လံာ်စီၤယိၤၡူ 15:1 - Sgaw Karen Common Bible

¹ ယူဒၤအဒူၣ်, အဒူၣ်ဖိထၢဖိတဖၣ်ဒိးန့ၢ်ဘၣ်တၢ်လီၢ်တနီၤဒ် တၢ်ပာ်ဖျါလၢလာ်အံၤအသိးန့ၣ်လီၤ. အဝဲသ့ၣ်အကီၢ်လဲၤတုၤလၢကလံၤ ထံးလၢပှၢ်မုၢ်ကနၢစံၣ်အကလံၤထံးကတၢၢ်တတီၤဖဲကီၢ်အဒိၣ်အကီၢ် ဆၢန့ၣ်လီၤ.

လံာ်စီၤယိၤၡူ 15:1 Iomraidhean Croise

လံာ်တၢ်ကဲထီၣ်အခီၣ်ထံး 35:23

နီၢ်လ့ၤအၤအဖိခွါတဖၣ်မ့ၢ်ဝဲ, စီၤရူၤဘ့ၣ် (စီၤယၤကိာ်အဖိ ဝဲၢ်ကိ) စီၤစူၤမ့းအိၣ်, စီၤလ့ၤဝံ, စီၤယူဒၤ, စီၤယံးစၣ်ကၢ်ဒီး စီၤစဘူလိၣ်လီၤ.

လံာ်စီၤပၤအခီၣ်ထံးတဘ့ၣ် 8:65

ဖဲန့ၣ်လၢယွၤအတၢ်လုၢ်ဟံၣ်န့ၣ်, စီၤၡလိၤမိၤဒီးကယဲၢ်ကီၢ်အံၣ် စရ့လးအပှၤဂီၢ်မုၢ်ခဲလၢာ်မၤဝဲဘူၣ်ဒဲလၢနွံသီအတီၢ်ပူၤ န့ၣ်လီၤ. ဖဲန့ၣ်, ပှၤဂီၢ်မုၢ်ဖးဒိၣ်အိၣ်ဝဲလၢအဟဲဝဲ, ယံၤမးလၢတၢ်လဲၤနုာ်ဆူဝ့ၢ်ဃမါသးဒီးလၢအဲၤကူပတူးအကီၢ် အဆၢလၢကလံၤထံးတခီန့ၣ်လီၤ.

လံာ်ယဃ့းစက့လး 47:19

ကလံၤထံးအကီၢ်ဆၢန့ၣ်လဲၤဝဲဆူကလံၤထံးမုၢ်နုာ်တကပၤစးထီၣ် လၢဝ့ၢ်တၤမၣ်ပၢၢ်တုၤဆူကၤဒ့ၣ်မရံဘါအမဲးမုၢ်ခိၣ်ထံအိၣ်အလီၢ် ဒီးလဲၤကဒီးဆူကလံၤစိးမုၢ်နုာ်လၢကီၢ်အဲၤကူပတူးအကီၢ်ဆၢ တကျိၤဆူပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ.

လံာ်ယဃ့းစက့လး 48:7

ယူဒၤအဒူၣ်ကမၤန့ၢ်တၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲရူၤဘ့ၣ်အဒူၣ်အလီၢ် အဃၢၤစးထီၣ်လၢမုၢ်ထီၣ်တုၤဆူမုၢ်နုာ် န့ၣ်လီၤ.

လံာ်တၢ်ဂံၢ် 20:16

ဒီးပကိးထီၣ်တ့ၢ်ဆူယွၤအအိၣ်လၢတၢ်မၤစၢၤအဂီၢ်လီၤ. အဝဲနၢ်ဟူဘၣ်ပတၢ်ကိးထီၣ်, ဒီးဆှၢလီၤတ့ၢ်ကလူးတဂၤပှၤလၢ အထုးထီၣ်ကွံာ်ပှၤလၢကီၢ်အဲၤကူပတူးအပူၤန့ၣ်လီၤ. ခဲအံၤပအိၣ်လၢကၤဒ့ၣ်, ဝ့ၢ်တဝ့ၢ်လၢအအိၣ်ဖဲနကီၢ်အဆၢန့ၣ် လီၤ.

လံာ်မၢ်ကူး 3:8

လၢဝ့ၢ်ယရူၤၡလ့ၣ်, လၢကီၢ်အဒိၣ်, လၢကီၢ်အိၣ်လၢယၢ်ဒ့ၣ်မုၢ်ထီၣ်တကပၤဒီးတၢ်လီၢ်တၢ်ကျဲအိၣ်ဘူး အိၣ်တံၢ်ဒီးဝ့ၢ်ထါယၢၣ်ဒီးဝ့ၢ်စံဒိၣ်တဖၣ်လီၤ. ပှၤသ့ၣ်တဖၣ်အံၤဟဲဝဲဆူယ့ၣ်ၡူးအအိၣ်မ့ၢ်လၢအဝဲသ့ၣ်နၢ်ဟူ ဘၣ်တ့ၢ်လံတၢ်တဖၣ်လၢအဝဲဒၣ်မၤဝဲအဃိလီၤ.

လံာ်သိၣ်လီၤသီလီၤတၢ် 32:51

မ့ၢ်လၢသုဝဲခံဂၤလိာ်သုတသူၣ်တီသးရၤဘၣ်ဒီးယၤလၢကီၢ်အံၣ် စရ့လးအပှၤဂီၢ်မုၢ်အမဲာ်ညါအဃိန့ၣ်လီၤ. ဖဲသုအိၣ်လၢထံမရံၤဘါ, ဘူးဒီးဝ့ၢ်ကၤဒ့ၣ်လၢပှၢ်မုၢ်ကနၢ စံၣ်အခါန့ၣ်, သုတမၤလၤကပီၤဘၣ်ယၤလၢပှၤဂီၢ်မုၢ်အမဲာ်ညါဘၣ်လီၤ.

လံာ်စီၤယိၤၡူ 14:2

ဒ်ယွၤမၤလိာ်စီၤမိၤၡ့အသိး, ပှၤခွံဒူၣ်ဒီးဒူၣ်တဝာ်လၢထံကျိယၢ်ဒ့ၣ်အမုၢ်နုာ်တဖၣ်ဘၣ်တၢ် နီၤဖးန့ၢ်အထံအကီၢ်ခီဖျိတၢ်ဖီၣ်တၢ်ဖးန့ၣ်လီၤ.

လံာ်စီၤယိၤၡူ 15:2

ကလံၤထံးကီၢ်ဆၢအံၤစးထီၣ်အသးဖဲပီၣ်လဲၣ်အံသၣ်အကလံၤထံးအကတၢၢ်,

လံာ်စီၤယိၤၡူ 18:5

အဝဲသ့ၣ်ကနီၤဖးလီၤကီၢ်အံၤနွံပူၤလၢအဂီၢ်ဒၣ်ဝဲန့ၣ်လီၤ. ယူဒၤအဒူၣ်ကအိၣ်လၢအလီၢ်ဒၣ်ဝဲလၢကလံၤထံး, ဒီးစီၤယိၤသးကအိၣ်လၢအလီၢ်ဒၣ်ဝဲလၢကလံၤစိးန့ၣ်လီၤ.