လံာ်ယၡါယၤ 66:1 - Sgaw Karen Common Bible

¹ ယွၤစံးဝဲဒၣ်, “မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ် ယခီၣ်ယီၢ်လီၤတၢ်အလီၢ်လီၤ. ဟံၣ်လၢသုသူၣ် ထီၣ်လၢယဂီၢ်ကသ့, ကမ့ၢ်ဟံၣ်ဒ်လဲၣ်တကလုာ်လဲၣ်. ကမ့ၢ်တၢ်လီၢ်ဒ်လဲၣ်တကလုာ်လၢယကအိၣ်ကဆိးလၢ အပူၤအဂီၢ်န့ၣ်လဲၣ်.

လံာ်ယၡါယၤ 66:1 Iomraidhean Croise

လံာ်စီၤပၤအခီၣ်ထံးတဘ့ၣ် 8:27

ဘၣ်ဆၣ်ဒီးကစၢ်ယွၤဧၢ, မ့ၢ်နအိၣ်နဆိးနီၢ်နီၢ်လၢဟီၣ်ခိၣ်အံၤ ကသ့စ့ၢ်ကီးဧါ. ကယဲၢ်မူခိၣ်အလီၢ်ဒၣ်လဲာ်တလဲၢ်ဝဲလၢနကအိၣ်ကဆိးဘၣ်အဃိ, ယွၤအတၢ်လုၢ်ဟံၣ်လၢယဘှီ ထီၣ်အံၤတြီၢ်ဝဲလၢလၢလီၣ်လီၣ်လၢနဂီၢ်ကသ့ဒ်လဲၣ်.

လံာ်ကွဲးနီၣ်တၢ်အခီၣ်ထံးတဘ့ၣ် 28:2

စီၤဒၤဝံးဆၢထၢၣ်လၢအဝဲသ့ၣ်အမဲာ်ညါ, ဒီးကတိၤလီၤတၢ်ဆူ အဝဲသ့ၣ်အအိၣ်, “ယပှၤထံဖိကီၢ်ဖိသ့ၣ်ဧၢ, ဒိကနၣ်ယၤတက့ၢ်. တၢ်မိၢ်သူၣ်ထီၣ်တ့ၢ်ဘၣ်ယသးလၢဟံၣ်အဂၢၢ်အကျၢၤတဖျၢၣ်လၢယွၤ အတလါစီဆှံ, ယွၤပကစၢ်ယွၤအခီၣ်ယီၢ်လီၤအလီၢ်အဂီၢ်န့ၣ်လီၤ. လၢတၢ်မၤလၤမၤကပီၤအီၤအဂီၢ်, ယကတဲာ်ကတီၤတ့ၢ်တၢ်တဖၣ်လၢတၢ်ကသူၣ်ထီၣ်တၢ်လုၢ်ဟံၣ်တဖျၢၣ်,

လံာ်ကွဲးနီၣ်တၢ်ခံဘ့ၣ်တဘ့ၣ် 2:5

ယအဲၣ်ဒိးလၢတၢ်လုၢ်ဟံၣ်လၢယသူၣ်ထီၣ်အံၤကမ့ၢ်တၢ်လုၢ်ဟံၣ်ဖး ဒိၣ်တဖျၢၣ်, မ့ၢ်လၢပကစၢ်ယွၤန့ၣ်, ဒိၣ်န့ၢ်ဒံးကစၢ်အဂၤအဃိ န့ၣ်လီၤ.

လံာ်ကွဲးနီၣ်တၢ်ခံဘ့ၣ်တဘ့ၣ် 6:18

ဘၣ်ဆၣ်ဒီး, အိကစၢ်ယွၤဧၢ, နအိၣ်နဆိးလၢဟီၣ်ခိၣ်ချၢလၢပှၤပိာ် ခွါတဖၣ်ဒီးပှၤပိာ်မုၣ်တဖၣ်အကျါ, ဘၣ်ကသ့နီၢ်နီၢ်ဧါ. ကယဲၢ်မူခိၣ်အလီၢ်ခဲလၢာ်ဒၣ်လဲာ်န့ၣ်, တလဲၢ်ဝဲတုၤကလၢဝဲလၢနကအိၣ်ကဆိးအဂီၢ်န့ၣ်ဘၣ်. လၢတၢ်န့ၣ်အဃိ, ယွၤအတၢ်လုၢ်ဟံၣ်လၢယသူၣ်ထီၣ်တ့ၢ်အီၤအံၤ, လဲၢ်ဝဲလၢလၢလီၣ်လီၣ်ကသ့ဒ်လဲၣ်.

စံးထီၣ်ပတြၢၤ 11:4

ယွၤအိၣ်ဝဲလၢအတၢ်လုၢ်ဟံၣ်စီဆှံအပူၤ, အိၣ်ဒီးအလီၢ်ပစိာ်လၢမူခိၣ်လီၤ. အဝဲကွၢ်လီၤဝဲပှၤဟီၣ်ခိၣ်ဖိခဲလၢာ် ဒီးကွၢ်ထံကွၢ်ဆးအတၢ်မၤတဖၣ်န့ၣ်လီၤ.

စံးထီၣ်ပတြၢၤ 132:7

ပစံးပဝဲ, “မ်ပလဲၤသကိးဆူ ယွၤအဟံၣ်, မ်ပဘူၣ်ထီၣ်ဘါထီၣ်တၢ်လၢ အလီၢ်ပစိာ်အမဲာ်ညါတက့ၢ်.”

စံးထီၣ်ပတြၢၤ 99:9

စံးထီၣ်ပတြၢၤယွၤ, ပကစၢ်ယွၤ, ဒီးဘူၣ်တၢ်ဘါတၢ်လၢအကစၢၢ်စီဆှံန့ၣ်တက့ၢ်. အဂ့ၢ်ဒ်အံၤယွၤပကစၢ်ယွၤန့ၣ်စီဝဲဆှံဝဲလီၤ.

လံာ်ယၡါယၤ 57:15

ယဲဒၣ်အံၤ, ယမ့ၢ်ကစၢ်ယွၤလၢအအိၣ်ထီၣ်ထီဒီးစီဆှံဝဲ, ယွၤလၢအအိၣ်မူအစိၤစိၤအဃၣ်ဃၣ်လီၤ. ယအိၣ်လၢတၢ်လီၢ်ထီၣ်ထီဒီးစီဆှံတတီၤ, ဘၣ်ဆၣ်ဒီးယအိၣ်စ့ၢ် ကီးလၢပှၤဂီၢ်မုၢ်လၢအဆီၣ်လီၤအသးဒီးပီၢ်ယၢ်လီၤက့ၤအသး အကျါ, ဒ်သိးယဟ့ၣ်က့ၤအဝဲသ့ၣ်အတၢ်နာ် န့ၢ်ဒီးတၢ်မုၢ်လၢ်ကသ့ဝဲအဂီၢ်လီၤ.

လံာ်ယၡါယၤ 60:13

သ့ၣ်တဖၣ်လၢတၢ်မၤန့ၢ်အီၤလၢသ့ၣ်ဆှိ, သ့ထိးအီၣ်ဒီးသ့ၣ်ဆှိတအၤၡူၢ်, သ့ၣ်အဂ့ၤကတၢၢ်လၢကီၢ်လဘၤနိၣ်အသ့ၣ်ပှၢ်ပူၤတဖၣ် ကဘၣ်တၢ်ဟဲစိာ်အီၤလၢတၢ်ကသူၣ်ထီၣ်က့ၤနၤအဂီၢ်, ဝ့ၢ်ယရူၤၡလ့ၣ်ဧၢ, ဒ်သိးကမၤဃံမၤလၤထီၣ်ယတၢ်လုၢ်ဟံၣ်, ဒ်သိးယဝ့ၢ်ကအိၣ်ဒီးအလၤကပီၤအဂီၢ်န့ၣ်လီၤ.

လံာ်ယံးရမံယၤ 23:24

ပှၤအိၣ်ခူသူၣ်လၢတၢ်လီၢ်ဖဲယထံၣ်အီၤတသ့, တအိၣ်နီတဂၤဘၣ်. မ့ၢ်သုတသ့ၣ်ညါဘၣ်လၢယအိၣ် လၢတၢ်လီၢ်ကိးပူၤဒဲးလၢမူခိၣ်ဒီးလၢဟီၣ်ခိၣ်န့ၣ်ဘၣ်ဧါ.

လံာ်မၤလကံ 1:11

ပှၤဂီၢ်မုၢ်လၢမုၢ်ထီၣ်တခီပၢၢ်တုၤလၢမုၢ်နုာ်တခီမၤလၤကပီၤယၤလီၤ. ဒီးအဝဲသ့ၣ်ကဆိၣ်ကဲၤတၢ်နၢမူလၢယဂီၢ်လၢတၢ်လီၢ်ကိးပူၤဒဲးဒီး ကလုၢ်တၢ်လုၢ်ကဆှီလၢယဂီၢ်လီၤ. အဝဲသ့ၣ်ခဲလၢာ်မၤလၤကပီၤယၤလီၤ.

လံာ်မးသဲ 12:6

ယတဲဘၣ်သု, တၢ်တမံၤလၢအကါဒိၣ်န့ၢ်ဒံးတၢ်လုၢ်ဟံၣ်န့ၣ်အိၣ်ဝဲ ဒၣ်ဖဲအံၤလီၤ.

လံာ်မးသဲ 24:2

ဒီးယ့ၣ်ၡူးစံးဘၣ်အဝဲသ့ၣ်, “တၢ်တဖၣ်အံၤသုထံၣ်သုဝဲတမ့ၢ်ဘၣ်ဧါ. ယစံးဘၣ်တဲဘၣ်သုတၢ်မ့ၢ်တၢ်တီ, တၢ်သူၣ်ထီၣ်အလၢၢ်တဖၣ်အံၤကဘၣ်တၢ်မၤလီၤပှီၢ်ကွံာ်အီၤခဲလၢာ်, ဒီးတအိၣ်လၢၤလၢအလီၢ်ဒၣ်ဝဲနီတဖျၢၣ်လၢၤဘၣ်.”

မၤတၢ် 17:24

ကစၢ်ယွၤလၢအတ့လီၤပာ်လီၤဟီၣ်ခိၣ်ဒီးတၢ်အိၣ်လၢ အပူၤခဲလၢာ်န့ၣ်, မ့ၢ်မူခိၣ်ဒီးဟီၣ်ခိၣ်အကစၢ်, ဒီးတအိၣ်တဆိးလၢတၢ်လုၢ်ဟံၣ်လၢပှၤကညီဘှီအီၤလၢ အစုပူၤဘၣ်န့ၣ်လီၤ.