လံာ်ယၡါယၤ 61:3 - Sgaw Karen Common Bible

³ ဒ်သိးယကဟ့ၣ်ပှၤလၢအဘၣ်ဟီၣ်ဘၣ်ယၢၤလၢ ဝ့ၢ်စံယိၣ်တဖၣ် လၢတၢ်သးခုဒီးတၢ်သူၣ်ဖှံသးညီ လၢတၢ်သူၣ်အုးသးအုးအလီၢ်, တၢ်သးဝံၣ်စံးထီၣ်ပတြၢၤတယုၢ် လၢတၢ်ဘၣ်မိၢ်ဘၣ်မးအလီၢ်န့ၣ်လီၤ. အဝဲသ့ၣ်ကလီၤဂာ်ဒီးသ့ၣ်တဖၣ်လၢ ယွၤအကစၢ်ဒၣ်ဝဲသူၣ်လီၤဖျးလီၤဝဲန့ၣ်လီၤ. အဝဲသ့ၣ်ခဲလၢာ်ကမၤတၢ်လၢအဘၣ်ဒီးကစၢ်ယွၤကဘၣ်တၢ် စံးထီၣ်ပတြၢၤအီၤလၢတၢ်လၢအဝဲမၤတ့ၢ်ဝဲအဃိလီၤ.

လံာ်ယၡါယၤ 61:3 Iomraidhean Croise

လံာ်နီၢ်အ့ၤစတၢ် 8:15

စီၤမၢ်ဒကဲၤဟးထီၣ်ဝဲလၢနီပူၤ, ကူသိးဝဲဒၣ်စီၤပၤအကူအသိး, လၢတၢ်လါဒီးတၢ်ဝါဆ့ကၤဖးထီတဘ့ၣ်လၢပှၤမၤအီၤလၢ ဖှီဝါကဆှၣ်လုးတကုာ်အိၣ်ဒီးခိၣ်သလုးထူဖးဒိၣ်လီၤ. ဝ့ၢ်ၡူၡၣ်အပှၤဝ့ၢ်ဖိကိးပသူထီၣ်လၢတၢ်သူၣ်ခုသးခုဒီး တၢ်သူၣ်ဖှံသးညီလၢကျဲတဖၣ်အပူၤလီၤ.

လံာ်နီၢ်အ့ၤစတၢ် 9:22

မုၢ်နံၤတဖၣ်အံၤမ့ၢ်မုၢ်နံၤလၢပှၤယူဒၤဖိတဖၣ်မၤပူၤ ဖျဲးအသးလၢအဒုၣ်အဒါအတၢ်ကူၣ်အၢ, ဒီးလါအံၤမ့ၢ်လါတလါ လၢအလဲလိာ်ကွံာ်တၢ်သူၣ်အုးသးအုးဒီးတၢ်သးဟးဂီၤ, ဆူတၢ်သူၣ်ခုသးခုဒီးတၢ်သူၣ်ဖှံသးညီန့ၣ်လီၤ. အဝဲသ့ၣ်ကဘၣ်တိၢ်န့ၢ်ဖံးဃာ်မုၢ်နံၤတဖၣ်အံၤ, အိၣ်ဒီးတၢ်အီၣ်တၢ်အီအမူးတဖၣ်ဒီးတၢ်သူၣ်ဖှံသးညီအမူး, တၢ်ဟ့ၣ်လိာ်သကိးအသးလၢတၢ်အီၣ်တၢ် အီတဖၣ်တဂၤဒီးတဂၤဒီးဆူပှၤဖှီၣ်ဖိယာ်ဖိန့ၣ်လီၤ.

စံးထီၣ်ပတြၢၤ 104:15

ဒီးစပံးထံလၢကမၤသးခုပှၤကညီအသး, သိလၢအကဒုးကပီၤထီၣ်ပှၤကညီအမဲာ်, ဒီးကိၣ်လၢကဟ့ၣ်ဂံၢ်ဟ့ၣ်ဘါ ပှၤကညီအသးအဂီၢ်လီၤ.

စံးထီၣ်ပတြၢၤ 149:4

အဂ့ၢ်ဒ်အံၤ, ယွၤဘၣ်အသးလၢအပှၤဂီၢ်မုၢ်လီၤ. မၤလၤကပီၤပှၤလၢအသူၣ်စူၤအသးစူၤ လၢတၢ်မၤနၢၤလီၤ.

စံးထီၣ်ပတြၢၤ 23:5

နကတဲာ်ကတီၤစီၢ်နီၤခိၣ်လၢယဂီၢ် လၢယဒုၣ်ယဒါတဖၣ်အမဲာ်ညါလီၤ. နဖှူယခိၣ်လၢသိ, ယလီခီတဖျၢၣ်ပှဲၤလုာ်ကွံာ်လီၤ.

စံးထီၣ်ပတြၢၤ 30:11

ယတၢ်မိၣ်တၢ်မးန့ၣ်နဒုးကဲထီၣ်အီၤဆူ တၢ်ဂဲၤကလံၣ်လၢယဂီၢ်, နဟံးထီၣ်ကွံာ်ယတၢ်သူၣ်အုးသးအုး ဒီးဘိၣ်ဘံယၤလၢတၢ်သူၣ်ခုသးခု,

စံးထီၣ်ပတြၢၤ 30:12

ဒ်သိးယသးအသုတအိၣ်ဘှီၣ်တဂ့ၤ ဒီးကစံးထီၣ်ပတြၢၤနၤအဂီၢ်လီၤ. ယွၤ, ယကစၢ်ယွၤဧၢ, ယကစံးထီၣ်ပတြၢၤနၤလီၤထူလီၤယိာ်လီၤ.

စံးထီၣ်ပတြၢၤ 45:7

နအဲၣ်တၢ်လၢအမ့ၢ်ဝဲတီဝဲ ဒီးသးဟ့တၢ်အၢတၢ်သီန့ၣ်လီၤ. လၢတၢ်န့ၣ်အဃိကစၢ်ယွၤ, နကစၢ်ယွၤ, ဃုထၢတ့ၢ်နၤ ဒီးလူလီၤတၢ်သးဖှံလၢနလိၤ အါန့ၢ်စီၤပၤအဂၤတက့ၢ်န့ၣ်လီၤ.

လံာ်ပှၤစံၣ်တဲၤတဲလီၤတၢ် 9:8

ပာ်ဖျါနမဲာ်လၢတၢ်သူၣ်ခုသးခုဒီးတၢ်သူၣ်ဖှံသးညီအပူၤထီ ဘိတက့ၢ်.

လံာ်ယၡါယၤ 12:1

မုၢ်တနံၤကဟဲဝဲဖဲပှၤကသးဝံၣ်ထီၣ်, “ယွၤဧၢ, ယစံးထီၣ်ပတြၢၤနၤလီၤ. နသးဒိၣ်တ့ၢ်ယၤ, ဘၣ်ဆၣ်ခဲအံၤနမၤမုာ်ယသးဒီးနတသးဒိၣ်လၢၤယၤလၢၤဘၣ်.

လံာ်ယၡါယၤ 26:2

အိးထီၣ်ဝ့ၢ်အတြဲၤတဖၣ် ဒီးပျဲပှၤအတီအလိၤတကလုာ်လဲၤနုာ်ဝဲ, ပှၤတကလုာ်လၢအပှၤဂီၢ်မုၢ်မၤတၢ်တီတၢ်လိၤ န့ၣ်တက့ၢ်.

လံာ်ယၡါယၤ 44:23

ကိးထီၣ်လၢတၢ်သးခုတက့ၢ်, သုဝဲမူခိၣ်မူကပိာ်လိၤသ့ၣ်တဖၣ်ဧၢ, ကိးထီၣ်, ဟီၣ်ခိၣ်အလီၢ်လၢအယိာ်တဖၣ်ဧၢ, ကိးထီၣ်လၢတၢ်သးခုတက့ၢ်, ကစၢၢ်သ့ၣ်တဖၣ်ဒီးသ့ၣ်ထူၣ်ကိးထူၣ်ဒဲးလၢသ့ၣ်ဒိၣ်ပှၢ်တီၣ်ပူၤသ့ၣ်ဧၢ, ယွၤဒုးနဲၣ်အတၢ်ဒိၣ်တၢ်မုၢ်ခီဖျိတၢ်အုၣ်က့ၤခီၣ်က့ၤ အပှၤဂီၢ်မုၢ်အံၣ်စရ့လးလီၤ.

လံာ်ယၡါယၤ 46:13

တၢ်မၤနၢၤအမုၢ်နံၤအံၤယဟဲစိာ်ဘူးထီၣ်အီၤလံ. တအိၣ်ယံၤလၢၤဘၣ်. ယတၢ်မၤနၢၤအံၤတၢ်တမၤယံာ်လၢၤဘၣ်အီၤဘၣ်, ယကအုၣ်က့ၤခီၣ်က့ၤဝ့ၢ်ယရူၤၡလ့ၣ်ဒီးဟဲစိာ်တၢ်လၤတၢ်ကပီၤလၢ ကီၢ်အံၣ်စရ့လးအဂီၢ်ဖဲန့ၣ်လီၤ.

လံာ်ယၡါယၤ 52:1

ဝ့ၢ်ယရူၤၡလ့ၣ်ဧၢ, ဂံၢ်ဆူၣ်ဘါဆူၣ်ဒီး ဒိၣ်ကဒီးက့ၤနဲတက့ၢ်. ကစၢ်ယွၤအဝ့ၢ်စီဆှံဧၢ, ကူသိးထီၣ်နဲတၢ်ဃံဒိၣ်လၤဒိၣ်တ က့ၢ်. ပှၤတသ့ၣ်ညါယွၤတဟဲနုာ်ဘၣ်ကဒီး လၢနတြဲၤတဖၣ်အပူၤနီတစုဘၣ်.

လံာ်ယၡါယၤ 61:10

ဝ့ၢ်ယရူၤၡလ့ၣ်သူၣ်ဖှံသးညီမ့ၢ်လၢတၢ်လၢ ယွၤမၤတ့ၢ်လံဝဲအဃိလီၤ. အဝဲလီၤဂာ်ဒီးတလးမူးပိာ်မုၣ်တဂၤလၢအကယၢကယဲထီၣ် လံအသးလၢအတၢ်တ့တၢ်ဖျီအဂီၢ်လီၤ. ကစၢ်ယွၤဒုးကူထီၣ်သိးထီၣ်အီၤလၢတၢ်အုၣ်က့ၤခီၣ်က့ၤဒီး တၢ်မၤနၢၤလီၤ.

လံာ်ယံးရမံယၤ 31:13

အန့ၣ်ဒီး, မုၣ်လိၤဘိတဖၣ် ကဂဲၤကလံာ်ဝဲဒီးသးဖှံသးညီဝဲ, ဒီးပှၤပိာ်ခွါတဖၣ်, သးစၢ်ဂ့ၤသးပှၢ်ဂ့ၤ, ကသူၣ်ခုသးခုဝဲလီၤ. ယကမၤမုာ်မၤခုၣ်အဝဲသ့ၣ်, ဒီးဘိးဃၣ်အဝဲသ့ၣ် တၢ်ဟီၣ်တၢ်ယၢၤဆူ တၢ်သူၣ်ခုသးခု, အဝဲသ့ၣ်အတၢ်သူၣ်အုၣ်သးအုးဆူ တၢ်သူၣ်ဖှံသးညီန့ၣ်လီၤ.

လံာ်ယဃ့းစက့လး 34:29

ယကဟ့ၣ်အဝဲသ့ၣ်စံာ်ပျီတဖၣ်လၢအအိၣ်ဒီးဟီၣ်ခိၣ်ညၣ်ထ့ၣ်လၢ အဂ့ၤဒီးမၤကတၢၢ်ကွံာ်တၢ်သၣ်ဝံၤလီၤဒိလၢကီၢ်ပူၤန့ၣ်လီၤ. ပှၤကလုာ်အဂၤတဖၣ်တကတိၤဆဲးအဲးလၢၤဘၣ်အဝဲသ့ၣ်နီတဘျီ လၢၤဘၣ်.

လံာ်ယဃ့းစက့လး 47:7

ဒီးဖဲယဟဲတုၤဖဲန့ၣ်န့ၣ်ဒီးယထံၣ်ဘၣ်လၢသ့ၣ်တဖၣ်အိၣ်ဝဲအါအါ ဂီၢ်ဂီၢ်လၢထံကျိကၢၢ်ပၤနံၤခံခီလိာ်န့ၣ်လီၤ.

လံာ်စကၤရယၤ 3:5

အဝဲမၢပှၤမၤစၢၤအီၤတဖၣ် လၢကဒုးဖၢၣ်ထီၣ်စီၤယိၤၡူအခိၣ်လၢခိၣ်ဖၢၣ်အကဆှီတဘ့ၣ်လီၤ. အဝဲသ့ၣ်မၤဝဲဒ်န့ၣ်, ဒီးဒုးကူထီၣ်သိးထီၣ်အီၤလၢတၢ်ကူတၢ် သိးအသီတဖၣ်ဖဲယွၤအကလူးဆၢထၢၣ်ဝဲဒၣ်ဖဲန့ၣ်အခါလီၤ.

လံာ်မးသဲ 15:13

အဝဲစံးဆၢတၢ်ဒီးစံး, “ကယဲၢ်တၢ်မုၢ်တၢ်ဘိလၢယပၢ်လၢမူခိၣ်တဂၤ တသူၣ်လီၤဘၣ်ဝဲန့ၣ်, ကဘၣ်တၢ်ထဲးထီၣ်ကွံာ်အီၤလီၤ.

လံာ်မးသဲ 5:16

ဒ်မ့ၣ်အူလၢမ့ၣ်အူဒၢအလီၢ်အဖီခိၣ်အသိးန့ၣ်, ဟ့ၣ်ထီၣ်သုတၢ်ကပီၤလၢပှၤကိးဂၤဒဲးအမဲာ်ညါဒ်သိးအဝဲသ့ၣ် ကထံၣ်ဘၣ်သုတၢ်မၤအဂ့ၤတဖၣ်, ဒီးကစံးထီၣ်ပတြၢၤသုပၢ်အိၣ်လၢမူခိၣ်န့ၣ်တက့ၢ်.

လံာ်လူၤကၣ် 15:22

ဘၣ်ဆၣ်ဒီးပၢ်ကိးဃီၤအတၢ်ခ့တၢ်ပှၤတဖၣ်ဒီးစံး, ‘မၤချ့ချ့တက့ၢ်. ဟဲစိာ်ဆ့ကၤဖးထီအဂ့ၤကတၢၢ်တဘ့ၣ်ဒီးဒုးကၤထီၣ်အီၤတက့ၢ်. ဖျီၣ်လီၤပသံးတဘိလၢအစုမုၢ်လိၤဒီးဒုးဒိးထီၣ်အီၤခီၣ်ဖံးတက့ၢ်.

လံာ်ယိၤဟၣ် 15:8

ယပၢ်အလၤကပီၤဘၣ်တၢ်ဒုးနဲၣ်ဖျါထီၣ်အီၤခီဖျိလၢ သုသၣ်ထီၣ်အါမး, ဒီးလၢတၢ်အံၤအဃိ, သုကဲထီၣ် ယပျဲၢ်ယဘီၣ်တဖၣ်လီၤ.

လံာ်ယိၤဟၣ် 16:20

ယစံးဘၣ်တဲဘၣ်သုတၢ်မ့ၢ်တၢ်တီ, သုကဟီၣ်သုကယၢၤဘၣ်ဆၣ်ဒီး ဟီၣ်ခိၣ်ကသးခုလီၤ. သုကသူၣ်အုးသးအုးဘၣ်ဆၣ်ဒီး သုတၢ်သူၣ်အုးသးအုးန့ၣ်, ကကဲထီၣ်ကဒါက့ၤလၢ တၢ်သူၣ်ခုသးခု န့ၣ်လီၤ.

1 ကရံၣ်သူး 3:9

အဂ့ၢ်ဒ်အံၤ, ပမ့ၢ်ပှၤမၤသကိးတၢ်တဖၣ်လၢအမၤဃုာ်တၢ်တပူၤဃီလၢကစၢ်ယွၤ အဂီၢ်, ဒီးသုမ့ၢ်ကစၢ်ယွၤအစံာ်လီၢ်ပှဲၤလီၢ်န့ၣ်လီၤ. သုမ့ၢ်စ့ၢ်ကီးကစၢ်ယွၤအတၢ်သူၣ်ထီၣ်လီၤ.

1 ကရံၣ်သူး 6:20

အဝဲဒၣ်ပှ့ၤသု, ဒီးဘၣ်ဟ့ၣ်ဝဲအပှ့ၤအကလံၤလီၤ. လၢတၢ်န့ၣ်အဃိဒိးသူသုနီၢ်ခိတဖၣ်လၢယွၤအလၤကပီၤ အဂီၢ်န့ၣ်တက့ၢ်.

ဖံလံးပံၤ 1:11

သုတၢ်အိၣ်မူတဖၣ်ကဘၣ်တၢ်မၤပှဲၤအီၤဒီးတၢ်ဂ့ၤ တၢ်ဝါနီၢ်နီၢ်တဖၣ်လၢထဲဒၣ်ယ့ၣ်ၡူးခရံာ်ဒုးအိၣ်ထီၣ် အီၤသ့, လၢယွၤလၤကပီၤဒီးတၢ်စံးထီၣ်ပတြၢၤကစၢ်ယွၤ အဂီၢ်န့ၣ်လီၤ.

၂ သ့းစၤလနံ 1:10

တၢ်သ့ၣ်တဖၣ်အံၤခဲလၢာ်ကမၤအသးဖဲနံၤအဝဲန့ၣ် ဖဲအဝဲဒၣ်ဟဲဝဲဒ်သိးအကဒိးန့ၢ်တၢ်လၤကပီၤလၢအပှၤ ဂီၢ်မုၢ်ခဲလၢာ်အအိၣ်, ဒီးတၢ်မၤလၤမၤကပီၤလၢပှၤလၢအစူၢ်က့ၤနာ်က့ၤအီၤခဲလၢာ် အအိၣ်န့ၣ်လီၤ. သုဝဲသ့ၣ်စ့ၢ်ကီးသုကအိၣ်လၢအဝဲသ့ၣ်အသိး အကျါအဂ့ၢ်မ့ၢ်လၢသုနာ်တၢ်ကစီၣ်လၢပစံးဘၣ်တဲဘၣ်သု အဃိန့ၣ်လီၤ.

ဧ့ၤဘြံၤ 1:9

နအဲၣ်တၢ်လၢအဘၣ်ဒီး နသးဟ့တၢ်လၢအတဘၣ်ဘၣ်န့ၣ်လီၤ. လၢတၢ်န့ၣ်အဃိကစၢ်ယွၤ, နကစၢ်ယွၤဃုထၢထီၣ် ဒီးဖှူနၤလၢတၢ်သးခုအသိ အါန့ၢ်ဒိၣ်န့ၢ်ဒံးနတံၤသကိးတဖၣ်တက့ၢ်လီၤ.”

၁ ပ့းတရူး 2:9

ဘၣ်ဆၣ်ဒီး, သုမ့ၢ်ပှၤတကလုာ်လၢအဘၣ်တၢ်ဃုထၢ ထီၣ်အီၤ, စီၤပၤအပှၤလုၢ်တၢ်အခိၣ်တဖၣ်, ပှၤစီဆှံတကလုာ် (ဟးထီၣ် ၁၉:၆), ယွၤအပှၤဂီၢ်မုၢ်ဒၣ်ဝဲလၢအဘၣ်တၢ်ဃုထၢထီၣ်အီၤလၢ အကတဲဖျါယွၤအတၢ်မၤလီၤလးတဖၣ်, ယွၤလၢအကိးထီၣ်သုလၢတၢ်ခံးတၢ်နၤဆူအကစၢ်ဒၣ်ဝဲ အတၢ်ကပီၤလီၤလးအပူၤန့ၣ်လီၤ.

၁ ပ့းတရူး 4:14

သုမ့ၢ်ဘၣ်တၢ်ဒုၣ်ဒွဲၣ်သုလၢသုမ့ၢ်ပှၤတဖၣ်လၢ အပိာ်ခရံာ်အခံအဃိဒီး, သုဘၣ်တၢ်ဆိၣ်ဂ့ၤလီၤ. တၢ်အံၤအခီပညီမ့ၢ်ဝဲ, တၢ်လၤကပီၤအသးဒီးကစၢ်ယွၤအသးအိၣ်ဝဲဆိးဝဲလၢသုလိၤလီၤ.