လံာ်ယိၤဟၣ် 2:19 - Sgaw Karen Common Bible

¹⁹ ယ့ၣ်ၡူးစံးဆၢဝဲ, “မၤလီၤပှီၢ်ကွံာ်တၢ်လုၢ်ဟံၣ်အံၤ တက့ၢ်. ဒီးလၢသၢသီအတီၢ်ပူၤန့ၣ်ယကသူၣ်ထီၣ်ကဒါ က့ၤအီၤန့ၣ်လီၤ.”

လံာ်ယိၤဟၣ် 2:19 Iomraidhean Croise

လံာ်မးသဲ 12:40

အဂ့ၢ်ဒ်အံၤ, ဒ်စီၤယိၤနါအိၣ်လၢညၣ်ဖးဒိၣ်အဟၢဖၢပူၤသၢနံၤသၢနၤ အသိးန့ၣ်, ပှၤကညီဖိခွါအံၤကအိၣ်လၢဟီၣ်ခိၣ်အသးကံၢ်ပူၤသၢနံၤသၢနၤ စ့ၢ်ကီးလီၤ.

လံာ်မးသဲ 16:21

စးထီၣ်ဖဲအကတီၢ်န့ၣ်, ယ့ၣ်ၡူးတဲနၢ်ပၢၢ်အပျဲၢ်အဘီၣ်တဖၣ်, လၢအဝဲကဘၣ်လဲၤဆူဝ့ၢ်ယရူၤၡလ့ၣ်, ဒီးတူၢ်ဘၣ် ပှၤယူဒၤဖိကရၢအခိၣ်အနၢ်တဖၣ်, ဒီးပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်အတၢ်မၤနးမၤဖှီၣ် အီၤအါမံၤ, ဒီးလၢအကဘၣ်တၢ်မၤသံအီၤဒီးလၢသၢသီတသီန့ၣ် ယွၤကဒုးဂဲၤဆၢထၢၣ်က့ၤအီၤန့ၣ်လီၤ.

လံာ်မးသဲ 27:40

“နသါကမၤလီၤပှီၢ်ကွံာ်တၢ်လုၢ်ဟံၣ်ဒီးဘှီထီၣ်က့ၤအီၤလၢ သၢသီအတီၢ်ပူၤဘၣ်. နမ့မ့ၢ်ကစၢ်ယွၤအဖိခွါဒီး, မၤပူၤဖျဲးက့ၤနသးဒၣ်နဲတက့ၢ်. ဟဲက့ၤလီၤလၢထူၣ်စုညါအလိၤတက့ၢ်.”

လံာ်မးသဲ 27:63

ဒီးစံး, “တၢ်ဒိၣ်ဧၢ, ပသ့ၣ်နီၣ်ထီၣ်လၢပှၤလီတၢ်ဖိတဂၤန့ၣ်, ဖဲအမူဒံးအခါစံးတ့ၢ်ဝဲ, ‘သၢသီတသီန့ၣ်ယကဂဲၤဆၢထၢၣ်သမူထီၣ်က့ၤလီၤ.’

လံာ်မၢ်ကူး 14:58

“ပနၢ်ဟူအဝဲဒၣ်စံးဝဲ, ‘ယကမၤလီၤပှီၢ်ကွံာ်တၢ်လုၢ်ဟံၣ်လၢအဘၣ်တၢ်ဘှီထီၣ်အီၤလၢပှၤ ကညီအစုတဖျၢၣ်အံၤ, ဒီးလၢသၢသီတသီန့ၣ်ယကဘှီထီၣ်အဂၤတဖျၢၣ်လၢအတဘၣ် တၢ်မၤအီၤလၢပှၤကညီအစုဘၣ်န့ၣ်လီၤ.’ ”

လံာ်မၢ်ကူး 15:29

ပှၤလၢအလဲၤဘၣ်ဖဲန့ၣ် တဖၣ်ကတိၤဒုၣ်ဒွဲၣ်စံးအၢအီၤ, ဒီးဂံၤဂုၤအခိၣ်ဒီးစံးဝဲ, “အီၢ်, နစံးလၢနကမၤဟးဂီၤကွံာ်တၢ်လုၢ်ဟံၣ် ဒီးဘှီထီၣ်က့ၤကဒီးအီၤလၢသၢသီအတီၢ်ပူၤတမ့ၢ်ဘၣ်ဧါ.

လံာ်မၢ်ကူး 8:31

အန့ၣ်ဝံၤယ့ၣ်ၡူးသိၣ်လိအပျဲၢ်အဘီၣ်တဖၣ်ဒီးစံးဝဲ, “ပှၤကညီဖိခွါအံၤကဘၣ်တူၢ်တၢ်နးတၢ်ဖှီၣ်အကလုာ်ကလုာ် ဒီးပှၤယူဒၤဖိကရၢအခိၣ်အနၢ်တဖၣ်, ပှၤလုၢ်တၢ်အခိၣ်အဒိၣ်တဖၣ် ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ကညိကွံာ်အီၤလီၤ. ကဘၣ်တၢ်မၤသံအီၤဘၣ်ဆၣ်ဒီးသၢသီတသီန့ၣ်ကဂဲၤ ဆၢထၢၣ်က့ၤလၢတၢ်သံလီၤ.”

လံာ်ယိၤဟၣ် 11:25

ယ့ၣ်ၡူးစံးဘၣ်အီၤ, “ယဲဒၣ်အံၤ ယမ့ၢ်တၢ်ဂဲၤဆၢထၢၣ်သမူထီၣ်က့ၤ ဒီးတၢ်မူန့ၣ်လီၤ. ပှၤလၢအစူၢ်က့ၤနာ်က့ၤယၤတဂၤလၢ်လၢ်န့ၣ်, မ့ၢ်သံဘၣ်ဆၣ်ဒီးကမူဝဲလီၤ.

လံာ်ယိၤဟၣ် 5:19

မၤသးဒ်န့ၣ်ဒီး, ယ့ၣ်ၡူးစံးဆၢအဝဲသ့ၣ်, “ယစံးဘၣ်တဲဘၣ်သုတၢ်မ့ၢ်တၢ်တီလီၤ. ဖိခွါမၤဒၣ်အတၢ်တသ့နီတမံၤဘၣ်. မၤဝဲသ့ထဲတၢ်လၢအဝဲထံၣ်အပၢ်မၤဝဲန့ၣ်လီၤ. တၢ်လၢပၢ်မၤတမံၤလၢ်လၢ်န့ၣ်, ဖိခွါမၤစ့ၢ်ကီးဝဲလီၤ.

မၤတၢ် 2:24

ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးမၤထူၣ်ဖျဲးထီၣ်အီၤလၢတၢ်သံအစိကမီၤအဖီလာ်, မ့ၢ်လၢတၢ်သံဟံးဃာ်အီၤတသ့လ့ၤတက့ၤဘၣ်အဃိလီၤ.

မၤတၢ် 2:32

ယ့ၣ်ၡူးတဂၤအံၤကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးတၢ်လၢအမၤအသးအံၤ, ပဝဲဒၣ်ခဲလၢာ်ပထံၣ်ဘၣ်လၢပမဲာ်လီၤ.

မၤတၢ် 3:15

သုမၤသံကွံာ်ပှၤလၢအဆှၢပှၤဆူတၢ်မူနီၢ်နီၢ်တဂၤ, ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးတၢ်တမံၤအံၤပထံၣ်ဘၣ်လၢပနီၢ်ကစၢ်ဒၣ်ပဝဲလီၤ.

မၤတၢ် 3:26

အန့ၣ်သတးဒီး, ကစၢ်ယွၤဃုထၢထီၣ်အခ့အပှၤဒီးမၢလီၤဝဲလၢအကဟဲအဆိ ကတၢၢ်ဆူသုအိၣ်ဒ်သိးကဆိၣ်ဂ့ၤသု, ဒီးဒုးဃၣ်ကွံာ်သုကိးဂၤဒဲးလၢ သုကျဲအအၢအသီတဖၣ်န့ၣ်လီၤ.”

မၤတၢ် 6:14

ပနၢ်ဟူဘၣ်တ့ၢ်လံအဝဲဒၣ်အတၢ်ကတိၤလၢအစံးဝဲလၢပှၤ နစၤရ့းဖိယ့ၣ်ၡူးတဂၤအံၤကမၤလီၤပှီၢ်ကွံာ်တၢ်လုၢ်ဟံၣ်စီဆှံ တဖျၢၣ်အံၤ, ဒီးလဲလိာ်ကွံာ်ပလုၢ်ပလၢ်တဖၣ်လၢစီၤမိၤၡ့ ဟ့ၣ်လီၤတ့ၢ်လံပှၤန့ၣ်လီၤ.”

ရိမ့ၤ 4:24

ဘၣ်တၢ်ကွဲးစ့ၢ်ကီးအီၤလၢပဝဲလၢအကဘၣ်တၢ်တူၢ်လိာ်အီၤဒ် ပှၤတီပှၤလိၤအသိးတဖၣ်အဂီၢ်, ပဝဲလၢအစူၢ်က့ၤနာ်က့ၤကစၢ်ယွၤလၢအဒုးဂဲၤဆၢထၢၣ်က့ၤ ကစၢ်ယ့ၣ်ၡူးလၢတၢ်သံတဂၤန့ၣ်လီၤ.

ရိမ့ၤ 6:4

မ့မ့ၢ်ဒ်န့ၣ်ဒီး, လၢပတၢ်ဒိးဘျၢပသးအဃိပဘၣ် တၢ်ခူၣ်လီၤဃုာ်ဒီးအီၤဒီးပသံဃုာ်ဒီးအီၤဒ်သိး, ဒ်ခရံာ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ လၢတၢ်သံခီဖျိပၢ်အစိကမီၤလၢအပှဲၤဒီးအလၤကပီၤ အသိးန့ၣ်, ပကအိၣ်ဒီးတၢ်အိၣ်မူအသီဒ်န့ၣ်အသိးစ့ၢ် ကီးလီၤ.

ရိမ့ၤ 8:11

ကစၢ်ယွၤအသးလၢအဒုးဂဲၤဆၢထၢၣ်သမူထီၣ်က့ၤယ့ၣ်ၡူး လၢတၢ်သံန့ၣ်, မ့ၢ်မူလၢသုပူၤဒီး, ပှၤလၢအဒုးဂဲၤဆၢထၢၣ် သမူထီၣ်က့ၤခရံာ်လၢတၢ်သံန့ၣ်ကဟ့ၣ်လီၤစ့ၢ်ကီးသုနီၢ်ခိလၢ အသံသ့တဖၣ်အံၤလၢတၢ်မူခီဖျိယွၤအသးလၢအအိၣ် ဝဲဆိးဝဲလၢသုပူၤန့ၣ်လီၤ.

1 ကရံၣ်သူး 15:12

ခဲကနံၣ်အံၤ, မ့ၢ်လၢပတၢ်ကစီၣ်မ့ၢ်ဝဲခရံာ်ဘၣ်တၢ်ဒုးဂဲၤဆၢထၢၣ်သမူ ထီၣ်က့ၤအီၤလၢတၢ်သံအဃိဒီး, သုဝဲတနီၤသုစံးလၢပှၤသံတဖၣ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤန့ၣ်သ့ဝဲလၢကျဲဒ်လဲၣ်.

ကလီးစဲ 2:12

အဂ့ၢ်ဒ်အံၤ, ဖဲသုဒိးစူၢ်ဒိးဘျၢသုသးအခါန့ၣ်, သုဘၣ်တၢ်ခူၣ်လီၤကွံာ်သုဃုာ်ဒီးခရံာ် ဒီးသုဘၣ်တၢ်ဒုးဂဲၤ ဆၢထၢၣ်က့ၤသုလၢတၢ်သံအပူၤဃုာ်ဒီးခရံာ်ခီဖျိလၢသုတၢ် စူၢ်တၢ်နာ်ယွၤအစိအကမီၤလၢအဒုးဂဲၤဆၢထၢၣ်သမူထီၣ်က့ၤ ခရံာ်လၢတၢ်သံအပူၤအဃိန့ၣ်လီၤ.

၁ ပ့းတရူး 3:18

အဂ့ၢ်ဒ်အံၤ, ခရံာ်တူၢ်သံစ့ၢ်ကီးအသးလၢတၢ်ဒဲးဘးအဃိ တဘျီဒီးအဝံၤ, ပှၤအဂ့ၤတဂၤလၢပှၤတၢ်ဒဲးဘးဖိတဖၣ်အဂီၢ်, ဒ်သိးကဆှၢသုဆူယွၤအအိၣ်န့ၣ်လီၤ. အဝဲဘၣ်တၢ်မၤသံအီၤလၢတၢ်ဖံးတၢ်ညၣ်အပူၤ, ဘၣ်ဆၣ်ဒီးဒိးတၢ်မၤမူထီၣ်က့ၤအီၤလၢသူၣ်လၢသးန့ၣ်လီၤ.