လံာ်ယၡါယၤ 47:2 - Sgaw Karen Common Bible

² တြံးဆၢၣ်ဂူာ်လၢၢ်ဒီးဂံာ်ကိၣ်ကမူၣ်တက့ၢ်. ပဲကွံာ်နီၣ်ကျၢၢ်ဘၢမဲာ်ဒီးဘ့ၣ်ကွံာ်နကူနကၤအဂ့ၤတဖၣ်တက့ၢ်. ထဲးထီၣ်နဆ့ကၤဆူအဖီခိၣ်လၢနကခီထံကျိအဂီၢ်တက့ၢ်.

လံာ်ယၡါယၤ 47:2 Iomraidhean Croise

လံာ်တၢ်ကဲထီၣ်အခီၣ်ထံး 24:65

ဒီးသံကွၢ်ဝဲစီၤအၤဘြၤဟၣ်အခ့အပှၤန့ၣ်, “ပှၤလၢအဟဲဆူ ပအိၣ်လၢစံာ်ပျီပူၤတဂၤန့ၣ်မ့ၢ်မတၤလဲၣ်.” စီၤအၤဘြၤဟၣ်အကုၢ်န့ၣ်စံးဆၢအီၤ, “အဝဲမ့ၢ်ယကစၢ်လီၤ.” ဒီးနီၢ်ရံးဘကၤဟံးန့ၢ်နီၣ်ကျၢၢ်ဘၢမဲာ်ဒီးကးဘၢအမဲာ်လီၤ.

လံာ်ကွဲးနီၣ်တၢ်အခီၣ်ထံးတဘ့ၣ် 19:4

စီၤဃၤနူၣ်ဖီၣ်န့ၢ်စီၤဒၤဝံးအပှၤစိာ်တၢ်ကစီၣ်တဖၣ်, ဒီးလူၤကွံာ်အဝဲသ့ၣ်အခၣ်ဆူၣ်, ဒီးကူးတဲာ်အဝဲသ့ၣ်အဆ့လၢအဖး ဖီဖဲအခံကိၢ်ဒီးပျၢ်ကွံာ်ဝဲဒၣ်လီၤ.

လံာ်စီၤယိၤဘး 31:10

မ်ယမါမၤဒုးအီၣ်ဒုးအီပှၤအဂၤတဂၤဒီးမံဃုာ်ဒီးအီၤတ က့ၢ်.

လံာ်တၢ်ဟးထီၣ်ကွံာ် 11:5

ဒီးကယဲၢ်ဖိခွါဝဲၢ်ကိလၢကီၢ်အဲၤကူပတူးအပူၤကသံဝဲ, စးထီၣ်လၢစီၤပၤအဖိခွါဝဲၢ်ကိလၢအကထီၣ်က့ၤစီၤပၤအလီၢ်, တုၤလီၤလၢကုၢ်ပိာ်မုၣ်လၢအဂံာ်ဘုအဖိခွါဝဲၢ်ကိ, ဒီးဆၣ်ဖိကီၢ်ဖိအဖိဝဲၢ်ကိခဲလၢာ်ဒၣ်လဲာ်န့ၣ်လီၤ.

လံာ်ပှၤစံၣ်တဲၤတဲလီၤတၢ် 12:4

နနၢ်တဖၣ်ကတအၢဝဲတုၤနတနၢ်ဟူတၢ်အသီၣ်လၢကျဲခိၣ်ဘၣ်, နကနၢ်ဟူကဟၣ်ဂံာ်ဘုအသီၣ်မ့တမ့ၢ်, တၢ်ဒ့တၢ်အူအသီၣ်ကဒၢကဒၢ, မ့မ့ၢ်ထိၣ်ဖိတဘ့ၣ်အတၢ်သူၣ်ဝံၣ်သး ဆၢကထိၣ်ဂဲၤထၢၣ်နၤလၢနတၢ်မံအပူၤ,

လံာ်ယၡါယၤ 20:4

ကီၢ်အၤၡူၢ်အစီၤပၤဖးဒိၣ်ကဆှၢကွံာ်ပှၤလၢအဖီၣ်န့ၢ်ဝဲလၢထံကီၢ်ခံ ဘ့ၣ်န့ၣ်လၢတၢ်အိၣ်ဘ့ၣ်ဆ့အပူၤလီၤ. သးပှၢ်ဂ့ၤ, သးစၢ်ဂ့ၤ, အဝဲသ့ၣ်ကဟးဝဲအိၣ်ဘ့ၣ်ဆ့အိၣ်ဘ့ၣ်ခီၣ်, အခံခိၣ်တဖၣ်အိၣ်ဖျါ လၢခိဒီးဟဲစိာ်တၢ်မဲာ်ဆှးလၢကီၢ်အဲၤကူပတူးအဂီၢ်လီၤ.

လံာ်ယၡါယၤ 3:17

ဘၣ်ဆၣ်ဒီးယကစံၣ်ညီၣ်အဝဲသ့ၣ်, ယကလူၤကျိကွံာ်အခိၣ်တဖၣ်ဒီးပာ်အီၤလ့ၤကဒိလီၤ.”

လံာ်ယၡါယၤ 3:23

အတၢ်ကူတၢ်ကၤဘူသလါ, အစုဖီၣ်, ဒီးတၢ်ကံးယာ်တဝံာ်ကိာ်ဒီးခိၣ်ဖၢၣ် တဖၣ်လၢအခိၣ်တဖၣ်အလိၤန့ၣ်လီၤ.

လံာ်ယၡါယၤ 32:11

သုအိၣ်မူတ့ၢ်တၢ်အိၣ်မူမံသူၣ် မုာ်သးဒၣ်သုဝဲဒီးတကိၢ်တဂီၤ တၢ်နီတမံၤဘၣ်. မ့မ့ၢ်, အခဲအံၤ ကနိးကစုာ်လၢတၢ်ပျံၤတၢ်ဖုးအပူၤတက့ၢ်. ဘ့ၣ်လီၤကွံာ်သုဆ့ကၤတဖၣ်ဒီးစၢဃာ်တၢ် ယာ်ဖျ့တဖၣ်လၢသုယီၢ်ဒ့အလိၤန့ၣ်တက့ၢ်.

လံာ်ယံးရမံယၤ 13:22

နမ့ၢ်သံကွၢ်, ဘၣ်မနုၤအဃိတၢ်သ့ၣ်တဖၣ်အံၤမၤအသးဒီးနၤလဲၣ်, ဘၣ်မနုၤအဃိနကူနကၤတဖၣ်ဘၣ်တၢ်ဖှီယာ်အီၤဒီးနဘၣ်တၢ်မၤ တရီတပါနၤလဲၣ်ဒီး, တၢ်အံၤမ့ၢ်ဒၣ်လၢနတၢ်ဒဲးဘးလီၤပျံၤလီၤဖုး ဒိၣ်မးအဃိန့ၣ်လီၤ.

လံာ်ယံးရမံယၤ 13:26

ယွၤအကစၢ်ဒၣ်ဝဲကဘ့ၣ်ကွံာ်နကူနကၤတဖၣ်ဒီးပာ်ဖျါနတၢ် အိၣ်ဘ့ၣ်ဆ့လၢနတၢ်မၤမဲာ်ဆှးနၤအဂီၢ်န့ၣ်လီၤ.

လံာ်ယံးရမံယၤ 25:10

ယကမၤဘှ့ၣ် မၤဘှီၣ်အဝဲသ့ၣ် အတၢ်ကိးထီၣ်အသီၣ်လၢ တၢ်သးခုဒီးတၢ်သူၣ်ဖှံသးညီအပူၤ, ဒီးတၢ်တ့တၢ်ဖျီအတၢ်အီၣ်အမူးတဖၣ် အတၢ်သီၣ်ထီၣ်လၢတၢ်သူၣ်ဖှံသးညီအပူၤန့ၣ်လီၤ. လၢအဝဲသ့ၣ် အမ့ၣ်အူဒၢတဖၣ်အဂီၢ်သိတအိၣ်လၢၤဘၣ်, ဒီးဘုဧိၤဟုဧိၤတအိၣ် လၢၤစ့ၢ်ကီးဘၣ်န့ၣ်လီၤ.

လံာ်ယံးရမံယၤ 27:7

ပှၤကလုာ်ခဲလၢာ် ကမၤအဝဲအတၢ်, ဒီးအဝဲသ့ၣ် ကမၤအဝဲအဖိခွါဒီး အဝဲအလံၤအတၢ်တုၤလီၤလၢ တၢ်ဆၢကတီၢ် ဟဲတုၤဝဲလၢ အဝဲအပှၤကလုာ်ဒၣ်ဝဲ ကလီၤပှီၢ်န့ၣ်လီၤ. ဝံၤဒီး အဝဲအပှၤကလုာ်ကမၤ ပှၤကလုာ်ဒိၣ်စိဒိၣ်ကမီၤတဖၣ် ဒီး စီၤပၤဖးဒိၣ်တဖၣ် အတၢ်န့ၣ်လီၤ.

လံာ်သးသယုၢ်တၢ် 5:13

ပပှၤသးစၢ်ပိာ်ခွါတဖၣ်ဘၣ်တၢ်မၢဆူၣ်အီၤလၢကဂံာ်ဘုဒ်ကုၢ်တဖၣ် အသိး, ဒီးဖိသၣ်ပိာ်ခွါတဖၣ်လဲၤကနူၤနူၤကပၤပၤလၢ တၢ်ဝံသ့ၣ်မုၣ်ဃၢမးအဃိန့ၣ်လီၤ.

လံာ်ဟိၤၡ့ 2:3

အဝဲမ့ၢ်တပာ်ကတီၢ်ဝဲဘၣ်ဒီး, ယကဘ့ၣ်ကွံာ်အကူအကၤခဲ လၢာ်ဒီးဒုးအိၣ်ဘ့ၣ်ဆ့အီၤဒ်မုၢ်တနံၤလၢအအိၣ်ဖျဲၣ်ဝဲအသိး န့ၣ်လီၤ. ယကမၤအီၤလီၤဂာ်ဒ်ဟီၣ်ခိၣ်လၢအဃ့ထီဒီးတဟ့ၣ်ထီၣ်တၤ သူတၤသၣ်တပူၤအသိးဒီးအဝဲကသံလၢတၢ်သူအသးလၢထံအဃိ န့ၣ်လီၤ.

လံာ်မံကၤ 1:11

ပှၤဂီၢ်မုၢ်လၢဝ့ၢ်ၡၤဖံၣ်ဧၢ, လဲၤဆူတၢ်စိာ်မၢကဲကုၢ်အပူၤလၢတၢ်အိၣ်ဘ့ၣ်ဆ့ဒီးတၢ်မဲာ်ဆှးတက့ၢ်. ပှၤတဖၣ်လၢအအိၣ်ဝဲဆိးဝဲလၢဝ့ၢ်စၤနၣ်အပူၤန့ၣ်ဟဲထီၣ်ဆူဝ့ၢ်အချၢ တဘူၣ်ဘၣ်. ဖဲသုနၢ်ဟူဝ့ၢ်ဘ့ၤစသ့လးအပှၤဂီၢ်မုၢ်ဟီၣ်တၢ်ယၢၤ တၢ်န့ၣ်, သုကသ့ၣ်ညါလၢတၢ်ပူၤဖျဲးအလီၢ်တအိၣ်ဘၣ်ဖဲန့ၣ်ဘၣ်.

လံာ်မးသဲ 24:41

ပိာ်မုၣ်ခံဂၤကဂံာ်သကိးဘုလီၤ. တဂၤကဘၣ်တၢ်စိာ်ထီၣ်ကွံာ်အီၤလီၤ. မ့မ့ၢ်အတဂၤကဘၣ်တၢ်ပာ်တ့ၢ်ကွံာ်အီၤလီၤ.

လံာ်လူၤကၣ် 17:35

ပှၤပိာ်မုၣ်ခံဂၤကဂံာ်ဘုတပူၤဃီ, ဒီးတဂၤကဘၣ်တၢ်စိာ်ကွံာ်အီၤ, အဂၤတဂၤကဘၣ်တၢ်ပာ်လီၤတဲာ်တ့ၢ်အီၤလီၤ.

1 ကရံၣ်သူး 11:5

ဒီးပှၤပိာ်မုၣ်တဂၤဂၤလၢအဃ့ဘါထုကဖၣ်, မ့တမ့ၢ်, ကတိၤတၢ်လၢဝံအကျိာ်ဖဲပှၤဂီၢ်မုၢ်အတၢ်ဘူၣ်ထီၣ်ဘါထီၣ်အဆၢ ကတီၢ်န့ၣ်မ့ၢ်တဖၢၣ်ဘၢဃာ်အခိၣ်လၢတၢ်နီတစဲးဒီးမ့ၢ်အမၤဟးဂီၤ အဝၤအလၤကပီၤလီၤ. အဝဲဒၣ်တလီၤဆီဒီးပိာ်မုၣ်လၢအခိၣ်သူဘၣ်တၢ်လူၤကွံာ်အီၤ တဂၤဘၣ်.

လံာ်ပှၤစံၣ်ညီၣ်ကွီၢ် 16:21

ပှၤဖလ့ၡသးဖိတဖၣ်ဖီၣ်န့ၢ်အီၤဒီးထုးထီၣ်ကွံာ်အမဲာ်ချံလီၤ. ဒီးအဝဲသ့ၣ်လဲၤစိာ်အီၤဆူဝ့ၢ်ဂါစၤ, စၢအီၤလၢထးသွဲတိၢ်ဘီတဖၣ်ဒီးမၢအဂူာ်ဆၢၣ်ဂူာ်လၢဃိာ်ပူၤန့ၣ်လီၤ.