လံာ်ပှၤစံၣ်ညီၣ်ကွီၢ် 7:14 - Sgaw Karen Common Bible

¹⁴ အတံၤသကိးစံးဆၢအီၤ, “တၢ်န့ၣ်မ့ၢ်ပှၤအံၣ်စရ့လးဖိ စီၤယိၤအၣ်အဖိခွါစီၤကံးဒဧိၣ်အနးန့ၣ်လီၤ. အခီပညီအဂၤတအိၣ်ဘၣ်. ကစၢ်ယွၤဟ့ၣ်လီၤအီၤတၢ်မၤနၢၤလၢပှၤမံးဒယၣ်ဖိဒီးပဝဲသုးမုၢ် ဒီဖုညါအဖီခိၣ်လံ.”

လံာ်ပှၤစံၣ်ညီၣ်ကွီၢ် 7:14 Iomraidhean Croise

လံာ်စီၤယိၤဘး 1:10

နကဟုဘံၣ်ကယာ်ဘၢအီၤ, အပှၤဟံၣ်ဖိဃီဖိဒီးတၢ်လၢအအိၣ် ဒီးအီၤခဲလၢာ်ထီဘိန့ၣ်လီၤ. နဆိၣ်ဂ့ၤတၢ်လၢအမၤဝဲခဲလၢာ် ဒီးနဟ့ၣ်တ့ၢ်လံအီၤဂီၤဖံးလၢလၢပှဲၤပှဲၤတုၤအကမၤပှဲၤထံကီၢ် ဒီဘ့ၣ်န့ၣ်လီၤ.

လံာ်တၢ်ဂံၢ် 22:38

စီၤဘံးလၣ်စံးဆၢအီၤ, “ယဟဲလံ, တမ့ၢ်ဘၣ်ဧါ. ဘၣ်ဆၣ်ဒီးခဲအံၤယအိၣ်ဒီးတၢ်စိကမီၤမနုၤန့ၣ်လဲၣ်. ယတဲကသ့ဒၣ်ထဲတၢ်လၢကစၢ်ယွၤမၢယစံးဧိၤလီၤ.”

လံာ်တၢ်ဂံၢ် 23:20

ယဘၣ်တၢ်သိၣ်လိနဲၣ်ယုၤတ့ၢ်ယၤလၢယကဆိၣ်ဂ့ၤတၢ်အဂီၢ်လီၤ. ဒီးဖဲကစၢ်ယွၤဆိၣ်ဂ့ၤတၢ်အခါန့ၣ်ယထုးက့ၤအီၤတန့ၢ်ဘၣ်.

လံာ်တၢ်ဂံၢ် 23:5

ယွၤတဲဘၣ်စီၤဘံးလၣ်တၢ်လၢကဘၣ်တဲဝဲ, ဒီးဆှၢလီၤကဒါက့ၤ အီၤဆူစီၤဘၤလးအအိၣ်လၢကဟ့ၣ်လီၤအီၤအဝဲအတၢ်ကစီၣ်န့ၣ်လီၤ.

လံာ်စီၤယိၤၡူ 2:24

ဒီးစံးဝဲဒၣ်, “ပသ့ၣ်ညါလီၤတံၢ်လၢယွၤဟ့ၣ်လီၤပှၤထံကီၢ်ဒီဘ့ၣ်လံ. ပှၤဖဲန့ၣ်ခဲလၢာ်ပျံၤပှၤဒိၣ်မးန့ၣ်လီၤ.”

လံာ်စီၤယိၤၡူ 2:9

ဒီးစံးဘၣ်အဝဲသ့ၣ်, “ယသ့ၣ်ညါလၢယွၤဟ့ၣ်လီၤသုကီၢ်အံၤလီၤ. ပှၤကိးဂၤဒဲးလၢထံကီၢ်ပူၤအံၤပျံၤသုလီၤ.

လံာ်စီၤယိၤၡူ 5:1

ဖဲပှၤအမိၢ်ဖိအစီၤပၤခဲလၢာ်လၢ အအိၣ်လၢထံကျိယၢ်ဒ့ၣ်အမုၢ်နုာ်, ဒီးပှၤကနၤဧၣ်ဖိအစီၤပၤခဲလၢာ်လၢအအိၣ်လၢပီၣ်လဲၣ်ဖးဒိၣ် မဲးဒံးထၢၣ်ရ့နယၢၣ်အနံၤ, နၢ်ဟူဝဲလၢကစၢ်မၤလီၤသံးကွံာ်ယၢ်ဒ့ၣ်အထံတုၤလၢပှၤအံၣ်စရ့ လးဖိခဲလၢာ်ခီဂာ်တၢ်သ့သတးဒီး, အဝဲသ့ၣ်အသးလီၤစၢ်ဝဲဒီးတၢ်သူၣ်ဒူ သးဒူတအိၣ်လၢၤလၢအပူၤလၢပှၤအံၣ်စရ့လးဖိ တဖၣ်အဃိန့ၣ်လီၤ.

လံာ်ပှၤစံၣ်ညီၣ်ကွီၢ် 3:28

အဝဲစံးဝဲ, “ပိာ်ယခံတက့ၢ်. ယွၤဟ့ၣ်လီၤသုတၢ်မၤနၢၤလၢ သုဒုၣ်သုဒါပှၤမိၤအးဖိတဖၣ်အဖီခိၣ်လံ.” မၤသးဒ်န့ၣ်ဒီးအဝဲသ့ၣ်ပိာ်ထီၣ်စီၤအ့ဟူာ်အခံ ဒီးမၤန့ၢ်တၢ်လီၢ်တတီၤဖဲပှၤမိၤအးဖိတဖၣ်ကခီထံကျိယၢ်ဒ့ၣ်န့ၣ်လီၤ. အဝဲသ့ၣ်တပျဲဘၣ်ပှၤကခီဂာ်တၢ်နီတဂၤဘၣ်န့ၣ်လီၤ.

လံာ်ပှၤစံၣ်ညီၣ်ကွီၢ် 7:13

ဖဲစီၤကံးဒဧိၣ်လဲၤတုၤန့ၣ်, အဝဲနၢ်ဟူပှၤတဂၤတဲဘၣ်အတံၤ သကိးလၢတၢ်မံမီၢ်တယုၢ်အဂ့ၢ်န့ၣ်လီၤ. အဝဲစံး, “ယမံမီၢ်လၢဘုမုယီၤအကိၣ်တလိၣ်ဟဲတလ့ၣ်လီၤအသး ဆူပသူၣ်ဒဲအလီၢ်ဒီးဘၣ်ဒိဒဲတဖျၢၣ်လီၤ. ဒီးဒဲန့ၣ်လီၤပှီၢ်ကွံာ်ဝဲအိၣ်ဒါလီၤအသးဘံၣ် သလၣ်လၢဟီၣ်ခိၣ်လိၤလီၤ.”

လံာ်ပှၤစံၣ်ညီၣ်ကွီၢ် 7:15

တုၤစီၤကံးဒဧိၣ်နၢ်ဟူဘၣ်ပှၤတဂၤန့ၣ်အတၢ်မံမီၢ်ဒီးအခီပညီ န့ၣ်အဝဲတီၤလီၤလၢအခီၣ်လ့ၢ်ခိၣ်ဒီးဘူၣ်ထီၣ်ဘါထီၣ်ယွၤန့ၣ် လီၤ. တုၤနုၤတစုအဝဲက့ၤကဒါက့ၤဆူပှၤအံၣ်စရ့လးဖိသူၣ်ဒဲအလီၢ် ဒီးစံးဝဲ, “ဂဲၤထၢၣ်တက့ၢ်. ယွၤဟ့ၣ်လီၤသုတၢ်မၤနၢၤလၢပှၤမံးဒယၣ်ဖိ အသုးမုၢ်အဖီခိၣ်လံ.”

လံာ်စီၤၡမူၤအ့လးအခီၣ်ထံးတဘ့ၣ် 14:12

အန့ၣ်ဝံၤဒီးအဝဲသ့ၣ်ကိးထီၣ်ဆူစီၤယိနၤသၣ်ဒီးပှၤသးစၢ် ပိာ်ခွါန့ၣ်အအိၣ်, “ဟဲထီၣ်ဆူအံၤတက့ၢ်. ပအိၣ်ဒီးတၢ်ဂ့ၢ်တနီၤလၢပအဲၣ်ဒိးတဲဘၣ်သုလီၤ.” စီၤယိၤနၤသၣ်စံးဘၣ်ပှၤသးစၢ်ပိာ်ခွါန့ၣ်, “ပိာ်ယခံတက့ၢ်. ယွၤဟ့ၣ်လီၤကီၢ်အံၣ်စရ့လးတၢ်မၤနၢၤလၢအဝဲသ့ၣ်အဖီခိၣ်လံ.”