လံာ်တၢ်ဘူၣ်ထီၣ်ဘါထီၣ် 25:54 - Sgaw Karen Common Bible

⁵⁴ ဒီးအဝဲဒၣ်မ့ၢ်တဘၣ်တၢ်ပျၢ်ကွံာ်အီၤလၢကျဲဒ်သိးအံၤဘၣ်ဒီး, အဝဲဒီးအဖိတဖၣ်ကဘၣ်တၢ်ပျၢ်ကွံာ်အီၤလၢနံၣ်တၢ်သဘျ့အကတီၢ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 25:54 Iomraidhean Croise

လံာ်ယၡါယၤ 49:25

ယွၤစံးဆၢဝဲ, “တၢ်လၢအကမၤအသးမ့ၢ်တၢ်ဒ်န့ၣ်လီၤ. ပှၤသုးဖိအပှၤဘၣ်စၢဃာ်လၢဃိာ်ပူၤတဖၣ်ကဘၣ်တၢ်စိာ်ကွံာ်အီၤ ဒီးပှၤပၢတၢ်ဖဲအသးအၢအၢသီသီတဂၤအတၢ်ဂုာ်န့ၢ်န့ၣ်ကဘၣ်တၢ် ဟံးန့ၢ်အီၤလီၤ. ယကဒုးတၢ်ထီဒါပှၤတဂၤလၢ်လၢ်လၢအဒုးတၢ်ထီဒါသုဒီးယကမၤပူၤ မၤဖျဲးသုဖိတဖၣ်လီၤ.

လံာ်ယၡါယၤ 49:9

ယကစံးဘၣ်ပှၤဘၣ်တၢ်စၢဃာ်လၢဃိာ်ပူၤတဖၣ်, ဟးထီၣ်လၢတၢ်သဘျ့အပူၤတက့ၢ်, ဒီးပှၤအိၣ်လၢတၢ်ခံးကျါတဖၣ်, ဟဲထီၣ်ဆူတၢ်ကပီၤအပူၤတက့ၢ်. အဝဲသ့ၣ်ကလီၤဂာ်ဒ်သိတဖၣ်လၢအအီၣ်အဆၣ်လၢတၢ်လူၢ်တဖၣ် အလိၤအသိးန့ၣ်လီၤ.

လံာ်ယၡါယၤ 52:3

ယွၤပၢဘၣ်တၢ်ခဲလၢာ်အကစၢ်စံးဘၣ်အပှၤဂီၢ်မုၢ်, “ဖဲသုကဲထီၣ်ကုၢ်တဖၣ်န့ၣ်, တၢ်တပှ့ၤန့ၢ်သုလၢစ့နီတဘ့ၣ်ဘၣ်. ဒ်န့ၣ်အသိး, တလိၣ်တၢ်ဟ့ၣ်တၢ်နီတမံၤလၢသုကထူၣ်ဖျဲးထီၣ် အဂီၢ်န့ၣ်ဘၣ်.

လံာ်တၢ်ဘူၣ်ထီၣ်ဘါထီၣ် 25:10

လၢကျဲဒ်အံၤန့ၣ်သုကဘၣ်ပာ်စီဆှံနံၣ်ယဲၢ်ဆံအနံၣ် န့ၣ်ဒီးဘိးဘၣ်သ့ၣ်ညါတၢ်သဘျ့ဆူပှၤကိးဂၤဒဲးလၢအအိၣ် လၢကီၢ်ပူၤဒီကီၢ်ညါန့ၣ်လီၤ. လၢနံၣ်အံၤအကတီၢ်ပူၤန့ၣ်ကယဲၢ်တၢ်ဖိတၢ်လံၤ, တၢ်စုလီၢ်ခီၣ်ခိၣ်လၢအဘၣ်တၢ်ဆါလီၤကွံာ်တ့ၢ်လံအီၤတဖၣ်ကဘၣ် တၢ်ဟ့ၣ်က့ၤဆူအကစၢ်ဒၣ်ဝဲအအိၣ်မ့ၢ်ဂ့ၤ, ဆူအစၢၤအသွဲၣ်တဖၣ်အအိၣ်မ့ၢ်ဂ့ၤ, ဒီးပှၤတဂၤလၢ်လၢ်လၢအဘၣ်တၢ် ဆါလီၤကွံာ်အီၤဒ်ကုၢ်အသိးန့ၣ်ကဘၣ်တၢ်ဆှၢက ဒါက့ၤအီၤဆူအဒူၣ်ဖိထၢဖိဒၣ်ဝဲအအိၣ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 25:13

ဒီးလၢနံၣ်အံၤအပူၤန့ၣ်ကယဲၢ်တၢ်စုလီၢ်ခီၣ်ခိၣ်လၢအဘၣ်တၢ်ဆါ လီၤကွံာ်တ့ၢ်လံတဖၣ်ကဘၣ်တၢ်ဟ့ၣ်က့ၤအီၤဆူအကစၢ်လၢအခီၣ်ထံး အအိၣ်န့ၣ်လီၤ.

လံာ်တၢ်ဘူၣ်ထီၣ်ဘါထီၣ် 25:55

အဂ့ၢ်ဒ်အံၤ, ပှၤအံၣ်စရ့လးဖိန့ၣ်မ့ၢ်ယကုၢ်ယပှၤလီၤ. အဝဲသ့ၣ်မ့ၢ်ယကုၢ်ယပှၤလၢယဒုးဟးထီၣ်ကွံာ်အီၤလၢအဲၤကူပတူးအပူၤလီၤ. ယဲဒၣ်အံၤယမ့ၢ်ယွၤသုကစၢ်ယွၤလီၤ.