လံာ်ယံးရမံယၤ 10:10 - Sgaw Karen Common Bible

¹⁰ မ့မ့ၢ်နဲဒၣ်, ယွၤဧၢ, နမ့ၢ်ကစၢ်ယွၤအမ့ၢ်အတီန့ၣ်လီၤ. နမ့ၢ်ကစၢ်ယွၤလၢအမူဝဲ ဒီးစီၤပၤအထူအယိာ်န့ၣ်လီၤ. ဖဲနသးဒိၣ်ထီၣ်န့ၣ်ဟီၣ်ခိၣ်ဟူးဟးဆှဲးဆှိးဝဲ ဒီးပှၤကလုာ်တဖၣ်တူၢ်နတၢ်သးကဲၤထီၣ် တကဲဘၣ်လီၤ.

လံာ်ယံးရမံယၤ 10:10 Iomraidhean Croise

လံာ်တၢ်ကဲထီၣ်အခီၣ်ထံး 21:33

အန့ၣ်ဒီးစီၤအၤဘြၤဟၣ်သူၣ်သ့ၣ်တဖုဖဲဘ့ၢ်ၡဘၤဒီးဘူၣ်ထီၣ်ဘါ ထီၣ်ယွၤ, ကစၢ်ယွၤလီၤထူလီၤယိာ်န့ၣ်လီၤ.

လံာ်စီၤပၤအခီၣ်ထံးတဘ့ၣ် 18:39

တုၤပှၤဂီၢ်မုၢ်ထံၣ်ဃီၤတၢ်အံၤန့ၣ်, အဝဲသ့ၣ်ထိၣ်လီၤပှီၤအသး လၢဟီၣ်ခိၣ်လိၤဒီးကိးထီၣ်ဝဲ, “ယွၤမ့ၢ်ကစၢ်ယွၤ, ယွၤထဲတဂၤဧိၤမ့ၢ်ကစၢ်ယွၤန့ၣ်လီၤ.”

လံာ်စီၤပၤအခီၣ်ထံးတဘ့ၣ် 8:60

ဒီးလၢတၢ်န့ၣ်အဃိ, ပှၤကလုာ်ခဲလၢာ်လၢဟီၣ်ခိၣ်ချၢကသ့ၣ်ညါဝဲ လၢယွၤထဲတဂၤဧိၤအံၤမ့ၢ်ကစၢ်ယွၤ, ဒီးကစၢ်ယွၤအဂုၤအဂၤတအိၣ်ဘၣ်န့ၣ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 29:11

နမ့ၢ်တၢ်ဒိၣ်တၢ်မုၢ်ဒီးစိဒိၣ်ကမီၤထီ, လၤဒိၣ်ကပီၤအါ, ကပြုၢ်ကပြီၤဒီးလီၤကဟုကညီၢ်န့ၣ်လီၤ. ကယဲၢ်တၢ်ခဲလၢာ်လၢအအိၣ်ဝဲလၢမူခိၣ်ဒီးဟီၣ်ခိၣ်န့ၣ်မ့ၢ်နတၢ်, ဒီးနမ့ၢ်စီၤပၤ, ဒီးပှၤပၢတၢ်အဒိၣ်ကတၢၢ်လၢတၢ်ခဲလၢာ်အဖီခိၣ် န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 15:3

လၢအါနံၣ်အါလါအပူၤန့ၣ်, ကီၢ်အံၣ်စရ့လးအိၣ်မူဝဲ, တအိၣ်ဘၣ်ဒီးကစၢ်ယွၤအမ့ၢ်အတီ, တအိၣ်ဘၣ်ဒီးပှၤလုၢ်တၢ်အခိၣ် တဖၣ်လၢကသိၣ်လိအဝဲသ့ၣ်ဒီးတအိၣ်ဘၣ်ဒီးတၢ်စူၢ်တၢ်နာ်အတၢ်သိၣ် တၢ်သီတမံၤဘၣ်န့ၣ်လီၤ.

လံာ်စီၤယိၤဘး 9:6

ကစၢ်ယွၤမၤဟူးဝးဟီၣ်ခိၣ်ဒီးဟီၣ်ခိၣ်ဟူးဝးဝဲဒီးမၤဝးတၢ် အထူၣ်တဖၣ်လၢအယိးဃာ်ဟီၣ်ခိၣ်န့ၣ်လီၤ.

စံးထီၣ်ပတြၢၤ 10:16

ယွၤမ့ၢ်စီၤပၤအစိၤစိၤအဃၣ်ဃၣ်လီၤ. ပှၤလၢအဘူၣ်ထီၣ်ဘါထီၣ် ကစၢ်အဂၤတဖၣ်န့ၣ် ကလီၤမၢ်ကွံာ်လၢအကီၢ်ပူၤလီၤ.

စံးထီၣ်ပတြၢၤ 100:3

သ့ၣ်ညါလၢယွၤမ့ၢ်ကစၢ်ယွၤတက့ၢ်. အဝဲဒၣ်န့ၣ်တ့ပှၤ ဒီးပမ့ၢ်အတၢ်လီၤ. ပမ့ၢ်အပှၤဂီၢ်မုၢ်ဒီး အတၢ်အီၣ်ဆၣ်အလီၢ် အသိတဖုလီၤ.

စံးထီၣ်ပတြၢၤ 100:5

အဂ့ၢ်ဒ်အံၤ, ယွၤန့ၣ်ဂ့ၤဝဲ, အတၢ်အဲၣ်ဂၢၢ်ကျၢၤအိၣ်ဝဲလီၤထူလီၤယိာ် ဒီးအကလုၢ်တီဝဲအစိၤစိၤအဃၣ်ဃၣ်လီၤ.

စံးထီၣ်ပတြၢၤ 104:32

အဝဲကွၢ်လီၤဟီၣ်ခိၣ်ဒီးဟီၣ်ခိၣ်ဆှဲးဆှိးဝဲ, အဝဲထိးဘၣ်ကစၢၢ်ကလိဒီး မ့ၣ်အူလုၣ်ခုၣ်ထီၣ်ဝဲလီၤ.

စံးထီၣ်ပတြၢၤ 114:7

ဟီၣ်ခိၣ်ဧၢ, ကနိးကစုာ် လၢယွၤအမဲာ်ညါဖဲအဝဲဟဲ လၢစီၤယၤကိာ်အကစၢ်ယွၤမဲာ်ညါ,

စံးထီၣ်ပတြၢၤ 145:13

နတၢ်ပၢတၢ်ပြးန့ၣ်အိၣ်ဝဲလီၤထူလီၤယိာ် ဒီးနမ့ၢ်စီၤပၤအစိၤစိၤအဃၣ်ဃၣ်န့ၣ်လီၤ. ယွၤန့ၣ်တီဒီးအတၢ်အၢၣ်လီၤတဖၣ်, အဝဲအိၣ်ဒီးတၢ်သးကညီၤလၢ အတၢ်မၤခဲလၢာ်အပူၤလီၤ.

စံးထီၣ်ပတြၢၤ 146:6

ယွၤမ့ၢ်ပှၤလၢအတ့လီၤမူခိၣ်, ဟီၣ်ခိၣ်, ဒီးပီၣ်လဲၣ်, ဒီးကယဲၢ်တၢ်အိၣ်လၢအပူၤ, လၢအတီဒီး အတၢ်အၢၣ်လီၤအီလီၤ လီၤထူလီၤယိာ်,

စံးထီၣ်ပတြၢၤ 18:7

တုၤနုၤတစုဟီၣ်ခိၣ်ဟူးဝးဒီးဆှဲးဆှိးဝဲ, ကစၢၢ်တဖၣ်အခီၣ်ထံးသုးအသးဒီးဟူးဝးဝဲ, မ့ၢ်လၢကစၢ်ယွၤသးဒိၣ်ထီၣ်အဃိန့ၣ်လီၤ.

စံးထီၣ်ပတြၢၤ 29:10

ယွၤဆ့ၣ်နီၤပၢတၢ်လၢထံလုၣ်ဘၢတၢ်အဖီခိၣ်, ယွၤ, စီၤပၤလီၤထူလီၤယိာ်ဆ့ၣ်နီၤပၢတၢ်လီၤ.

စံးထီၣ်ပတြၢၤ 31:5

ယွၤ, ကစၢ်ယွၤလၢအမ့ၢ်အတီတဂၤဧၢ, ယဟ့ၣ်လီၤယသးလၢနစုပူၤလီၤ. အဂ့ၢ်ဒ်အံၤ, နပှ့ၤက့ၤလံယၤလံ.

စံးထီၣ်ပတြၢၤ 42:2

ကစၢ်ယွၤလၢအမူဝဲတဂၤဧၢ, တၢ်သူယသးလၢနၤလီၤ. ယကလဲၤဒီးဘူၣ်ထီၣ်ဘါထီၣ်ဘၣ်နၤအခါဖဲလဲၣ်.

စံးထီၣ်ပတြၢၤ 68:11

ကစၢ်ဟ့ၣ်လီၤအကလုၢ်, ဒီးပိာ်မုၣ်အါဂၤစိာ်တၢ်ကစီၣ်တဖၣ်န့ၣ်လီၤ.

စံးထီၣ်ပတြၢၤ 68:8

ဟီၣ်ခိၣ်ဆှဲးဆှိးဝဲဒီး မူခိၣ်ဒုးစူၤလီၤတၢ်, လၢကစၢ်ယွၤ လၢအမ့ၢ်ကစၢၢ်စံၤနါအကစၢ်, အကစၢ်ယွၤလၢအမ့ၢ် အံၣ်စရ့လးအကစၢ်ယွၤအမဲာ်ညါန့ၣ်လီၤ.

စံးထီၣ်ပတြၢၤ 74:12

ကစၢ်ယွၤမ့ၢ်ယစီၤပၤလၢပျၢၤ, လၢအမၤတၢ်အုၣ်က့ၤခီၣ်က့ၤလၢ ထံဧိၤကီၢ်ဧိၤအပူၤလီၤ.

စံးထီၣ်ပတြၢၤ 76:7

မ့မ့ၢ်, နဲဒၣ်ယွၤဧၢ, နဘၣ်တၢ်ပျံၤနၤလၢပှၤခဲလၢာ်လီၤ. တုၤနသးထီၣ်န့ၣ်ဒီး, ပှၤဆၢထၢၣ်လၢနမဲာ်ညါတသ့ဝဲနီတဂၤဘၣ်.

စံးထီၣ်ပတြၢၤ 76:8

နမၤသ့ၣ်ညါတ့ၢ်လံနတၢ်စံၣ်ညီၣ်လၢမူခိၣ်, ဒီးပှၤဟီၣ်ခိၣ်ဖိခဲလၢာ်ပျံၤတၢ်ဒီးအိၣ်ဘှီၣ်ဝဲဒၣ်,

စံးထီၣ်ပတြၢၤ 77:18

နလီသီၣ်အိၣ်ဝဲလၢကလံၤသဝံးအပူၤ, လီဝၢ်ဒံးန့ၣ်မၤကပီၤထီၣ်ဟီၣ်ခိၣ် ဒီးဟီၣ်ခိၣ်ဆှဲးဆှိးဒီးဟူးဝးဝဲလီၤ.

စံးထီၣ်ပတြၢၤ 84:2

ယသးဆၢလဲၤဘၣ်ဆူယွၤအဂၢၤတဖၣ်အပူၤ, တုၤယလီၤဘှါဝဲဒၣ်န့ၣ်လီၤ. ယသးဒီးယညၣ်သးဝံၣ်တၢ်လၢတၢ်သူၣ်ခုသးခု ဆူကစၢ်ယွၤလၢအမူဝဲတဂၤအအိၣ်န့ၣ်လီၤ.

စံးထီၣ်ပတြၢၤ 9:8

အဝဲပၢပှၤဟီၣ်ခိၣ်ဖိလၢတၢ်တီတၢ်လိၤ, စံၣ်ညီၣ်ပှၤကလုာ်တဖၣ်လၢတၢ်စံၣ်ညီၣ်တီအပူၤ

စံးထီၣ်ပတြၢၤ 90:11

မ့ၢ်မတၤဆိကမိၣ်ထီၣ်နတၢ်သးထီၣ်အစိအကမီၤ ဒီးသ့ၣ်ညါတၢ်ပျံၤလၢနတၢ်သးကဲၤထီၣ် ဟဲစိာ်ဝဲသ့န့ၣ်တဂၤလဲၣ်.

စံးထီၣ်ပတြၢၤ 90:2

တချုးလၢကစၢၢ်ကလိအိၣ်ထီၣ်ဒံးဘၣ်, မ့တမ့ၢ်တချုးလၢနဒုးအိၣ်ထီၣ်ဟီၣ်ခိၣ်ဒံးဘၣ်န့ၣ်, နမ့ၢ်ကစၢ်ယွၤအစိၤစိၤအဃၣ်ဃၣ်ဒီး နကမ့ၢ်ဒံးနဲလီၤစိၤထီလီၤ.

စံးထီၣ်ပတြၢၤ 93:2

ယွၤဧၢ, နလီၢ်ပစိာ်အိၣ်ဂၢၢ်ဆိးကျၢၤတ့ၢ်လံလၢ အခီၣ်ထံးလံၤလံၤ ဒီးနအိၣ်တ့ၢ်လံနဲလၢပျၢၤလၢကစၢၤ လီၤထူလီၤယိာ်န့ၣ်လီၤ.

စံးထီၣ်ပတြၢၤ 97:4

အလီဝၢ်ဒံးတဖၣ်မၤကပီၤထီၣ်ဟီၣ်ခိၣ်, ဟီၣ်ခိၣ်ထံၣ်ဝဲဒီးဆှဲးဆှိးဝဲလီၤ.

လံာ်ယၡါယၤ 37:17

ခဲအံၤ, ယွၤဧၢ, ဒိကနၣ်ပှၤဒီးကွၢ်တၢ်လၢအမၤအသးဒီးပှၤတက့ၢ်. ဒိကနၣ်တၢ်ခဲလၢာ်လၢစီၤပၤစီၤစၤနဃ့ရံာ်စံးဝဲလၢကဒုၣ်ဒွဲၣ်နၤ, ကစၢ်ယွၤလၢအမူဝဲတဂၤန့ၣ်တက့ၢ်.

လံာ်ယၡါယၤ 37:4

ကီၢ်အၤၡူၢ်အစီၤပၤဖးဒိၣ်ဆှၢလီၤအသုးခိၣ်လၢကဒုၣ်ဒွဲၣ်ကစၢ် ယွၤလၢအမူဝဲတဂၤလီၤ. မ်ယွၤနကစၢ်ယွၤနၢ်ဟူတၢ်ဒုၣ်ဒွဲၣ်တဖၣ်အံၤဒီးစံၣ်ညီၣ်ပှၤ တဖၣ်လၢအစံးကတိၤတၢ်အံၤန့ၣ်တက့ၢ်. လၢတၢ်န့ၣ်အဃိ, ဃ့ထုကဖၣ်တၢ်ဆူကစၢ်ယွၤလၢပှၤလၢအိၣ်မူတ့ၢ်တဖၣ်အဂီၢ် တက့ၢ်.”

လံာ်ယၡါယၤ 40:15

လၢယွၤအဂီၢ်န့ၣ်ပှၤကလုာ်တဖၣ်တမ့ၢ်တၢ်နီတမံၤဘၣ်. တအါန့ၣ်ထံဖိတလီၤစီၤဘၣ်. ကီးလၢအယံၤတဖၣ်န့ၣ်အတ ယၢၢ်ဖှံဝဲဒၣ်ထဲသိးသိးဒီးဟီၣ်ခိၣ်ကမူၣ်န့ၣ်လီၤ.

လံာ်ယၡါယၤ 40:28

မ့ၢ်နတသ့ၣ်ညါဘၣ်ဧါ. မ့ၢ်နတနၢ်ဟူတ့ၢ်ဘၣ်ဧါ. ယွၤမ့ၢ်ကစၢ်ယွၤအထူအယိာ်ဒီးတ့လီၤပာ်လီၤဟီၣ်ခိၣ်ခဲလၢာ် လီၤ. အဝဲတလီၤဘှံးလီၤတီၤဘၣ်ဒီးအသးတလီၤစၢ်လီၤဘှါနီတစုဘၣ်. အတၢ်ဆိကမိၣ်တဖၣ်န့ၣ်ပှၤတနၢ်ပၢၢ်အီၤနီတဂၤဘၣ်.

လံာ်ယၡါယၤ 57:15

ယဲဒၣ်အံၤ, ယမ့ၢ်ကစၢ်ယွၤလၢအအိၣ်ထီၣ်ထီဒီးစီဆှံဝဲ, ယွၤလၢအအိၣ်မူအစိၤစိၤအဃၣ်ဃၣ်လီၤ. ယအိၣ်လၢတၢ်လီၢ်ထီၣ်ထီဒီးစီဆှံတတီၤ, ဘၣ်ဆၣ်ဒီးယအိၣ်စ့ၢ် ကီးလၢပှၤဂီၢ်မုၢ်လၢအဆီၣ်လီၤအသးဒီးပီၢ်ယၢ်လီၤက့ၤအသး အကျါ, ဒ်သိးယဟ့ၣ်က့ၤအဝဲသ့ၣ်အတၢ်နာ် န့ၢ်ဒီးတၢ်မုၢ်လၢ်ကသ့ဝဲအဂီၢ်လီၤ.

လံာ်ယၡါယၤ 65:16

ပှၤတဂၤဂ့ၤတဂၤဂ့ၤလၢထံကီၢ်ပူၤ, လၢအဃ့တၢ်ဆိၣ်ဂ့ၤတမံၤ န့ၣ်, ကဃ့ဝဲဒ်သိးတၢ်သူၣ်တီသးရၤအကစၢ်ယွၤကဆိၣ်ဂ့ၤအီၤအဂီၢ် န့ၣ်လီၤ. ပှၤတဂၤလၢ်လၢ်လၢအမၤတၢ်ဆိၣ်တမံၤန့ၣ်, ကဆိၣ်လီၤအသးလၢတၢ်သူၣ်တီသးရၤအကစၢ်ယွၤအမံၤ အပူၤန့ၣ်လီၤ. တၢ်ကီတၢ်ခဲလၢအပူၤကွံာ်တဖၣ် ကလၢာ်ကွံာ်ဒီးကဘၣ်တၢ်သးပ့ၤနီၣ်ကွံာ်အီၤန့ၣ်လီၤ.”

လံာ်ယံးရမံယၤ 23:36

လၢတၢ်န့ၣ်အဃိ, အဝဲသ့ၣ်တဘၣ်သူလၢၤဘၣ်တၢ်ကတိၤ, ယွၤအတၢ်ဝံတၢ်ယိးဘၣ်. အဂ့ၢ်မ့ၢ်လၢ, ပှၤမ့ၢ်သူအီၤတဂၤဂၤဒီး, ယကဒုးကဲထီၣ်ယတၢ်ကစီၣ်လၢတၢ်ဝံတၢ်ယိးနီၢ်နီၢ်လၢအဝဲ အဂီၢ်န့ၣ်လီၤ. ပှၤဂီၢ်မုၢ်ဘိးကဒါကွံာ်အကစၢ်ယွၤ, ကစၢ်ယွၤလၢအမူဝဲ, ယွၤသ့တၢ်လၢာ်အတၢ်ကတိၤန့ၣ်လံ.

လံာ်ယံးရမံယၤ 4:2

ကမ့ၢ်တၢ်အတီအဘၣ်လၢသုဂီၢ်လၢသုကဆိၣ်တၢ်လၢယမံၤအပူၤ န့ၣ်လီၤ. အန့ၣ်ဒီး, ပှၤကလုာ်တဖၣ်ခဲလၢာ်ကမၢယဆိၣ်ဂ့ၤ အဝဲသ့ၣ်ဒီးအဝဲသ့ၣ်ကစံးထီၣ်ပတြၢၤယၤလီၤ.”

လံာ်ယံးရမံယၤ 4:24

ယကွၢ်တၢ်ဆူကစၢၢ်ကလိတဖၣ်, ဒီးကွၢ်ကွၢ်, အဝဲသ့ၣ်ဟူးဝးဝဲ, ဒီးတၢ်လူၢ်တဖၣ်ဟူးဝးဆှဲးဆှိးဆူအံၤဆူဘးန့ၣ်လီၤ.

လံာ်ယံးရမံယၤ 50:46

ဖဲဝ့ၢ်ဘၤဘူၤလိၣ်လီၤပှီၢ်ကွံာ်ဝဲန့ၣ်, တၢ်အသီၣ်ဖးဒိၣ်တမံၤက ဟူထီၣ်ဝဲတုၤဒၣ်လဲာ်ဟီၣ်ခိၣ်ဒီဘ့ၣ်ကဟူးဝးဝဲ, ဒီးပှၤကလုာ် အဂၤတဖၣ် ကနၢ်ဟူဘၣ်တၢ်ပျံၤတၢ်ဖုးအတၢ်ကိးထီၣ်တဖၣ်န့ၣ်လီၤ.”

လံာ်ယံးရမံယၤ 51:29

ဟီၣ်ခိၣ်ကနိးကစုာ်ဒီး ဟူးဝးဝဲ, မ့ၢ်လၢယွၤမၤထွဲအတၢ်ကူၣ်ကျဲၤ ဒ်သိးကဒုးကဲထီၣ်ကီၢ်ဘၤဘူၤလိၣ်လၢမဲးမုၢ်ခိၣ်တတီၤဖဲပှၤ တအိၣ်တဆိးနီတဂၤဘၣ်အဃိန့ၣ်လီၤ.

လံာ်ဒၤနံးယ့လး 4:3

ယွၤအတၢ်ပနီၣ်တဖၣ်ဒိၣ်နီၢ်မး, အတၢ်လီၤလးတဖၣ်လီၤဘီလီၤမုၢ်မးလီၤ. ကစၢ်ယွၤအဘီအမုၢ်န့ၣ်မ့ၢ်ဘီမုၢ်အထူအယိာ်ဒီးအတၢ်ပၢတၢ် ပြးမ့ၢ်တၢ်အစိၤစိၤအဃၣ်ဃၣ်တမံၤန့ၣ်လီၤ.

လံာ်ဒၤနံးယ့လး 4:34

“တုၤနွံနံၣ်ပူၤကွံာ်ဝဲဒီး, ယၤ, စီၤနဘူၤကးန့စၢ်ကွၢ်ထီၣ်တၢ်ဆူ မူခိၣ်ဒီးယအိၣ်က့ၤဒီးယတၢ်သူၣ်ထံသးဆးလီၤ. ယစံးထီၣ်ပ တြၢၤတၢ်ထီကတၢၢ်ကစၢ်ယွၤဒီးဟ့ၣ်တၢ်ယူးယီၣ်ဒီးတၢ်လၤ ကပီၤဆူပှၤလၢအမူဝဲအထူအယိာ်တဂၤအအိၣ်န့ၣ်လီၤ. “အဂ့ၢ်ဒ်အံၤ, အတၢ်ပၢတၢ်ပြးန့ၣ်မ့ၢ်တၢ်ပၢတၢ်ပြး အထူအယိာ်, ဒီးအဘီအမုၢ်အိၣ်ဂၢၢ်အိၣ်ကျၢၤ အစိၤစိၤအဃၣ်ဃၣ်လီၤ.

လံာ်ဒၤနံးယ့လး 6:26

ယဟ့ၣ်လီၤယကလုၢ်ဆူယဘီယမုၢ်ဒီဘ့ၣ်ညါအပူၤလၢပှၤကိး ဂၤဒဲးကဘၣ်ပျံၤဒီးယူးယီၣ်ပာ်ကဲစီၤဒၤနံးယ့လး အကစၢ်ယွၤန့ၣ်လီၤ. အဝဲမ့ၢ်ကစၢ်ယွၤလၢအမူဝဲ, အိၣ်ဝဲဆိးဝဲအစိၤစိၤအဃၣ်ဃၣ်လီၤ. အဝဲအဘီအမုၢ်န့ၣ်တဟးဂီၤနီတစုဘၣ်, ဒီးအစိအကမီၤန့ၣ် အကတၢၢ်တအိၣ်ဘၣ်.

လံာ်ဒၤနံးယ့လး 6:27

အဝဲအုၣ်က့ၤခီၣ်က့ၤတၢ်ဒီးမၤပူၤဖျဲးတၢ်, အဝဲမၤတၢ်ပနီၣ်လီၤလးဒီးတၢ်လီၤလိၢ်လီၤလး တဖၣ်လၢမူခိၣ်ဒီးလၢဟီၣ်ခိၣ်လီၤ. အဝဲအုၣ်က့ၤခီၣ်က့ၤတ့ၢ်စီၤဒၤနံးယ့လးလၢခ့ယုၢ်တဖၣ်အ တၢ်မၤသံမၤဝီအီၤန့ၣ်လီၤ.”

လံာ်ဒၤနံးယ့လး 7:14

အဝဲဘၣ်တၢ်ဟ့ၣ်လီၤအီၤလၢပှၤပၢတၢ်အစိကမီၤ, တၢ်လၤကပီၤ, ဒီးစီၤလိၣ်စီၤပၤအစိကမီၤ, ဒ်သိးကယဲၢ်ပှၤဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲးဒီးပှၤကတိၤကျိာ်အကလုာ်ကလုာ်တဖၣ်ကမၤ အခ့အပှၤအတၢ်မၤန့ၣ်လီၤ. အစိအကမီၤကအိၣ်လီၤထူလီၤယိာ်, ဒီးအဘီအမုၢ်န့ၣ်အကတၢၢ်တအိၣ်ဘၣ်.

လံာ်ယိၤအ့လး 2:11

ယွၤဟ့ၣ်လီၤအကလုၢ်ဆူအသုးမုၢ်အအိၣ်န့ၣ်လီၤ. သုးမုၢ်သံၣ်ဘိတဖၣ်လၢဒိကနၣ်အီၤန့ၣ်အိၣ် ဂီၢ်မုၢ်ဂီၢ်ပၤဒီးအဂံၢ်အဘါဆူၣ်ဒိၣ်မးလီၤ. ယွၤအမုၢ်တနံၤန့ၣ်လီၤပျံၤလီၤဖုးဒိၣ်မး ဒီးမ့ၢ်မတၤပူၤဖျဲးသ့တဂၤလဲၣ်.

လံာ်မံကၤ 1:4

တုၤနုၤတစု, ဒ်ဃိးလၢအပှံၢ်လီၤဝဲလၢမ့ၣ်အူပူၤဒီးထံလၢ အယွၤလီၤဝဲလၢတၢ်လူၢ်ခိၣ်အသိးန့ၣ်ကစၢၢ်တဖၣ်ကပှံၢ်လီၤဝဲ ဒီးယွၤလီၤဝဲလၢကစၢၢ်ကဆူးပူၤလီၤ.

လံာ်နၤဃူၣ် 1:5

ကစၢၢ်ကလိတဖၣ်ဟူးဝးဆှဲးဆှိး ဒီးတၢ်လူၢ်ဒီခိၣ်တဖၣ်ပှံၢ်ထီၣ်ကွံာ်ဝဲလၢယွၤ အမဲာ်ညါန့ၣ်လီၤ. ဟီၣ်ခိၣ်ဟူးဝးဖဲယွၤလီၣ်ဖျါထီၣ်အသး, ဟီၣ်ခိၣ်ဒီးအပှၤဂီၢ်မုၢ်ခဲလၢာ်ကနိးကစုာ်ဝဲဒၣ်န့ၣ်လီၤ.

လံာ်နၤဃူၣ် 1:6

မ့ၢ်မတၤကွၢ်ဆၢၣ်မဲာ်အတၢ်သးထီၣ်ကန့ၢ်တဂၤလဲၣ်. ဒီးမ့ၢ်မတၤတူၢ်အတၢ်သးကဲၤထီၣ်ကကဲဝဲတဂၤန့ၣ်လဲၣ်. လူလီၤဝဲအတၢ်သးကဲၤထီၣ်, ဒီးလၢၢ်ဧိၤလ့ဧိၤကၢ်လီၤကလဲကွံာ်ဆူဖၣ်ကမူၣ်လၢအမဲာ်ညါလီၤ.

လံာ်ဃဘးကူာ် 3:10

တုၤကစၢၢ်ကလိတဖၣ်ထံၣ်ဃီၤနၤဒီးကနိးကစုာ်တ့ၢ်ဝဲ, ဒီးထံဂၢ်လီၤတ့ၢ်အသးလၢ မူခိၣ်အလီၢ်တဖၣ်အပူၤန့ၣ်လီၤ. ထံလၢဟီၣ်ခိၣ်လာ်တဖၣ်သီၣ်ထီၣ်ရုၢ်ရုၢ် ဒီးအလပီတဖၣ်ထီၣ်ထီဝဲလီၤ.

လံာ်ဃဘးကူာ် 3:6

တုၤအအိၣ်ကတီၢ်ဒီးဟီၣ်ခိၣ်ဟူးဝးဝဲ, ကွၢ်ဃီၤတၢ်ဒီးပှၤကလုာ်တဖၣ်ကနိးကစုာ်န့ၣ်လီၤ. ကစၢၢ်ကလိအထူအယိာ်တဖၣ်သ့ၣ်ဖးလီၤကလဲ, တၢ်စိခိၣ်အထူအယိာ်တဖၣ်, တၢ်စိခိၣ်လၢအယီၢ်လီၤတ့ၢ်ဝဲလၢပျၢၤလၢကစၢၤ သ့ၣ်တဖၣ်လီၤယၢၣ်ကွံာ်ဝဲလီၤ.

လံာ်မၤလကံ 3:2

ဘၣ်ဆၣ်ဒီး, မုၢ်တနံၤလၢအဝဲဟဲန့ၣ်မ့ၢ်မတၤတူၢ်ကကဲန့ၣ်လဲၣ်. ဒီးတုၤအဝဲအိၣ်ဖျါထီၣ်န့ၣ်မ့ၢ်မတၤကပူၤဖျဲးန့ၣ်လဲၣ်. အဝဲကလီၤဂာ်ဒ်ပှၤဆှုၣ်တၢ်အချါသိမ့ၢ်ဂ့ၤ, ဒ်မ့ၣ်အူလၢအမၤကဆှီ, တိၢ်ဒီးထးတဖၣ်မ့ၢ်ဂ့ၤန့ၣ်လီၤ.

လံာ်မးသဲ 16:16

စီၤၡံမိၣ်ပ့းတရူးစံးဆၢဝဲ, “နမ့ၢ်ခရံာ်, ကစၢ်ယွၤလၢအမူဝဲတဂၤအဖိခွါလီၤ.”

လံာ်မးသဲ 26:63

ဘၣ်ဆၣ်ယ့ၣ်ၡူးအိၣ်ဘှီၣ်ကလာ်လီၤ. မၤကဒီးတဘျီပှၤလုၢ်တၢ်အခိၣ်အဒိၣ်ကတၢၢ် ကတိၤတၢ်လၢယ့ၣ်ၡူးဒီးစံး, “အခဲအံၤယမၢနဆိၣ်လီၤနသး လၢကစၢ်ယွၤလၢအမူဝဲတဂၤအမံၤအပူၤလီၤ. တဲဘၣ်ပှၤ, မ့ၢ်နမ့ၢ်ခရံာ်, ကစၢ်ယွၤအဖိခွါန့ၣ်ဧါ.”

လံာ်ယိၤဟၣ် 17:3

ဒီးတၢ်မူအထူအယိာ်အခီပညီမ့ၢ်ဝဲတၢ်သ့ၣ်ညါနၤ, ကစၢ်ယွၤ အမ့ၢ်အတီတဂၤဧိၤ, ဒီးတၢ်သ့ၣ်ညါယ့ၣ်ၡူးခရံာ်လၢနမၢလီၤ အီၤန့ၣ်လီၤ.

မၤတၢ် 14:15

“ဘၣ်မနုၤအဃိသုမၤတၢ်အံၤလဲၣ်. ပမ့ၢ်ဒၣ်ပှၤကညီဒ်သုဝဲအသိးလီၤ. ပဟဲပဝဲဖဲအံၤဒ်သိးပကဘိးဘၣ်သ့ၣ်ညါသုလၢတၢ်သးခုအကစီၣ်, ဒ်သိးသုကဃၣ်ကွံာ်သုသးလၢတၢ်တဂိာ်တသီၣ်တဖၣ်အံၤ, ဒီးဃၣ်ဃီၤသုသးဆူကစၢ်လၢအမူဝဲတဂၤန့ၣ်အအိၣ်, ကစၢ်လၢ အတ့လီၤမူခိၣ်, ဟီၣ်ခိၣ်, ပီၣ်လဲၣ်ပီၣ်တြီၤ, ဒီးတၢ်အိၣ်လၢအပူၤခဲလၢာ်ခဲဆ့န့ၣ်လီၤ.

လံာ်သိၣ်လီၤသီလီၤတၢ် 32:4

ယွၤမ့ၢ်သုပှၤကဟုကယာ်သုလၢအဂံၢ်ဆူၣ်ဘါဆူၣ်, လၢဝဲပှဲၤဝဲဒီးတီဝဲလိၤဝဲလၢကယဲၢ်အကျဲခဲလၢာ်အပူၤန့ၣ်လီၤ. သုကစၢ်ယွၤမ့ၢ်ပှၤလၢအသူၣ်တီသးရၤဒီးမ့ၢ်ဝဲတီဝဲ, အဝဲမၤတၢ်လၢအဘၣ်ဒီးအတီန့ၣ်လီၤ.

လံာ်သိၣ်လီၤသီလီၤတၢ် 5:26

မ့ၢ်ပှၤတဂၤဂၤအိၣ်မူဒံးဝဲ, ဖဲအနၢ်ဟူဘၣ်ကစၢ်ယွၤလၢအမူဝဲ ကတိၤတၢ်လၢမ့ၣ်အူအကျါဝံၤအလီၢ်ခံန့ၣ်ဧါ.

၁ သ့းစၤလနံ 1:9

ပှၤခဲလၢာ်န့ၣ်စံးကတိၤတၢ်ဘၣ်ဃးသုတၢ်တူၢ်လိာ်မုာ်ပှၤဖဲ ပလဲၤအိၣ်သကိးသုအဆၢကတီၢ်, ဒီးဘၣ်ဃးသုတၢ်ဃၣ်ကွံာ်သုသးလၢတၢ်ဂီၤတၢ်ဖီၣ်ဒီးသုတၢ်ဃၣ် ကဒါက့ၤသုသးဆူကစၢ်ယွၤအအိၣ်, ဒ်သိးသုကမၤကစၢ်ယွၤလၢအတီဒီးမူဝဲတဂၤအတၢ်,

၁ တံၤမသ့း 1:17

စီၤပၤလၢအပၢတၢ်လီၤထူလီၤယိာ်လၢအသံတသ့ ဒီးတၢ်ထံၣ်အီၤတသ့, ကစၢ်ယွၤထဲတဂၤဧိၤအံၤ, မ်တၢ်ယူးယီၣ်ဒီးတၢ်လၤကပီၤအိၣ်ဒီးအီၤအစိၤစိၤ အဃၣ်ဃၣ်တက့ၢ်. အၤမ့ၣ်.

၁ တံၤမသ့း 6:17

မၤလိာ်ပှၤအထူးအတီၤတဖၣ်လၢဟီၣ်ခိၣ်ချၢအံၤလၢအသုတပာ် ကဖၢလၢအသးတဂ့ၤ. မ့မ့ၢ်ကပာ်အတၢ်မုၢ်လၢ်, တမ့ၢ်လၢတၢ်ထူးတၢ်တီၤလၢအတဂၢၢ်တကျၢၤတဖၣ်အပူၤ ဘၣ်. မ့မ့ၢ်, ကမ့ၢ်ဒၣ်ဝဲလၢကစၢ်ယွၤလၢအဟ့ၣ်ပှၤတၢ်ခဲလၢာ် ထူးထူးတီၤတီၤလၢပတၢ်မုာ်လၤသးခုအဂီၢ်, တဂၤအပူၤန့ၣ် တက့ၢ်.

ဧ့ၤဘြံၤ 10:31

တၢ်လီၤနုာ်ဘၣ်ဆူ ကစၢ်ယွၤလၢအမူဝဲတဂၤအစုပူၤန့ၣ်, မ့ၢ်တၢ်လၢအလီၤပျံၤလီၤဖုးဒိၣ်မးလီၤ.

လံာ်စီၤယိၤၡူ 3:10

ဖဲသုလဲၤထီၣ်ဆူညါဒီး, အဝဲကနီၣ်ထီၣ်ကွံာ်ပှၤကနၤဧၣ်ဖိ, ပှၤဃ့ၤသးဖိ, ပှၤဃံၤဝံဖိ, ပှၤပရးစၤဖိ, ပှၤကံၢ်ကၣ်ဖိ, ပှၤအမိၢ်ဖိ, ဒီးပှၤယဘူၣ်ဖိတဖၣ်သပှၢ်ကတၢၢ်န့ၣ်လီၤ. ဒီးသုကသ့ၣ်ညါလၢကစၢ်ယွၤလၢအမူဝဲတဂၤအိၣ်လၢသုကျါ,

၁ ယိၤဟၣ် 5:20

ပသ့ၣ်ညါလၢကစၢ်ယွၤအဖိခွါဟဲဝဲဒီးဟ့ၣ်တ့ၢ်လံ ပှၤတၢ်သ့ၣ်ညါနၢ်ပၢၢ်, ဒ်သိးပကသ့ၣ်ညါကစၢ်ယွၤ အမ့ၢ်အတီတဂၤအဂီၢ်န့ၣ်လီၤ. ပအိၣ်မူလၢကစၢ်ယွၤ အမ့ၢ်အတီတဂၤအံၤအပူၤ, လၢအဖိခွါယ့ၣ်ၡူးခရံာ် အပူၤန့ၣ်လီၤ. အအံၤမ့ၢ်ကစၢ်ယွၤနီၢ်နီၢ်, ဒီးအအံၤမ့ၢ် တၢ်မူအထူအယိာ်လီၤ.

လံာ်လီၣ်ဖျါ 20:11

အန့ၣ်ဝံၤဒီးယထံၣ်လီၢ်ပစိာ်ဝါဖးဒိၣ်တဖျၢၣ်ဒီးပှၤ တဂၤလၢအဆ့ၣ်နီၤလၢအလိၤန့ၣ်လီၤ. မူခိၣ်ဒီးဟီၣ်ခိၣ်ဃ့ၢ်ကွံာ်လၢအဝဲဒၣ်အမဲာ်ညါဒီးတဘၣ် တၢ်ထံၣ်န့ၢ်အီၤနီတစုလၢၤဘၣ်.

လံာ်ပှၤစံၣ်ညီၣ်ကွီၢ် 5:4

ယွၤဧၢ, ဖဲနဟးထီၣ်လၢကစၢၢ်စ့ဧၢ်, ဖဲနဟဲထီၣ်လၢကီၢ်အဒိၣ်ပူၤန့ၣ်, ဟီၣ်ခိၣ်ဟူးဝးဝဲ, ဒီးတၢ်စူၤလီၤလၢမူကပိာ်လိၤလီၤ. မ့ၢ်ဝဲလီၤ. တၢ်အၢၣ်တဖၣ်ဒုးစူၤလီၤထံန့ၣ်လီၤ.

လံာ်စီၤၡမူၤအ့လးအခီၣ်ထံးတဘ့ၣ် 17:26

စီၤဒၤဝံးသံကွၢ်ပှၤတဖၣ်လၢအအိၣ်ဘူးဒီးအီၤ, “ပှၤတဂၤလၢအမၤသံပှၤဖလ့ၡသးဖိတဂၤန့ၣ်ဒီးမၤသဘျ့ထီၣ် ပှၤအံၣ်စရ့လးဖိလၢတၢ်ဒုၣ်ဒွဲၣ်အံၤန့ၣ်ကမၤန့ၢ်တၢ်မနုၤ လဲၣ်. ဝံၤဒီးပှၤဖလ့ၡသးဖိလၢအတစူၢ်တနာ်ယွၤဒီးထီဒါကစၢ်ယွၤလၢ အမူဝဲတဂၤအသုးမုၢ်န့ၣ်မ့ၢ်မတၤတဂၤလဲၣ်.”

လံာ်စီၤၡမူၤအ့လးအခီၣ်ထံးတဘ့ၣ် 17:36

ယမၤသံတ့ၢ်ခ့ယုၢ်တဖၣ်, တၤသူတဖၣ်ဒီးယကမၤတၢ်တမံၤဃီလၢပှၤ တစူၢ်တနာ်တၢ်ပှၤဖလ့ၡသးဖိတဂၤအံၤလၢအခီၣ်ဆၢ ကစၢ်ယွၤလၢအမူဝဲတဂၤအသုးမုၢ်န့ၣ်လီၤ.”