လံာ်သးသယုၢ်တၢ် 2:13 - Sgaw Karen Common Bible

¹³ ဝ့ၢ်ယရူၤၡလ့ၣ်, ဝ့ၢ်ယရူၤၡလ့ၣ်လၢဘၣ်တၢ်အဲၣ်အီၤဧၢ, ယစံးတၢ်မနုၤကသ့လဲၣ်. ယမၤမုာ်ထီၣ်နၤကသ့ဒ်လဲၣ်. ပှၤတတူၢ်ဘၣ်တၢ်ဒ်သိးအံၤနီတဂၤဘၣ်. နတၢ်နးတၢ်ဖှီၣ်န့ၣ်အကတၢၢ်တအိၣ်ဘၣ်ဒ်ပီၣ်လဲၣ်ဖးဒိၣ်အသိးဒီး တၢ်မုၢ်လၢ်အိၣ်ထီၣ်တသ့ဘၣ်နီတမံၤဘၣ်.

လံာ်သးသယုၢ်တၢ် 2:13 Iomraidhean Croise

လံာ်စီၤၡမူၤအ့လးခံဘ့ၣ်တဘ့ၣ် 5:20

လၢတၢ်န့ၣ်အဃိ, စီၤဒၤဝံးလဲၤဝဲဆူဝ့ၢ်ဘဧၤလးပရၤစံၣ်ဒီး ဖဲန့ၣ်အဝဲမၤနၢၤကွံာ်ပှၤဖလ့ၡသးဖိတဖၣ်န့ၣ်လီၤ. အဝဲစံးဝဲဒၣ်, “ယွၤမၤဟးဂီၤကွံာ်ယဒုၣ်ယဒါတဖၣ်ဒ်ထံလုၣ်ဘၢတၢ်အသိးန့ၣ်လီၤ.” ဒီးလၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢဘဧၤလး ပရၤစံၣ်န့ၣ်လီၤ.

လံာ်စီၤပၤခံဘ့ၣ်တဘ့ၣ် 19:21

ယွၤစံးတ့ၢ်ဒ်အံၤ, “ဝ့ၢ်ယရူၤၡလ့ၣ်နံၤဘၣ်ဖၣ်လဲနၤ, စီၤစၤနဃ့ရံာ်ဧၢ, ဒီးဒုၣ်ဒွဲၣ်ပယွဲနၤလီၤ.

စံးထီၣ်ပတြၢၤ 60:2

နမၤဆှဲးဆှိးတ့ၢ်လံဟီၣ်ခိၣ်, နမၤသ့ၣ်ဖးလံအီၤလံ. ဘှီက့ၤအတၢ်သ့ၣ်ဖးအလီၢ်န့ၣ်တက့ၢ်. အဂ့ၢ်ဒ်အံၤ, ဟူးဝးဝဲလီၤ.

လံာ်ယၡါယၤ 37:22

ယွၤစံးတ့ၢ်ဝဲဒၣ်, “ဝ့ၢ်ယရူၤၡလ့ၣ်နံၤဘၣ်ဖၣ်လဲနၤဒီးသး ဘၣ်အၢနၤလံ, စီၤပၤစီၤစၤနဃ့ရံာ်ဧၢ.

လံာ်ယံးရမံယၤ 14:17

ယွၤမၤလိာ်တ့ၢ်ယၤလၢယကတဲဘၣ်ပှၤဂီၢ်မုၢ်ဘၣ်ဃးယတၢ်သူၣ်အုး သးအုးအဂ့ၢ်ဒီးစံး, “မ်မဲာ်ထံတဖၣ်ယွၤလီၤလၢယမဲာ်ချံတဖၣ်အပူၤလၢမုၢ်ဆါဆဲးလၢမုၢ်နၤ, ဒီးမ်ယသုတဆိကတီၢ်တၢ်ဟီၣ်တၢ်ယၢၤနီတစုတဂ့ၤ. အဂ့ၢ်ဒ်အံၤ, ယပှၤဂီၢ်မုၢ်တဖၣ်ဘၣ်ဒိဘၣ်ထံးနးနးကလဲာ်ဒီး တၢ်မၤဘၣ်ဒိဆါအီၤအၢအၢသီသီန့ၣ်လီၤ.

လံာ်ယံးရမံယၤ 14:19

ယွၤဧၢ, မ့ၢ်နညိကွံာ်ကီၢ်ယူဒၤလၢာ်လၢာ်ဆ့ဆ့လံဧါ. မ့ၢ်နသးဟ့ဝ့ၢ်စံယိၣ်အပှၤဂီၢ်မုၢ်လံဧါ. ဘၣ်မနုၤအဃိနမၤဘၣ်ဒိဘၣ်ထံးပှၤအၢအၢသီသီ တုၤဒၣ်လဲာ် တၢ်မၤဘျါက့ၤပှၤတသ့န့ၣ်လဲၣ်. ပကွၢ်လၢ်တၢ်ဃူတၢ်ဖိး, ဘၣ်ဆၣ်တၢ်အဂ့ၤတမၤအသးနီတမံၤဘၣ်. ပမုၢ်လၢ်တၢ်မၤဘျါက့ၤ, ဘၣ်ဆၣ်တၢ်မၤပျံၤမၤဖုးဟဲလၢအလီၢ်န့ၣ်လီၤ.

လံာ်ယံးရမံယၤ 8:22

လၢကီၢ်ကံးလဧးအပူၤန့ၣ်, မ့ၢ်ကသံၣ်ကသီတအိၣ်လၢၤနီတမံၤ ဘၣ်ဧါ. မ့ၢ်ကသံၣ်သရၣ်တဖၣ်တအိၣ်ဖဲန့ၣ်နီတဂၤဘၣ်ဧါ. မ့မ့ၢ်ဒ်န့ၣ်ဒီး, ဘၣ်မနုၤအဃိယပှၤဂီၢ်မုၢ်တဘၣ် တၢ်မၤဘျါက့ၤအီၤန့ၣ်လဲၣ်.

လံာ်ယံးရမံယၤ 9:18

ပှၤဂီၢ်မုၢ်စံးဝဲဒၣ်, “တဲဘၣ်အဝဲသ့ၣ်လၢကမၤချ့ချ့ဒီးသးဝံၣ် တၢ်သံအတၢ်သးဝံၣ်တယုၢ်လၢပဂီၢ် တုၤလၢပမဲာ်ချံတဖၣ်ပှဲၤဝဲဒီးမဲာ်ထံမဲာ်နိ ဒီးပမဲာ်ဖံးတဖၣ်ဘၣ်စီၣ်ဘၣ်သ့လၢတၢ်ဟီၣ်တၢ်ယၢၤ အဃိန့ၣ်တက့ၢ်.”

လံာ်သးသယုၢ်တၢ် 1:12

ကိးပသူထီၣ်ဝဲဆူကယဲၢ်ပှၤလဲၤတြူာ် လၢကျဲပူၤတဖၣ်အအိၣ်, “ကွၢ်ဃီၤယၤတက့ၢ်. ပှၤတဘၣ်ဒိဆါတ့ၢ်ဒ်ယၤနီတဂၤဘၣ်. တၢ်ဘၣ်ဒိဆါအံၤယွၤဒုးလီၤဘၣ်လၢယလိၤ ဖဲအသးဒိၣ်ဝဲအကတီၢ်န့ၣ်လီၤ.

လံာ်ယဃ့းစက့လး 32:31

တၢ်ထံၣ်ဘၣ်ပှၤတဖၣ်လၢအဘၣ်တၢ်မၤသံအီၤလၢတၢ်ဒုးပူၤန့ၣ် ကမ့ၢ်တၢ်မၤမုာ်တမံၤလၢကီၢ်အဲၤကူပတူးအစီၤပၤဒီးအသုးမုၢ် အဂီၢ်န့ၣ်လီၤ. ယွၤပၢဘၣ်တၢ်ခဲလၢာ်ကစၢ်စံးတၢ်အံၤလီၤ.

လံာ်ဒၤနံးယ့လး 9:12

နမၤတ့ၢ်တၢ်လၢနစံးတ့ၢ်နကမၤအီၤလၢပလိၤဒီးပပှၤပၢတၢ် တဖၣ်အလိၤန့ၣ်လီၤ. နစံၣ်ညီၣ်တ့ၢ်ဝ့ၢ်ယရူၤၡလ့ၣ်နးဒိၣ်န့ၢ်ဒံး ဝ့ၢ်အဂုၤအဂၤလၢဟီၣ်ခိၣ်ချၢ,