လံာ်ယံးရမံယၤ 46:2 - Sgaw Karen Common Bible

² စးထီၣ်ဝဲဒီး ကီၢ်အဲၤကူပတူးအဂ့ၢ်န့ၣ်လီၤ. တၢ်အံၤမ့ၢ် တၢ်လၢအဝဲစံးဝဲဘၣ်ဃးဒီးကီၢ်အဲၤကူပတူးအစီၤပၤ နကိၤအသုးမုၢ်လၢ ကီၢ်ဘၤဘူၤလိၣ် အစီၤပၤနဘူၤကးန့စၢ် မၤနၢၤမၤဃၣ်အီၤဖဲ ဝ့ၢ်ကၢ်ကမံၣ်ဘူးဒီး ထံကျိဖရၤသး, ဖဲကီၢ်ယူဒၤအစီၤပၤ ယဟိၤယါကံၣ်ပၢတၢ်လွံၢ်နံၣ်တနံၣ် အပူၤန့ၣ်လီၤ.

လံာ်ယံးရမံယၤ 46:2 Iomraidhean Croise

လံာ်စီၤပၤခံဘ့ၣ်တဘ့ၣ် 18:21

သုမုၢ်လၢ်ကီၢ်အဲၤကူပတူးလၢကမၤစၢၤသု, ဘၣ်ဆၣ်တၢ်န့ၣ်ကမၤ အသးဒ်တၢ်သူတပိၢ်တဘိလၢနီၣ်ထိးဘိတဘိအဂီၢ်အသိး, တၢ်န့ၣ်ကကၢ်ကွံာ်ဒီးဆဲးဘၣ်က့ၤသုစုန့ၣ်လီၤ. ကီၢ်အဲၤကူပတူးအစီၤပၤလီၤဂာ်ဒ်န့ၣ်ဖဲပှၤတဂၤလၢ်လၢ်သန့ၤ အသးလၢအီၤအခါန့ၣ်လီၤ.

လံာ်စီၤပၤခံဘ့ၣ်တဘ့ၣ် 23:29

ဖဲစီၤယိၤၡံယၤမ့ၢ်စီၤပၤအခါန့ၣ်, ကီၢ်အဲၤကူပတူးအစီၤပၤ နကိၤဆှၢဃီၤသုးမုၢ်တဖုဆူထံကျိဖရၤသးလၢကမၤစၢၤကီၢ်အၤ ၡူၢ်အစီၤပၤအဂီၢ်န့ၣ်လီၤ. စီၤယိၤၡံယၤဂုာ်ကျဲးစၢးတြီပှၤအဲၤကူပတူးဖိအသုးမုၢ်ဖဲ ဝ့ၢ်မကံးဒိၤဒီးဘၣ်တၢ်မၤသံကွံာ်အီၤလၢတၢ်ဒုးအပူၤန့ၣ်လီၤ.

လံာ်စီၤပၤခံဘ့ၣ်တဘ့ၣ် 23:33

အဝဲအတၢ်ပၢကတၢၢ်ကွံာ်ဝဲဒၣ်, ဖဲကီၢ်အဲၤကူပတူးအစီၤပၤနကိၤ က့ၤကိးအီၤဆူဝ့ၢ်ရံးဘလၤလၢကီၢ်ဃမါသး, ဒ်ပှၤဘၣ်တၢ်စၢဃာ် တဂၤအသိးအခါ, ဒီးမၢကီၢ်ယူဒၤဟ့ၣ်စ့လီၤတယၢၢ်အကံကၢ် တကယၤဒီးထူလီၤတယၢၢ်တကံကၢ်ဒ်တၢ်ခိတၢ်သွဲအသိးန့ၣ်လီၤ.

လံာ်စီၤပၤခံဘ့ၣ်တဘ့ၣ် 24:7

ကီၢ်အဲၤကူပတူးအစီၤပၤဒီးအဝဲအသုးမုၢ်တဟးထီၣ်ကဒီးလၢၤလၢ ကီၢ်အဲၤကူပတူးအပူၤနီတစုလၢၤဘၣ်. မ့ၢ်လၢခဲအံၤကီၢ်ဘၤဘူၤလိၣ်အစီၤပၤပၢကယဲၢ်လီၢ်ကဝီၤလၢအဘၣ် ဃးဒီးကီၢ်အဲၤကူပတူး, စးထီၣ်လၢထံကျိဖရၤသး, တုၤလီၤလၢကီၢ်အဲၤကူပတူးအကလံၤစိးကီၢ်ဆၢဒၣ်လဲာ်အ ဃိန့ၣ်လီၤ.

လံာ်ယၡါယၤ 10:9

ယမၤန့ၢ်မၤနၢၤဝ့ၢ်ကးလနိၤဒီးဝ့ၢ်ကၢ်ကမံၣ်တဖၣ်, ဝ့ၢ်ဃမါသးဒီးဝ့ၢ်အၢ်ပးတဖၣ်လီၤ. ယမၤန့ၢ်မၤနၢၤဝ့ၢ်ၡၤမရံ ဒီးဝ့ၢ်ဒၤမ့ၤစ့းလီၤ.

လံာ်ယၡါယၤ 19:1

အအံၤမ့ၢ်တၢ်ကစီၣ်ဘၣ်ဃးကီၢ်အဲၤကူပတူးအဂ့ၢ်န့ၣ်လီၤ. ယွၤဟဲဆူကီၢ်အဲၤကူပတူး, ဒိးတၢ်ချ့မးလၢတၢ်အၢၣ်တလိၣ် အလိၤလီၤ. ကီၢ်အဲၤကူပတူးအတၢ်ဂီၤတၢ်ဖီၣ်တဖၣ်ကနိး ကစုာ်လၢအမဲာ်ညါ, ဒီးပှၤအဲၤကူပတူးဖိတဖၣ် အသးပှံၢ်လီၤဝဲဒၣ်လီၤ.

လံာ်ယၡါယၤ 19:19

တုၤတၢ်ဆၢကတီၢ်န့ၣ်ဟဲဝဲဒီး, ကီၢ်အဲၤကူပတူးကအိၣ်ဒီးတၢ်လုၢ်လီၢ်လၢယွၤအဂီၢ်ဒီးလၢၢ် ထူၣ်တထူၣ်ကဘၣ်တၢ်ပာ်စီဆှံအီၤလၢယွၤအဂီၢ်ဖဲကီၢ်အဲၤကူပ တူးအဆၢန့ၣ်လီၤ.

လံာ်ယံးရမံယၤ 25:1

ဖဲစီၤယိၤၡံယၤအဖိခွါ ကီၢ်ယူဒၤအစီၤပၤ စီၤယဟိၤယါကံၣ်ပၢတၢ် လွံၢ်နံၣ်တနံၣ်အပူၤန့ၣ်, ယဒိးန့ၢ်ဘၣ် တ့ၢ်တၢ်ကစီၣ်တမံၤလၢယွၤ အအိၣ်ဘၣ်ဃးဒီး ကီၢ်ယူဒၤအပှၤဂီၢ်မုၢ်ခဲလၢာ်န့ၣ်လီၤ. (အဝဲအံၤမ့ၢ်နံၣ်အခီၣ်ထံး တနံၣ်ဖဲ စီၤနဘူၤကးန့ စၢ်မ့ၢ်တ့ၢ်စီၤပၤလၢကီၢ်ဘၤဘူၤလိၣ် န့ၣ်လီၤ.)

လံာ်ယံးရမံယၤ 25:19

အအံၤမ့ၢ် ပှၤအဂၤတဖၣ်လၢ အမံၤအိၣ်ကွဲးလီၤ အသးလၢကဘၣ်အီစ့ၢ်ကီးလီခီအံၤန့ၣ်လီၤ.

လံာ်ယံးရမံယၤ 25:9

“ယကမၤလိာ်ကယဲၢ်ပှၤဂီၢ်မုၢ်လၢ ကလံၤစိးတခီ, ဒီးယခ့ယပှၤ ကီၢ် ဘၤဘူၤလိၣ်အစီၤပၤနဘူၤကးန့စၢ်န့ၣ်လီၤ. ယကမၢအဝဲသ့ၣ် ဟဲထီၣ်ဒီးဒုးတၢ်ထီဒါကီၢ်ယူဒၤဒီး ပှၤအိၣ်ဆိးလၢအပူၤတဖၣ်, ဒီးထီဒါစ့ၢ်ကီးပှၤကလုာ်ခဲလၢာ်လၢ အအိၣ်ဘူးအိၣ်တံၢ်ဒီးအီၤန့ၣ်လီၤ. ယကမၤဟးဂီၤကွံာ်ပှၤတကလုာ်အံၤဒီး ပှၤအိၣ်လၢ အဃၢၤတဖၣ် ဒီးပာ်တ့ၢ်အဝဲသ့ၣ်လၢတၢ်ဟးဂီၤအပူၤအစိၤစိၤ အဃၣ်ဃၣ်, ဒီးကကဲထီၣ်တၢ်ထံၣ်ဘၣ်တမံၤဘၣ်တမံၤလၢ အလီၤပျံၤလီၤဖုးဒီး လီၤကမၢကမၣ်န့ၣ်လီၤ. ယၤ, ယွၤအံၤ, ကတိၤလံတၢ်လံ.

လံာ်ယံးရမံယၤ 36:1

လၢစီၤယိၤၡံယၤအဖိခွါ စီၤယဟိၤယါကံၣ်ကဲစီၤပၤလၢ ကီၢ်ယူဒၤ လွံၢ်နံၣ်တနံၣ်အပူၤန့ၣ်, ယွၤစံးဘၣ်တ့ၢ်ယၤ,

လံာ်ယံးရမံယၤ 43:11

စီၤနဘူၤကးန့ စၢ်ကဟဲဒီး မၤနၢၤကီၢ်အဲၤကူပတူးန့ၣ်လီၤ. ပှၤဂီၢ်မုၢ်တဖၣ်လၢ ကဘၣ်တၢ်စံၣ်ညီၣ်ဃါ မနၤလၢ ကဘၣ်သံလၢ တၢ်ဆူးတၢ်ဆါအဃိန့ၣ် ကသံလၢ တၢ်ဆူးတၢ်ဆါ, ပှၤတဖၣ်လၢ ကဘၣ်တၢ်စံၣ်ညီၣ်ဃါ မနၤလၢ တၢ်စိာ်မၢကဲကုၢ်ကဘၣ် တၢ်စိာ်မၢကဲကုၢ်ကွံာ်အီၤ, ဒီး ပှၤတဖၣ်လၢ ကဘၣ်တၢ်စံၣ်ညီၣ်ဃါမနၤလၢ ကဘၣ်သံ လၢ တၢ်ဒုးအပူၤန့ၣ်, ကဘၣ်တၢ်မၤသံအီၤလၢ တၢ်ဒုးအပူၤန့ၣ်လီၤ.

လံာ်ယံးရမံယၤ 45:1

လၢစီၤယိၤၡံယၤ အဖိခွါ ကီၢ်ယူဒၤအစီၤပၤစီၤယဟိၤယါ ကံၣ်ပၢတၢ်လွံၢ်နံၣ်တနံၣ်အပူၤန့ၣ်, စီၤဘၤရူးကွဲးလီၤတၢ် လၢယကိးထီၣ်န့ၢ်အီၤန့ၣ်လီၤ.

လံာ်ယံးရမံယၤ 46:14

“တဲဖျါထီၣ်တၢ်အံၤ လၢကီၢ်အဲၤကူပတူးအဝ့ၢ်တဖၣ်လၢ အမ့ၢ်မံးကဒိးလး, မဲဖံး, ဒီးဝ့ၢ်တၤပါန့ၤအပူၤတက့ၢ်. ကတဲာ်ကတီၤထီၣ်သုသးလၢ နကဒီဒၣ်လီၤသုသးအဂီၢ်တက့ၢ်. တၢ်လၢအအိၣ်ဒီး သုခဲလၢာ်န့ၣ် ကဘၣ်တၢ်မၤဟးဂီၤကွံာ်အီၤလၢ တၢ်ဒုးတၢ်ယၤအပူၤန့ၣ်လီၤ.