လံာ်တၢ်ဘူၣ်ထီၣ်ဘါထီၣ် 25:9 - Sgaw Karen Common Bible

⁹ ဒီးလၢလါနွံလါတလါထီၣ်အသီတဆံအနံၤလၢအမ့ၢ်ဝဲတၢ်ပူၤဖျဲး အမုၢ်နံၤန့ၣ်သုဘၣ်ဒုးသီၣ်ကွဲၤအသီၣ်လၢသုကီၢ်ဒီကီၢ်ညါန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 25:9 Iomraidhean Croise

စံးထီၣ်ပတြၢၤ 89:15

ပှၤဂီၢ်မုၢ်လၢအဘါထီၣ်နၤ အိၣ်ဒီးတၢ်သးဝံၣ်တဖၣ်, လၢအအိၣ်လၢနတၢ်သးကညီၤအတၢ်ကပီၤ အပူၤန့ၣ်ဘၣ်ဆိၣ်ဂ့ၤဝဲလီၤ.

စံးထီၣ်ပတြၢၤ 89:16

လၢနဃိန့ၣ် အဝဲသ့ၣ်သးခုဒီ တနံၤညါဒီး စံးထီၣ်ပတြၢၤနၤလၢ နတၢ်ဂ့ၤတၢ်ဝါအဃိလီၤ.

လံာ်ယၡါယၤ 27:13

တုၤမုၢ်တနံၤန့ၣ်ဟဲဝဲဒီး, ကွဲၤတဖျၢၣ်ကဘၣ်တၢ်အူထီၣ် အီၤလၢတၢ်ကိးက့ၤပှၤအံၣ်စရ့လးဖိခဲလၢာ်လၢဘၣ်တၢ်စိာ် မၢကဲကုၢ်အီၤလၢကီၢ်အၤၡူၢ်ဒီးကီၢ်အဲၤကူပတူးန့ၣ်လီၤ. အဝဲသ့ၣ်ကဟဲဒီးဘူၣ်ထီၣ်ဘါထီၣ်ယွၤလၢဝ့ၢ်ယရူၤၡလ့ၣ်, လၢအကစၢၢ်စီဆှံအလိၤန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 16:20

ဖဲစီၤအၤဟရိၣ်မၤဝံၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်မၤကဆှီ တၢ်လီၢ်စီဆှံကတၢၢ်, တၢ်ဘူၣ်ထီၣ်ဘါထီၣ်ယွၤအဒဲခဲလၢာ်, ဒီးတၢ်လုၢ်လီၢ်, တစုန့ၣ်, အဝဲကဘၣ်လုၢ်ထီၣ်မဲာ်တဲးလဲးမူဒံးတဒုဆူယွၤ အအိၣ်လၢအဘၣ်တၢ်ဃုထၢအီၤလၢတၢ်နါဧ့စ့ၤစ့လးအဂီၢ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 16:29

တၢ်သိၣ်တၢ်ဘျၢလၢလာ်တဖၣ်အံၤန့ၣ်ကဘၣ်တၢ်ဒိကနၣ်မၤထွဲအီၤ အစိၤစိၤအဃၣ်ဃၣ်န့ၣ်လီၤ. လၢနွံလါတလါထီၣ်အသီ တဆံအနံၤန့ၣ်ပှၤအံၣ်စရ့လးဖိဒီးပှၤတခီဘီမုၢ် ဖိလၢအအိၣ်ဝဲဆိးဝဲလၢပှၤအံၣ်စရ့လးဖိအကျါခဲလၢာ်ကဘၣ်ဒုၣ်တၢ်အီၣ်ဒီး တဘၣ်ဖံးတၢ်မၤတၢ်နီတမံၤဘၣ်.

လံာ်တၢ်ဘူၣ်ထီၣ်ဘါထီၣ် 16:30

ဒီးလၢမုၢ်နံၤအဝဲန့ၣ်န့ၣ်, တၢ်ဘူၣ်တၢ်ဘါအလုၢ်အလၢ်ဘၣ်ဃးဘူၣ်တၢ်ပျၢ်တၢ်ဒဲးဘး ကဘၣ်တၢ်မၤအီၤလၢတၢ်မၤကဆှီထီၣ်က့ၤအဝဲသ့ၣ်လၢအတၢ်ဒဲးဘးခဲလၢာ်အဂီၢ်ဒ်သိးအဝဲသ့ၣ်ကကဆှီထီၣ်က့ၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 25:8

ဒီးသုကဘၣ်ဂံၢ်နွံနံၣ်နွံဝီ, ခဲလၢာ်ကဘၣ်အိၣ်လွံၢ်ဆံခွံနံၣ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 27:17

အဝဲမ့ၢ်ပာ်စီဆှံအစံာ်ဖဲနံၣ်တၢ်သဘျ့ဝံၤတဘျီဃီဒီး အပှ့ၤကမ့ၢ်ဝဲဒ်နပာ်အီၤအသိးန့ၣ်လီၤ.

လံာ်တၢ်ဘူၣ်ထီၣ်ဘါထီၣ် 27:24

ဒီးလၢနံၣ်သဘျ့န့ၣ်စံာ်အံၤက ဘၣ်တၢ်ဟ့ၣ်က့ၤအီၤဆူပှၤလၢအဆါလီၤကွံာ်အီၤအအိၣ် မ့တမ့ၢ်အစၢၤအသွဲၣ်တဖၣ်အအိၣ်န့ၣ်လီၤ.

လံာ်တၢ်ဂံၢ် 10:10

ဒ်န့ၣ်အသိးလၢတၢ်သူၣ်ခုသးခုအကတီၢ်တဖၣ်လၢအမ့ၢ်, သုလါထီၣ်သီအမူးတဖၣ်ဒီးသုတၢ်ဘူၣ်တၢ်ဘါအမူးအဂၤတဖၣ်အခါ န့ၣ်, သုကဘၣ်အူထီၣ်ကွဲၤတဖၣ်န့ၣ်ဖဲသုဟ့ၣ်ထီၣ်သုတၢ်လုၢ်မ့ၣ် အူတဖၣ်ဒီးတၢ်လုၢ်မၤဃူမၤဖိးတဖၣ်အကတီၢ်န့ၣ်လီၤ. အန့ၣ်တစု, ယကမၤစၢၤသုလီၤ. ယဲဒၣ်အံၤယမ့ၢ်ယွၤ, သုကစၢ်ယွၤလီၤ.”

လံာ်တၢ်ဂံၢ် 36:4

လၢတၢ်ဟ့ၣ်ကဒါက့ၤတၢ်အနံၣ်အပူၤ, ဖဲကယဲၢ်တၢ်စုလီၢ်ခီၣ်ခိၣ်လၢဘၣ်တၢ်ဆါလီၤတ့ၢ်အီၤဘၣ်တၢ်ဟ့ၣ် က့ၤအီၤဆူအကစၢ်လၢအခီၣ်ထံးကတၢၢ်တဂၤအအိၣ်န့ၣ်, စီၤစလၤဖဃး အဖိမုၣ်တဖၣ်အတၢ်စုလီၢ်ခီၣ်ခိၣ်ကဘၣ်တၢ်ပာ်ဖှိၣ်ဂၢၢ်ကျၢၤအီၤ ဆူပှၤအဒူၣ်လၢအဝဲသ့ၣ်ဆီဟံၣ်ဆီဃီတ့ၢ်ဝဲဒီးအီၤအအိၣ်, ဒီးကလီၤမၢ်ကွံာ်လၢပဒူၣ်ထၢအဂီၢ်န့ၣ်လီၤ.”

ရိမ့ၤ 10:18

ဘၣ်ဆၣ်ဒီးယစံး, အဝဲသ့ၣ်တနၢ်ဟူဘၣ်တၢ်ကစီၣ် န့ၣ်မ့ၢ်ဝဲတီဝဲကစီဒီဧါ. အဝဲသ့ၣ်နၢ်ဟူဝဲကစီဒီလီၤ. အဂ့ၢ်ဒ်လဲၣ်န့ၣ်တၢ်ကွဲးအသးစီဆှံစံးဝဲ, “အဝဲသ့ၣ်အကလုၢ်တဖၣ်သီၣ်ထီၣ်ဝဲသကုၤဟီၣ်ခိၣ်ချၢဒီး အတၢ်ကတိၤတဖၣ်တုၤဃီၤဝဲလၢ ဟီၣ်ခိၣ်အကတၢၢ်န့ၣ်လီၤ” (စံး ၁၉:၄).

ရိမ့ၤ 15:19

ခီဖျိတၢ်ပနီၣ်လီၤလးတဖၣ်ဒီးတၢ်လီၤလးတဖၣ်, ဒီးခီဖျိယွၤအသးစီဆှံအစိအကမီၤန့ၣ်လီၤ. ဒီးလၢတၢ်န့ၣ်အဃိ, လၢယတၢ်လဲၤကျဲဒီဘိညါစးထီၣ်လၢဝ့ၢ်ယရူၤၡလ့ၣ်ဒီးတုၤလၢ ဝ့ၢ်အံးလူၤရံကူးန့ၣ်, ယစံၣ်တဲၤတဲလီၤတၢ်သးခုကစီၣ်ဘၣ်ဃးဒီးခရံာ်လၢလၢပှဲၤပှဲၤန့ၣ်လီၤ.

၁ သ့းစၤလနံ 1:8

အဂ့ၢ်ဒ်အံၤ, တမ့ၢ်ထဲလၢတၢ်ကစီၣ်လၢသုရၤလီၤအီၤဘၣ်ဃးဒီး ကစၢ်န့ၣ်လဲၤတုၤကီၢ်မၤက့းဒနံဒီးကီၢ်အဃါယၤဒီကီၢ်န့ၣ်ဘၣ်. မ့မ့ၢ်, တၢ်ကစီၣ်ဘၣ်ဃးဒီးသုတၢ်စူၢ်တၢ်နာ်ကစၢ်ယွၤန့ၣ်လဲၤတုၤ လၢတၢ်လီၢ်ကိးပူၤဒဲးလီၤ. လၢတၢ်န့ၣ်အဃိ, ပစံးတၢ်အလီၢ် တအိၣ်နီတမံၤဘၣ်.

လံာ်စီၤယိၤၡူ 6:4

ပှၤလုၢ်တၢ်အခိၣ်နွံဂၤ, တဂၤကစိာ်ကွဲၤတဖျၢၣ်စုာ်စုာ်, ကဘၣ်လဲၤတၢ်လၢတၢ်အၢၣ်လီၤအီလီၤ အတလါအမဲာ်ညါန့ၣ်လီၤ. ဒီးလၢနွံသီတသီန့ၣ်, နၤဒီးနသုးဖိတဖၣ်ကဘၣ်လဲၤတရံးဝ့ၢ်န့ၣ်နွံဝီဖဲပှၤလုၢ်တၢ် အခိၣ်တဖၣ်အူထီၣ်ကွဲၤအခါန့ၣ်လီၤ.