လံာ်စီၤယိၤၡူ 10:41 - Sgaw Karen Common Bible

⁴¹ စီၤယိၤၡူမၤနၢၤအဝဲသ့ၣ်စးထီၣ်လၢဝ့ၢ်ကၤဒ့ၣ်ဘၢ်န့တုၤလၢ ဝ့ၢ်ဂါစၤ, ဒီးကိၡ့ၣ်အကီၢ်ဒီဘ့ၣ်ညါတုၤလီၤလၢဝ့ၢ်ကံးဘိၣ်န့ၣ်လီၤ.

လံာ်စီၤယိၤၡူ 10:41 Iomraidhean Croise

လံာ်တၢ်ကဲထီၣ်အခီၣ်ထံး 10:19

တုၤလၢပှၤကနၤဧၣ်ဖိအကီၢ်ဆၢတုၤဃီၤဝဲစးထီၣ်လၢကီၢ်စံဒိၣ် အကလံၤထံးဆူဝ့ၢ်ကရၢ်လၢအအိၣ်ဘူးဒီးဝ့ၢ်ဂါစၤ, ဒီးလၢမုၢ်ထီၣ်တခီန့ၣ်ဆူဝ့ၢ်စဒိၣ်, ဝ့ၢ်ဂမိရၤ, ဝ့ၢ်အၤဒမၤဒီးဝ့ၢ်စဘိအံၣ်လၢအအိၣ်ဘူးဒီးဝ့ၢ်လါၡၤန့ၣ် လီၤ.

လံာ်စီၤပၤအခီၣ်ထံးတဘ့ၣ် 3:5

မုၢ်တနၤဃီန့ၣ်, ယွၤလီၣ်ဖျါထီၣ်အသးလၢအီၤလၢတၢ်မံမီၢ်တခါ အပူၤဒီးသံကွၢ်အီၤ, “နအဲၣ်ဒိးလၢယကဟ့ၣ်နၤတၢ်မနုၤလဲၣ်.”

လံာ်စကၤရယၤ 9:5

ဝ့ၢ်အၤၡကလိၣ်ကထံၣ်ဘၣ်တၢ်အံၤဒီးကပျံၤတၢ်လီၤ. ဝ့ၢ်ဂါစၤကထံၣ်ဘၣ်တၢ်အံၤဒီးကကနိးကစုာ်ဖးဒိၣ်လီၤ. ဒ်န့ၣ်အသိးဝ့ၢ်ဧ့ကြိၣ်ဒီးအတၢ်မုၢ်လၢ်တဖၣ်စ့ၢ်ကီးကဟးဂီၤဝဲလီၤ. ဝ့ၢ်ဂါစၤအစီၤပၤကလီၤမၢ်သဒၣ်အီၤဒီးဝ့ၢ်အၤၡကလိၣ်ကအိၣ်တ့ၢ် သယုၢ်သညိလီၤ.

လံာ်တၢ်ဂံၢ် 13:26

ဆူစီၤမိၤၡ့, စီၤအၤဟရိၣ်, ဒီးကီၢ်အံၣ်စရ့လးအပှၤဒီတဖု လၢအအိၣ်သကိးတပူၤဃီအအိၣ်, ဖဲကၤဒ့ၣ်လၢပၤရၣ်အပှၢ်မုၢ်ကနၢ အပူၤန့ၣ်လီၤ. အဝဲသ့ၣ်တဲဖျါထီၣ်တၢ်လၢအဝဲသ့ၣ်ထံၣ်တ့ၢ်ဝဲဒီးဒုးနဲၣ် အဝဲသ့ၣ်တၤသူတၤသၣ်လၢအဝဲသ့ၣ်ဟဲက့ၤစိာ်ဝဲန့ၣ်လီၤ.

လံာ်တၢ်ဂံၢ် 32:8

တၢ်အံၤမ့ၢ်တၢ်လၢသုပၢ်တဖၣ်မၤတ့ၢ်ဝဲဖဲယမၢလီၤအဝဲသ့ၣ်လၢ ကၤဒ့ၣ်ဘၢ်န့ဒ်သိးကလဲၤဃုကွၢ်ထံကီၢ်တဘ့ၣ်အခါန့ၣ်လီၤ.

လံာ်တၢ်ဂံၢ် 34:4

အန့ၣ်ဝံၤဒီးကတရံးအသးဆူကလံၤထံးလိၤလိၤလၢတၢ်လဲၤနုာ်ဆူ ဧးကရးဘံၣ်ဒီးကလဲၤဆူညါဖျိကွံာ်ပှၢ်မုၢ်ကနၢစံၣ်, ယံၤတုၤလၢကလံၤထံးဖဲကၤဒ့ၣ်ဘၢ်န့လီၤ. ဝံၤဒီးတရံးက့ၤဆူမုၢ်နုာ်ကလံၤစိးဆူဃးစၢ်အးဒၢ်ဒီးလဲၤဆူဧၤစမိၣ်,

မၤတၢ် 8:26

ကစၢ်အကလူးတဂၤစံးဘၣ်စီၤဖံလံးပူး, “ကတီၤထီၣ်နသးဝံၤလဲၤလီၤဆူကလံၤထံးတခီ, ဒီးပိာ်လီၤကျဲလၢအလဲၤလၢဝ့ၢ်ယရူၤၡလ့ၣ်ဆူဝ့ၢ်ဂါစၤန့ၣ်တက့ၢ်.” (ကျဲအံၤတဘၣ်တၢ်သူအီၤလၢၤဘၣ်).

လံာ်သိၣ်လီၤသီလီၤတၢ် 1:19

ပမၤတၢ်လၢယွၤ, ပကစၢ်ယွၤမၤလိာ်တ့ၢ်ပှၤန့ၣ်လီၤ. ပဟးထီၣ်ကွံာ်လၢကစၢၢ်စံၤနါ, ဒီးလဲၤခီဖျိပှၢ်မုၢ်ကနၢဖး ဒိၣ်ဖးလဲၣ်ဒီးလီၤပျံၤလီၤဖုး, လၢပတၢ်လဲၤကျဲဆူပှၤဧၣ်မိၣ်ဖိတဖၣ်အကီၢ်လၢအပှဲၤဒီးတၢ်လူၢ်တၢ်တြီၤန့ၣ်လီၤ. ဖဲပလဲၤတုၤလၢဝ့ၢ်ကၤဒ့ၣ်ဘၢ်န့န့ၣ်,

လံာ်သိၣ်လီၤသီလီၤတၢ် 2:23

ဖဲကီၢ်လၢအအိၣ်လၢ ပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်အကၢၢ် ခိၣ်တရဲာ်န့ၣ်ပှၤဂီၢ်မုၢ်လၢကီးကြ့တ့ၤတဖၣ် သူၣ်လီၤဆီလီၤအတၢ်အိၣ်တၢ်ဆိးအလီၢ်န့ၣ်လီၤ. အဝဲသ့ၣ်မၤဟးဂီၤကွံာ် ပှၤဧ့ၤဝံဖိလၢအအိၣ်ဆိးတ့ၢ်လၢပျၢၤလံၤ လံၤဖဲန့ၣ်တဖၣ်ဒီးဟံးန့ၢ်ကွံာ်အဝဲသ့ၣ်အကီၢ်ယံၤဝဲလၢ ကလံၤထံးတကပၤတုၤလၢဝ့ၢ်ဧးစၤန့ၣ်လီၤ.)

လံာ်သိၣ်လီၤသီလီၤတၢ် 9:23

ဒီးဖဲအဝဲဆှၢထီၣ်သုလၢဝ့ၢ်ကၤဒ့ၣ်ဘၢ်န့ဃုာ်ဒီးအတၢ်မၤလိာ် လၢသုကလဲၤဒီးမၤန့ၢ်ကီၢ်လၢအဝဲဟ့ၣ်လီၤသုန့ၣ်, သုပူထီၣ်ထီဒါအီၤလီၤ. သုတနာ်အီၤမ့ၢ်ဂ့ၤစူၢ်အီၤမ့ၢ်ဂ့ၤ န့ၣ်ဘၣ်.

လံာ်စီၤယိၤၡူ 10:12

မုၢ်တနံၤလၢယွၤဟ့ၣ်ပှၤအံၣ်စရ့လးဖိ တၢ်မၤနၢၤလၢပှၤအမိၢ်ဖိအဖီခိၣ်န့ၣ်, စီၤယိၤ ၡူကတိၤတၢ်ဒီးယွၤလၢပှၤအံၣ်စရ့လးဖိတဖၣ်အမဲာ်ညါဒီးစံးဝဲ, “မုၢ်ဧၢ, အိၣ်ဂၢၢ်တပၢၢ်လၢဝ့ၢ်ကံးဘိၣ်အဖီခိၣ်ဒီးလါဧၢ, အိၣ်ကတီၢ်လၢအးယၤလိၣ်အကစၢၢ်ကဆူးအဖီခိၣ်န့ၣ်တက့ၢ်.”

လံာ်စီၤယိၤၡူ 10:2

ပှၤဝ့ၢ်ယရူၤၡလ့ၣ်ဖိတဖၣ်ပျံၤ တၢ်ဖုးတၢ်ဒိၣ်မးလၢတၢ်ဂ့ၢ်အံၤအဃိန့ၣ်လီၤ. အဂ့ၢ်မ့ၢ်လၢကံးဘိၣ်မ့ၢ်ဝ့ၢ်လၢအဒိၣ်ထဲသိးဝ့ၢ်အဂၤတဖၣ်လၢ အအိၣ်ဒီးအစီၤပၤ, ဒီးမ့ၢ်ဝ့ၢ်လၢအဒိၣ်န့ၢ်ဒံးဝ့ၢ်ဂဲဒီးအပှၤတဖၣ်မ့ၢ်ပှၤလၢ အဒုးတၢ်သ့အဃိန့ၣ်လီၤ.

လံာ်စီၤယိၤၡူ 11:16

စီၤယိၤၡူမၤန့ၢ်ကီၢ်ခဲလၢာ်, ကီၢ်လၢကစၢၢ်ကလိအလိၤဒီးအဂံၢ်ထံးတဖၣ်, ကီၢ်လၢကလံၤစိးဒီးကလံၤထံး, ကိၡ့ၣ်ဒီကီၢ်ညါဒီးကီၢ်လၢအဃ့ထီလၢအကလံၤထံး, ဃုာ်ဒီးထံကျိယၢ်ဒ့ၣ်အတၢ်ပၢၤခိၣ်န့ၣ်လီၤ.

လံာ်စီၤယိၤၡူ 11:22

ဒီးလၢပှၤအံၣ်စရ့လးဖိတဖၣ်အကီၢ်ပူၤန့ၣ်, ပှၤဧနးဖိ တအိၣ်လီၤတဲာ်နီတဂၤလၢၤဘၣ်န့ၣ်လီၤ. အိၣ်တီၢ်ဒၣ်စှၤဂၤလၢဝ့ၢ်ဂါစၤ, ဝ့ၢ်ကၤသးဒီးဝ့ၢ်အၤစဒိာ် အပူၤန့ၣ်လီၤ.

လံာ်စီၤယိၤၡူ 15:51

ကိၡၣ်, ဟိလိၣ်, ဒီးကံလိၤန့ၣ်လီၤ. မ့ၢ်ဝ့ၢ်တဆံတဝ့ၢ်ဃုာ်ဒီး ဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ.

လံာ်ပှၤစံၣ်ညီၣ်ကွီၢ် 16:1

ဘၣ်တနံၤစီၤၡံၣ်ၡိၣ်လဲၤဆူပှၤဖလ့ၡသးဖိအဝ့ၢ်ဂါစၤဒီးဖဲန့ၣ် ထံၣ်လိာ်ပှၤဃဲသဲမုၣ်တဂၤဒီးမံဃုာ်ဒီးအီၤလီၤ.

လံာ်ပှၤစံၣ်ညီၣ်ကွီၢ် 16:21

ပှၤဖလ့ၡသးဖိတဖၣ်ဖီၣ်န့ၢ်အီၤဒီးထုးထီၣ်ကွံာ်အမဲာ်ချံလီၤ. ဒီးအဝဲသ့ၣ်လဲၤစိာ်အီၤဆူဝ့ၢ်ဂါစၤ, စၢအီၤလၢထးသွဲတိၢ်ဘီတဖၣ်ဒီးမၢအဂူာ်ဆၢၣ်ဂူာ်လၢဃိာ်ပူၤန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 6:17

ပှၤဖလ့ၡသးဖိတဖၣ်ဆှၢလီၤတၢ်အချံထီၣ်ဒီးညိးအဂီၤထူယဲၢ်ခါ ဆူယွၤအအိၣ်ဒ်တၢ်ဟ့ၣ်ကနၢၤအသိး လၢတၢ်လိးက့ၤတၢ်လၢအတၢ်ဒဲးဘးတဖၣ်အဂီၢ်, လၢဝ့ၢ်အၤစဒိး, ဝ့ၢ်ဂါစၤ, ဝ့ၢ်အၤၡကလိၣ်, ဝ့ၢ်ကၤသးဒီးဝ့ၢ်ဧ့ကြိၣ်အဂီၢ်တခါစုာ်စုာ်န့ၣ်လီၤ.