လံာ်ယံးရမံယၤ 5:1 - Sgaw Karen Common Bible

¹ ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, ဃ့ၢ်ဝ့ၤဝီၤလၢသုကျဲတဖၣ် အပူၤတက့ၢ်. ကွၢ်တၢ်ဝးတရံးဒီးကွၢ်တၢ်လၢသုကစၢ် ဒၣ်သုဝဲတက့ၢ်. ကွၢ်ဃုတၢ်ဆါတၢ်ပှ့ၤအလီၢ်တဖၣ်တက့ၢ်. ပှၤလၢအမၤတၢ်အဘၣ် ဒီးကျဲးစၢးသးတီဒီးကစၢ်ယွၤန့ၣ်, မ့ၢ်သုထံၣ်န့ၢ်သ့ တဂၤဂၤဧါ. သုထံၣ်န့ၢ်မ့ၢ်သ့ဒီးယွၤကပျၢ်ဝ့ၢ်ယရူၤၡလ့ၣ်န့ၣ်လီၤ.

လံာ်ယံးရမံယၤ 5:1 Iomraidhean Croise

လံာ်စီၤပၤအခီၣ်ထံးတဘ့ၣ် 19:10

အဝဲစံးဆၢဝဲ, “ယွၤ, သ့တၢ်လၢာ်ကစၢ်ယွၤဧၢ, ထီဘိယမၤတ့ၢ်နတၢ်မၤဒီးမၤဒၣ်ထဲတဂၤဧိၤအတၢ်မၤန့ၣ်လီၤ. မ့မ့ၢ်ကီၢ်အံၣ်စရ့လးအပှၤဂီၢ်မုၢ်မၤဟးဂီၤကွံာ်အတၢ်အၢၣ်လီၤ ဒီးနၤ, မၤလီၤပှီၢ်ကွံာ်နတၢ်လုၢ်လီၢ်တဖၣ်ဒီးမၤသံကွံာ်လံနဝံခဲလၢာ် န့ၣ်လီၤ. ယမ့ၢ်ပှၤထဲတဂၤဧိၤလၢအအိၣ်လီၤတဲာ်, ဒီးအဝဲသ့ၣ်ကျဲးစၢးမၤ သံယၤန့ၣ်လီၤ.”

လံာ်ကွဲးနီၣ်တၢ်ခံဘ့ၣ်တဘ့ၣ် 16:9

ယွၤကွၢ်ထံကွၢ်ဆးတၢ်လၢဟီၣ်ခိၣ်ဒီဘ့ၣ်ညါအဖီခိၣ်, ဒ်သိးအကဟ့ၣ်ဂံၢ်ဟ့ၣ်ဘါပှၤတဖၣ်လၢအအိၣ်ဒီးတၢ်သးတီဒီးအီၤ န့ၣ်လီၤ. နမၤတ့ၢ်လံတၢ်ဒ်ပှၤအမၢးတဂၤဒီးစးထီၣ်ခဲအံၤန့ၣ်နကဘၣ်ဒုး တၢ်ယၤတၢ်ထီဘိန့ၣ်လီၤ.”

စံးထီၣ်ပတြၢၤ 12:1

ယွၤဧၢ, မၤစၢၤပှၤတက့ၢ်, ပှၤအဲၣ်ယွၤပျံၤယွၤတအိၣ်နီတဂၤလၢၤဘၣ်. ပှၤအကလုၢ်တီတဘၣ်တၢ်ထံၣ်န့ၢ်အီၤလၢ ပှၤဟီၣ်ခိၣ်ဖိအကျါလၢၤဘၣ်.

စံးထီၣ်ပတြၢၤ 14:2

ယွၤကွၢ်လီၤပှၤကညီလၢမူခိၣ် ဒ်သိး ကထံၣ်ဝဲပှၤကူၣ်သ့ကူၣ်ဘၣ်, ပှၤလၢအဘူၣ်ထီၣ်ဘါထီၣ်အီၤ မ့ၢ်အအိၣ်တအိၣ်လဲၣ်အဂီၢ်န့ၣ်လီၤ.

စံးထီၣ်ပတြၢၤ 14:3

ဘၣ်ဆၣ်အဝဲသ့ၣ်လဲၤကမၣ်တ့ၢ်လံခဲလၢာ်လံ. အဝဲသ့ၣ်ခဲလၢာ်ဟးဂီၤဝဲဒ်သိးသိးလီၤ. ပှၤလၢအမၤတၢ်အဂ့ၤအဘၣ်တအိၣ်နီတဂၤဘၣ်. ထဲတဂၤဧိၤဒၣ်လဲာ်တအိၣ်ဘၣ်.

စံးထီၣ်ပတြၢၤ 94:16

မ့ၢ်မတၤကဆၢထၢၣ်လၢယဂီၢ်ထီဒါ ပှၤတတီတလိၤန့ၣ်လဲၣ်. မ့ၢ်မတၤကမၤစၢၤယၤ ထီဒါပှၤမၤတၢ်အၢတဖၣ်န့ၣ်လဲၣ်

တၢ်ကတိၤဒိ. 20:6

ပှၤကိးဂၤကတိၤတၢ်ဘၣ်ဃးအဝဲမ့ၢ်ပှၤအသးတီဒီးတၢ်နာ်န့ၢ်အီၤ သ့ထဲလဲၣ်ထဲလဲၣ်အဂ့ၢ်လီၤ. ဘၣ်ဆၣ်ကျဲးစၢးဃုကွၢ်ဒၣ်ကလိာ်ပှၤတဂၤဂၤလၢအမ့ၢ်တၢ်ဒ်အစံးဝဲ အံၤအသိးန့ၣ်တက့ၢ်.

တၢ်ကတိၤဒိ. 23:23

တၢ်မ့ၢ်တၢ်တီ, တၢ်ကူၣ်သ့, တၢ်မၤလိမၤဒိး, တၢ်သ့ၣ်ညါတၢ်ဂ့ၤ, တၢ်သ့ၣ်တဖၣ်အံၤကၢကီၣ်ဝဲလၢတၢ်ကဟ့ၣ် အပှ့ၤလၢတၢ်မၤန့ၢ်အီၤအဂီၢ်လီၤ. ဘၣ်ဆၣ်လုၢ်ဒိၣ်ပှ့ၤဒိၣ်ကဲၣ်ဆိးလၢနကဆါကွံာ်အီၤန့ၣ်လီၤ.

တၢ်ကတိၤဒိ. 8:3

ဖဲတၢ်လဲၤနုာ်ဃီၤဆူဝ့ၢ်ပူၤ တြဲၤဖးဒိၣ်တဖၣ်အကပၤန့ၣ်, အဝဲကိးထီၣ်ဝဲ,

လံာ်တၢ်သးဝံၣ်တဖၣ်အတၢ်သးဝံၣ် 3:2

ယဟးတရံးဝ့ၤဝီၤလၢဝ့ၢ်ပူၤ, ဆူကျဲဘိတဖၣ်ဒီးကျဲကဆူးတဖၣ်, ဒီးဃုပှၤလၢယအဲၣ်တဂၤန့ၣ်လီၤ. ယကွၢ်ဃုပှၤလၢယအဲၣ်အီၤတဂၤ, ဘၣ်ဆၣ်ယတထံၣ်န့ၢ်အီၤဘၣ်.

လံာ်ယၡါယၤ 59:4

သုလဲၤဆူကွီၢ်ဘျီၣ်, ဘၣ်ဆၣ်ဒီးသုတမၤန့ၢ်တၢ်စံၣ်ညီၣ် တီလၢသုအိၣ်တခီဘၣ်. သုသန့ၤထီၣ်သုသးလၢတၢ်လီ တၢ်ဝ့ၤတဖၣ်လၢသုကွီၢ်ကနၢၤအဂီၢ်လီၤ. သုမၤထွဲသုတၢ်ကူၣ်ကျဲၤတဖၣ်လၢကမၤဘၣ်ဒိဘၣ်ထံးပှၤဂၤ တဖၣ်အဂီၢ်န့ၣ်လီၤ.

လံာ်ယံးရမံယၤ 2:29

နတၢ်ကဒူးကဒ့ၣ်မ့ၢ်တၢ်မနုၤလဲၣ်. ဘၣ်မနုၤအဃိနပူထီၣ်တ့ၢ်တၢ် ထီဒါယၤန့ၣ်လဲၣ်.

လံာ်ယံးရမံယၤ 44:15

အန့ၣ်ဝံၤဒီး, ပှၤပိာ်ခွါခဲလၢာ်လၢ အသ့ၣ်ညါတ့ၢ်ဝဲ လၢအမါတဖၣ် လုၢ်ထီၣ်တၢ်လုၢ်တၢ်ပာ်တဖၣ် ဆူကစၢ်အဂၤတဖၣ်, ဒီးပိာ်မုၣ်ခဲလၢာ်လၢ အဆၢ ထၢၣ်ဖဲန့ၣ် ဃုာ်ဒီးပှၤအံၣ်စရ့လးဖိတဖၣ်လၢအအိၣ် အဆိးလၢကီၢ်အဲၤကူပတူးအကလံၤထံး, ပှၤဂီၢ်မုၢ်ဖးဒိၣ် တဖုန့ၣ်စံးဘၣ်ယၤ,

လံာ်ယံးရမံယၤ 8:6

ယဒိကနၣ်တၢ်လီၤတံၢ်လီၤဆဲး, ဘၣ်ဆၣ်ဒီးသုတကတိၤတၢ်မ့ၢ်တၢ်တီဘၣ်. သုတသးအုးလၢသုတၢ်အၢတၢ်သီအဃိနီတဂၤဘၣ်. သုတသံကွၢ်တ့ၢ်နီတဂၤလၢ ‘မ့ၢ်ယမၤကမၣ်တၢ်မနုၤလဲၣ်’ န့ၣ်ဘၣ်. ပှၤကိးဂၤဒဲးလဲၤဒၣ်လၢအကျဲဒၣ်ဝဲ, ဒ်ကသ့ၣ် တဒုဃ့ၢ်သဖှိဃီၤဆူတၢ်ဒုးအပူၤအသိးန့ၣ်လီၤ.

လံာ်ယံးရမံယၤ 9:2

ယသးအိၣ်မးလၢယကအိၣ်ဒီးတၢ်လီၢ်တတီၤလၢမဲးမုၢ်ခိၣ်ဖဲ ယအိၣ်ယံၤကွံာ်ဒီးယပှၤဂီၢ်မုၢ်ကသ့ဝဲလီၤ. အဝဲသ့ၣ်ခဲလၢာ်တသူၣ်တီသးရၤဘၣ်. ဒီးမ့ၢ်ပှၤပူထီၣ်လီထီၣ်တၢ်တဖုန့ၣ်လီၤ.

လံာ်ယံးရမံယၤ 9:7

လၢတၢ်အံၤအဃိယွၤသ့တၢ်လၢာ်စံးဝဲဒၣ်, “ယကပှံၢ်ယပှၤဂီၢ်မုၢ်ဒ်တိၢ်စ့ထးအသိး, ဒီးမၤကွၢ်အဝဲသ့ၣ်န့ၣ်လီၤ. ယပှၤဂီၢ်မုၢ်မၤတ့ၢ်တၢ်အၢတၢ်သီလံ. ယသူအဝဲသ့ၣ်လၢတၢ်အဂုၤအဂၤအဂီၢ်ကသ့ဒ်လဲၣ်.

လံာ်ယဃ့းစက့လး 22:30

ယဃုထံၣ်ပှၤတဂၤလၢကသ့ဘှီထီၣ်တၢ်ဒူၣ်တခါ, ပှၤတဂၤလၢကသ့ဆၢထၢၣ်ဖဲတၢ်လီၢ်တဖၣ်လၢတၢ်အဒူၣ်တဖၣ်လီၤပှီၢ် တ့ၢ်န့ၣ်, ဒီးဒီဒၣ်ကီၢ်ဖဲယတၢ်သးထီၣ်ကမၤဟးဂီၤအီၤအခါန့ၣ်လီၤ. ဘၣ်ဆၣ်ယတထံၣ်န့ၢ်ပှၤနီတဂၤဘၣ်.

လံာ်ယဃ့းစက့လး 9:9

ကစၢ်ယွၤစံးဆၢတၢ်ဒီးစံးဝဲ, “ကီၢ်အံၣ်စရ့လးဒီးကီၢ်ယူဒၤ အပှၤဂီၢ်မုၢ်တဖၣ်မၤတၢ်ဒဲးဘးတဖၣ်လၢအလီၤပျံၤလီၤဖုးန့ၣ်လီၤ. အဝဲသ့ၣ်မၤသံတ့ၢ်တၢ်လၢထံကီၢ်ဒီဘ့ၣ်ညါဒီးမၤပှဲၤဝ့ၢ် ယရူၤၡလ့ၣ်ဒီးတၢ်မၤကမၣ်တၢ်သိၣ်တၢ်သီန့ၣ်လီၤ. အဝဲသ့ၣ်စံးဝဲလၢယၤ, ယွၤအံၤ, ပာ်လီၤတဲာ်ကွံာ်အဝဲသ့ၣ်အထံ အကီၢ်ဒီးလၢယတထံၣ်အဝဲသ့ၣ်ဘၣ်န့ၣ်လီၤ.

လံာ်ဒၤနံးယ့လး 12:4

မ့မ့ၢ်နဲဒၣ်အံၤစီၤဒၤနံးယ့လးဧၢ, ကးတံၢ်လံာ်န့ၣ်ဒီးပာ် တၢ်စဲပနီၣ်လၢအလိၤတုၤလၢတၢ်အကတၢၢ်မၤအသးန့ၣ်တက့ၢ်. ပှၤအါဂၤကလဲၤဆူအံၤဆူနုၤဒ်သိးဒီးအတၢ်သ့ၣ်ညါကအါ ထီၣ်န့ၣ်လီၤ.”

လံာ်ယိၤအ့လး 2:9

အဝဲသ့ၣ်ဃ့ၢ်သဖှိဃီၤဆူဝ့ၢ်, ဃ့ၢ်လၢဝ့ၢ်ခိၣ်ဒူတဖၣ်အလိၤ, လဲၤနုာ်ဆူဟံၣ်တဖၣ်အပူၤ ဒီးလဲၤနုာ်ခီဖျိပဲတြီဖိတဖၣ်ဒ်တၢ်ဘျၣ်တဖၣ်အသိးလီၤ.

လံာ်ဧၤမိၣ် 8:12

ဒီးပှၤဂီၢ်မုၢ်ကဟးဝ့ၤဝီၤလၢပီၣ်လဲၣ်တပူၤဆူပီၣ်လဲၣ်တပူၤဒၣ်, ဒီးဃ့ၢ်ဝ့ၤဝီၤတၢ်လၢကလံၤစိးတခီဆူမုၢ်ထီၣ်တခီဒ်သိး အကဃုထံၣ်န့ၢ်တၢ်ကစီၣ်တမံၤဟဲလၢယွၤန့ၣ်လီၤ. ဘၣ်ဆၣ်ဒီးတထံၣ်န့ၢ်ဝဲဘၣ်.

လံာ်စကၤရယၤ 2:4

ကလူးအခီၣ်ထံးတဂၤတဲဘၣ်အဂၤတဂၤ, “ဃ့ၢ်ဒီးလဲၤတဲဘၣ်ပှၤသးစၢ်လၢအအိၣ်ဒီးနီၣ်ထိၣ်ပျံၤန့ၣ် လၢပှၤဂီၢ်မုၢ်ဒီးဆၣ်ဖိကီၢ်ဖိကအိၣ်ဝဲဒၣ်လၢဝ့ၢ်ယရူၤၡလ့ၣ် အပူၤဂီၢ်မုၢ်ဂီၢ်ပၤတုၤဒၣ်လဲာ်ဝ့ၢ်န့ၣ်ကဒိၣ်ကဲာ်ဆိးလၢ ကအိၣ်ဒီးအခိၣ်ဒူတဖၣ်လီၤ.

လံာ်လူၤကၣ် 14:21

တၢ်ခ့တၢ်ပှၤက့ၤကဒါက့ၤဒီးစံးဘၣ်တဲဘၣ်အကစၢ် လၢတၢ်သ့ၣ်တဖၣ်အံၤခဲလၢာ်လီၤ. ဟံၣ်ကစၢ်အသူၣ်ဒိၣ်သးဖျိးဒီးစံးဘၣ်အတၢ်ခ့တၢ်ပှၤ, ‘ဟးထီၣ်ချ့ချ့ဆူဝ့ၢ်အကျဲမုၢ်ခိၣ်ဒီးကျဲဖိတဖၣ် ဒီးဟဲက့ၤကိးပှၤဖှီၣ်ဖိယာ်ဖိ, ပှၤက့ပှၤကွဲၣ်, ပှၤမဲာ်ဘျီၣ်, ဒီးပှၤခီၣ်ဟးဂီၤတဖၣ်န့ၣ်တက့ၢ်.’

၂ သ့းစၤလနံ 2:10

ဒီးကသူဝဲတၢ်အၢတၢ်သီအတၢ်လီန့ၢ်တၢ်လၢကျဲကိးဘိဒဲး ဒီးလီန့ၢ်ပှၤလၢအကတုၤဆူတၢ်ဟးဂီၤအပူၤခဲလၢာ်လီၤ. အဂ့ၢ်မ့ၢ်လၢ, အဝဲသ့ၣ်တသးခုတူၢ်လိာ်, ဒီးတပာ်လုၢ်ပာ်ပှ့ၤတၢ်မ့ၢ်တၢ်တီဒ်သိးကဘၣ်တၢ်အုၣ်က့ၤ ခီၣ်က့ၤအီၤအဂီၢ်ဘၣ်အဃိန့ၣ်လီၤ.