လံာ်ယၡါယၤ 62:9 - Sgaw Karen Common Bible

⁹ မ့မ့ၢ်သုဝဲလၢအဖှံလီၤတ့ၢ်ဒီးကူးက့ၤတ့ၢ် ဘုဧိၤဟုဧိၤတဖၣ် ကအီၣ်ဘၣ်ကိၣ်ဒီးစံးထီၣ်ပတြၢၤယွၤလီၤ. သုဝဲလၢအအံးထွဲကွၢ်ထွဲဒီးထၢဖှိၣ်က့ၤစပံးသၣ်တဖၣ် ကအီစပံးထံလၢယတၢ်လုၢ်ဟံၣ်အဂၢၤတဖၣ် အပူၤန့ၣ်လီၤ.

လံာ်ယၡါယၤ 62:9 Iomraidhean Croise

လံာ်ယၡါယၤ 55:2

ဘၣ်မနုၤအဃိသုကဘၣ်မၤလၢာ်ကျိၣ်လၢာ်စ့လၢတၢ်တတံၤ သူၣ်တံၤသးအဂီၢ်န့ၣ်လဲၣ်. ဘၣ်မနုၤအဃိသုကဘၣ်မၤလၢာ်သုဘူးသုလဲဒီးသူၣ်ဝံၤသၣ်စ့ၤဒံး ဒၣ်တၢ်န့ၣ်လဲၣ်. ဒိကနၣ်ယၤဒီးမၤတၢ်လၢယစံးဘၣ်သုန့ၣ်တက့ၢ်. အန့ၣ်ဒီး, သုကမုာ်လၤသးခုလၢတၢ်အီၣ်အဂ့ၤကတၢၢ်လၢ တၢ်အီၣ်ခဲလၢာ်အကျါလီၤ.

လံာ်ယၡါယၤ 65:13

လၢတၢ်န့ၣ်အဃိ, ယစံးဘၣ်တဲဘၣ်သုလၢပှၤလၢအဘူၣ်ထီၣ် ဘါထီၣ်ဒီးစူၢ်ယၤန့ၣ်ကအိၣ်ဒီးတၢ်အီၣ်ကုးအီပှဲၤ, မ့မ့ၢ်, သုဝဲသုကသၣ်ဝံၤလီၤဒိန့ၣ်လီၤ. အဝဲသ့ၣ်ကသူၣ်ဖှံ သးညီဝဲ, မ့မ့ၢ်သုဝဲသုကဘၣ်တၢ်မၤမဲာ်ဆှးကွံာ်သုလီၤ.

လံာ်ယၡါယၤ 65:21

ပှၤဂီၢ်မုၢ်ကဘှီထီၣ်ဟံၣ်ဃီတဖၣ်ဒီးအကစၢ်ဒၣ်ဝဲကအိၣ်လၢ အပူၤ, ဟံၣ်ဃီတဖၣ်န့ၣ်တဘၣ်တၢ်သူအီၤလၢပှၤအဂၤတဖၣ်ဘၣ်. အဝဲသ့ၣ်ကသူၣ်လီၤဖျးလီၤစပံးလီၢ်တဖၣ်ဒီးမုာ်လၤသးခုလၢ အစပံးထံအပူၤ, ပှၤအဂၤတဖၣ်တအီဘၣ်စပံးထံန့ၣ်ဘၣ်.

လံာ်ယၡါယၤ 65:22

ယပှၤဂီၢ်မုၢ်ကအိၣ်မူတၢ်အိၣ်မူအိၣ်ကၢအိၣ်ခိးဒ်သ့ၣ်ထူၣ်တဖၣ် အသိးန့ၣ်လီၤ. အဝဲသ့ၣ်ကမုာ်လၤသးခုဘၣ်လၢလၢပှဲၤပှဲၤ လၢတၢ်လၢအဝဲသ့ၣ်မၤတ့ၢ်ဝဲတဖၣ်အဃိလီၤ.

လံာ်ယံးရမံယၤ 31:5

မၤကဒီး တစုသုကသူၣ်လီၤဖျးလီၤ စပံးလီၢ်တဖၣ်လၢ ကီၢ်ၡၤမရံ အတၢ်လူၢ်တဖၣ်အလိၤ, ဒီး ပှၤတဖၣ်လၢ အသူၣ်လီၤအီၤန့ၣ် ကအီၣ်တၢ်လၢ စပံးလီၢ်တဖၣ် ဟ့ၣ်ထီၣ်ဝဲန့ၣ်လီၤ.

လံာ်ယဃ့းစက့လး 40:14

ဒၢးလၢအအိၣ်လၢတၢ်ထိးနါကတၢၢ်တဖျၢၣ်န့ၣ်, လဲၤပၢၢ်တုၤဆူယွၤအတၢ်လုၢ်ဟံၣ်အဂၢၤန့ၣ်လီၤ. အဝဲထိၣ်ဒၢး အဝဲန့ၣ်ဒီးထံၣ်ဘၣ်ဝဲလၢအလဲၢ်အိၣ်ဝဲအပျၢ်ခံဆံန့ၣ်လီၤ.

လံာ်ယိၤအ့လး 2:26

ဒီးခဲကနံၣ်အံၤ, သုကအိၣ်ဒီးတၢ်အီၣ်တၢ်အီအါအါ ဂီၢ်ဂီၢ်လၢသုကအီၣ်အဂီၢ်, ဒီးသုကသူၣ်မံသးမံန့ၣ်လီၤ. သုကစံးထီၣ်ပတြၢၤယွၤ, သုကစၢ်ယွၤ, ပှၤလၢအမၤတ့ၢ်တၢ်လီၤလိၢ်လီၤလးလၢသုဂီၢ်န့ၣ်လီၤ. ယပှၤဂီၢ်မုၢ်တဘၣ်တၢ်ဒုၣ်ဒွဲၣ်ကဒီးအီၤနီတစုလၢၤဘၣ်.

လံာ်စကၤရယၤ 3:7

သ့တၢ်လၢာ်အယွၤစံးဒ်အံၤ, “နမ့ၢ်စူၢ်ယတၢ်သိၣ်တၢ်သီ တဖၣ်ဒီးမၤမူဒါတဖၣ်လၢယဟ့ၣ်လီၤနၤန့ၣ်ဒီး, နကပၢဆှၢဘၣ်ဒံးယတၢ်လုၢ်ဟံၣ်ဒီးအဂၢၤတဖၣ်, ဒီးယကဒိကနၣ်နတၢ်ထုကဖၣ်ဒ်ယဒိကနၣ်က လူးတဖၣ်လၢအအိၣ်လၢယမဲာ်ညါအတၢ်ထုကဖၣ်အသိးန့ၣ်လီၤ.

လံာ်သိၣ်လီၤသီလီၤတၢ် 12:12

သူၣ်ခုသးခုဖဲန့ၣ်လၢအဝဲအမဲာ်ညါ, ဃုာ်ဒီးသုဖိတဖၣ်, သုကုၢ်သုပှၤတဖၣ်, ဒီးပှၤလ့ၤဝံဖိတဖၣ်လၢအအိၣ်လၢသုဝ့ၢ်တဖၣ်အပူၤတက့ၢ်, ဒီးသ့ၣ်နီၣ်ထီၣ်က့ၤလၢပှၤလ့ၤဝံဖိတဖၣ်တအိၣ်ဘၣ်ဒီးအဟီၣ်ခိၣ် ဒၣ်ဝဲဘၣ်န့ၣ်တက့ၢ်.

လံာ်သိၣ်လီၤသီလီၤတၢ် 12:7

ဖဲန့ၣ်, လၢယွၤသုကစၢ်ယွၤလၢအဆိၣ်ဂ့ၤသုအမဲာ်ညါန့ၣ်, သုဝဲဒီးသုပှၤဟံၣ်ဖိဃီဖိတဖၣ်ကအီၣ်တၢ်ဒီးမုာ်လၤသးခုလၢ ကယဲၢ်တၢ်ဂ့ၤတဖၣ်လၢသုမၤတ့ၢ်အီၤအဃိန့ၣ်လီၤ.

လံာ်သိၣ်လီၤသီလီၤတၢ် 16:11

သူၣ်ခုသးခုလၢအမဲာ်ညါ, ဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတ ဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢသုဝ့ၢ်တဖၣ်ပူၤန့ၣ်တက့ၢ်. မၤတၢ်အံၤဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်တက့ၢ်.

လံာ်သိၣ်လီၤသီလီၤတၢ် 16:14

သူၣ်ခုသးခုလၢဘူၣ်ပူၤဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢဝ့ၢ်တဖၣ်အပူၤတက့ၢ်.