢ်သံသတြိာ်တမံၤမၤအသးမ့ၢ်ဂ့ၤ, တၢ်မုၢ်တၢ်ဘိတဖၣ်ဘၣ်တၢ်မၤဟးဂီၤကွံာ်အီၤလၢကလံၤမုၢ်ကိၢ် အဃိမ့ၢ်ဂ့ၤ, လၢဒွဲၣ်အဖုအဂီၢ်အဃိမ့ၢ်ဂ့ၤ, ဒီးဖဲနပှၤဂီၢ်မုၢ်ဘၣ်တၢ်ထီဒါအီၤလၢအဝဲသ့ၣ်အဒုၣ်အဒါတဖၣ် အခါမ့ၢ်ဂ့ၤ,

လံာ်စီၤပၤခံဘ့ၣ်တဘ့ၣ် 17:3

ကီၢ်အၤၡူၢ်အစီၤပၤဖးဒိၣ်ၡၤလမၤန့စ့ၢ်ဒုးတၢ်ထီဒါအီၤန့ၣ် လီၤ. စီၤဟိၤၡ့ဟ့ၣ်လီၤအသးဆူစီၤၡၤလမၤန့စ့ၢ်အစုပူၤ, ဒီးဟ့ၣ်အီၤတၢ်ခိတၢ်သွဲကိးနံၣ်ဒဲးန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 24:24

ပှၤစူၤရံအသုးမုၢ်မ့ၢ်သုးမုၢ်လၢအဆံး, ဘၣ်ဆၣ်ယွၤပျဲ အမၤနၢၤကွံာ်ပှၤယူဒၤအသုးမုၢ်လၢဒိၣ်န့ၢ်ဒံးအဝဲသ့ၣ်မ့ၢ်လၢ ပှၤဂီၢ်မုၢ်လဲၤသဒၣ်ကွံာ်အီၤ, ယွၤ, အဝဲသ့ၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤအဃိန့ၣ်လီၤ. လၢကျဲဒ်သိးအံၤစီၤပၤယိၤအၣ်ဘၣ်တၢ်စံၣ်ညီၣ်အီၤန့ၣ်လီၤ.

စံးထီၣ်ပတြၢၤ 94:1

ယွၤဧၢ, နမ့ၢ်ကစၢ်ယွၤလၢအသိၣ်ဃီၣ်တၢ်လီၤ. ပာ်ဖျါထီၣ်နတၢ်သးထီၣ်တက့ၢ်.

လံာ်တၢ်ဟးထီၣ်ကွံာ် 5:3

ဒီးစီၤမိၤၡ့ဒီးစီၤအၤဟရိၣ်စံးဝဲဒၣ်, “ပှၤဧ့ၤဘြံၤဖိအကစၢ်ယွၤလီၣ်ဖျါထီၣ်အသးလၢပှၤလံ. ဒုးလဲၤလၢ်ပှၤသၢနံၤကျဲဆူပှၢ်မုၢ်ကနၢဒ်သိးပကလုၢ်တၢ်ပာ်တၢ်ဆူယွၤ, ပကစၢ်ယွၤအအိၣ်တက့ၢ်. ပမ့ၢ်တမၤဘၣ်ဒ်န့ၣ်ဒီးအဝဲကမၤသံပှၤလၢတၢ်ဆူးတၢ်ဆါဒီးတၢ်ဒုးတၢ်ယၤန့ၣ်လီၤ.”

လံာ်ယၡါယၤ 1:20

ဘၣ်ဆၣ်သုမ့ၢ်ခီၣ်ဆၢယၤဒီး, သုကဘၣ်တၢ်စံၣ်ညီၣ်ဃါမနၤ ဆူတၢ်သံလီၤ. ယၤ, ယွၤန့ၣ်, ကတိၤလံတၢ်လံ.”

လံာ်ယၡါယၤ 65:12

တၢ်သံဆူၣ်သံစိးကမ့ၢ်သုတၢ်ဘူၣ်တၢ်တီၢ်, မ့ၢ်လၢဖဲယကိး ထီၣ်တ့ၢ်သုန့ၣ်သုတစံးဆၢယၤမ့ၢ်ဂ့ၤ, ဖဲယကတိၤတၢ်န့ၣ် သုတဒိကနၣ်ဘၣ်မ့ၢ်ဂ့ၤအဃိလီၤ. သုဃုထၢတ့ၢ်တၢ်တစူၢ်ယၤဒီးမၤ တၢ်အၢတၢ်သီလီၤ.

လံာ်ယံးရမံယၤ 19:7

ဖဲတၢ်လီၢ်အံၤအပူၤန့ၣ်, ယကမၤသဘံၣ်ဘုၣ်ကွံာ်ကီၢ်ယူဒၤဒီး ဝ့ၢ်ယရူၤၡလ့ၣ်အပှၤဂီၢ်မုၢ်အတၢ်ကူၣ်ကျဲၤခဲလၢာ်န့ၣ်လီၤ. ယကပျဲအဝဲသ့ၣ်အဒုၣ်အဒါတဖၣ်မၤနၢၤအဝဲသ့ၣ်ဒီးမၤသံအဝဲသ့ၣ်လၢ တၢ်ဒုးတၢ်ယၤအပူၤန့ၣ်လီၤ. ယကဟ့ၣ်လီၤအဝဲသ့ၣ်အစိၣ်တဖၣ်ဆူ ထိၣ်တဖၣ်ဒီးဆၣ်ဖိကီၢ်ဖိအမံၤတဖၣ်အအိၣ်ဒ်တၢ်အီၣ်အသိးန့ၣ်လီၤ.

လံာ်ယံးရမံယၤ 24:10

ယကဟဲစိာ်တၢ်ဒုးတၢ်ယၤ, တၢ်သၣ်ဝံၤလီၤဒိဒီးတၢ်ဆူးတၢ်ဆါလၢ အဝဲသ့ၣ်အဖီခိၣ်တုၤလီၤလၢပှၤတအိၣ်လီၤတဲာ်တ့ၢ်နီတဂၤလၢၤဘၣ် လၢထံကီၢ်လၢယဟ့ၣ်လီၤတ့ၢ်အဝဲသ့ၣ်ဒီးအမိၢ်ပၢ်ဖံဖုလၢပျၢၤ တဖၣ်အပူၤဘၣ်န့ၣ်လီၤ.”

လံာ်ယံးရမံယၤ 50:28

(ပှၤတဖၣ်လၢ အဃ့ၢ်ထူၣ်ဖျဲးထီၣ်လၢ ကီၢ်ဘၤဘူၤလိၣ် န့ၣ်ဟဲဆူဝ့ၢ်ယရူၤၡလ့ၣ်ဒီး အဝဲသ့ၣ်စံးဘၣ်တဲဘၣ်တၢ်ဘၣ်ဃးဒီးယွၤ, ပကစၢ်ယွၤ, မၤကၣ်ဆၢက့ၤပှၤဘၤဘူၤလိၣ်ဖိတဖၣ်လၢ တၢ်လၢအဝဲသ့ၣ်မၤဘၣ်တ့ၢ်အဝဲ အတၢ်လုၢ်ဟံၣ်အဂီၢ်, ဒ်လဲၣ်အဂ့ၢ်န့ၣ်လီၤ.)

လံာ်ယံးရမံယၤ 51:11

ယွၤထိၣ်ဂဲၤထီၣ်ကီၢ်မၤဒဲအစီၤပၤတဖၣ်အသး, မ့ၢ်လၢအဝဲတိာ်ပာ်လၢ ကမၤဟးဂီၤဘၤဘူၤလိၣ်အဃိန့ၣ်လီၤ. တၢ်န့ၣ်မ့ၢ်ကျဲလၢ အဟ့ၣ်ကၣ်က့ၤတၢ်လၢ တၢ်မၤဟးဂီၤတၢ်လုၢ်ဟံၣ်အဃိဒ်လဲၣ်န့ၣ်လီၤ. သုးခိၣ်တဖၣ်လၢ အထီၣ်ဒုးတၢ်ဟ့ၣ်လီၤအကလုၢ်စံးဝဲ, “မၤစူထီၣ်သုပျၢ်တဖၣ်, ကတဲာ်ကတီၤဃာ်သုကတီၤတဖၣ်တက့ၢ်.

လံာ်ယံးရမံယၤ 9:16

ယကမၤပြံ မၤပြါအဝဲသ့ၣ်လၢပှၤကလုာ်တဖၣ်အကျါ, ပှၤကလုာ်တဖၣ်လၢအဝဲသ့ၣ်မ့ၢ်ဂ့ၤ, အမိၢ်ပၢ်ဖံဖုလၢပျၢၤတဖၣ်မ့ၢ်ဂ့ၤတနၢ်ဟူသ့ၣ်ညါဝဲအဂ့ၢ်, ဒီးယကဆှၢလီၤသုးမုၢ်တဖၣ်ထီဒါအဝဲသ့ၣ်တုၤ ယမၤဟးဂီၤကွံာ်အဝဲသ့ၣ်လၢာ်လၢာ်ဆ့ဆ့တစုန့ၣ်လီၤ.”

လံာ်သးသယုၢ်တၢ် 2:21

ပှၤသးစၢ်ဒီးပှၤသးပှၢ်လီၤဃံၤသံဒ်သိးသိးလၢကျဲတဖၣ် အပူၤလီၤ. ပှၤသးစၢ်ပိာ်ခွါဒီးပိာ်မုၣ်တဖၣ်ဘၣ်တၢ်မၤသံအီၤလၢ ဒုၣ်ဒါအနးတဖၣ်လီၤ. လၢနတၢ်သးထီၣ်အမုၢ်တနံၤန့ၣ်နမၤသံအဝဲသ့ၣ်တအိၣ်ဒီးတၢ်သး ကညီၤဘၣ်.

လံာ်ယဃ့းစက့လး 14:17

မ့တမ့ၢ်ယကဒုးဘၣ်ထံကီၢ်န့ၣ်လၢတၢ်ဒုးတၢ်ယၤဒီးဆှၢလီၤတၢ် စုကဝဲၤမၤဟးဂီၤတၢ်တဖၣ်လၢကတြူာ်ကွံာ်ပှၤဂီၢ်မုၢ်ဒီးဆၣ်ဖိ ကီၢ်ဖိတဖၣ်ဒ်သိးသိး,

လံာ်ယဃ့းစက့လး 20:37

“ယကပၢၤဃာ်သုဂၢၢ်ဂၢၢ်ကျၢၤကျၢၤ, ဒီးဒုးစူၢ်သုလၢယတၢ်အၢၣ်လီၤန့ၣ်လီၤ.

လံာ်ယဃ့းစက့လး 29:8

အန့ၣ်ဒီးခဲအံၤ, ယၤယွၤပၢဘၣ်တၢ်ခဲလၢာ် ကစၢ်စံး ဘၣ်နၤလၢယကမၤန့ၢ် ပှၤပိာ်ခွါတဖၣ်လၢ အကဟဲထီၣ်ဒုးနၤလၢနးတဖၣ်ဒီး အဝဲသ့ၣ်ကမၤသံကွံာ် နပှၤဂီၢ်မုၢ်ဒီး နဆၣ်ဖိကီၢ်ဖိတဖၣ်န့ၣ်လီၤ.

လံာ်ယဃ့းစက့လး 5:17

ယကမၢလီၤတၢ်သၣ်ဝံၤလီၤဒိဒီးဆၣ်ဖိကီၢ်ဖိအမံၤတဖၣ်လၢကမၤ သံသုဖိတဖၣ်, ဒီးယကဆှၤလီၤတၢ်ဆူးတၢ်ဆါ, တၢ်စုဆူၣ်ခီၣ်တကး, ဒီးတၢ်ဒုးတၢ်ယၤလၢကမၤသံသုအဂီၢ်လီၤ. ယၤ, ယွၤအံၤ, ကတိၤလံတၢ်လံ.

လံာ်ယဃ့းစက့လး 6:3

တဲဘၣ်ကီၢ်အံၣ်စရ့လးအကစၢၢ်ကလိတဖၣ်လၢကနၢ်ဟူယွၤအကလုၢ်, ကနၢ်ဟူတၢ်လၢယၤ, ယွၤပၢဘၣ်တၢ်ခဲလၢာ်ကစၢ်, စံးဘၣ်တဲဘၣ်ကစၢၢ်ကလိတဖၣ်, တၢ်လူၢ်တဖၣ်, တၢ်တြိတဖၣ်, ဒီးတၢ်တြီၤတဖၣ်န့ၣ်တက့ၢ်. ယကမၢလီၤနးတဘ့ၣ်လၢကမၤဟးဂီၤ တၢ်လီၢ်တဖၣ်ဖဲပှၤဂီၢ်မုၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ် န့ၣ်လီၤ.

လံာ်ဟိၤၡ့ 11:6

တၢ်ဒုးတၢ်ယၤကအိၣ်ထီၣ်သကုၤအဝ့ၢ်တဖၣ်ဒီးမၤလီၤပှီၢ်ကွံာ်ဝ့ၢ် အတြဲၤဖးဒိၣ်တဖၣ်န့ၣ်လီၤ. တၢ်န့ၣ်ကမၤဟးဂီၤယပှၤဂီၢ်မုၢ်, မ့ၢ်လၢအဝဲသ့ၣ်မၤတၢ်လၢအဆိကမိၣ်ဝဲအမ့ၢ်တၢ်အဂ့ၤကတၢၢ် အဃိန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 26:6

ဒီးယကဟ့ၣ်လီၤသုလၢတၢ်ဃူတၢ်ဖိးလၢသုထံဧိၤကီၢ် ဧိၤအပူၤ, ဒီးသုကမံဒီးပှၤတမၤပျံၤမၤဖုးဘၣ်သုနီတဂၤဘၣ်. ဒီးယကဒုးဟးထီၣ်ကွံာ်ဆၣ်ဖိကီၢ်ဖိအအၢလၢသုကီၢ်ပူၤ, ဒီးတၢ်ဒုးတၢ်ယၤတအိၣ်လၢၤဘၣ်လၢသုကီၢ်ပူၤဘၣ်.

လံာ်ဧၤမိၣ် 4:10

ယမၢလီၤတၢ်သံသတြိာ်လၢသုကျါဒ်ယမၤတ့ၢ်လၢကီၢ်အဲၤကူပတူး အသိးန့ၣ်လီၤ. ယမၤသံကွံာ်သုပှၤသးစၢ်တဖၣ်လၢတၢ်ဒုးတၢ်ယၤ အပူၤဒီးစိာ်ကွံာ်သုကသ့ၣ်တဖၣ်န့ၣ်လီၤ. ယမၤပှဲၤသုနါဒ့တဖၣ်ဒီးတၢ်သံစိၣ်အတၢ်နၢအုၣ်လၢသုသူၣ်ဒဲ လီၢ်တဖၣ်အပူၤလီၤ. ဘၣ်ဆၣ်ဒီးသုတဟဲက့ၤကဒါက့ၤဆူယအိၣ်ဘၣ်.

လံာ်ဃဘးကူာ် 3:5

အဝဲဆှၢလီၤတၢ်ဆူးတၢ်ဆါလၢအမဲာ်ညါ ဒီးမၤလိာ်တၢ်သံလၢကပိာ်ထွဲထီၣ်အခံန့ၣ်လီၤ.

လံာ်တၢ်ဂံၢ် 14:12

ယကဆှၢလီၤတၢ်သံသတြိာ်တခါဒီးမၤဟးဂီၤကွံာ်အဝဲသ့ၣ်, ဘၣ်ဆၣ်ဒီးယကဒုးကဲထီၣ်နၤလၢပှၤကလုာ်တကလုာ်အပၢ်တဂၤ, လၢအဒိၣ်န့ၢ်ဒီးအဂံၢ်အဘါဆူၣ်န့ၢ်ဒံးအဝဲသ့ၣ်တက့ၢ်န့ၣ်လီၤ.”

လံာ်တၢ်ဂံၢ် 16:49

ပှၤဂီၢ်မုၢ်လၢအသံဝဲအနီၣ်ဂံၢ်မ့ၢ် တကလးလွံၢ်ကထိနွံကယၤ ဂၤ, လၢတဘၣ်တၢ်ဂံၢ်ဃုာ်အီၤဒီးပှၤတဖၣ်လၢအသံဝဲလၢစီၤကိးရးအတၢ် ပူထီၣ်အပူၤဘၣ်န့ၣ်လီၤ.

လံာ်တၢ်ဂံၢ် 31:3

မၤသးဒ်န့ၣ်ဒီးစီၤမိၤၡ့စံးဘၣ်ပှၤဂီၢ်မုၢ်, “ကတဲာ်ကတီၤသုသးလၢတၢ်ဒုးတၢ်ယၤအဂီၢ်လၢသုဒုးတၢ်ထီဒါ ပှၤမံးဒယၣ်ဖိတဖၣ်ဒီးစံၣ်ညီၣ်အဝဲသ့ၣ်, လၢတၢ်လၢအမၤတၢ်ဘၣ်တ့ၢ်ယွၤအဃိ, ကသ့ဝဲအဂီၢ်န့ၣ်တက့ၢ်.

လံာ်လူၤကၣ် 21:11

ဟီၣ်ခိၣ်ကဟူးဝဲအဒိၣ်အမုၢ်, တၢ်သၣ်ဝံၤလီၤဒိဒီးတၢ်ဆါသံသတြိာ် တဖၣ်ကအိၣ်ထီၣ်ဝဲအဒိၣ်အမုၢ်လၢတၢ်လီၢ်ကိးပူၤဒဲးလီၤ. တၢ်လီၤပျံၤလီၤဖုးဒီးတၢ်ပနီၣ်အဒိၣ်အသွါတဖၣ်ကအိၣ်ဖျါထီၣ်ဝဲလၢမူ ကပိာ်လိၤလီၤ.

လံာ်သိၣ်လီၤသီလီၤတၢ် 28:21

အဝဲကဆှၢဃီၤတၢ်ဆူးတၢ်ဆါတမံၤဝံၤတမံၤလၢသုလိၤတုၤလီၤလၢ သုကျါပှၤတအိၣ်လီၤတဲာ်တ့ၢ်ဘၣ်နီတဂၤလၢ ကီၢ်လၢသုကဘၣ်မၤန့ၢ်အီၤအပူၤဘၣ်န့ၣ်လီၤ.

လံာ်သိၣ်လီၤသီလီၤတၢ် 32:25

တၢ်ဒုးတၢ်ယၤကဟဲစိာ်တၢ်သံလၢကျဲတဖၣ်အပူၤ, တၢ်လီၤပျံၤလီၤဖုးတဖၣ်ကမၤဒၢၣ်တၢ်လၢဟံၣ်တဖၣ်အပူၤလီၤ. ပိာ်ခွါသးစၢ်တဖၣ်ဒီးပိာ်မုၣ်သးစၢ်တဖၣ်ကသံဝဲ ဒီးဖိသၣ်ဆံးတဖၣ်မ့ၢ်ဂ့ၤ, ပှၤသးပှၢ်တဖၣ်မ့ၢ်ဂ့ၤဒၣ်လဲာ်, တၢ်တပာ်မူတ့ၢ်လၢၤအီၤဘၣ်.

လံာ်သိၣ်လီၤသီလီၤတၢ် 32:35

ယွၤကဟ့ၣ်ကၣ်တၢ်ဒီးစံၣ်ညီၣ်အဝဲသ့ၣ်, တၢ်ဆၢကတီၢ်ကတုၤဝဲဖဲအဝဲသ့ၣ်ကဟးဂီၤကွံာ်, အဝဲသ့ၣ်အတၢ်ဘၣ်စံၣ်ညီၣ်ဃါမနၤအမုၢ်နံၤန့ၣ် ဘူးထီၣ်ဝဲလံ.

လံာ်သိၣ်လီၤသီလီၤတၢ် 32:41

လၢကယကျ့အ့ၣ်ထီၣ်ယနးလၢအကတြ့ၣ်ကတြိၣ်တဘ့ၣ် ဒီးထံၣ်လၢတၢ်စံၣ်ညီၣ်တီမၤအသးန့ၣ်လီၤ. ယကဟ့ၣ်ကၣ်တၢ်လၢယဒုၣ်ယဒါတဖၣ်အလိၤ, ဒီးစံၣ်ညီၣ်ပှၤတဖၣ်လၢအသးဟ့ယၤန့ၣ်လီၤ.

လံာ်ပှၤစံၣ်ညီၣ်ကွီၢ် 15:11

မၤသးဒ်န့ၣ်ဒီးယူဒၤအပှၤသၢကထိဂၤလဲၤဆူလ့ကအိဖဲဧ့ၤတၣ် ဒီးစံးဘၣ်စီၤၡံၣ်ၡိၣ်, “မ့ၢ်နတသ့ၣ်ညါဘၣ်ပှၤဖလ့ၡသးဖိတဖၣ်န့ၣ်မ့ၢ်ပှၤပၢဆှၢဘၣ်ပှၤဧါ. မ့ၢ်နမၤပှၤဒ်လဲၣ်.” အဝဲစံးဆၢဝဲဒၣ်, “ယမၤအဝဲသ့ၣ်ဒ်အမၤယၤအသိးလီၤ.”