လံာ်ယိၤဟၣ် 14:23 - Sgaw Karen Common Bible

²³ ယ့ၣ်ၡူးစံးဆၢတၢ်ဒီးစံးဘၣ်အီၤ, “ပှၤတဂၤလၢ်လၢ်လၢ အအဲၣ်ယၤန့ၣ်, ကတိၢ်န့ၢ်ဒီးမၤထွဲယကလုၢ်ကထါလီၤ. ယပၢ်ကအဲၣ်အီၤ, ဒီးယပၢ်ဒီးယၤပကဟဲဆူအအိၣ် ဒီးအိၣ်ဆိးဒီးအီၤန့ၣ်လီၤ.

လံာ်ယိၤဟၣ် 14:23 Iomraidhean Croise

လံာ်တၢ်ကဲထီၣ်အခီၣ်ထံး 1:26

ဒီးကစၢ်ယွၤစံးဝဲဒၣ်, “ဒီးခဲကနံၣ်အံၤ ပကတ့လီၤပာ်လီၤပှၤကညီတဖၣ်, လၢအကလီၤဂာ်ဒီးပှၤ ဒီးဒ်သိးသိးလိာ်အသးဒီးပှၤလီၤ. အဝဲသ့ၣ်ကအိၣ်ဒီးတၢ်စိတၢ်ကမီၤ လၢဒ့ၣ်ဧိၤညၣ်ဧိၤ, ထိၣ်ဧိၤလံာ်ဧိၤဒီးကယဲၢ်ဆၣ်ဖိကီၢ်ဖိခဲလၢာ်, အဒၢဒီးအမံၤ, အဒိၣ်ဒီးအဆံးသ့ၣ်တဖၣ်အဖီခိၣ်န့ၣ်လီၤ.”

လံာ်တၢ်ကဲထီၣ်အခီၣ်ထံး 11:7

မ်ပလဲၤလီၤသကိးဒီးမၤဃါဃုာ်ကွံာ်အကျိာ်ဒ်သိးတဖုဒီးတဖု အသုတနၢ်ပၢၢ်လိာ်အသးတဂ့ၤန့ၣ်တက့ၢ်.”

စံးထီၣ်ပတြၢၤ 90:1

ယွၤဧၢ, နမ့ၢ်တ့ၢ်နဲပတၢ်အိၣ်တၢ်ဆိးအလီၢ် အစိၤစိၤအဃၣ်ဃၣ်လီၤ.

စံးထီၣ်ပတြၢၤ 91:1

ပှၤလၢအအိၣ်ဝဲဆိးဝဲလၢ တၢ်ထီကတၢၢ်တဂၤအလီၢ်တဒၢ, ဒီးအိၣ်ဝဲလၢတၢ်သ့တၢ်လၢာ်အကဒုပူၤန့ၣ်,

လံာ်ယၡါယၤ 57:15

ယဲဒၣ်အံၤ, ယမ့ၢ်ကစၢ်ယွၤလၢအအိၣ်ထီၣ်ထီဒီးစီဆှံဝဲ, ယွၤလၢအအိၣ်မူအစိၤစိၤအဃၣ်ဃၣ်လီၤ. ယအိၣ်လၢတၢ်လီၢ်ထီၣ်ထီဒီးစီဆှံတတီၤ, ဘၣ်ဆၣ်ဒီးယအိၣ်စ့ၢ် ကီးလၢပှၤဂီၢ်မုၢ်လၢအဆီၣ်လီၤအသးဒီးပီၢ်ယၢ်လီၤက့ၤအသး အကျါ, ဒ်သိးယဟ့ၣ်က့ၤအဝဲသ့ၣ်အတၢ်နာ် န့ၢ်ဒီးတၢ်မုၢ်လၢ်ကသ့ဝဲအဂီၢ်လီၤ.

လံာ်ယိၤဟၣ် 10:30

ယပၢ်ဒီးယၤန့ၣ်မ့ၢ်တၢ်တမံၤဃီလီၤ.”

လံာ်ယိၤဟၣ် 14:15

သုမ့ၢ်အဲၣ်ယၤဒီးသုကတိၢ်န့ၢ်ဒီးမၤထွဲယတၢ်မၤလိာ်တဖၣ် န့ၣ်လီၤ.

လံာ်ယိၤဟၣ် 14:17

အဝဲဒၣ်န့ၣ်မ့ၢ်ယွၤအသးလၢအလီၣ်ဖျါထီၣ်တၢ် မ့ၢ်တၢ်တီဘၣ်ဃးဒီးကစၢ်ယွၤန့ၣ်လီၤ. ဟီၣ်ခိၣ်တူၢ်လိာ်အီၤ တသ့ဘၣ်. မ့ၢ်လၢအထံၣ်အီၤတသ့ဒီးသ့ၣ်ညါအီၤတသ့ဘၣ် အဃိလီၤ. ဘၣ်ဆၣ်ဒီးသုသ့ၣ်ညါအီၤမ့ၢ်လၢအဝဲအိၣ်ဝဲ ဆိးဝဲဒီးသုဒီးကအိၣ်ကဆိးလၢသုပူၤအဃိန့ၣ်လီၤ.

လံာ်ယိၤဟၣ် 14:21

ပှၤတဂၤလၢ်လၢ်လၢအတူၢ်လိာ်ယတၢ်မၤလိာ်တဖၣ် ဒီးတိၢ်န့ၢ်ဒီးမၤထွဲဝဲန့ၣ်, မ့ၢ်ပှၤတဂၤလၢအအဲၣ်ယၤလီၤ. ယပၢ်ကအဲၣ်ပှၤတဂၤလၢ်လၢ်လၢအအဲၣ်ယၤ, ဒီးယဲဒၣ်စ့ၢ်ကီး ယကအဲၣ်အီၤဒီးလီၣ်ဖျါထီၣ်ယသးလၢအီၤလီၤ.”

လံာ်ယိၤဟၣ် 14:24

ပှၤတဂၤလၢ်လၢ်လၢအတအဲၣ်ယၤန့ၣ်, တတိၢ်န့ၢ်ဒီးမၤထွဲ ယကလုၢ်ကထါဘၣ်. ဒီးတၢ်ကတိၤတဖၣ်လၢသုနၢ်ဟူလၢယၤန့ၣ်, တမ့ၢ်ယတၢ်ဒၣ်ယဲဘၣ်. မ့မ့ၢ်ဟဲလၢပၢ်လၢအမၢလီၤယၤတဂၤ အအိၣ်န့ၣ်လီၤ.

လံာ်ယိၤဟၣ် 15:10

သုမ့ၢ်ဒိကနၣ်ယတၢ်မၤလိာ်တဖၣ်ဒီးသုကအိၣ်ဆိးလၢ ယတၢ်အဲၣ်အပူၤ, ဒ်ယဒိကနၣ်ယပၢ်အတၢ်မၤလိာ်တဖၣ် ဒီးအိၣ်ဆိးလၢအတၢ်အဲၣ်အပူၤအသိးန့ၣ်လီၤ.

လံာ်ယိၤဟၣ် 16:27

အဂ့ၢ်ဒ်လဲၣ်န့ၣ်, ပၢ်အကစၢ်ဒၣ်ဝဲအဲၣ်သုလီၤ. အဝဲဒၣ်အဲၣ် သုမ့ၢ်လၢသုအဲၣ်ယၤဒီးနာ်တ့ၢ်လၢယဟဲလၢပၢ်ကစၢ်ယွၤ အအိၣ်အဃိန့ၣ်လီၤ.

လံာ်ယိၤဟၣ် 6:56

ပှၤတဂၤလၢ်လၢ်လၢအအီၣ်ယညၣ်ဒီးအီယသွံၣ်န့ၣ်မူလၢယပူၤ, ဒီးယမူလၢအပူၤလီၤ.

လံာ်ယိၤဟၣ် 8:51

ယစံးဘၣ်တဲဘၣ်သုတီတီလိၤလိၤ, ပှၤလၢအတိၢ်န့ၢ်ယကလုၢ်ကထါတဂၤလၢ်လၢ်န့ၣ် တသံနီတဘျီဘၣ်.”

လံာ်ယိၤဟၣ် 8:52

အဝဲသ့ၣ်စံးဘၣ်အီၤ, “ခဲအံၤပသ့ၣ်ညါလီၤတံၢ်လၢတၢ်နါ အိၣ်လၢနပူၤလီၤ. စီၤအၤဘြၤဟၣ်သံလံ, ဒီးဝံတဖၣ်သံလံ. အန့ၣ်ဒၣ်လဲာ် နစံးလၢ ‘ပှၤလၢအတိၢ်န့ၢ်ယကလုၢ်ကထါန့ၣ် တသံနီတဘျီဘၣ်.’

၂ ကရံၣ်သူး 6:16

ကစၢ်ယွၤအတၢ်လုၢ်ဟံၣ်ဒီးပှၤသူခိၣ်ဖိအတၢ်ဂီၤတၢ်ဖီၣ် န့ၣ်အသးလီၤပလိာ်ကသ့ဝဲလၢကျဲဒ်လဲၣ်. အဂ့ၢ်ဒ်အံၤ, ပမ့ၢ်ကစၢ်ယွၤလၢအမူဝဲတဂၤအတၢ်လုၢ်ဟံၣ်လီၤ. ဒ်ကစၢ်ယွၤအနီၢ်ကစၢ်ဒၣ်ဝဲစံးလံဝဲအသိး, “ယကသူၣ်ထီၣ်ယဟံၣ်ယဃီဒီးယပှၤဂီၢ်မုၢ် ဒီးအိၣ်ယဲဆိးယဲလၢအဝဲသ့ၣ်တဖၣ်အသိးအကျါလီၤ. ယကမ့ၢ်အဝဲသ့ၣ်အကစၢ်ယွၤ ဒီးအဝဲသ့ၣ်ကမ့ၢ်ယပှၤဂီၢ်မုၢ်လီၤ.”

အ့းဖ့းစူး 3:17

လၢခရံာ်ကအိၣ်ဝဲဆိးဝဲလၢသုသးကံၢ်ပူၤခီဖျိတၢ်စူၢ်တၢ်နာ် အဂီၢ်, ဒီးလၢသုကစဲၤလီၤသုဂံၢ်ဒီးသူၣ်လီၤသုသးလၢ တၢ်အဲၣ်တၢ်ကွံပူၤအဂီၢ်,

၁ ယိၤဟၣ် 2:24

မၤသးဒ်န့ၣ်ဒီး, တၢ်ကစီၣ်လၢသုနၢ်ဟူတ့ၢ်လၢအခီၣ်ထံး လံၤလံၤန့ၣ်မ်အအိၣ်အဆိးလၢသုပူၤတက့ၢ်. တၢ်လၢသုနၢ်ဟူတ့ၢ်လၢအခီၣ်ထံးလံၤလံၤမ့ၢ်အိၣ်မ့ၢ်ဆိးလၢ သုပူၤဒီး, သုကအိၣ်ကဆိးလၢဖိခွါကစၢ်ဒီးလၢပၢ်ကစၢ် အပူၤထီဘိန့ၣ်လီၤ.

၁ ယိၤဟၣ် 2:5

ဘၣ်ဆၣ်ဒီးပှၤတဂၤဂ့ၤတဂၤဂ့ၤလၢအစူၢ်အကလုၢ်န့ၣ်, မ့ၢ်ပှၤလၢ တၢ်အဲၣ်တၢ်ကွံကစၢ်ယွၤလၢထီၣ်ပှဲၤထီၣ်လၢအပူၤနီၢ်နီၢ်လီၤ. ခီဖျိတၢ်အံၤန့ၣ်, ပသ့ၣ်ညါလီၤတံၢ်လၢပအိၣ်မူလၢ ကစၢ်ယွၤအပူၤန့ၣ်လီၤ.

၁ ယိၤဟၣ် 4:4

ဘၣ်ဆၣ်ဒီး, ယဖိယလံၤသ့ၣ်ဧၢ, သုဘၣ်ဃးဒီးကစၢ်ယွၤ ဒီးမၤနၢၤမၤဃၣ်တ့ၢ်လံဝံအဘျၣ်တဖၣ်, မ့ၢ်လၢယွၤအသးလၢအအိၣ်လၢသုပူၤအံၤအစိကမီၤဒိၣ် န့ၢ်ဒံးသးလၢအအိၣ်လၢပှၤလၢအဘၣ်ဃးဒီးဟီၣ်ခိၣ် တဖၣ်အပူၤအဃိန့ၣ်လီၤ.

၁ ယိၤဟၣ် 5:3

အဂ့ၢ်ဒ်လဲၣ်န့ၣ်, ပတၢ်အဲၣ်ကစၢ်ယွၤအခီပညီမ့ၢ်ဝဲပစူၢ် အတၢ်မၤလိာ်တဖၣ်န့ၣ်လီၤ. ဒီးအတၢ်မၤလိာ်တဖၣ်တမ့ၢ်တၢ်ကီတၢ်ခဲကဲၣ်ဆိးလၢပဂီၢ်ဘၣ်.

၂ ယိၤဟၣ် 1:6

ဒီးတၢ်အဲၣ်အံၤအခီပညီမ့ၢ်ဝဲ, ပကအိၣ်မူလၢတၢ်စူၢ်ကစၢ်ယွၤအတၢ်မၤလိာ်တဖၣ်အပူၤ န့ၣ်လီၤ. တၢ်မၤလိာ်, ဒ်သုဝဲခဲလၢာ်သုနၢ်ဟူတ့ၢ်လၢ တၢ်အခီၣ်ထံးလံၤလံၤမ့ၢ်အအံၤ, သုဝဲခဲလၢာ်သုကဘၣ်အိၣ်မူလၢတၢ်အဲၣ်တၢ်ကွံအပူၤ န့ၣ်လီၤ.

လံာ်လီၣ်ဖျါ 21:22

လၢဝ့ၢ်ပူၤန့ၣ်ယတထံၣ်တၢ်လုၢ်ဟံၣ်နီတဖျၢၣ်ဘၣ်. အဂ့ၢ်ဒ်အံၤ, အတၢ်လုၢ်ဟံၣ်မ့ၢ်ဝဲသ့တၢ်လၢာ်ကစၢ်ယွၤ ဒီးသိဖိတဒုန့ၣ်လီၤ.

လံာ်လီၣ်ဖျါ 21:3

ယနၢ်ဟူတၢ်ကလုၢ်ဖးဒိၣ်ကတိၤလီၤတၢ်လၢလီၢ်ပစိာ်ဒီးစံး, “ခဲကနံၣ်အံၤ, ကစၢ်ယွၤအဟံၣ်အိၣ်ဝဲလၢတၢ်လီၢ်တပူၤဃီ ဒီးပှၤဟီၣ်ခိၣ်ဖိလီၤ. အဝဲဒၣ်ကအိၣ်ကဆိးဒီးအဝဲသ့ၣ်, ဒီးအဝဲသ့ၣ်ကမ့ၢ်အဝဲဒၣ်အပှၤဂီၢ်မုၢ်လီၤ. ကစၢ်ယွၤအနီၢ်ကစၢ်ဒၣ်ဝဲကအိၣ်တပူၤဃီဒီးအဝဲသ့ၣ်, ဒီးအဝဲဒၣ်ကမ့ၢ်အဝဲသ့ၣ်အကစၢ်ယွၤလီၤ.

လံာ်လီၣ်ဖျါ 22:3

တၢ်လၢအအိၣ်လၢကစၢ်ယွၤအတၢ်ဆိၣ်အၢအဖီလာ်န့ၣ်တၢ် တထံၣ်န့ၢ်လၢၤအီၤလၢဝ့ၢ်တဖျၢၣ်အံၤအပူၤနီတမံၤဘၣ်. ကစၢ်ယွၤဒီးသိဖိအလီၢ်ပစိာ်န့ၣ်ကအိၣ်လၢဝ့ၢ်တဖျၢၣ်န့ၣ် အပူၤ, ဒီးအဝဲဒၣ်အခ့အပှၤတဖၣ်ကဘူၣ်ထီၣ်ဘါထီၣ်အီၤလီၤ.