လံာ်ယၡါယၤ 33:2 - Sgaw Karen Common Bible

² ယွၤဧၢ, သူၣ်ကညီၤသးကညီၤလၢ်ပှၤတက့ၢ်. ပပာ်ပတၢ်မုၢ်လၢ်လၢနပူၤလီၤ. ကဟုကယာ်ပှၤတနံၤဘၣ် တနံၤဒီးအုၣ်က့ၤခီၣ်က့ၤပှၤလၢတၢ်ကိၢ်တၢ်ဂီၤအဆၢကတီၢ် တဖၣ်န့ၣ်တက့ၢ်.

လံာ်ယၡါယၤ 33:2 Iomraidhean Croise

စံးထီၣ်ပတြၢၤ 123:2

ကွၢ်ကွၢ်, ဒ်ကုၢ်ပိာ်ခွါအမဲာ်ကွၢ်တၢ်ဆူ အကစၢ်အစုအသိးဒီး ဒ်အခ့အပှၤပိာ်မုၣ်အမဲာ်ကွၢ်တၢ်ဆူ အကစၢ်မုၣ်အစုအသိးန့ၣ်, ပမဲာ်ကွၢ်တၢ်ဆူယွၤပကစၢ်အအိၣ်တုၤ အသူၣ်ကညီၤသးကညီၤပှၤတစုလီၤ.

စံးထီၣ်ပတြၢၤ 143:8

ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ. သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်. အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.

စံးထီၣ်ပတြၢၤ 25:3

ပှၤလၢအနာ်နၤသ့ၣ်တဖၣ်တဘၣ်တၢ်မၤနၢၤအီၤဘၣ်. မ့မ့ၢ်ဘၣ်ဒၣ်ထဲပှၤလၢအချ့ဝဲလၢ တၢ်ပူထီၣ်နၤအပူၤတဖၣ်န့ၣ်လီၤ.

စံးထီၣ်ပတြၢၤ 27:1

ယွၤမ့ၢ်ယတၢ်ကပီၤဒီးယတၢ်အုၣ်က့ၤခီၣ်က့ၤလီၤ. ယကပျံၤမတၤတဂၤလဲၣ်. ယွၤမ့ၢ်ယသးသမူအဂံၢ်အဘါလီၤ. ယကပျံၤမတၤတဂၤလဲၣ်.

စံးထီၣ်ပတြၢၤ 33:22

ယွၤဧၢ, မ်နတၢ်အဲၣ်အဂၢၢ်အကျၢၤအိၣ်လၢပလိၤ ဒ်ပတၢ်မုၢ်လၢ်လၢအိၣ်လၢနပူၤအသိးန့ၣ်တက့ၢ်.

စံးထီၣ်ပတြၢၤ 37:39

ပှၤတီပှၤလိၤအတၢ်ပူၤဖျဲးန့ၣ်ဟဲလၢယွၤ ဒီးယွၤမ့ၢ်အတၢ်အိၣ်တဒၢအလီၢ် လၢတၢ်မၤကိၢ်မၤဂီၤအကတီၢ်န့ၣ်လီၤ.

စံးထီၣ်ပတြၢၤ 46:1

ကစၢ်ယွၤမ့ၢ်ပတၢ်ပူၤဖျဲးအလီၢ်ဒီးပဂံၢ်ပဘါလီၤ. လၢတၢ်ကိၢ်တၢ်ဂီၤအကတီၢ်န့ၣ် အဝဲအိၣ်ကတဲာ်ကတီၤအသးထီဘိလၢ ကမၤစၢၤပှၤန့ၣ်လီၤ.

စံးထီၣ်ပတြၢၤ 46:5

ကစၢ်ယွၤအိၣ်လၢအသးကံၢ်ပူၤ, ဒီးတဘၣ်တၢ်သုးကွံာ်အီၤဘၣ်. ကစၢ်ယွၤကမၤစၢၤအီၤဖဲမုၢ်ဆ့ၣ်ဝါထီၣ် အကတီၢ်န့ၣ်လီၤ.

စံးထီၣ်ပတြၢၤ 50:15

လၢတၢ်ကိၢ်တၢ်ဂီၤအမုၢ်တနံၤန့ၣ်ကိးထီၣ်ယၤတက့ၢ်. ယကမၤပူၤဖျဲးနၤ ဒီးနကမၤလၤကပီၤယၤလီၤ.

စံးထီၣ်ပတြၢၤ 60:11

ဟ့ၣ်လၢ်ပှၤတၢ်မၤစၢၤလၢတၢ်ထီဒါ ပဒုၣ်ပဒါအဂီၢ်န့ၣ်တက့ၢ်. အဂ့ၢ်ဒ်အံၤ, ပှၤကညီအတၢ်မၤစၢၤန့ၣ် မ့ၢ်တၢ်ကလီကလီန့ၣ်လီၤ.

စံးထီၣ်ပတြၢၤ 62:1

ယသးအိၣ်ခိးထဲကစၢ်ယွၤတဂၤဧိၤလၢတၢ်အိၣ်ဘှ့ၣ်အိၣ်ဘှီၣ်အပူၤန့ၣ်လီၤ. တၢ်အုၣ်က့ၤခီၣ်က့ၤယၤန့ၣ်ဟဲဒၣ်ထဲလၢအအိၣ်လီၤ.

စံးထီၣ်ပတြၢၤ 62:5

အဂ့ၢ်ဒ်အံၤယသးအိၣ်ခိးထဲကစၢ်ယွၤတဂၤဧိၤ လၢတၢ်အိၣ်ဘှ့ၣ်အိၣ်ဘှီၣ်အပူၤန့ၣ်လီၤ. အဂ့ၢ်ဒ်အံၤယမုၢ်လၢ်တၢ်လၢအီၤလီၤ.

စံးထီၣ်ပတြၢၤ 62:8

ပှၤဂီၢ်မုၢ်သ့ၣ်ဧၢ, သန့ၤသုသးလၢအီၤကိးအကတီၢ်ဒဲး ဒီးတဲအီၤလၢသုတၢ်ကိၢ်တၢ်ဂီၤခဲလၢာ်န့ၣ်တက့ၢ်. ကစၢ်ယွၤမ့ၢ်တၢ်ပူၤဖျဲးအလီၢ်လၢပဂီၢ်လီၤ. စ့လၤ

စံးထီၣ်ပတြၢၤ 90:15

ဟ့ၣ်လၢ်ပှၤတၢ်သူၣ်ခုသးခုဒိၣ်ဒိၣ်အါအါခဲအံၤ, ဒ်နဟ့ၣ်တ့ၢ်ပှၤတၢ်သူၣ်အုးသးအုး လၢတၢ်သူၣ်ကိၢ်သးဂီၤအနံၣ်အလါ တဖၣ်အပူၤအသိးန့ၣ်တက့ၢ်.

စံးထီၣ်ပတြၢၤ 91:15

တုၤအကိးထီၣ်ယၤန့ၣ်ယကစံးဆၢအီၤ, ယကအိၣ်ဒီးအီၤလၢတၢ်ကိၢ်တၢ်ဂီၤအပူၤ, ယကမၤပူၤမၤဖျဲးအီၤဒီးမၤလၤကပီၤအီၤလီၤ.

လံာ်တၢ်ဟးထီၣ်ကွံာ် 14:27

မၤသးဒ်န့ၣ်ဒီး, စီၤမိၤၡ့ယူာ်ထီၣ်အစုလၢပီၣ်လဲၣ်ဖီခိၣ်ဒီး ဖဲမုၢ်ဆ့ၣ်ဝါထီၣ်န့ၣ်ထံဟဲက့ၤပှဲၤထီၣ်ဝဲဒၣ်ဒ်အလီၢ်လီၢ်န့ၣ် လီၤ. ပှၤအဲၤကူပတူးဖိတဖၣ်ကျဲးစၢးဒ်သိးကပူၤဖျဲးထီၣ်လၢထံကျါ ဘၣ်ဆၣ်ဒီးယွၤတြူာ်ကွံာ်အဝဲသ့ၣ်လၢပီၣ်လဲၣ်အသးကံၢ်ပူၤန့ၣ်လီၤ.

လံာ်ယၡါယၤ 17:10

ကီၢ်အံၣ်စရ့လးဧၢ, နသးပ့ၤနီၣ်ကစၢ်ယွၤလၢအအုၣ်က့ၤခီၣ် က့ၤနၤဒီးဒီဒၣ်အိၣ်ပှိၤနၤဒ်လၢၢ်မုၢ်လ့တီလၢအဂံၢ်ဆူၣ်ဘါဆူၣ် တဖျၢၣ်အသိးန့ၣ်လီၤ. အခိၣ်တလိာ်, နသူၣ်လီၤဖီကရၢၢ်စီဆှံ တဖၣ်လၢနကဘူၣ်ထီၣ်ဘါထီၣ်တခီဘီမုၢ်အကစၢ်အဂီၢ်လီၤ.

လံာ်ယၡါယၤ 25:4

ပှၤအဖှီၣ်ဒီးပှၤလၢတၢ်မၤစၢၤအီၤ တအိၣ်တဖၣ်ဃ့ၢ်ဃီၤဆူနအိၣ် ဒီးအိၣ်ပူၤအိၣ်ဖျဲးလၢတၢ်မၤကိၢ်မၤဂီၤအကတီၢ်န့ၣ်လီၤ. နဟ့ၣ်အဝဲသ့ၣ်လၢတၢ်အိၣ်တ ဒၢအလီၢ်ဖဲကလံၤမုၢ်လီၤအကတီၢ်, ဒီးဒုးအိၣ်ကဒုတ့ၢ်အီၤလၢတၢ် ကိၢ်ဂီၤကဲၤအကတီၢ်န့ၣ်လီၤ. ပှၤအၢပှၤသီတဖၣ်ထီၣ်ဒုးတၢ် ဒ်တၢ်ဂိၢ်ကတီၢ်ကလံၤမုၢ်လီၤဝဲအသိး, ဒီးဒ်တၢ်ယီၤဃ့လၢကီၢ်လၢအဃ့ထီ တဘ့ၣ်အပူၤအသိးလီၤ.

လံာ်ယၡါယၤ 25:9

ဖဲတၢ်အံၤမၤအသးဒီး, ပှၤကိးဂၤဒဲးကစံးဝဲ, “အဝဲဒၣ်မ့ၢ်ပကစၢ်ယွၤလီၤ. ပပာ်ပတၢ်နာ်လၢအပူၤဒီးခဲအံၤ, ပသူၣ်ဖှံသးညီဒီးသူၣ်ခုသးခုလီၤ. အဂ့ၢ်ဒ်အံၤ, အုၣ်က့ၤခီၣ်က့ၤတ့ၢ်ပှၤလီၤ.”

လံာ်ယၡါယၤ 26:16

နစံၣ်ညီၣ်နပှၤဂီၢ်မုၢ်, ယွၤဧၢ, ဒီးလၢတၢ်သးကိၢ်သးဂီၤအပူၤ အဝဲသ့ၣ်ဘါထုကဖၣ်တၢ်ဆူနအိၣ်လီၤ.

လံာ်ယၡါယၤ 26:8

ပမၤထွဲတၢ်ဘၣ်နသးဒီးပာ်ပတၢ်မုၢ်လၢ်လၢနပူၤလီၤ. ကယဲၢ်ပတၢ်သးအိၣ်န့ၣ်မ့ၢ်ထဲနၤတဂၤလီၤ.

လံာ်ယၡါယၤ 37:3

အအံၤမ့ၢ်တၢ်ကစီၣ်လၢအဝဲစံးဘၣ်တ့ၢ်အဝဲသ့ၣ်လၢကလဲၤဟ့ၣ်ဝံ ယၡါယၤအဂီၢ်လီၤ. “မုၢ်တနံၤအံၤမ့ၢ်တၢ်နးတၢ်ဖှီၣ်အမုၢ်တနံၤလီၤ. ပဘၣ်တၢ်စံၣ်ညီၣ်တ့ၢ်ပှၤဒီးပဘၣ်တၢ်မၤမဲာ်ဆှးပှၤလီၤ. ပလီၤဂာ်ဒီးပိာ်မုၣ်တဂၤလၢအိၣ်ကတဲာ်ကတီၤအသးလၢကဆံးစၢ် အဖိ, ဘၣ်ဆၣ်အဂံၢ်အဘါစၢ်ကဲၣ်ဆိးလၢကမၤဝဲအဂီၢ်န့ၣ်လီၤ.

လံာ်ယၡါယၤ 40:10

ယွၤပၢဘၣ်တၢ်ခဲလၢာ်ကစၢ်ဟဲဝဲလၢကပၢတၢ်ဒီး အစိကမီၤ, ဒီးကဟဲကိးဃုာ်ဒီးအီၤပှၤဂီၢ်မုၢ်လၢအမၤပူၤဖျဲးတ့ၢ်ဝဲတဖၣ်လီၤ.

လံာ်ယၡါယၤ 51:5

ယကဟဲချ့ချ့ဒီးအုၣ်က့ၤခီၣ်က့ၤအဝဲသ့ၣ်, ယတၢ်မၤနၢၤ အဆၢကတီၢ်ဘူးထီၣ်လံ. ယၤ, ယကစၢ်ဒၣ်ယဲ, ယကပၢတၢ်လၢပှၤကလုာ်တဖၣ်အဖီခိၣ်လီၤ. ထံယံၤကီၢ်ယံၤတဖၣ်အိၣ်ခိးယၤလၢယကဟဲအဂီၢ်, အဝဲသ့ၣ်အိၣ်ခိးဝဲပှဲၤဒီးတၢ်မုၢ်လၢ်လၢယကအုၣ်က့ၤခီၣ်က့ၤ အီၤအဂီၢ်လီၤ.

လံာ်ယၡါယၤ 59:16

အဝဲကမၢကမၣ်လၢတထံၣ်န့ၢ်ဘၣ်ပှၤနီတဂၤလၢကမၤစၢၤ ပှၤလၢအဘၣ်တၢ်မၤအၢမၤနးအီၤတဖၣ်ဘၣ်အဃိလီၤ. သတးဒီးအဝဲကသူအတၢ်စိကမီၤဒၣ်ဝဲလၢကမၤထူၣ်ဖျဲး အဝဲသ့ၣ်ဒ်သိးကမၤနၢၤတၢ်အဂီၢ်လီၤ.

လံာ်ယၡါယၤ 8:17

ယွၤပာ်ခူသူၣ်ကွံာ်အသးလၢအပှၤဂီၢ်မုၢ်လီၤ. ဘၣ်ဆၣ်ဒီးယနာ်အီၤဒီးပာ်ယတၢ်မုၢ်လၢ်လၢအဝဲအပူၤလီၤ.

လံာ်ယံးရမံယၤ 14:8

နမ့ၢ်ကီၢ်အံၣ်စရ့လးအတၢ်မုၢ်လၢ်ထဲတမံၤဧိၤလီၤ. နမ့ၢ်ပှၤထဲတဂၤဧိၤလၢအအုၣ်က့ၤခီၣ်က့ၤပှၤလၢ တၢ်တတၢးတနါန့ၣ်လီၤ. ဘၣ်မနုၤအဃိနလီၤဂာ်ဒ်ပှၤစီစၣ်တဂၤအသိးလၢပထံပကီၢ်အပူၤ, နလီၤဂာ်ဒ်ပှၤလဲၤတၢ်ဖိတဂၤအသိးလၢအအိၣ်ဝဲဆိးဝဲထဲတနၤဧိၤန့ၣ်လဲၣ်.

လံာ်သးသယုၢ်တၢ် 3:23

သီဝဲကိးမုၢ်ဂီၤဒဲးဒ်မုၢ်ဆ့ၣ်ထီၣ်, လီၤတံၢ်လီၤဆဲးဝဲဒ်မုၢ် ဟဲထီၣ်အသိးန့ၣ်လီၤ.

လံာ်ဟိၤၡ့ 14:2

ဟဲက့ၤဆူယွၤအအိၣ်ဒီးဒုးကဲထီၣ်တၢ်ထုကဖၣ်အံၤလၢတၢ်လုၢ်တၢ် ပာ်ဆူအအိၣ်တက့ၢ်. ပျၢ်လၢ်ဘၣ်ပတၢ်ဒဲးဘးတဖၣ်ခဲလၢာ်ဒီးတူၢ်လိာ်ပတၢ်ထုကဖၣ်, ဒီးပကစံးထီၣ်ပတြၢၤနၤဒ်ပအၢၣ်လီၤတ့ၢ်အသိးန့ၣ်လီၤ.