လံာ်ယၡါယၤ 34:8 - Sgaw Karen Common Bible

⁸ ခဲအံၤကမ့ၢ်တၢ်ဆၢကတီၢ်လၢယွၤကအုၣ်က့ၤခီၣ်က့ၤဝ့ၢ်စံယိၣ် ဒီးဟ့ၣ်ကၣ်အဒုၣ်အဒါတဖၣ်န့ၣ်လီၤ.

လံာ်ယၡါယၤ 34:8 Iomraidhean Croise

စံးထီၣ်ပတြၢၤ 94:1

ယွၤဧၢ, နမ့ၢ်ကစၢ်ယွၤလၢအသိၣ်ဃီၣ်တၢ်လီၤ. ပာ်ဖျါထီၣ်နတၢ်သးထီၣ်တက့ၢ်.

လံာ်ယၡါယၤ 13:6

ဟီၣ်အိၣ်ယူၤလၢတၢ်ဆါအ့ၣ်ထုးအ့ၣ်စိၢ်အဃိတက့ၢ်. ယွၤအမုၢ်တနံၤန့ၣ်အိၣ်ဘူးဝဲ, မုၢ်တနံၤဖဲသ့တၢ်လၢာ်, ဟဲစိာ်တၢ်ဟးဂီၤန့ၣ်လီၤ.

လံာ်ယၡါယၤ 13:9

ယွၤအမုၢ်တနံၤဟဲဝဲလံ. မ့ၢ်အတၢ်သးထီၣ်ဆူၣ်ဒီးအတၢ်သး ကဲၤထီၣ်အမုၢ်နံၤအအၢအသီတနံၤလီၤ. ဟီၣ်ခိၣ်ကဘၣ်တၢ်ဒုးကဲ ထီၣ်အီၤလၢတၢ်အိၣ်သယုၢ်အလီၢ်, ဒီးကယဲၢ်ပှၤတၢ်ဒဲးဘးဖိ ကဘၣ်တၢ်မၤဟးဂီၤကွံာ်အီၤလီၤ.

လံာ်ယၡါယၤ 26:21

ယွၤကဟဲဝဲလၢအလီၢ်ပစိာ်လၢမူခိၣ်ဒ်သိးကစံၣ်ညီၣ်ပှၤဂီၢ်မုၢ်လၢ ဟီၣ်ခိၣ်အံၤလၢအဝဲသ့ၣ်အတၢ်ဒဲးဘးဒၣ်ဝဲအဃိလီၤ. တၢ်မၤသံမၤဝီတဖၣ်လၢတၢ်မၤတ့ၢ်အီၤလၢတၢ်ခူသူၣ်အပူၤလၢ ဟီၣ်ခိၣ်အံၤ, ကဘၣ်တၢ်မၤဖျါထီၣ်အီၤလီၤ. ဒီးဟီၣ်ခိၣ်တပာ်ခူသူၣ်လၢၤပှၤလၢအဘၣ်တၢ်မၤသံတ့ၢ်အီၤ တဖၣ်လၢၤဘၣ်.

လံာ်ယၡါယၤ 35:4

တဲဘၣ်ပှၤလၢအသးဟးဂီၤတ့ၢ်ကိးဂၤဒဲးန့ၣ်, “ပာ်ဆူၣ်သုသးဒီးပျံၤတၢ်တဂ့ၤ. ကစၢ်ယွၤဟဲဝဲလၢသုတၢ်ပူၤဖျဲးအဂီၢ် ဒီးလၢတၢ်စံၣ်ညီၣ်သုဒုၣ်သုဒါတဖၣ်အဂီၢ်လီၤ.”

လံာ်ယၡါယၤ 47:3

ပှၤကထံၣ်လၢနအိၣ်ဘ့ၣ်ဆ့လီၤ. အဝဲသ့ၣ်ကထံၣ်နဘၣ်တၢ်ဆီၣ်လီၤနၤဒီး တၢ်မၤမဲာ်ဆှးနၤလီၤ. ယကဟ့ၣ်ကၣ်တၢ်ဒီးပှၤကဆိကတီၢ်ယၤ တအိၣ်နီတဂၤဘၣ်.”

လံာ်ယၡါယၤ 49:26

ပှၤလၢအမၤအၢမၤသီသုတဖၣ်န့ၣ်ယကပျဲအမၤသံလိာ်အသးတဂၤဒီး တဂၤလီၤ. ဒ်ပှၤအီမူၤသံးအသိးန့ၣ်, အဝဲသ့ၣ်ကမူၤလၢတၢ်မၤသံတၢ်ဒီးတၢ် သူၣ်ဒိၣ်သးဖျိးလီၤ. အန့ၣ်ဒီးပှၤဟီၣ်ခိၣ်ဖိခဲလၢာ်ကသ့ၣ်ညါလၢယမ့ၢ်ယွၤ, ပှၤတဂၤလၢအအုၣ်က့ၤခီၣ်က့ၤသုဒီးမၤထူၣ်ဖျဲးသုလီၤ. အဝဲသ့ၣ်ကသ့ၣ်ညါဝဲလၢယမ့ၢ်အံၣ်စရ့လးအကစၢ်ယွၤလၢအအိၣ်ဒီး အစိကမီၤန့ၣ်လီၤ.”

လံာ်ယၡါယၤ 61:2

အဝဲမၢလီၤတ့ၢ်ယၤဒ်သိးယကဒုးဟူထီသါလီၤတၢ်လၢ တၢ်ဆၢကတီၢ်ဟဲတုၤလံလၢယွၤကအုၣ်က့ၤခီၣ်က့ၤအပှၤဂီၢ်မုၢ် ဒီးမၤနၢၤကွံာ်အဝဲသ့ၣ်အဒုၣ်အဒါတဖၣ်န့ၣ်လီၤ. အဝဲမၢလီၤတ့ၢ်ယၤဒ်သိးယကမၤမုာ်ပှၤလၢ အသူၣ်အုးသးအုးခဲလၢာ်,

လံာ်ယၡါယၤ 63:4

ယစံၣ်ညီၣ်တဲာ်လၢတၢ်ဆၢကတီၢ်လၢယကအုၣ်က့ၤခီၣ်က့ၤယပှၤ ဂီၢ်မုၢ်ဟဲတုၤဝဲ, ဒီးတၢ်အံၤမ့ၢ်တၢ်ဆၢကတီၢ်လၢတၢ်စံၣ်ညီၣ် အဝဲသ့ၣ်အဒုၣ်အဒါတဖၣ်အဂီၢ်လီၤ.

လံာ်ယံးရမံယၤ 46:10

အအံၤတနံၤအံၤ မ့ၢ်ယွၤသ့တၢ်လၢာ်ဒီး ပၢဘၣ် တၢ်ခဲလၢာ်ကစၢ် တဂၤအမုၢ်နံၤလီၤ. တနံၤအံၤ အဝဲကဟ့ၣ်ကၣ်တၢ်န့ၣ်လီၤ. တနံၤအံၤ အဝဲကစံၣ်ညီၣ်အဒုၣ်အဒါတဖၣ်န့ၣ်လီၤ. အနးကအီၣ် အဝဲသ့ၣ် တုၤအီၣ်ဘျဲးအီၣ်ဒီး အီအဝဲသ့ၣ် အသွံၣ်တုၤအသးမံဝဲတစုလီၤ. တနံၤအံၤ, ယွၤသ့တၢ်လၢာ်လုၢ်ထီၣ်ပာ်ထီၣ်ပှၤလၢ အမၤနၢၤဝဲတဖၣ် ဖဲထံကျိဖရၤသးအနံၤလၢ ကီၢ်ကလံၤစိးန့ၣ်လီၤ.

လံာ်ဟိၤၡ့ 9:7

တၢ်ဆၢကတီၢ်လၢတၢ်စံၣ်ညီၣ်အဂီၢ်, တၢ်ဆၢကတီၢ်လၢပှၤဂီၢ်မုၢ်တဖၣ်ကဒိးန့ၢ်တၢ်လၢအကြၢးဒိးန့ၢ်ဘၣ် ဝဲန့ၣ်ဟဲတုၤလံ. ဖဲတၢ်န့ၣ်မၤအသးဒီးကီၢ်အံၣ်စရ့လးကသ့ၣ်ညါအီၤလီၤ. သုစံးလၢဝံတဂၤအံၤမ့ၢ်ပှၤဟးဂီၤဖိန့ၣ်လီၤ. ပှၤလၢယွၤဟ့ၣ်စိဟ့ၣ်ကမီၤအီၤတဂၤအံၤပျုၢ်လီၤ. သုပှၤဂီၢ်မုၢ်တဖၣ်သးဟ့ယၤနးနးကလဲာ်မ့ၢ်လၢသုတၢ်ဒဲးဘး န့ၣ်အါဝဲအဃိလီၤ.

လံာ်ယိၤအ့လး 3:4

ဝ့ၢ်ထါယၢၣ်, ဝ့ၢ်စံဒိၣ်ဒီးကယဲၢ်လီၢ်ကဝီၤလၢကီၢ်ဖလ့ၡသးသ့ၣ်ဧၢ, သုကမၤယၤဒ်လဲၣ်. သုကျဲးစၢးလၢသုကမၤဆၢကဒါက့ၤယၤလၢ တၢ်တမံၤမံၤအဂီၢ်န့ၣ်ဧါ. သုမ့ၢ်မၤဒီး, ယကမၤဆၢကဒါက့ၤသုချ့ချ့ ကလဲာ်လီၤ.

လံာ်မံကၤ 6:1

ကနၣ်ယွၤအကွီၢ်ထီဒါကီၢ်အံၣ်စရ့လးတက့ၢ်. ဂဲၤထၢၣ်, ယွၤဧၢ, ပာ်ဖျါထီၣ်နကွီၢ်, ဒီးပျဲကစၢၢ်တဖၣ်ဒီးတၢ်လုၢ်တဖၣ်နၢ်ဟူတၢ်လၢနစံးတက့ၢ်.

လံာ်လူၤကၣ် 18:7

ခဲကနံၣ်အံၤမ့ၢ်ယွၤတစံၣ်ညီၣ်တီန့ၢ်တၢ်လၢအပှၤဂီၢ်မုၢ်ဒၣ်ဝဲလၢ အကိးဃ့တၢ်မၤစၢၤလၢအအိၣ်မုၢ်ဆါဒီးမုၢ်နၤန့ၣ်, အဂီၢ်ဘၣ်ဧါ. မ့ၢ်အဝဲဒၣ်ကဝံခိၣ်ဒိၣ်ခံဃၢလၢအကမၤစၢၤအဝဲသ့ၣ်အဂီၢ်န့ၣ်ဧါ.

ရိမ့ၤ 2:5

ဘၣ်ဆၣ်ဒီး, နအိၣ်ဒီးသးလၢအကိၤဒီးသးလၢအတပီၢ်ယၢ်လီၤ က့ၤအသးန့ၣ်လီၤ. လၢတၢ်န့ၣ်အဃိ, နပာ်ဖှိၣ်အါထီၣ်တၢ်သးဒိၣ်လၢနဂီၢ်ဒၣ်နဲလၢ တၢ်သးဒိၣ်အမုၢ်တနံၤ, ဖဲယွၤအတၢ်စံၣ်ညီၣ်တီကဘၣ်တၢ်လီၣ်ဖျါထီၣ်အီၤ အကတီၢ်န့ၣ်လီၤ.

လံာ်သိၣ်လီၤသီလီၤတၢ် 32:35

ယွၤကဟ့ၣ်ကၣ်တၢ်ဒီးစံၣ်ညီၣ်အဝဲသ့ၣ်, တၢ်ဆၢကတီၢ်ကတုၤဝဲဖဲအဝဲသ့ၣ်ကဟးဂီၤကွံာ်, အဝဲသ့ၣ်အတၢ်ဘၣ်စံၣ်ညီၣ်ဃါမနၤအမုၢ်နံၤန့ၣ် ဘူးထီၣ်ဝဲလံ.

လံာ်လီၣ်ဖျါ 14:11

မ့ၣ်အူလၢအမၤအၢမၤနးအဝဲသ့ၣ်တဖၣ်န့ၣ်, အလုၢ်ခုၣ်ထီၣ်ဝဲလီၤ စိၤလီၤဃၣ်လီၤ. ပှၤသ့ၣ်တဖၣ်လၢအဘူၣ်ထီၣ်ဘါထီၣ်တၢ်ဒူတၢ်ဃိၤဒီးအက့ၢ် အဂီၤ, ပှၤတဂၤဂ့ၤတဂၤဂ့ၤလၢအအိၣ်ဒီးတၢ်ပနီၣ်ဘၣ်ဃးတၢ်ဒူ တၢ်ဃိၤအမံၤ, ပှၤသ့ၣ်တဖၣ်အံၤအဂီၢ်န့ၣ်, လၢမုၢ်ဆါမ့ၢ်ဂ့ၤမုၢ်နၤမ့ၢ်ဂ့ၤတၢ်အိၣ်ဘှံးအိၣ်သါ တအိၣ်ဝဲဘၣ်.”

လံာ်လီၣ်ဖျါ 18:20

သးခုလၢအဝဲဒၣ်အတၢ်ဟးဂီၤကွံာ်အဃိတက့ၢ်. မူခိၣ်ဧၢ, သးခုတက့ၢ်, ကစၢ်ယွၤအပှၤဂီၢ်မုၢ်ဒီးတၢ်မၢဖိဒီးဝံသ့ၣ်တဖၣ်ဧၢ, အဂ့ၢ်ဒ်အံၤ, ကစၢ်ယွၤစံၣ်ညီၣ်ဃၣ်လံအီၤလၢတၢ်လၢ အမၤတ့ၢ်သုန့ၣ်အဃိလံ.

လံာ်လီၣ်ဖျါ 19:2

အဝဲအတၢ်စံၣ်ညီၣ်တဖၣ်မ့ၢ်ဝဲတီဝဲ, ဒီးတီဝဲလိၤဝဲလီၤ. အဝဲစံၣ်ညီၣ်ဃၣ်တ့ၢ်လံဃဲသဲမုၣ်လၢအမၤဟးဂီၤဟီၣ်ခိၣ်လၢ အလုၢ်အၢလၢ်သီန့ၣ်လီၤ. ကစၢ်ယွၤစံၣ်ညီၣ်တ့ၢ်လံအီၤမ့ၢ်လၢအဝဲဒၣ်မၤသံတ့ၢ် ကစၢ်ယွၤအခ့အပှၤတဖၣ်အဃိလီၤ.”