လံာ်ယိၤအ့လး 2:28 - Sgaw Karen Common Bible

²⁸ တၢ်န့ၣ်ဝံၤအလီၢ်ခံဒီးယကလူလီၤယသးစီ ဆှံလၢပှၤကိးဂၤဒဲးအလိၤ, သုဖိခွါတဖၣ်ဒီးသုဖိမုၣ်တဖၣ်ကတဲဖျါယတၢ်ကစီၣ်, သုပှၤပိာ်ခွါသးပှၢ်တဖၣ်ကမံမီၢ်တၢ်, ဒီးသုပှၤပိာ်ခွါသးစၢ်တဖၣ်ကထံၣ်တၢ်လၢညါခီလီၤ.

လံာ်ယိၤအ့လး 2:28 Iomraidhean Croise

တၢ်ကတိၤဒိ. 1:23

ဖဲယသိၣ်ဃီၣ်သုဒီးဒိကနၣ်တက့ၢ်. ယကဟ့ၣ်သုတၢ်ဟ့ၣ်ကူၣ် အဂ့ၤဒီးနီၤဟ့ၣ်သုလၢယတၢ်သ့ၣ်ညါလီၤ.

လံာ်ယၡါယၤ 32:15

ဘၣ်ဆၣ်ဒီးကစၢ်ယွၤကဟ့ၣ်လီၤပှၤလၢအသးအသီတဘျီ န့ၣ်လီၤ. ဟီၣ်ခိၣ်လီၤဃိကကဲထီၣ်က့ၤဟီၣ်ခိၣ်ညၣ်ထ့ၣ်, ဒီးစံာ်ပျီတဖၣ်ကဟ့ၣ်ထီၣ်တၤသူတၤသၣ်အါအါဂီၢ်ဂီၢ်လီၤ.

လံာ်ယၡါယၤ 40:5

အန့ၣ်ဒီး, ယွၤအလၤကပီၤကဘၣ်တၢ်လီၣ်ဖျါထီၣ်အီၤ, ဒီးကယဲၢ်ပှၤဟီၣ်ခိၣ်ဖိခဲလၢာ်ကထံၣ်ဘၣ်အီၤလီၤ. ယွၤအနီၢ်ကစၢ်ဒၣ်ဝဲအၢၣ်လီၤတ့ၢ်တၢ်အံၤလီၤ.”

လံာ်ယၡါယၤ 44:3

ယကဟ့ၣ်လီၤထံဆူကီၢ်လၢအသးသူထံ, ဒီးဒုးယွၤလီၤထံကျိတဖၣ်လၢဟီၣ်ခိၣ်လၢအဃ့ထီအလိၤန့ၣ် လီၤ. ယကလူလီၤဂၢ်လီၤယသးလၢသုဖိတဖၣ်အဖီခိၣ်, ဒီးယတၢ်ဆိၣ်ဂ့ၤလၢသုစၢၤသုသွဲၣ်တဖၣ်အလိၤလီၤ.

လံာ်ယၡါယၤ 49:26

ပှၤလၢအမၤအၢမၤသီသုတဖၣ်န့ၣ်ယကပျဲအမၤသံလိာ်အသးတဂၤဒီး တဂၤလီၤ. ဒ်ပှၤအီမူၤသံးအသိးန့ၣ်, အဝဲသ့ၣ်ကမူၤလၢတၢ်မၤသံတၢ်ဒီးတၢ် သူၣ်ဒိၣ်သးဖျိးလီၤ. အန့ၣ်ဒီးပှၤဟီၣ်ခိၣ်ဖိခဲလၢာ်ကသ့ၣ်ညါလၢယမ့ၢ်ယွၤ, ပှၤတဂၤလၢအအုၣ်က့ၤခီၣ်က့ၤသုဒီးမၤထူၣ်ဖျဲးသုလီၤ. အဝဲသ့ၣ်ကသ့ၣ်ညါဝဲလၢယမ့ၢ်အံၣ်စရ့လးအကစၢ်ယွၤလၢအအိၣ်ဒီး အစိကမီၤန့ၣ်လီၤ.”

လံာ်ယၡါယၤ 49:6

ယွၤစံးဘၣ်ယၤ, “ယခ့ယပှၤဧၢ, ယအိၣ်ဒီးတၢ်မၤဒိၣ်န့ၢ်အလီၢ်တမံၤလၢနဂီၢ်လီၤ. ယပှၤဂီၢ်မုၢ်အံၣ်စရ့လးလၢအအိၣ်လီၤတဲာ်တ့ၢ်တဖၣ်အံၤ, တမ့ၢ်ထဲနကပာ်ထီၣ်က့ၤအီၤဆူတၢ်ဒိၣ်တၢ်မုၢ်အလီၢ်ဧိၤဘၣ်, မ့မ့ၢ်ယကဒုးကဲထီၣ်စ့ၢ်ကီးနၤတၢ်ကပီၤတဖျၢၣ်လၢပှၤကလုာ်တဖၣ် အဂီၢ်, ဒ်သိးဟီၣ်ခိၣ်ဒီဘ့ၣ်ကတုၤလၢတၢ်အုၣ်က့ၤခီၣ်က့ၤ န့ၣ်လီၤ.”

လံာ်ယၡါယၤ 54:13

ယကစၢ်ဒၣ်ယဲ, ယကသိၣ်လိနပှၤဂီၢ်မုၢ် ဒီးဟ့ၣ်အဝဲသ့ၣ်လၢတၢ်အီၣ်ကုးအီပှဲၤဒီး တၢ်ဃူတၢ်ဖိးလီၤ.

လံာ်ယံးရမံယၤ 23:25

တၢ်လၢဝံတဖၣ်လၢအကတိၤလီတၢ်လၢယမံၤအပူၤစံးတ့ၢ်ဝဲန့ၣ်, ယသ့ၣ်ညါယဲလီၤ. အဝဲသ့ၣ်စံးဝဲလၢယဟ့ၣ်အီၤယတၢ်ကစီၣ် တဖၣ်လၢအတၢ်မံမီၢ်အပူၤန့ၣ်လီၤ.

လံာ်ယံးရမံယၤ 23:28

ဝံတဂၤလၢအအိၣ်ဒီးတၢ်မံမီၢ်တမံၤန့ၣ်, ကြၢးစံးဝဲလၢတၢ်အံၤ မ့ၢ်ဒၣ်တၢ်မံမီၢ်ဧိၤန့ၣ်လီၤ. ဘၣ်ဆၣ်ဒီးဝံတဂၤလၢအနၢ်ဟူတ့ၢ် ယတၢ်ကစီၣ်န့ၣ်, ကြၢးစံးဘၣ်တဲဘၣ်တၢ်ကစီၣ်အဝဲန့ၣ်လၢတၢ်သးတီအပူၤန့ၣ်လီၤ. တၢ်ထိၣ်သတြီၤဘုလီၢ်ဒီးဘုကၠူၣ်န့ၣ်ကမၤဂ့ၤတၢ်မနုၤလဲၣ်.

လံာ်ယဃ့းစက့လး 36:27

ယကဒၢနုာ်လီၤယသးလၢသုပူၤဒီးယကကွၢ်, လၢမ့ၢ်သု ပိာ်ထွဲယတၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးတိၢ်န့ၢ်ဖံးဃာ် တၢ်မၤလိာ်တဖၣ်လၢယဟ့ၣ်လီၤတ့ၢ်သုကစီဒီဧါန့ၣ်လီၤ.

လံာ်ယဃ့းစက့လး 37:14

ယကဒၢနုာ်ယတၢ်သါဆူအဝဲသ့ၣ်အပူၤ, မၤမူထီၣ်ကဒါက့ၤအဝဲသ့ၣ် ဒီးပျဲအဝဲသ့ၣ်အိၣ်ဆိးလၢအကီၢ်ဒၣ်ဝဲအပူၤန့ၣ်လီၤ. အန့ၣ်ဒီးအဝဲသ့ၣ်က သ့ၣ်ညါဝဲလၢယမ့ၢ်ယွၤန့ၣ်လီၤ. ယအၢၣ်လီၤတ့ၢ်လၢယကမၤတၢ်အံၤဒီးယကမၤအီၤန့ၣ်လီၤ. ယၤ, ယွၤ, ကတိၤလံတၢ်လံ.”

လံာ်ယဃ့းစက့လး 39:29

ယကလူလီၤယသးလၢကီၢ်အံၣ်စရ့လးအပှၤဂီၢ်မုၢ်အလိၤဒီး တဃၣ်ကွံာ်ဘၣ်ယသးလၢအဝဲသ့ၣ်အအိၣ်နီတစုလၢၤဘၣ်န့ၣ်လီၤ. ယၤယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.”

လံာ်ဒၤနံးယ့လး 7:1

ဖဲစီၤဘ့ၤလၡါစၢ်ပၢကီၢ်ဘၤဘူၤလိၣ်အခီၣ်ထံးတနံၣ်န့ၣ်, စီၤဒၤနံးယ့လးမံမီၢ်တ့ၢ်တၢ်တမံၤဒီးထံၣ်တၢ်ထံၣ်လၢညါခီလၢ မုၢ်နၤအကတီၢ်န့ၣ်လီၤ. ဒီးကွဲးလီၤတ့ၢ်ဝဲတၢ်မံမီၢ်န့ၣ်, ဒီးစံးတ့ၢ်ဝဲတၢ်ဂ့ၢ်လၢတၢ်ပာ်ဖှိၣ်ဖုၣ်ဖုၣ်အပူၤန့ၣ်လီၤ.

လံာ်စကၤရယၤ 12:10

ဒီးယကမၤပှဲၤစီၤဒၤဝံးအစၢၤအသွဲၣ်တဖၣ်ဒီးဝ့ၢ် ယရူၤၡလ့ၣ်အပှၤဂီၢ်မုၢ်ဒီးသးလၢအသးကညီၤတၢ်ဒီး သးလၢအအိၣ်ဒီးတၢ်ထုကဖၣ်န့ၣ်လီၤ. အဝဲသ့ၣ်ကကွၢ်ဃီၤတၢ်ဆူပှၤတဂၤလၢအဝဲသ့ၣ်ဆဲးသံကွံာ်ဝဲ, ဒီးအဝဲသ့ၣ်ကဟီၣ်ဝဲယၢၤဝဲလၢအဃိဒ်ပှၤတဖၣ်လၢအဟီၣ်ဝဲယၢၤဝဲ လၢအဖိခွါတဂၤဃီအဃိအသိးန့ၣ်လီၤ. အဝဲသ့ၣ်ကဟီၣ်ဝဲနးနးကလဲာ်ဒ်ပှၤတဖၣ်လၢအဟီၣ်ဝဲယၢၤဝဲလၢ အဖိခွါဝဲၢ်ကိလီၤမၢ်ကွံာ်အဃိအသိးန့ၣ်လီၤ.

လံာ်တၢ်ဂံၢ် 11:17

ယကဟဲလီၤဒီးကတိၤတၢ်ဒီးနၤဖဲန့ၣ်ဒီးယကဟံးန့ၢ်သးလၢယဟ့ၣ် လီၤတ့ၢ်နၤတနီၤဒီးဟ့ၣ်လီၤအီၤဆူအဝဲသ့ၣ်အအိၣ်န့ၣ်လီၤ. အန့ၣ်ဒီးအဝဲသ့ၣ်ကမၤစၢၤနၤလၢတၢ်စိာ်ထီၣ်မူဒါလၢပှၤဂီၢ် မုၢ်တဖၣ်အံၤအဂီၢ်, ဒီးနတဝံဘၣ်ယိးဘၣ်ထဲတဂၤဧိၤလၢၤဘၣ်.

လံာ်တၢ်ဂံၢ် 12:6

ဒီးယွၤစံးဝဲဒၣ်, “ခဲအံၤဒိကနၣ်တၢ်လၢယကစံးယဲန့ၣ်တက့ၢ်. ဖဲဝံတဖၣ်အိၣ်လၢသုကျါန့ၣ်ယလီၣ်ဖျါယသးဆူအဝဲသ့ၣ်အအိၣ်လၢ တၢ်ထံၣ်လၢညါခီတဖၣ်အပူၤဒီးကတိၤတၢ်ဆူအဝဲသ့ၣ်အအိၣ်လၢတၢ် မံမီၢ်တဖၣ်အပူၤန့ၣ်လီၤ.

လံာ်လူၤကၣ် 1:67

စီၤယိၤဟၣ်အပၢ်စီၤစဃၤရံလၢထီၣ်ပှဲၤထီၣ်လၢသးစီဆှံဒီး အဝဲဒၣ်ကတိၤထီၣ်ကစၢ်ယွၤအတၢ်ကစီၣ်လီၤ.

လံာ်လူၤကၣ် 3:6

ပှၤဟီၣ်ခိၣ်ဖိကိးဂၤဒဲး ကထံၣ်ဘၣ် ကစၢ်ယွၤအတၢ်အုၣ်က့ၤခီၣ်က့ၤလီၤ.’ ”

လံာ်ယိၤဟၣ် 7:39

ယ့ၣ်ၡူးစံးတၢ်အံၤဘၣ်ဃးဒီးယွၤအသးလၢ ပှၤလၢအစူၢ်က့ၤနာ်က့ၤအီၤတဖၣ်ကဒိးန့ၢ်ဘၣ်ဝဲန့ၣ်လီၤ. အကတီၢ်ဖဲန့ၣ်, ယွၤအသးတဘၣ်တၢ်ဟ့ၣ်လီၤအီၤဒံးဘၣ်န့ၣ်, မ့ၢ်လၢယ့ၣ်ၡူးတဘၣ်တၢ်ဒုးဂဲၤထၢၣ်အီၤဆူတၢ်လၤ ကပီၤဒံးဘၣ်အဃိလီၤ.

မၤတၢ် 2:33

အဝဲဒၣ်ဘၣ်တၢ်ပာ်ထီၣ်ထီအီၤလၢပၢ်ကစၢ်ယွၤအစုထွဲတကပၤ, ဒီးဒိးန့ၢ်သးစီဆှံလၢအအိၣ်ဒ်အအၢၣ်လီၤအီလီၤတ့ၢ်ဝဲအသိး န့ၣ်လီၤ. ဒီးတၢ်လၢသုထံၣ်ဘၣ်ဒီးနၢ်ဟူဘၣ်ခဲကနံၣ်အံၤ, မ့ၢ်ယ့ၣ်ၡူးအတၢ်ဟ့ၣ်လၢအလူလီၤဂၢ်လီၤဝဲလၢပလိၤန့ၣ်လီၤ.

မၤတၢ် 2:39

ကစၢ်ယွၤအတၢ်အၢၣ်လီၤအီလီၤအံၤမ့ၢ်ဝဲလၢသုဂီၢ်ဒီးလၢ သုဖိသုလံၤအဂီၢ်, ဒီးကယဲၢ်ပှၤအိၣ်လၢထံယံၤကီၢ်ယံၤတဖၣ်ခဲလၢာ် အဂီၢ်, ပှၤခဲလၢာ်လၢပကစၢ်ယွၤကိးန့ၢ်ဆူအအိၣ်န့ၣ်လီၤ.”

မၤတၢ် 21:9

အဝဲဒၣ်အိၣ်ဒီးအဖိမုၣ်မုၣ်ကနီၤလွံၢ်ဂၤ, လၢအတဲဖျါထီၣ်ကစၢ်ယွၤအတၢ်ကစီၣ်န့ၣ်လီၤ.

ကလၤတံ 3:28

အဃိ, တၢ်လီၤဆီလိာ်သးတအိၣ်ဘၣ်လၢပှၤယူဒၤဖိဒီးပှၤ ကလုာ်ဂၤတဖၣ်အဘၢၣ်စၢၤ, ပှၤကုၢ်ဖိဒီးပှၤသဘျ့ဖိတဖၣ် အဘၢၣ်စၢၤ, ပှၤပိာ်ခွါဒီးပှၤပိာ်မုၣ်တဖၣ်အဘၢၣ်စၢၤန့ၣ်ဘၣ်. သုဝဲခဲလၢာ်န့ၣ်သုမ့ၢ်တၢ်တမံၤဃီလၢယ့ၣ်ၡူးခရံာ်အပူၤ န့ၣ်လီၤ.

ဧ့ၤဘြံၤ 1:1

လၢပျၢၤန့ၣ်, ကစၢ်ယွၤကတိၤတ့ၢ်တၢ်ဒီးပမိၢ်ပၢ်ဖံဖုလၢပျၢၤ တဖၣ်ဘၣ်ထွဲတၢ်အါမံၤအါကလုာ်ဒီးအါဘျီခီဖျိဝံတဖၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 19:20

လၢတၢ်န့ၣ်အဃိ, အဝဲမၢလီၤပှၤတနီၤလၢကလဲၤဖီၣ်န့ၢ်အီၤန့ၣ် လီၤ. အဝဲသ့ၣ်ထံၣ်ဝံတဖုဂဲၤကလံာ်ဒီးကိးပသူတၢ်ဃုာ်ဒီး စီၤၡမူၤအ့လးဒ်အခိၣ်အနၢ်အသိးန့ၣ်လီၤ. တုၤနုၤတစု, ယွၤအသးဟံးဃာ်စီၤစီလူးအပှၤတဖၣ်ဒီးအဝဲသ့ၣ် စးထီၣ်ဂဲၤကလံာ်ဒီးကိးပသူဝဲလီၤ.

လံာ်စီၤၡမူၤအ့လးအခီၣ်ထံးတဘ့ၣ် 19:21

ဖဲစီၤစီလူးနၢ်ဟူတၢ်အံၤန့ၣ်, အဝဲဆှၢလီၤအါထီၣ်ပှၤစိာ်တၢ် ကစီၣ်လီၤ. အဝဲသ့ၣ်စ့ၢ်ကီးစးထီၣ်ဂဲၤကလံာ်ဒီးကိးပသူဝဲလီၤ. အဝဲဆှၢလီၤပှၤစိာ်တၢ်ကစီၣ်သၢဘျီတဘျီ, ဒီးတၢ်တမံၤဃီမၤအသးဒီးအဝဲသ့ၣ်န့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 28:6

မၤသးဒ်န့ၣ်ဒီး, အဝဲသံကွၢ်ယွၤလၢကဘၣ်မၤတၢ်မနုၤလဲၣ်န့ၣ်လီၤ. ဘၣ်ဆၣ်ဒီးလၢတၢ်မံမီၢ်မ့ၢ်ဂ့ၤ, လၢအူရံၣ်ဒီးတူမံၢ်မ့ၢ်ဂ့ၤ, ခီဖျိဝံတဖၣ်မ့ၢ်ဂ့ၤန့ၣ်, ယွၤတစံးဆၢအီၤနီတမံၤဘၣ်.