လံာ်ယၡါယၤ 16:10 - Sgaw Karen Common Bible

¹⁰ လၢစံာ်ပျီလၢဟီၣ်ခိၣ်ညၣ်ထ့ၣ်ဂ့ၤတဖၣ်အပူၤ, ပှၤတသးခုလၢၤ နီတဂၤလၢၤဘၣ်. လၢစပံးလီၢ်တဖၣ်အပူၤပှၤကကိးပသူထီၣ် ဒီးသူၣ်ဝံၣ်သးဆၢတၢ်တအိၣ်လၢၤနီတဂၤလၢၤဘၣ်. ပှၤကယီၢ်စပံးသၣ်လၢကဒုးကဲထီၣ်စပံးထံအဂီၢ်တအိၣ်လၢၤ နီတဂၤလၢၤဘၣ်. တၢ်သးခုအတၢ်ကိးပသူထီၣ်တဖၣ် ဆိကတီၢ်အသးလံ.

လံာ်ယၡါယၤ 16:10 Iomraidhean Croise

လံာ်စီၤယိၤဘး 24:11

အဝဲသ့ၣ်မၤသိလၢသ့ၣ်စၤယံး, ဒီးစပံးထံလၢစပံးသၣ်, ဘၣ်ဆၣ်အဝဲသ့ၣ်အနီၢ်ကစၢ်ဒၣ်ဝဲတၢ်သူအသးလၢထံန့ၣ်လီၤ.

လံာ်ယၡါယၤ 24:11

ပှၤဂီၢ်မုၢ်ကိးသတြီထီၣ်လၢကျဲတဖၣ်အပူၤမ့ၢ်လၢစပံးထံတအိၣ် လၢၤဘၣ်အဃိလီၤ. တၢ်သူၣ်ဖှံသးညီလဲၤပူၤကွံာ်ဝဲလီၤထူလီၤ ယိာ်ဒီးဘၣ်တၢ်နီၣ်ထီၣ်ဟီထီၣ်ကွံာ်အီၤလၢကီၢ်ပူၤလီၤ.

လံာ်ယၡါယၤ 32:10

အခဲအံၤ, သုကသူၣ်မံသးမံကစီဒီန့ၣ်လီၤ. ဘၣ်ဆၣ်ခဲငါတနံၣ်အကတီၢ်ဒ်သိးအံၤန့ၣ်သုသး ကဟးဂီၤလီၤ. အဂ့ၢ်ဒ်အံၤ, စပံးသၣ်လၢသုက ထၢဖှိၣ်အီၤလၢသုဂီၢ်ဒၣ်ဝဲတအိၣ်ဘၣ်နီတစဲးဘၣ်.

လံာ်ယံးရမံယၤ 48:33

တၢ်သူၣ်ဖှံသးညီဒီး တၢ်သူၣ်ခုသးခုဘၣ်တၢ်ဟံး ထီၣ်ကွံာ်လၢ ကီၢ်မိၤအးအဟီၣ်ခိၣ်ညၣ်ထ့ၣ်အဂ့ၤ အပူၤလီၤ. ယဒုးဆိကတီၢ် စပံးထံအတၢ်ယွၤလီၤလၢ နီၣ်စံၢ်စပံးသၣ်တဖၣ်အပူၤန့ၣ်လီၤ. ပှၤတအိၣ်နီတဂၤဘၣ် လၢကယီၢ်စပံးသၣ်ဒီး ကိးထီၣ်လၢတၢ်သးခုအပူၤန့ၣ်ဘၣ်.

လံာ်ယဃ့းစက့လး 7:7

တၢ်အကတၢၢ်ဟဲဝဲလၢသုဝဲပှၤဂီၢ်မုၢ်လၢအအိၣ်ဆိးလၢကီၢ်အံၤ အပူၤအဂီၢ်လီၤ. တၢ်ဆၢကတီၢ်ဘူးထီၣ်လံလၢတၢ်မၤမူးပွဲအသီၣ်တအိၣ်လၢၤဘၣ်လၢ ကစၢၢ်ကလိအတၢ်လုၢ်လီၢ်တဖၣ်န့ၣ်ဘၣ်. ကအိၣ်ဒၣ်ထဲတၢ်သဘံၣ်ဘုၣ်န့ၣ်လီၤ.

လံာ်ယိၤအ့လး 1:12

စပံးမုၢ်ဒီးချၢၣ်ဒၢအထူၣ်တဖၣ်လီၤညွံးလီၤဘဲကွံာ်လံ. ကယဲၢ်တၤသူတၤသၣ်အမုၢ်ခဲလၢာ်လီၤဘီဒီးသံကွံာ်လံ. ပှၤဂီၢ်မုၢ်အတၢ်သူၣ်ခုသးခုလီၤမၢ်ကွံာ်လံ.

လံာ်ဧၤမိၣ် 5:11

သုမၤအၢမၤနးတ့ၢ်လံပှၤဖှီၣ်ဖိယာ်ဖိဒီးဂုာ် ဆူၣ်ပျီဆူၣ်အဘုဧိၤဟုဧိၤလီၤ. မၤသးဒ်န့ၣ်ဒီး, သုတအိၣ်ဘၣ်လၢဟံၣ်တဖၣ်လၢသုမၤအီၤလၢလၢၢ်ဂ့ၤ မ့ၢ်ဂ့ၤ, သုတအီဘၣ်စပံးထံဟဲလၢစပံးလီၢ်အဃံအလၤလၢသုသူၣ်လီၤဖျး လီၤမ့ၢ်ဂ့ၤန့ၣ်ဘၣ်.

လံာ်ဧၤမိၣ် 5:17

လၢကယဲၢ်စပံးလီၢ်ခဲလၢာ်အပူၤန့ၣ်တၢ်ဟီၣ်ပသူကအိၣ်ဝဲလီၤ. တၢ်ခဲလၢာ်အံၤကမၤအသးမ့ၢ်လၢယဟဲဒ်သိးယကဟဲစံၣ်ညီၣ်သု အဃိန့ၣ်လီၤ. ယွၤစံးတ့ၢ်ဝဲဒၣ်လီၤ.

လံာ်ဧၤမိၣ် 9:13

ယွၤစံးဝဲဒၣ်, မုၢ်နံၤတဖၣ်ဟဲဝဲ, ဖဲဘုဧိၤဟုဧိၤတဖၣ်ကမဲထီၣ်ချ့န့ၢ်ဒံး တၢ်ကူးအီၤကသ့အကတီၢ်, ဒီးစပံးမုၢ်တဖၣ်ဒိၣ်ထီၣ်ဝဲကချ့န့ၢ်ဒံး တၢ်မၤစပံးထံကသ့အကတီၢ်န့ၣ်လီၤ. ကစၢၢ်ကလိတဖၣ်ကလီၤစီၤဒီးစပံးထံအဆၢဒီးတၢ်လူၢ်ခိၣ် တဖၣ်ကယွၤလီၤဃုာ်ဒီးစပံးထံန့ၣ်လီၤ.

လံာ်စဖါနယၤ 1:13

အတၢ်ဖိတၢ်လံၤဒီးအဟံၣ်အဃီသ့ၣ်တဖၣ်ကဘၣ်တၢ်ဂုာ်ဆူၣ်ပျီဆူၣ် ဒီးမၤဟးဂီၤကွံာ်အီၤန့ၣ်လီၤ. အဝဲသ့ၣ်တအိၣ်ဘၣ်လၢၤလၢဟံၣ်လၢအသူၣ်ထီၣ်ဝဲမ့ၢ်ဂ့ၤ, တအီဘၣ် လၢၤစပံးထံလၢစပံးမုၢ်လၢအသူၣ်လီၤဝဲသ့ၣ်တဖၣ်မ့ၢ်ဂ့ၤနီတဘျီဘၣ်.”

လံာ်ပှၤစံၣ်ညီၣ်ကွီၢ် 9:27

အဝဲသ့ၣ်ခဲလၢာ်လဲၤနုာ်ဆူပှၤၡက့ၣ်ဖိတဖၣ်အစပံးလီၢ် ဒီးဒဲးန့ၢ်စပံးသၣ်တဖၣ်ဒီးမၤန့ၢ်ဝဲစပံးထံဒီးမၤမူးသးဖှံန့ၣ်လီၤ. အဝဲသ့ၣ်လဲၤနုာ်ဆူပှၤၡက့ၣ်ဖိတဖၣ်အကစၢ်အတၢ်လုၢ်ဟံၣ်အပူၤ ဒီးအီမူၤအသးဒီးကတိၤဒုၣ်ဒွဲၣ်စီၤအဘံၤမ့လ့းန့ၣ်လီၤ.