လံာ်ယံးရမံယၤ 2:20 - Sgaw Karen Common Bible

²⁰ ယွၤပၢဘၣ်တၢ်ခဲလၢာ်ကစၢ်စံးဝဲ, “ကီၢ်အံၣ်စရ့လးဧၢ, နညိကွံာ်တ့ၢ်, ယတၢ်စိတၢ်ကမီၤလၢပျၢၤလံၤလံၤလီၤ. နဂ့ၢ်လိာ် လၢနကစူၢ်ယၤဒီးဘူၣ်ထီၣ်ဘါထီၣ်ယၤလီၤ. လၢတၢ်လူၢ်လၢ အထီကိးလူၢ်ဒဲးအလိၤဒီးလၢသ့ၣ်လၢအလါဟ့ကိးထူၣ်ဒဲးအဖီလာ် န့ၣ်, နဘူၣ်ထီၣ်ဘါထီၣ်ပှၤတစူၢ်တနာ်ယွၤ အကစၢ်တဖၣ်ဒီးမၤပှၤဃဲသဲမုၣ်အတၢ်မၤဖဲန့ၣ်လီၤ.

လံာ်ယံးရမံယၤ 2:20 Iomraidhean Croise

လံာ်စီၤပၤအခီၣ်ထံးတဘ့ၣ် 12:32

စီၤယၤရၤဘၣ်ဒုးအိၣ်ထီၣ်စ့ၢ်ကီးတၢ်ဘူၣ်တၢ်ဘါအမူးတမူးလၢ လါဃိးလါတလါထီၣ်တဆံယဲၢ်သီတသီအနံၤ, ဒ်မူးလၢကီၢ်ယူဒၤအပူၤအသိးန့ၣ်လီၤ. လၢတၢ်လုၢ်လီၢ်လၢဝ့ၢ်ဘ့ၤသ့လးအဖီခိၣ်န့ၣ်, အဝဲလုၢ်ထီၣ်တၢ်လုၢ်တၢ်ပာ်တဖၣ်ဆူဂီၤဖံးဖါထူတဖၣ်လၢ အဝဲမၤထီၣ်တ့ၢ်ဝဲ, ဒီးဖဲန့ၣ်, လၢဝ့ၢ်ဘ့ၤသ့လးအပူၤန့ၣ်, အဝဲဃုထၢထီၣ်ပှၤလုၢ်တၢ်အခိၣ်တဖၣ်လၢကမၤ တၢ်ဖဲတၢ်ဘူၣ်ထီၣ်ဘါထီၣ်အလီၢ်လၢအဝဲဘှီထီၣ်ဝဲန့ၣ်လီၤ.

လံာ်စီၤပၤအခီၣ်ထံးတဘ့ၣ် 14:23

အဝဲသ့ၣ်ဘှီထီၣ်တၢ်ဘူၣ်ထီၣ်ဘါထီၣ်အလီၢ်တဖၣ်လၢယွၤကဘျံးကဘျၣ် တဖၣ်အဂီၢ်ဒီးပာ်ထီၣ်လၢၢ်ထူၣ်တဖၣ်, ကစၢ်မုၣ်အၡ့ရၤအပနီၣ်လၢကဘူၣ်ထီၣ်ဘါထီၣ်ဝဲလၢကစၢၢ်ကလိအလိၤ မ့ၢ်ဂ့ၤ, သ့ၣ်အကဒုတဖၣ်အဖီလာ်မ့ၢ်ဂ့ၤန့ၣ်လီၤ.

စံးထီၣ်ပတြၢၤ 107:14

အဝဲဒၣ်စိာ်ထီၣ်ကွံာ်အဝဲသ့ၣ်လၢတၢ်ခံးတၢ်နၤ ဒီးတၢ်သူၣ်အုးသးအုးအဒိၣ်အဃိာ်အပူၤ, ဒီးမၤတဲာ်ကွံာ် အဝဲသ့ၣ်အထးသွဲတဖၣ်န့ၣ်လီး.

စံးထီၣ်ပတြၢၤ 2:3

အဝဲသ့ၣ်စံးဝဲ, “မ်ပကမၤထူၣ်ဖျဲးသကိးပသးလၢ အတၢ်စၢဃာ်ပှၤ, ဒီးကွံာ်တ့ၢ်ကွံာ်အတၢ်စၢဃာ်တၢ်တက့ၢ်.”

စံးထီၣ်ပတြၢၤ 78:58

အဂ့ၢ်ဒ်အံၤ, အဝဲသ့ၣ်မၤသးထီၣ်ယွၤလၢပှၤတဘူၣ်ထီၣ်ဘါထီၣ် ယွၤအတၢ်လီၢ်ထီၣ်ထီ ယွၤအတၢ်ဘူၣ်တၢ်ဘါအလီၢ်တဖၣ်, ဒီးထိၣ်ဂဲၤအတၢ်သးဒိၣ်လၢ အတၢ်ဂီၤတၢ်ဖီၣ်တဖၣ်န့ၣ်လီၤ.

လံာ်တၢ်ဟးထီၣ်ကွံာ် 19:8

အန့ၣ်ဒီးပှၤဂီၢ်မုၢ်ခဲလၢာ်စံးဆၢသကိးဝဲ, “ပကမၤတၢ်ကိးမံၤလၢယွၤစံးဝဲလီၤ.” ဒီးစီၤမိၤၡ့ပာ် ဖျါထီၣ်က့ၤတၢ်ဂ့ၢ်အံၤဆူယွၤအအိၣ်လီၤ.

လံာ်တၢ်ဟးထီၣ်ကွံာ် 24:3

စီၤမိၤၡ့လဲၤတၢ်ဒီးတဲဘၣ်ပှၤဂီၢ်မုၢ်လၢကယဲၢ်တၢ်လၢယွၤမၤ လိာ်တ့ၢ်ဝဲတဖၣ်ဒီးကယဲၢ်လုၢ်လၢ်တၢ်စီဆှံတဖၣ်န့ၣ်လီၤ. ဒီးပှၤဂီၢ်မုၢ်ခဲလၢာ်စံးဆၢသကိးဝဲ, “ပကမၤကယဲၢ်တၢ်ကိးမံၤလၢယွၤစံးဘၣ်တဲဘၣ်တ့ၢ်ဝဲန့ၣ်လီၤ.”

လံာ်တၢ်ဟးထီၣ်ကွံာ် 3:8

ဒီးယဟဲလီၤဒ်သိးယကမၤပူၤမၤဖျဲးက့ၤအဝဲသ့ၣ်လၢပှၤအဲၤကူ ပတူးဖိအစုပူၤ, ဒီးထုးထီၣ်ကွံာ်အဝဲသ့ၣ်လၢကီၢ်အဲၤကူပတူး အပူၤဒီးဆှၢအဝဲသ့ၣ်ဆူကီၢ်တဘ့ၣ်လၢဟီၣ်ခိၣ်ညၣ်ထ့ၣ်ဂ့ၤဒီးလဲၢ်ဝဲ, ကီၢ်လၢတၢ်နုၢ်ထံဒီးကနဲစီယွၤလီၤဝဲ, ဒီးမ့ၢ်ကီၢ်တဘ့ၣ်ဖဲပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ, ပှၤပရးစၤဖိ, ပှၤဃံၤဝံဖိဒီးပှၤယဘူၣ်ဖိတဖၣ်အိၣ်ဝဲအလီၢ်န့ၣ်လီၤ.

လံာ်ယၡါယၤ 1:21

ဝ့ၢ်လၢတဘျီအကလုၢ်တီဝဲန့ၣ်, အိၣ်မူမၤဝဲဒ်ဃဲသဲမုၣ်တဂၤ အသိးလီၤ. တဘျီန့ၣ်, ပှဲၤဝဲဒီးပှၤတီပှၤလိၤတဖၣ်, ဘၣ်ဆၣ်ခဲအံၤအိၣ်တီၢ်ဒၣ်ထဲပှၤ မၤသံတၢ်တဖၣ်လီၤ.

လံာ်ယၡါယၤ 10:27

ဖဲတၢ်ဆၢကတီၢ်အဝဲန့ၣ်ဟဲတုၤဒီး, ယကမၤထူၣ်ဖျဲးထီၣ်နၤလၢ ကီၢ်အၤၡူၢ်အစိအကမီၤအဖီလာ်, ဒီးအဝဲသ့ၣ်အနီၣ်ယိးဘိ တမ့ၢ်တၢ်ဝံတၢ်ယိးလၢသုဖံဘၣ်ခိၣ်တဖၣ်အလိၤလၢၤဘၣ်.”

လံာ်ယၡါယၤ 14:25

ယကမၤဟးဂီၤပှၤအၤၡူၢ်ဖိတဖၣ်လၢယကီၢ်အံၣ်စရ့လးအပူၤ ဒီးယီၢ်တံၢ်အဝဲသ့ၣ်လၢယကစၢၢ်တဖၣ်အဒီခိၣ်န့ၣ်လီၤ. ယကမၤထူၣ်ဖျဲးယပှၤဂီၢ်မုၢ်လၢပှၤအၤၡူၢ်ဖိတဖၣ်အနီၣ်ယိးဘိ ဒီးလၢတၢ်ဝံတၢ်ယိးတဖၣ်လၢအဝဲသ့ၣ်ဘၣ်ဝံတ့ၢ်ယိးတ့ၢ်ဝဲန့ၣ်လီၤ.

လံာ်ယၡါယၤ 9:4

အဂ့ၢ်ဒ်အံၤ, နမၤကၢ်တ့ၢ်နီၣ်ယိးဘိလၢအမၤဃၢမၤစံာ်အီၤ ဒီးနီၣ်တီၢ်လၢအတီၢ်အဝဲသ့ၣ်အဖံဘၣ်ခိၣ် တဖၣ်န့ၣ်လီၤ. နမၤနၢၤကွံာ်ပှၤကလုာ်လၢအမၤအၢမၤ နးဒီးဃုအဘျုးလၢနပှၤဂီၢ်မုၢ်အဖီခိၣ်, ဒ်နမၤနၢၤကွံာ်ကီၢ်မံးဒယၣ်အသုးမုၢ်လၢပျၢၤ အသိးန့ၣ်လီၤ.

လံာ်ယံးရမံယၤ 13:27

အဝဲထံၣ်တ့ၢ်နမၤတၢ်တဖၣ်လၢအဝဲသးဟ့ဝဲန့ၣ်လီၤ. အဝဲထံၣ်တ့ၢ်နလူၤပိာ်ထွဲပှၤတစူၢ်တနာ်ယွၤ အကစၢ်တဖၣ်အခံလၢတၢ်လူၢ်ဒီခိၣ်တဖၣ်ဒီးလၢစံာ်ပျီပူၤတဖၣ်, ဒ်ပှၤတဂၤလၢအသးကတၢထီၣ်ထွဲပှၤလၢအဃၢၤအမါအခံအသိးမ့ၢ်ဂ့ၤ, ကသ့ၣ်ဖါတဒုလၢအလူၤထွဲကသ့ၣ်မိၢ်တဒုအခံအသိးမ့ၢ်ဂ့ၤန့ၣ်လီၤ. ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, သုဘၣ်တၢ်စံၣ်ညီၣ်ဃါမနၤလီၤ. မ့ၢ်သုကကဆှီထီၣ်အခါဖဲလဲၣ်.”

လံာ်ယံးရမံယၤ 17:2

သုပှၤဂီၢ်မုၢ်ဘူၣ်ထီၣ်ဘါထီၣ်တၢ်ဖဲတၢ်လုၢ်လီၢ်တဖၣ်ဒီးတၢ်ပနီၣ်တဖၣ် လၢအဘၣ်တၢ်ပာ်လီၤအီၤလၢကစၢ်မုၣ်အၡ့ရၤအဂီၢ်, လၢသ့ၣ်ထူၣ် သံကစဲာ်ကိးထူၣ်ဒဲးအကပၤ, လၢတၢ်လူၢ်တဖၣ်အဒီခိၣ်,

လံာ်ယံးရမံယၤ 2:31

ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဒိကနၣ်တၢ်လၢယစံးဘၣ် တဲဘၣ်သုတက့ၢ်. မ့ၢ်ယလီၤဂာ်ဒီးမဲးမုၢ်ခိၣ်တတီၤလၢသုဂီၢ်, လီၤဂာ်ဒီးကီၢ်တဘ့ၣ်လၢအခံးဒီးလီၤပျံၤန့ၣ်ဧါ. ဘၣ်မနုၤအဃိ သုစံးလၢသုကမၤဖဲဒၣ်သုသး, ဒီးတဟဲက့ၤကဒါက့ၤလၢၤဘၣ် ဆူယအိၣ်နီတစုဘၣ်န့ၣ်လဲၣ်.

လံာ်ယံးရမံယၤ 3:13

ထဲ, သ့ၣ်ညါအၢၣ်လီၤလၢနမၤကမၣ်ဘၣ်တၢ်ဒီးနပူထီၣ်တၢ်ထီဒါ ယွၤ, နကစၢ်ယွၤန့ၣ်တက့ၢ်. အၢၣ်လီၤနတၢ်ကမၣ်လၢနဟ့ၣ်တ့ၢ် နတၢ်အဲၣ်ဆူတခီဘီမုၢ်အကစၢ်တဖၣ်လၢသ့ၣ်လါဟ့ကိးထူၣ်ဒဲး အဖီလာ်, ဒီးလၢနတစူၢ်ယတၢ်မၤလိာ်တဖၣ်ဘၣ်န့ၣ်တက့ၢ်. ယၤ, ယွၤအံၤ, ကတိၤလံတၢ်လံ.

လံာ်ယံးရမံယၤ 30:8

ယွၤသ့တၢ်လၢာ်စံးဝဲဒၣ်, “ဖဲမုၢ်နံၤအဝဲန့ၣ်ဟဲဝဲဒီး, ယကမၤကၢ်ကွံာ်နီၣ်ယိးဘိလၢ အအိၣ်လၢ အဝဲ သ့ၣ်အကိာ်လိၤဒီး သုးကွံာ် အဝဲသ့ၣ်အထးသွဲတဖၣ် ဒီး အဝဲသ့ၣ်တကဲဘၣ်လၢၤပှၤတခီဘီမုၢ် ဖိတဖၣ် အကုၢ်တဖၣ်န့ၣ်ဘၣ်.

လံာ်ယံးရမံယၤ 5:5

ယကလဲၤဆူပှၤတဖၣ်လၢအအိၣ်စိအိၣ်ကမီၤအအိၣ် ဒီးကတိၤတၢ်ဒီးအဝဲသ့ၣ်လီၤ. သပှၢ်ကတၢၢ်, အဝဲသ့ၣ်, သ့ၣ်ညါအကစၢ်ယွၤလိၣ်ဘၣ်တၢ်မနုၤလဲၣ်, ဒီးယွၤသးအိၣ်လၢအဝဲသ့ၣ်ကမၤတၢ်မနုၤလဲၣ်န့ၣ်လီၤ.” ဘၣ်ဆၣ်ဒီး, အဝဲသ့ၣ်ခဲလၢာ်ညိကွံာ်ယွၤအတၢ်န့ၢ်စိန့ၢ်ကမီၤ ဒီးဂ့ၢ်လိာ်လၢကစူၢ်အီၤန့ၣ်လီၤ.

လံာ်ယဃ့းစက့လး 16:28

မ့ၢ်လၢပှၤဂၤတဖၣ်တမၤသးမံဒံးနၤဘၣ်အဃိ, နဃ့ၢ်လူၤပိာ်ထွဲ ပှၤအၤၡူၢ်ဖိတဖၣ်အခံန့ၣ်လီၤ. နမ့ၢ်တ့ၢ်အဝဲသ့ၣ်အပှၤဃဲသဲ မုၣ်, ဘၣ်ဆၣ်ဒီးအဝဲသ့ၣ်စ့ၢ်ကီးတမၤသးမံဒံးနၤဘၣ်.

လံာ်ယဃ့းစက့လး 16:31

လၢကျဲဘိကိးဘိဒဲးအလိၤန့ၣ်, နသူၣ်ထီၣ်ဘှီထီၣ်တၢ်လီၢ်တဖၣ် လၢတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်အဂီၢ်ဒီးမၤပှၤဃဲသဲ မုၣ်အတၢ်မၤန့ၣ်လီၤ. ဘၣ်ဆၣ်ဒီးတမ့ၢ်နဃုကျိၣ်ဃုစ့ဒ်ပှၤဃဲသဲမုၣ် ပတီၢ်မုၢ်တဂၤအသိးန့ၣ်ဘၣ်.

လံာ်ယဃ့းစက့လး 16:41

အဝဲသ့ၣ်ကဒွဲၣ်အူထီၣ်ကွံာ်နဟံၣ်တဖၣ်ဒီးပျဲပှၤပိာ်မုၣ်ဂီၢ် မုၢ်တဖုထံၣ်ဘၣ်တၢ်စံၣ်ညီၣ်နၤန့ၣ်လီၤ. ယကဒုးဆိကတီၢ်နၤလၢနတၢ်မ့ၢ်ပှၤဃဲသဲမုၣ်တဂၤ, ဒီးဆိကတီၢ်နၤလၢနတၢ်ဟ့ၣ်တဖၣ်ဆူပှၤလၢနအဲၣ်အီၤတဖၣ်န့ၣ်လီၤ.

လံာ်ယဃ့းစက့လး 20:28

ယဆှၢဃီၤအဝဲသ့ၣ်ဆူကီၢ်တဘ့ၣ်လၢယအၢၣ်လီၤတ့ၢ်တၢ်လၢ ယကဟ့ၣ်လီၤအဝဲသ့ၣ်န့ၣ်လီၤ. ဖဲအဝဲသ့ၣ်ထံၣ်ဘၣ်တၢ်လူၢ်အထီတဖၣ်ဒီးသ့ၣ်လါဟ့တဖၣ်န့ၣ်, အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ် ဖဲတၢ်လီၢ်ခဲလၢာ်န့ၣ်လီၤ. အဝဲသ့ၣ်မၤဒိၣ်ထီၣ်ယသးခီဖျိ တၢ်လုၢ်တၢ်ပာ်တဖၣ်လၢအဆိၣ်ကဲၤထီၣ်ဝဲဒီးစပံးထံတဖၣ်လၢအဟဲ စိာ်ဝဲဒ်တၢ်လုၢ်မၤဘူၣ်အသိးအဃိန့ၣ်လီၤ.

လံာ်ယဃ့းစက့လး 23:5

အဝဲမ့ၢ်ယတၢ်, နာ်သက့, နီၢ်အိၤဟိလၤမၤဒံးဒၣ်ပှၤဃဲသဲမုၣ် အတၢ်မၤဒီးပှဲၤဝဲဒီးတၢ်သးကတၢလၢအတၢ်အဲၣ်တဖၣ်အဂီၢ်, လၢကီၢ်အၤၡူၢ်န့ၣ်လီၤ.

လံာ်ဟိၤၡ့ 1:2

ဖဲယွၤကတိၤတၢ်အဆိကတၢၢ်ဒီးအံၣ်စရ့လးခီဖျိစီၤဟိၤၡ့န့ၣ်, အဝဲစံးဘၣ်စီၤဟိၤၡ့, “လဲၤဒီးဒိးတ့ဒိးဖျီနသးတက့ၢ်. နမါကမ့ၢ်ပှၤဃဲသဲမုၣ်တဂၤ, ဒီးနဖိတဖၣ်ကမ့ၢ်ဒ်သိးအီၤန့ၣ်လီၤ. ဒ်န့ၣ်အသိးယပှၤဂီၢ်မုၢ်ကပာ်တ့ၢ်ယၤဒီးကကဲထီၣ်ပှၤအကလုၢ်တတီဘၣ် န့ၣ်လီၤ.”

လံာ်ဟိၤၡ့ 2:5

အဝဲအနီၢ်ကစၢ်ဒၣ်ဝဲစံးဝဲ, ယကလဲၤဆူပှၤလၢယအဲၣ်အီၤသ့ၣ်တဖၣ်အအိၣ်, အဝဲသ့ၣ်ဟ့ၣ်ယၤလၢတၢ်အီၣ်ဒီးထံ, သိဆူၣ်ဒီးတၢ်ကံးယာ်လုၣ်, သိဧိၤချါဧိၤဒီးစပံးထံလီၤ.

လံာ်ဟိၤၡ့ 3:3

ယတဲဘၣ်တ့ၢ်အီၤလၢအဝဲကဘၣ်ခိးယၤအါနံၤအါသီတအိၣ်ဘၣ် ဒီးတၢ်မၤပှၤဃဲသဲမုၣ်အတၢ်မၤဒီးတၢ်မၤကမၣ်မုၣ်ကမၣ်ခွါအတၢ်မၤ ဘၣ်, ဒီးလၢအကတီၢ်ဝဲန့ၣ်ယအိၣ်ခိးစ့ၢ်ကီးအီၤန့ၣ်လီၤ.

လံာ်ဟိၤၡ့ 4:13

လၢအတၢ်လီၢ်စီဆှံတဖၣ်လၢကစၢၢ်ဒီခိၣ်တဖၣ်န့ၣ်, အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ်, ဒီးလၢတၢ်လူၢ်ဒီခိၣ်တဖၣ် န့ၣ်အဝဲသ့ၣ်ဆိၣ်ကဲၤတၢ်နၢမူလၢသ့ၣ်သ့ထိးဖၣ်, သ့ၣ်လးဘန့ၤဒီးဃီၤမုၢ်ပျဲၤတဖၣ်လၢအထီဒီးသလၣ်လီၤအသးအဖီ လာ်, မ့ၢ်လၢအတၢ်ကဒုန့ၣ်မုာ်သူၣ်မုာ်သးဒိၣ်မးအဃိလီၤ. လၢတၢ်န့ၣ်အဃိ, သုဖိမုၣ်တဖၣ်မၤတၢ်ဒ်ပှၤဃဲသဲမုၣ်တဖၣ်ဒီးသုဒဲၣ်မုၣ်တဖၣ်မၤ တၢ်မၤကမၣ်မုၣ်ကမၣ်ခွါန့ၣ်လီၤ.

လံာ်ဟိၤၡ့ 9:1

ကီၢ်အံၣ်စရ့လးအပှၤဂီၢ်မုၢ်ဧၢ, ပာ်ကတီၢ်သု တၢ်မၤမူးမၤပွဲလၢအလီၤဂာ်ဒ်ပှၤဘါတၢ်ဂီၤတဖၣ်အသိးန့ၣ်တ က့ၢ်. သုဃၣ်ကပၤကွံာ်သုသးလၢသုကစၢ်ယွၤဒီးသု တသူၣ်တီသးရၤတ့ၢ်ဒီးအီၤဘၣ်. လၢကီၢ်ဒီဘ့ၣ်ညါအံၤသုဆါလီၤကွံာ်သုသးဒ် ပှၤဃဲသဲမုၣ်တဖၣ်အသိးဆူကစၢ်ဘဧၤလးအအိၣ်ဒီးသုအဲၣ်တ့ၢ် ဘုခ့လၢသုဆိကမိၣ်လၢအဝဲဟ့ၣ်သုလၢတၢ်ဘူးတၢ်လဲအဂီၢ်န့ၣ် လီၤ.

လံာ်တၢ်ဘူၣ်ထီၣ်ဘါထီၣ် 26:13

ယဲဒၣ်အံၤယမ့ၢ်ယွၤ, သုကစၢ်ယွၤလၢအဒုးဟးထီၣ်ကွံာ်သုလၢကီၢ်အဲၤကူပတူးပူၤ, ဒ်သိးသုသုတမ့ၢ်လၢၤအဝဲသ့ၣ်အကုၢ်အပှၤတဂ့ၤလီၤ. ဒီးယမၤကၢ်လံသုနီၣ်ယိးအဘိတဖၣ်ဒီးဒုးလဲၤသု တၢ်ထူၣ်ကလာ်လီၤ.”

လံာ်နၤဃူၣ် 1:13

ဒီးခဲကနံၣ်အံၤယကမၤကတၢၢ်ကွံာ်ပှၤအၤၡူၢ်ဖိသ့ၣ်တဖၣ်အစိ အကမီၤလၢသုဖီခိၣ်ဒီးမၤတဲာ်ထးသွဲတဖၣ်လၢအစၢဃာ်သုန့ၣ် လီၤ.”

လံာ်သိၣ်လီၤသီလီၤတၢ် 12:2

လၢကီၢ်လၢသုမၤန့ၢ်အီၤအပူၤန့ၣ်မၤဟးဂီၤကွံာ်ကယဲၢ်တၢ်လီၢ် တဖၣ်ဖဲပှၤဂီၢ်မုၢ်ဘူၣ်ထီၣ်ဘါထီၣ်အယွၤတဖၣ်လၢကစၢၢ်အထီ တဖၣ်အလိၤ, လၢတၢ်လူၢ်တဖၣ်အလိၤ, ဒီးလၢကယဲၢ်သ့ၣ်သံ ကစဲာ်တဖၣ်အဖီလာ်န့ၣ်တက့ၢ်.

လံာ်သိၣ်လီၤသီလီၤတၢ် 15:15

သ့ၣ်နီၣ်ထီၣ်က့ၤလၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူပတူး အပူၤဒီးယွၤသုကစၢ်ယွၤမၤထူၣ်ဖျဲးထီၣ်သုန့ၣ်တက့ၢ်. လၢတၢ်န့ၣ်အဃိ, ခဲကနံၣ်အံၤယဟ့ၣ်လီၤသုလၢတၢ်မၤလိာ်အံၤန့ၣ်လီၤ.

လံာ်သိၣ်လီၤသီလီၤတၢ် 26:17

မုၢ်မဆါတနံၤအံၤသုအၢၣ်လီၤသ့ၣ်ညါတ့ၢ်ယွၤ, ဒ်သုကစၢ်ယွၤအသိး, သုအၢၣ်လီၤတ့ၢ်လၢသုကစူၢ်အီၤ, ကတိၢ်န့ၢ်ဖံးဃာ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးကမၤတၢ်ခဲလၢာ်ဒ်အဝဲမၤလိာ်ဝဲအသိးန့ၣ်လီၤ.

လံာ်သိၣ်လီၤသီလီၤတၢ် 4:20

မ့မ့ၢ်, သုမ့ၢ်ပှၤဂီၢ်မုၢ်လၢအဝဲအုၣ်က့ၤခီၣ်က့ၤဝဲလၢကီၢ် အဲၤကူပတူးတခီ, လၢဖၣ်ကပူၤလၢအကဲၤကပျီၤအပူၤန့ၣ်လီၤ. အဝဲထုးထီၣ်ကွံာ်သုဒ်သိးကဒုးကဲထီၣ်သုလၢအပှၤဂီၢ်မုၢ်ဒ်သု မ့ၢ်တၢ်တနံၤအံၤအသိးန့ၣ်လီၤ.

လံာ်သိၣ်လီၤသီလီၤတၢ် 4:34

ဒ်ယွၤ, သုကစၢ်ယွၤမၤတ့ၢ်တၢ်လၢသုဂီၢ်လၢကီၢ်အဲၤကူပတူး အပူၤအသိးန့ၣ်, မ့ၢ်ကစၢ်လၢအလဲၤဒီးထုးထီၣ်ကွံာ်ပှၤဂီၢ်မုၢ်တဖုလၢပှၤအဂၤ တကလုာ်အကျါဒီးဒုးကဲထီၣ်အီၤလၢအတၢ်ဒၣ်ဝဲဘူၣ်န့ၣ်ကအိၣ်တဂၤ ဂၤဧါ. သုထံၣ်ဘၣ်အဝဲသူတ့ၢ်အတၢ်စိတၢ်ကမီၤဒီးတၢ်ဂံၢ်တၢ်ဘါဖးဒိၣ် လၢသုမဲာ်ချံဒၣ်သုဝဲလီၤ. အဝဲဒုးလီၤဘၣ်တၢ်ဆါသံသတြိာ်ဒီးတၢ်ဒုးတၢ်ယၤ, မၤတ့ၢ်တၢ်လီၤလးတဖၣ်ဒီးတၢ်လီၤကမၢကမၣ်တဖၣ်ဒီးဒုးအိၣ်ထီၣ် တၢ်လီၤပျံၤလီၤဖုးတဖၣ်လၢကမၤအသးန့ၣ်လီၤ.

လံာ်သိၣ်လီၤသီလီၤတၢ် 5:27

စီၤမိၤၡ့ဧၢ, က့ၤကဒါက့ၤ, ဒီးဒိကနၣ်တၢ်လၢယွၤ, ပကစၢ်ယွၤစံးဝဲခဲလၢာ်တက့ၢ်. အန့ၣ်ဝံၤဒီးဟဲကဒါက့ၤဒီး တဲဘၣ်ပှၤတၢ်လၢအဝဲဒၣ်စံးဘၣ်တ့ၢ်နၤတက့ၢ်. ပကဒိကနၣ်ဒီးစူၢ်အီၤန့ၣ်လီၤ.

လံာ်စီၤယိၤၡူ 1:16

အဝဲသ့ၣ်စံးဆၢက့ၤစီၤယိၤၡူ, “ပကမၤတၢ်ခဲလၢာ်လၢနစံးဘၣ်တဲဘၣ်ပှၤဒီးပကလဲၤတၢ်တပူၤလၢ် လၢ်ဖဲနမၢလီၤပှၤန့ၣ်လီၤ.

လံာ်စီၤယိၤၡူ 24:24

အန့ၣ်ဒီး, ပှၤဂီၢ်မုၢ်စံးဘၣ်စီၤယိၤၡူ, “ပကမၤပကစၢ်အတၢ်, ဒီးပကဒိကနၣ်အကလုၢ်န့ၣ်လီၤ.”

လံာ်စီၤယိၤၡူ 24:26

စီၤယိၤၡူကွဲးတၢ်မၤလိာ်တဖၣ်အံၤလၢယွၤအလံာ်တၢ်သိၣ်တၢ်သီအပူၤန့ၣ်လီၤ. အန့ၣ်ဝံၤဒီးအဝဲဟံးန့ၢ်လၢၢ်ဖးဒိၣ်တဖျၢၣ်ဒီးပာ်လီၤဝဲထူၣ် ကလာ်ဖဲသ့ထိးဖၣ်တထံးအဖီလာ်လၢယွၤအတၢ်လီၢ်စီဆှံအပူၤန့ၣ်လီၤ.

လံာ်လီၣ်ဖျါ 17:1

တုၤနုၤတစု, ကလူးနွံဂၤလၢအအိၣ်ဒီးသလၢနွံဖျၢၣ်န့ၣ် အကျါတဂၤဟဲဆူယအိၣ်ဒီးစံးဝဲ, “ဟဲ, ဒီးယကဒုးနဲၣ်နၤလၢဃဲသဲမုၣ်မံၤဟူသၣ်ဖျါတဂၤ, ဝ့ၢ်ဖးဒိၣ်တဖျၢၣ်လၢအဘၣ်တၢ်သူၣ်ထီၣ်အီၤဘူးဒီးထံကျိအါဘိန့ၣ်လီၤ. ကဘၣ်တၢ်စံၣ်ညီၣ်အီၤဒ်လဲၣ်န့ၣ်လီၤ.

လံာ်ပှၤစံၣ်ညီၣ်ကွီၢ် 10:6

မၤကဒီးတစု, ပှၤအံၣ်စရ့လးဖိတဖၣ်မၤတၢ်ဒဲးဘးထီဒါယွၤ ခီဖျိတၢ်ဘူၣ်ထီၣ်ဘါထီၣ်ဘဧၤလးတဖၣ်ဒီးဧၤၡကြိးတဖၣ်ဃုာ်ဒီး ကစၢ်တဖၣ်လၢကီၢ်စူၤရံ, ကီၢ်စံဒိၣ်, ကီၢ်မိၤအး, ကီၢ်ဧၣ်မိၣ်ဒီးကီၢ်ဖလ့ၡသးန့ၣ်လီၤ. အဝဲသ့ၣ်ညိကွံာ်ယွၤဒီးဆိကတီၢ်တၢ်ဘူၣ်ထီၣ်ဘါထီၣ်အီၤန့ၣ်လီၤ.

လံာ်ပှၤစံၣ်ညီၣ်ကွီၢ် 2:11

တုၤနုၤတစုကီၢ်အံၣ်စရ့လးအပှၤဂီၢ်မုၢ်မၤတၢ်ဒဲးဘးထီဒါ ယွၤဒီးစးထီၣ်မၤဘဧၤလးအတၢ်န့ၣ်လီၤ.

လံာ်ပှၤစံၣ်ညီၣ်ကွီၢ် 2:13

ဒီးအဝဲသ့ၣ်ဆိကတီၢ်ဘူၣ်ထီၣ်ဘါထီၣ်ယွၤ, ဒီးမၤဘဧၤလးဒီးဧၡတြိးတဖၣ်အတၢ်န့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 12:10

အန့ၣ်တစု, အဝဲသ့ၣ်ကိးထီၣ်ဆူယွၤအအိၣ်လၢတၢ်မၤစၢၤအဂီၢ်ဒီး စံးဝဲ, “ပမၤတ့ၢ်တၢ်ဒဲးဘးလံ. အဂ့ၢ်ဒ်အံၤ, ပဃၣ်ကွံာ်ပသးလၢနအိၣ်ယွၤဧၢ, ဒီးဘူၣ်ထီၣ်ဘါထီၣ်ဘဧၤလးဒီးအၤၡတြိးတဖၣ်အတၢ်ဂီၤသိအသး န့ၣ်လီၤ. အုၣ်က့ၤခီၣ်က့ၤပှၤလၢပဒုၣ်ပဒါတဖၣ်အစုပူၤ, ဒီးပကဘူၣ်ထီၣ်ဘါထီၣ်နၤလီၤ.