လံာ်ယံးရမံယၤ 52:18 - Sgaw Karen Common Bible

¹⁸ အဝဲသ့ၣ်စိာ်ကွံာ်စ့ၢ်ကီး နီၣ်တရီာ်ဟီၣ်ခိၣ်တဖၣ် ဒီးဖၣ်ဆါအသပၢၤ တဖၣ်လၢ တၢ်သူအီၤလၢတၢ်မၤကဆှဲကဆှီတၢ်လုၢ်လီၢ်အဂီၢ်, တၢ်ပီးတၢ်လီတဖၣ်လၢ တၢ်သူအီၤလၢ တၢ်အံး ထွဲကွၢ်ထွဲမ့ၣ်အူဒၢတဖၣ်အဂီၢ်, သလၢတဖၣ်လၢတၢ်သူအီၤလၢ တၢ်ကဒီဃာ်တၢ်လုၢ်တၢ်ပာ်တဖၣ် အသွံၣ်အဂီၢ်, သလၢတဖၣ်လၢ တၢ်သူအီၤလၢ တၢ်ဆိၣ်ကဲၤတၢ်နၢမူအဂီၢ်, ဒီးတိၢ်ဘီတၢ်ပီးတၢ်လီအဂၤခဲလၢာ်လၢတၢ်သူအီၤလၢ ယွၤအတၢ်လုၢ်ဟံၣ်ပူၤတၢ်မၤအဂီၢ်န့ၣ်လီၤ.

လံာ်ယံးရမံယၤ 52:18 Iomraidhean Croise

လံာ်စီၤပၤအခီၣ်ထံးတဘ့ၣ် 7:40

စီၤဃူရၣ်အဘံမၤစ့ၢ်ကီးဝဲသပၢၤတဖၣ်, တပူၣ်တဖၣ်ဒီးသရာ်တဖၣ် လီၤ. အဝဲမၤဝံၤအတၢ်မၤခဲလၢာ်လၢစီၤပၤၡလိၤမိၤအဂီၢ်လၢကစၢ်အတၢ် လုၢ်ဟံၣ်အပူၤန့ၣ်လီၤ. တၢ်လၢအဝဲမၤဝဲတဖၣ်မ့ၢ်ဒ်လၢလာ်အံၤလီၤ.

လံာ်စီၤပၤအခီၣ်ထံးတဘ့ၣ် 7:45

သပၢၤတဖၣ်, တပူာ်တဖၣ်ဒီးသလၢတဖၣ်န့ၣ်လီၤ. ကယဲၢ်တၢ်အပီးအလီလၢစီၤဃူရၣ်အဘံမၤဝဲလၢစီၤပၤၡလိၤမိၤ အဂီၢ်လၢယွၤအတၢ်လုၢ်ဟံၣ်အပူၤအံၤ, ဘၣ်တၢ်မၤအီၤလၢတိၢ်ဘီလၢတၢ်ထူးဘျ့ကတြ့ၣ်ထီၣ်အီၤန့ၣ်လီၤ.

လံာ်စီၤပၤအခီၣ်ထံးတဘ့ၣ် 7:50

လီခီတဖၣ်, နီၣ်တံာ်လၢကမၤကဆှီမ့ၣ်အူဒၢအဆၣ်တဖၣ်, သလၢတဖၣ်, ခွးလၢတၢ်နၢမူအဂီၢ်တဖၣ်, ဒီးသပၢၤဘံၣ်သလၣ်တဖၣ်လၢ တၢ်ကစိာ်မ့ၣ်အူအ့ၣ်တဖၣ်, သံၣ်ကျိၤတဖၣ်လၢတၢ်အလီၢ်စီဆှံကတၢၢ်အတြဲၤတဖၣ်ဒီးယွၤအတၢ် လုၢ်ဟံၣ်အကျဲစၢၤဆူတၢ်ချၢအတြဲၤတဖၣ်အဂီၢ်န့ၣ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 28:17

အဝဲဟ့ၣ်လီၤစ့ၢ်ကီးတၢ်သိၣ်လီၤမၤလိာ်တဖၣ်ဘၣ်ထွဲဒီးတၢ်က ဘၣ်သူထူအစီဆံးအါလၢတၢ်ကမၤနီၣ်ဆဲးတဖၣ်, သလၢတဖၣ်ဒီးသပၢၤတဖၣ်အဂီၢ်လဲၣ်, တၢ်ကဘၣ်သူစ့ဒီးထူ ဆံးအါလၢတၢ်ကမၤလီခီတဖၣ်အဂီၢ်လဲၣ်,

လံာ်ကွဲးနီၣ်တၢ်ခံဘ့ၣ်တဘ့ၣ် 4:11

စီၤဃူရၣ်အဘံမၤစ့ၢ်ကီးဝဲသပၢၤတဖၣ်, တပူာ်တဖၣ်ဒီးသရာ်တဖၣ် န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 4:16

သပၢၤတဖၣ်, တပူာ်တဖၣ်ဒီးနီၣ်ဆဲးတဖၣ်န့ၣ်လီၤ. ပှၤအခိၣ်လၢအမၤတၢ်သ့လၢစု, စီၤဃူရၣ်အဘံမၤကယဲၢ်တၢ်သ့ၣ်တဖၣ် အံၤခဲလၢာ်လၢတိၢ်ဘီလၢတၢ်ထူးဘျ့ကတြ့ၣ်ထီၣ်အီၤ, ဒ်စီၤပၤၡလိၤမိၤမၤလိာ်တ့ၢ်ဝဲ, လၢကဘၣ်တၢ်သူ အီၤလၢယွၤအတၢ်လုၢ်ဟံၣ်အပူၤန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 4:22

နီၣ်တံာ်လၢကမၤကဆှီမ့ၣ်အူအဆၣ်တဖၣ်, သလၢတဖၣ်, ခွးလၢတၢ်နၢမူအဂီၢ်တဖၣ်, ဒီးသပၢၤဘံၣ်သလၣ်တဖၣ်လၢတၢ်ကစိာ် မ့ၣ်အူအ့ၣ်တဖၣ်န့ၣ်လီၤ. တၢ်တဖၣ်ခဲလၢာ်အံၤဘၣ်တၢ်မၤအီၤလၢထူစီန့ၣ်လီၤ. ယွၤအတၢ်လုၢ်ဟံၣ်အတြဲၤလၢတၢ်ချၢတဖၣ်ဒီးတြဲၤလၢတၢ်လဲၤနုာ် ဆူတၢ်လီၢ်စီဆှံကတၢၢ်တဖၣ်န့ၣ်, ဘၣ်တၢ်ကျးဘၢအီၤလၢထူန့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 4:8

အဝဲသ့ၣ်မၤစ့ၢ်ကီးစီၢ်နီၤခိၣ်ဆံဆဲၣ်ဖျၢၣ်ဒီးပာ်ဝဲလၢတၢ် လုၢ်ဟံၣ်အဒၢးမိၢ်ပှၢ်အပူၤ, ယဲၢ်ဖျၢၣ်လၢကလံၤထံးဒီးယဲၢ်ဖျၢၣ်လၢကလံၤစိးန့ၣ်လီၤ. အဝဲသ့ၣ်မၤစ့ၢ်ကီးသရာ်ထူအဖျၢၣ်တကယၤန့ၣ်လီၤ.

လံာ်တၢ်ဟးထီၣ်ကွံာ် 25:29

မၤန့ၢ်လီခီတဖၣ်, ထံခွးတဖၣ်, ကိတဖၣ်ဒီးသလၢတဖၣ်လၢတၢ်ကသူ အီၤလၢတၢ်လုၢ်မၤဘူၣ်စပံးထံအဂီၢ်တက့ၢ်. ကယဲၢ်တၢ်ကိးမံၤဒဲးအံၤကဘၣ်တၢ်မၤအီၤလၢထူစီန့ၣ်လီၤ.

လံာ်တၢ်ဟးထီၣ်ကွံာ် 25:38

မၤထီၣ်အနီၣ်တံာ်မ့ၣ်အူဒီးနီၣ်တံာ်အလီခီတဖၣ်လၢထူစီတက့ၢ်.

လံာ်တၢ်ဟးထီၣ်ကွံာ် 27:3

မၤန့ၢ်သပၢၤဘံၣ်တဖၣ်လၢတၢ်ကစိာ်ကွံာ်ဖၣ်ဆါလၢအဘၣ်အၢဒီးသိ တဖၣ်အဂီၢ်, ဒီးမၤန့ၢ်နီၣ်တရီာ်တဖၣ်, လီခီဖးဒိၣ်တဖၣ်နီၣ်ကွးတၢ်တဖၣ်ဒီးသပၢၤမ့ၣ်အူတဖၣ်တက့ၢ်. ကယဲၢ်တၢ်အပီးအလီတဖၣ်အံၤကဘၣ်တၢ်မၤအီၤလၢတိၢ်ဘီန့ၣ်လီၤ.

လံာ်တၢ်ဟးထီၣ်ကွံာ် 37:16

အဝဲမၤလီခီတဖၣ်လၢထူစီလၢစီၢ်နီၤခိၣ်အဂီၢ်, လီခီတဖၣ်, ထံခွးတဖၣ်, သလၢတဖၣ်ဒီးကိတဖၣ်လၢတၢ်ကသူအီၤလၢတၢ်လုၢ်ထီၣ်စပံးထံအဂီၢ်န့ၣ်လီၤ.

လံာ်တၢ်ဟးထီၣ်ကွံာ် 37:23

အဝဲမၤထီၣ်မ့ၣ်အူဒၢနွံဖျၢၣ်လၢတၢ်ပာ်မ့ၣ်အူအလီၢ်အဂီၢ်ဒီးအနီၣ်တံာ်မ့ၣ်အူ ဒီးနီၣ်တံာ်အလီခီတဖၣ်န့ၣ်မ့ၢ်ထူစီန့ၣ်လီၤ.

လံာ်တၢ်ဟးထီၣ်ကွံာ် 38:3

အဝဲမၤစ့ၢ်ကီးတၢ်လုၢ်လီၢ်အပီးအလီတဖၣ်ဒ်သပၢၤဘံၣ်တဖၣ်, နီၣ်တရီာ်တဖၣ်သလၢတဖၣ်, နီၣ်ကွးတဖၣ်ဒီးသပၢၤမ့ၣ်အူတဖၣ်လၢတိၢ်ဘီခဲလၢာ်လီၤ.

လံာ်တၢ်ဂံၢ် 4:14

အဝဲသ့ၣ်ကဘၣ်ပာ်ထီၣ်ကယဲၢ်တၢ်ပီးတၢ်လီလၢဘၣ်တၢ်သူ အီၤလၢတၢ်လုၢ်လီၢ်အတၢ်ဖံးတၢ်မၤအပူၤလၢအမ့ၢ်, မ့ၣ်အူအသပၢၤဘံၣ်တဖၣ်, နီၣ်ကွးတဖၣ်, နီၣ်တရီာ်တဖၣ်, ဒီးသရာ်တဖၣ်န့ၣ်လီၤ. ဝံၤဒီးကဘၣ်ကျၢၢ်ဘၢအီၤလၢတၢ်ဖံးအဂ့ၤ ကတၢၢ်တခီဒီးဂိာ်နုာ်နီၣ်ယိးဘိတဖၣ်န့ၣ်လီၤ.

လံာ်တၢ်ဂံၢ် 4:7

အဝဲသ့ၣ်ကဘၣ်သလၣ်လီၤတၢ်ကံးယာ်အလွဲၢ်လါအဲးတခီလၢ တၢ်လုၢ်ထီၣ်ကိၣ်ဆူယွၤအအိၣ်အစီၢ်နီၤခိၣ်အလိၤဒီးလၢ အဖီခိၣ်န့ၣ်ပာ်ထီၣ်လီခီတဖၣ်, တၢ်နၢမူအသလၢတဖၣ်, တၢ်လုၢ်အသလၢတဖၣ်ဒီးကိတဖၣ်လၢတၢ်ဒၢနုာ် တၢ်လုၢ်စပံးထံန့ၣ်လီၤ. ကိၣ်ကဘၣ်အိၣ်လၢစီၢ်နီၤခိၣ်အဖီခိၣ်တဘိယူၢ်ဃီန့ၣ်လီၤ.