လံာ်ယိၤဟၣ် 11:52 - Sgaw Karen Common Bible

⁵² ဒီးတမ့ၢ်ထဲပှၤတကလုာ်ဧိၤန့ၣ်အဂီၢ်ဘၣ်. မ့ၢ်စ့ၢ်ကီးလၢအကထုးဖှိၣ်ပာ်ဖှိၣ်က့ၤကစၢ်ယွၤအပှၤဂီၢ်မုၢ် လၢအလီၤပြံလီၤပြါတဖၣ်ဒ်သိးအကကဲထီၣ်က့ၤပှၤတဖုဃီ အဂီၢ်န့ၣ်လီၤ.

လံာ်ယိၤဟၣ် 11:52 Iomraidhean Croise

လံာ်တၢ်ကဲထီၣ်အခီၣ်ထံး 49:10

စီၤယူဒၤကစိာ်စီၤပၤအဘီမုၢ်နီၣ်ထိး, ဒီးအစၢၤအသွဲၣ်ကပၢတၢ် တဘိယူၢ်ဃီလီၤ. ပှၤကလုာ်တဖၣ်ကဟဲစိာ်န့ၢ်အီၤတၢ်ယူးယီၣ်ပာ်ကဲအတၢ်ဟ့ၣ်ဒီးတီၤ လီၤလၢအမဲာ်ညါအိၣ်ဒီးတၢ်စူၢ်အကလုၢ်န့ၣ်လီၤ.

စံးထီၣ်ပတြၢၤ 22:15

ယဂံၢ်ယဘါဃ့ထီကွံာ်ဝဲဒ်သပၢၤတက့အသိး, ဒီးယပျုၤစဲဘူးဒီးယခၣ်ခိၣ်န့ၣ်လီၤ. နဒုးမံလီၤယၤလၢတၢ်သံအဟီၣ်ခိၣ်အကမူၣ် အပူၤန့ၣ်လီၤ.

စံးထီၣ်ပတြၢၤ 22:27

ပှၤကိးကလုာ်ဒဲးကသ့ၣ်နီၣ်ထီၣ်ယွၤလီၤ. ပှၤလၢအအိၣ်လၢဟီၣ်ခိၣ်ချၢခဲလၢာ် ကဃၣ်က့ၤအသးဆူအအိၣ်လီၤ. ဒူၣ်ထၢခဲလၢာ်ကဘူၣ်ထီၣ်ဘါထီၣ်အီၤလီၤ.

စံးထီၣ်ပတြၢၤ 72:19

အမံၤလၤသၣ်ကပီၤန့ၣ် မ်အဘၣ်တၢ်စံးထီၣ်ပတြၢၤ လီၤထူလီၤယိာ်တက့ၢ်. မ်ဟီၣ်ခိၣ်ဒီဘ့ၣ်ညါပှဲၤဝဲဒီးအလၤကပီၤတက့ၢ်. အၤမ့ၣ်, ဒီးအၤမ့ၣ်.

လံာ်ယၡါယၤ 49:18

ကွၢ်တရံးတၢ်ဝးဝးဒီးထံၣ်တၢ်လၢအမၤအသး န့ၣ်တက့ၢ်. နပှၤဂီၢ်မုၢ်တဖၣ်အိၣ်ဖှိၣ်ရိဖှိၣ်ဒီးဟဲက့ၤဆူနအိၣ်လံ. ဒ်ယမ့ၢ်ကစၢ်ယွၤလၢအမူဝဲနီၢ်နီၢ်တဂၤအသိး ယစံးဘၣ်နၤ, နကပာ်ကဖၢလၢဘၣ်နသးလၢနပှၤဂီၢ်မုၢ်အဃိ, ပှဲၤသိးသိးဒီးတလးမူးပိာ်မုၣ်တဂၤပာ်ကဖၢလၢဘၣ်အသးလၢ အတၢ်မျၢ်ပလဲတဖၣ်အဃိလီၤ.

လံာ်ယၡါယၤ 49:6

ယွၤစံးဘၣ်ယၤ, “ယခ့ယပှၤဧၢ, ယအိၣ်ဒီးတၢ်မၤဒိၣ်န့ၢ်အလီၢ်တမံၤလၢနဂီၢ်လီၤ. ယပှၤဂီၢ်မုၢ်အံၣ်စရ့လးလၢအအိၣ်လီၤတဲာ်တ့ၢ်တဖၣ်အံၤ, တမ့ၢ်ထဲနကပာ်ထီၣ်က့ၤအီၤဆူတၢ်ဒိၣ်တၢ်မုၢ်အလီၢ်ဧိၤဘၣ်, မ့မ့ၢ်ယကဒုးကဲထီၣ်စ့ၢ်ကီးနၤတၢ်ကပီၤတဖျၢၣ်လၢပှၤကလုာ်တဖၣ် အဂီၢ်, ဒ်သိးဟီၣ်ခိၣ်ဒီဘ့ၣ်ကတုၤလၢတၢ်အုၣ်က့ၤခီၣ်က့ၤ န့ၣ်လီၤ.”

လံာ်ယၡါယၤ 55:5

ခဲအံၤ, သုကကိးဖှိၣ်ထံဂုၤကီၢ်ဂၤအပှၤကလုာ်တဖၣ်လီၤ. တဘျီန့ၣ်, အဝဲသ့ၣ်တသ့ၣ်ညါသုဘၣ်. ဘၣ်ဆၣ်ဒီးခဲအံၤ, အဝဲသ့ၣ်ကဟဲဃ့ၢ် ပာ်ဖှိၣ်အသးဒီးသုလီၤ. ယၤ, ယွၤ, သုကစၢ်ယွၤ, အံၣ်စရ့လးအကစၢ်ယွၤစီဆှံ ကမၤကဲထီၣ်လိၣ်ထီၣ်တၢ်သ့ၣ်တဖၣ်အံၤခဲလၢာ်လီၤ. ယကဟ့ၣ်လီၤသုလၢတၢ်ဒိးဘၣ်တၢ်ယူးယီၣ် ဒီးတၢ်လၤကပီၤလီၤ.”

လံာ်ယၡါယၤ 56:8

ယွၤပၢဘၣ်တၢ်ခဲလၢာ်ကစၢ်, လၢအဟဲက့ၤစိာ်အပှၤဂီၢ်မုၢ် အံၣ်စရ့လးလၢတၢ်စိာ်မၢကဲကုၢ်အလီၢ်ဆူဟံၣ်န့ၣ်, အၢၣ်လီၤစ့ၢ်ကီးဝဲလၢကဟဲစိာ်ဒံးပှၤဂီၢ်မုၢ်အဂၤတဖၣ် လၢကဟဲပာ်ဖှိၣ်ဃုာ်အသးဒီးအဝဲသ့ၣ်န့ၣ်လီၤ.

လံာ်ယၡါယၤ 60:4

ကွၢ်တရံးနဃၢၤဝးဝးဒီး ထံၣ်တၢ်လၢအမၤအသးန့ၣ်တက့ၢ်. နပှၤဂီၢ်မုၢ်ပာ်ဖှိၣ်အသးလၢအကဟဲက့ၤဆူဟံၣ်လံ. နဖိခွါတဖၣ်ကဟဲလၢတၢ်လီၢ်အယံၤ ဒီးနဖိမုၣ်တဖၣ်ကဘၣ်တၢ်စိာ်အီၤဒ်ဖိသၣ်အသိးလီၤ.

လံာ်ယဃ့းစက့လး 34:12

ဒ်ကျဲတဘိဃီလၢပှၤကွၢ်သိတဂၤအံးထွဲကွၢ်ထွဲအသိတဖၣ်လၢ အလီၤပြံလီၤပြါဒီးဟဲက့ၤစိာ်ကဒါက့ၤကဒီးအဝဲသ့ၣ်တပူၤဃီ အသိးန့ၣ်လီၤ. ယကဟဲက့ၤစိာ်ကဒါက့ၤအဝဲသ့ၣ်လၢကယဲၢ် တၢ်လီၢ်တဖၣ်လၢအဝဲသ့ၣ်လီၤပြံလီၤပြါတ့ၢ်ဖဲမုၢ်တနံၤလၢ အခံးသူဒီးပှဲၤဒီးတၢ်တတၢးတနါန့ၣ်လီၤ.

လံာ်ဟိၤၡ့ 1:10

ကီၢ်အံၣ်စရ့လးအပှၤဂီၢ်မုၢ်ကကဲထီၣ်ဝဲဒ်မဲးလၢပီၣ်လဲၣ်အသိး, အါန့ၢ်ဒံးတၢ်ဂံၢ်အီၤသ့မ့ၢ်ဂ့ၤ, တၢ်ဃီၣ်နီၣ်အီၤသ့မ့ၢ်ဂ့ၤန့ၣ်လီၤ. ခဲကနံၣ်အံၤ, ကစၢ်ယွၤစံးဘၣ်အဝဲသ့ၣ်, သုတမ့ၢ်လၢၤယပှၤဂီၢ်မုၢ်ဘၣ်. ဘၣ်ဆၣ်မုၢ်တနံၤကဟဲတုၤဃီၤဝဲဒၣ်ဖဲအဝဲကစံးဘၣ်အဝဲသ့ၣ်, သုဝဲသ့ၣ်အံၤ, သုမ့ၢ်ကစၢ်ယွၤလၢအမူဝဲတဂၤအဖိသ့ၣ်တဖၣ်လီၤ.

လံာ်လူၤကၣ် 15:8

မ့တမ့ၢ်, ပစံးဒၣ်ကလိာ်ပိာ်မုၣ်တဂၤလၢအအိၣ်ဒီးစ့အဘ့ၣ်တဆံ အတၢ်လီၤမၢ်န့ၢ်အီၤတဘ့ၣ်လီၤ. အဝဲဒၣ်ကမၤဒ်လဲၣ်. အဝဲဒၣ်ကဒွဲၣ်ထီၣ်မ့ၣ်အူဒၢတဖျၢၣ်, ခွဲသိၣ်ခွဲပျီအဟံၣ်, ဒီးကွၢ်ဝဲလီၤတံၢ်လီၤဆဲးလၢတၢ်လီၢ်ကိးပူၤဒဲး တုၤလၢအထံၣ်န့ၢ်က့ၤဝဲတစုလီၤ.

လံာ်လူၤကၣ် 2:32

တၢ်ကပီၤတဖျၢၣ်လၢအကလီၣ်ဖျါထီၣ် နတၢ်ဘၣ်နသးဆူပှၤကလုာ်ဂၤတဖၣ်, ဒီးဟဲစိာ်တၢ်လၤကပီၤဆူ နပှၤဂီၢ်မုၢ်အံၣ်စရ့လးအအိၣ်န့ၣ်လီၤ.”

လံာ်ယိၤဟၣ် 1:12

ဘၣ်ဆၣ်ဒီးပှၤတနီၤန့ၣ်တူၢ်လိာ်အီၤဒီးနာ်အီၤသတးဒီး အဝဲဒၣ်ဒုးကဲထီၣ်အီၤလၢကစၢ်ယွၤအဖိတဖၣ်န့ၣ်လီၤ.

လံာ်ယိၤဟၣ် 1:29

မုၢ်ဆ့ၣ်ထီၣ်တနံၤစီၤယိၤဟၣ်ထံၣ်ဘၣ်ယ့ၣ်ၡူးဟဲဆူအအိၣ်ဒီး စံးဝဲ, “ကွၢ်ကွၢ်အဝဲမ့ၢ်ကစၢ်ယွၤအသိဖိလၢအစိာ်ထီၣ်ကွံာ် ပှၤဟီၣ်ခိၣ်ဖိအတၢ်ဒဲးဘးန့ၣ်လီၤ.

လံာ်ယိၤဟၣ် 10:16

သိအိၣ်ဝဲအဂၤတဖၣ်လၢအဘၣ်ဃးဒီးယၤလၢ အတအိၣ်လၢသိကရၢၢ်အဝဲအံၤအပူၤဘၣ်. ဘၣ်ဆၣ်ဒီးယကဘၣ်ဆှၢအီၤစ့ၢ်ကီးလီၤ. ဒီးအဝဲသ့ၣ်ကဒိကနၣ်ယကလုၢ်ဒီးကကဲထီၣ်သိ တဖုဃီအိၣ်ဒီးပှၤကွၢ်သိတဂၤဃီလီၤ.

လံာ်ယိၤဟၣ် 12:32

ဖဲယဘၣ်တၢ်ယူာ်ထီၣ်ယၤလၢဟီၣ်ခိၣ်အံၤဒီး, ယကထုးဖှိၣ်ပှၤခဲလၢာ်ဆူယအိၣ်လီၤ.

မၤတၢ် 18:10

အဂ့ၢ်ဒ်အံၤယအိၣ်ဒီးနၤလီၤ. ပှၤမၤဆူးမၤဆါနၤတသ့နီတဂၤဘၣ်. အဂ့ၢ်မ့ၢ်လၢပှၤအါဒံအါဂၤလၢဝ့ၢ်တဖျၢၣ်အံၤအပူၤမ့ၢ်ယပှၤဂီၢ်မုၢ် အဃိလီၤ.”

ရိမ့ၤ 3:29

ကစၢ်ယွၤအံၤမ့ၢ်ဒၣ်ထဲပှၤယူဒၤဖိတဖၣ်အကစၢ်ယွၤဧိၤန့ၣ်ဧါ. မ့ၢ်အတမ့ၢ်စ့ၢ်ကီးပှၤကလုာ်ဂၤတဖၣ်အကစၢ်ယွၤဘၣ်ဧါ. မ့ၢ်သပှၢ်ကတၢၢ်ပှၤကလုာ်ဂၤတဖၣ်အကစၢ်ယွၤစ့ၢ်ကီးလီၤ.

ရိမ့ၤ 4:17

တၢ်ကွဲးအသးစံးဝဲဒၣ်, “ယဒုးကဲထီၣ်လံနၤလၢပှၤ အါကလုာ်အပၢ်လံ.” လၢတၢ်န့ၣ်အဃိ, တၢ်အၢၣ်လီၤအီလီၤအံၤဂ့ၤဝဲလၢကစၢ်ယွၤအမဲာ်ညါ လၢစီၤအၤဘြၤဟၣ်နာ်, ကစၢ်ယွၤတဂၤလၢ အမၤမူထီၣ်က့ၤပှၤသံ, ဒီးဖဲအဟ့ၣ်လီၤအကလုၢ်န့ၣ်တၢ်လၢအတအိၣ်ဘၣ် တဖၣ်အိၣ်ထီၣ်ဒီးကဲထီၣ်ဝဲန့ၣ်လီၤ.

အ့းဖ့းစူး 1:5

မ့ၢ်လၢကစၢ်ယွၤအတၢ်အဲၣ်ဘၣ်ပှၤအဃိ, အဝဲဒၣ်ပာ်လီၤတ့ၢ်လံအသးလၢခီဖျိယ့ၣ်ၡူးခရံာ်န့ၣ်, အဝဲကဒုးကဲထီၣ်ပှၤလၢအဖိဒၣ်ဝဲန့ၣ်လီၤ. အအံၤမ့ၢ်ယွၤအတၢ်ဘၣ်အသးဒီးအတၢ်တိာ်ပာ်န့ၣ်လီၤ.

အ့းဖ့းစူး 3:11

ကစၢ်ယွၤမၤတၢ်အံၤဒ်အတၢ်တိာ်ပာ်အထူအယိာ်အိၣ်ဝဲ အသိး, လၢအမၤလၢထီၣ်ပှဲၤထီၣ်ဝဲခီဖျိခရံာ်န့ၣ်လီၤ.

ယၤကိာ် 1:1

စီၤယၤကိာ်, ကစၢ်ယွၤဒီးကစၢ်ယ့ၣ်ၡူးခရံာ်အခ့အပှၤ, ကတိၤဒိၣ်ဒီးဆၢဂ့ၤဆၢဝါဘၣ်ပှၤတဆံခံဒူၣ်လၢအအိၣ် လၢတၢ်လီၤပြံလီၤပြါအပူၤန့ၣ်လီၤ.

၁ ပ့းတရူး 1:1

လၢစီၤပ့းတရူး, ယ့ၣ်ၡူးခရံာ်အပှၤတၢ်မၢဖိ, ဆူကစၢ်ယွၤအပှၤဃုထၢဖိတဖၣ်လၢအလီၤပြံလီၤပြါဝဲ သကုၤကီၢ်ပီၣ်တူး, ကီၢ်ကလၤတံ, ကီၢ်ကးပၤဒကံ, ကီၢ်အၤစံ ဒီးကီၢ်ဘံၤသူၤနံတဖၣ်အပူၤအအိၣ်န့ၣ်လီၤ.

၁ ယိၤဟၣ် 2:2

ဒီးခီဖျိခရံာ်အကစၢ်ဒၣ်ဝဲန့ၣ်, ပတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤ, ဒီးတမ့ၢ်လၢၤထဲပတၢ်ဒဲးဘးတဖၣ်အဂီၢ်ဧိၤဘၣ်. မ့ၢ်စ့ၢ်ကီးလၢပှၤဟီၣ်ခိၣ်ဖိခဲလၢာ်အတၢ်ဒဲးဘးတဖၣ် အဂီၢ်လီၤ.

၁ ယိၤဟၣ် 3:1

ပၢ်ကစၢ်အဲၣ်တ့ၢ်ပှၤထဲထဲလဲၣ်န့ၣ်, ကွၢ်တက့ၢ်. အတၢ်အဲၣ်အံၤဒိၣ်ဝဲတုၤဒၣ်လဲာ်ပဘၣ်တၢ်ကိးပှၤလၢ ကစၢ်ယွၤအဖိတဖၣ်ဒီးပမ့ၢ်တၢ်အဝဲန့ၣ်န့ၣ်လီၤ. လၢတၢ်အံၤအဃိ, ဟီၣ်ခိၣ်တသ့ၣ်ညါပှၤဘၣ်, အဂ့ၢ်မ့ၢ်လၢတသ့ၣ်ညါကစၢ်ယွၤအဃိလီၤ.

၁ ယိၤဟၣ် 3:10

အအံၤမ့ၢ်တၢ်လီၤဆီလၢအအိၣ်ဖျါဝဲလီၤတံၢ်လီၤဆဲးလၢ ကစၢ်ယွၤအဖိတဖၣ်ဒီးမုၣ်ကီၤလံၢ်အဖိတဖၣ်အဘၢၣ်စၢၤ န့ၣ်လီၤ. ပှၤတဂၤဂၤလၢအတမၤတၢ်လၢအဘၣ်, မ့တမ့ၢ် တအဲၣ်ဘၣ်အဒီပုၢ်ဝဲၢ်န့ၣ်, တမ့ၢ်ကစၢ်ယွၤအဖိဘၣ်.

၁ ယိၤဟၣ် 3:2

ယတံၤသကိးသးဘိသ့ၣ်ဧၢ, ခဲအံၤပမ့ၢ်ကစၢ်ယွၤအဖိ တဖၣ်လီၤ. ဘၣ်ဆၣ်ဒီးပကမ့ၢ်တၢ်ဒ်လဲၣ်ဒ်လဲၣ်န့ၣ်, တၢ်တဒုးသ့ၣ်ညါပှၤဒံးဘၣ်. ဘၣ်ဆၣ်ဒီး, ပသ့ၣ်ညါလၢဖဲခရံာ်အိၣ်ဖျါထီၣ်န့ၣ်, ပကလီၤဂာ်ဒီးအီၤမ့ၢ်လၢ ပကထံၣ်အီၤဒ်အဝဲမ့ၢ်တၢ်နီၢ်နီၢ်အသိးအဃိန့ၣ်လီၤ.

လံာ်လီၣ်ဖျါ 5:9

အဝဲသ့ၣ်သးဝံၣ်တၢ်သးဝံၣ်အသီတယုၢ်, “နကြၢးဝဲဘၣ်ဝဲလၢနကဟံးန့ၢ်လံာ်ထူ ဒီးအိးထီၣ်အတၢ်စဲပနီၣ်ဃာ်တဖၣ်လီၤ. အဂ့ၢ်ဒ်အံၤနဘၣ်တၢ်မၤသံနၤ, ဒီးခီဖျိနသွံၣ်န့ၣ်, နပှ့ၤန့ၢ်ပှၤလၢဒူၣ်ဖိထၢဖိကိးဒူၣ်ဒဲးအပူၤ, လၢပှၤကတိၤကျိာ်အါကျိာ်အကျါ, လၢထံကီၢ်အါဘ့ၣ်အပူၤ, ဒီးပှၤကလုာ်အါကလုာ်အပူၤလၢကစၢ်ယွၤအဂီၢ် န့ၣ်လီၤ.