လံာ်ဟိၤၡ့ 7:7 - Sgaw Karen Common Bible

⁷ လၢအတၢ်သးထီၣ်ကိၢ်လူးထီၣ်အပူၤန့ၣ်, အဝဲသ့ၣ်မၤသံကွံာ် အပှၤပၢတၢ်တဖၣ်လီၤ. အဝဲသ့ၣ်အစီၤပၤတဖၣ်ဘၣ်တၢ်မၤသံကွံာ်အီၤတဂၤဘၣ်တဂၤ, ဘၣ်ဆၣ်ပှၤတဃ့ဘါထုကဖၣ်ဆူယအိၣ်လၢတၢ်မၤစၢၤအဂီၢ်နီတဂၤဘၣ်.

လံာ်ဟိၤၡ့ 7:7 Iomraidhean Croise

လံာ်စီၤပၤအခီၣ်ထံးတဘ့ၣ် 15:28

တၢ်အံၤမၤအသးဖဲကီၢ်ယူဒၤအစီၤပၤအၤစါပၢတၢ်သၢနံၣ်တနံၣ် အပူၤန့ၣ်လီၤ. ဒီးလၢတၢ်န့ၣ်အဃိစီၤဘါၡၤကဲထီၣ်ကီၢ်အံၣ်စရ့လး အစီၤပၤလၢစီၤနၤဒးအလီၢ်န့ၣ်လီၤ.

လံာ်စီၤပၤအခီၣ်ထံးတဘ့ၣ် 16:18

တုၤစီၤစံၣ်ရံၤထံၣ်ဝဲဒၣ်လၢဝ့ၢ်ဘၣ်တၢ်မၤန့ၢ်ကွံာ်အီၤလံ န့ၣ်အဝဲလဲၤနုာ်ဆူနီအသးကံၢ်ပူၤ, ဆိၣ်ကဲၤထီၣ်နီလၢမ့ၣ်အူဒီးသံဝဲလၢမ့ၣ်အူလၣ်အကျါန့ၣ်လီၤ.

လံာ်စီၤပၤအခီၣ်ထံးတဘ့ၣ် 16:22

လၢခံကတၢၢ်န့ၣ်, ပှၤလၢအဘၣ်သူၣ်ဘၣ်သးစီၤဧိၣ်ရံၤမၤနၢၤကွံာ် တၢ်န့ၣ်လီၤ. စီၤတံးဘနံၤသံဝဲဒီးစီၤဧိၣ်ရံၤကဲထီၣ်စီၤပၤန့ၣ်လီၤ.

လံာ်စီၤပၤခံဘ့ၣ်တဘ့ၣ် 10:14

စီၤယ့ၤဟူဟ့ၣ်လီၤအကလုၢ်ဆူအပှၤတဖၣ်စံးဝဲ, “ဖီၣ်န့ၢ်မူဒံးအဝဲသ့ၣ်တက့ၢ်.” အဝဲသ့ၣ်ဖီၣ်န့ၢ်ပှၤတဖၣ်န့ၣ်ဒီးစီၤယ့ၤဟူမၤသံပှၤတဖၣ်န့ၣ် ဖဲတၢ်ပူၤအိၣ်ဖဲန့ၣ်တပူၤလီၤ. ပှၤခဲလၢာ်အိၣ်လွံၢ်ဆံခံဂၤဒီးပှၤလၢအဘၣ်တၢ်ပာ်မူလီၤတဲာ် တ့ၢ်အီၤတအိၣ်နီတဂၤဘၣ်န့ၣ်လီၤ.

လံာ်စီၤပၤခံဘ့ၣ်တဘ့ၣ် 10:7

တုၤစီၤယ့ၤဟူအလံာ်ပရၢဘၣ်တၢ်ဒိးန့ၢ်အီၤန့ၣ်, ၡၤမရံအပှၤခိၣ်အပှၤနၢ်တဖၣ်မၤသံကွံာ်စီၤအၤဃာ်အစၢၤအသွဲၣ် နွံဆံဂၤလၢာ်, ဒီးဒၢနုာ်ဝဲအခိၣ်တဖၣ်ဆူနာ်တဖၣ်အပူၤ, ဒီးဆှၢလီၤအီၤဆူစီၤယ့ၤဟူအအိၣ်ဖဲဝ့ၢ်ယံးစရ့လးန့ၣ်လီၤ.

လံာ်စီၤပၤခံဘ့ၣ်တဘ့ၣ် 15:10

စီၤယၤဘ့ၣ်အဖိခွါစီၤၡၤလူၣ်, ကူၣ်တၢ်အၢထီဒါစီၤပၤစကၤရ ယၤ, မၤသံကွံာ်အီၤဖဲဝ့ၢ်ယံးဘျၣ်ဒီးကဲထီၣ်စီၤပၤလၢအလီၢ်န့ၣ် လီၤ.

လံာ်စီၤပၤခံဘ့ၣ်တဘ့ၣ် 15:14

စီၤကၤဒံအဖိခွါစီၤမနၤဃ့ၣ်ဟးထီၣ်လၢဝ့ၢ်တံးရစၢ်ဒီးလဲၤ ဆူၡၤမရံ, မၤသံကွံာ်စီၤၡၤလူၣ်ဒီးကဲထီၣ်စီၤပၤလၢအဝဲအလီၢ် န့ၣ်လီၤ.

လံာ်စီၤပၤခံဘ့ၣ်တဘ့ၣ် 15:25

စီၤပကၤဃယၤအသုး အဖုတဖၣ်အသုးခိၣ်တဂၤလၢအမ့ၢ်စီၤရမါလယၤ အဖိခွါစီၤပ့ကး, ကူၣ်ထီၣ်တၢ်အၢဃုာ်ဒီးပှၤကံးလဧးဖိအဂၤယဲၢ်ဆံဒီးမၤသံ ကွံာ်စီၤပကၤဃယၤဖဲနူၢ်ဧိၤစီၤဧိၤအတိာ်အသးကံၢ်ပူၤလၢၡၤမ ရံ, ဒီးကဲထီၣ်စီၤပၤလၢအဝဲအလီၢ်န့ၣ်လီၤ.

လံာ်စီၤပၤခံဘ့ၣ်တဘ့ၣ် 15:30

ဖဲစီၤဧူးစံယါအဖိခွါစီၤယိၤသၣ်ပၢတၢ်ဒ်ကီၢ်ယူဒၤအစီၤ ပၤအသိးခံဆံနံၣ်တနံၣ်အပူၤန့ၣ်စီၤအ့လၤအဖိခွါစီၤဟိၤ ၡ့, ကူၣ်တၢ်ထီဒါစီၤပၤပ့ကး, မၤသံကွံာ်အီၤ, ဝံၤဒီးကဲထီၣ်စီၤပၤလၢအဝဲအလီၢ်န့ၣ်လီၤ.

လံာ်စီၤပၤခံဘ့ၣ်တဘ့ၣ် 9:24

စီၤယ့ၤဟူထုးထီၣ်အချံၣ်ဒီးလၢအဂံၢ်အဘါခဲလၢာ်အပူၤန့ၣ်အဝဲ ခးပျၢ်တဘ့ၣ်လၢအဆဲးဖျိဘၣ်စီၤယဟိရၣ်အချၢဃံဒီးဆဲးဖျိဆူ အသးန့ၣ်လီၤ. စီၤယဟိရၣ်လီၤဃံၤသံဝဲလၢအလ့ၣ်ကဟၣ်ပူၤ,

လံာ်စီၤပၤခံဘ့ၣ်တဘ့ၣ် 9:33

ဒီးစီၤယ့ၤဟူစံးဘၣ်အဝဲသ့ၣ်, “ကွံာ်လီၤအီၤတက့ၢ်.” အဝဲသ့ၣ်ကွံာ်လီၤနီၢ်အံၤစ့ၤဘ့ၤလးဒီးအဝဲအသွံၣ်ဖျိးဘၣ်အၢ လၢတၢ်ဒူၣ်အလိၤဒီးလၢကသ့ၣ်တဖၣ်အလိၤန့ၣ်လီၤ. စီၤယ့ၤဟူနီၣ်ထီၣ်အလ့ၣ်ကဟၣ်တဖၣ်ဒီးယီၢ်တံၢ်နီၢ်အံၤစ့ဘ့ၤ လးအစိၣ်ဒီးအလ့ၣ်ကဟၣ်,

လံာ်စီၤယိၤဘး 36:13

ပှၤတဖၣ်လၢ အအိၣ်ဒီးသးလၢတစူၢ်တနာ်ယွၤန့ၣ်, သးဒိၣ်ထီၣ်တထံၣ် ဃီဒီးဖဲအဘၣ်တၢ်စံၣ်ညီၣ်အီၤဒၣ်လဲာ်န့ၣ်, တကိးထီၣ်ဝဲလၢ တၢ်မၤစၢၤအဂီၢ်ဘၣ်.

စံးထီၣ်ပတြၢၤ 14:4

ယွၤစံးဝဲဒၣ်, “မ့ၢ်အဝဲသ့ၣ်တသ့ၣ်ညါဘၣ်ဧါ. ကယဲၢ်ပှၤမၤတၢ်အၢခဲလၢာ်အံၤအသးတဆးဘၣ်ဧါ. အဝဲသ့ၣ်အိၣ်မူလၢတၢ်ဟုၣ်ယပှၤဂီၢ်မုၢ်အပူၤဒီး တဘါထုကဖၣ်တၢ်ဆူယၤနီတစုဘၣ်. ”

လံာ်ယၡါယၤ 43:22

ယွၤစံးဝဲ, “ဘၣ်ဆၣ်ကီၢ်အံၣ်စရ့လးဧၢ, နသးဟးဂီၤကွံာ်လၢယဃိ ဒီးနတဘူၣ်ထီၣ်ဘါထီၣ်လၢၤယၤဘၣ်.

လံာ်ယၡါယၤ 64:4

ကစၢ်ယွၤဒ်နၤတဂၤအသိး, လၢအမၤတၢ်ဒ်န့ၣ်တဖၣ်လၢပှၤ လၢအပာ်အတၢ်မုၢ်လၢ်လၢနပူၤအဂီၢ်န့ၣ်ပှၤတထံၣ်တ့ၢ်ဒီးနၢ်ဟူ တ့ၢ်နီတဂၤဘၣ်.

လံာ်ယၡါယၤ 64:6

ပဝဲခဲလၢာ်အံၤပပှဲၤတ့ၢ်ဒီးတၢ်ဒဲးဘးတုၤပတၢ်မၤအဂ့ၤကတၢၢ် တဖၣ်ဒၣ်လဲာ်ဘၣ်အၢဘၣ်သီဝဲလၢာ်လၢာ်ဆ့ဆ့လီၤ. လၢပတၢ်ဒဲးဘးတဖၣ်အဃိပလီၤဂာ်ဒ်သ့ၣ်လၣ်တဖၣ်လၢအလီၤ ညွံးကွံာ်ဝဲဒီးဘၣ်တၢ်အူဒံကွံာ်အီၤလၢကလံၤအသိးန့ၣ်လီၤ.

လံာ်ယၡါယၤ 64:7

ပှၤတဃၣ်ဃီၤအသးဆူနအိၣ်လၢတၢ်ထုကဖၣ်အပူၤနီတဂၤ, ပှၤတလဲၤဆူနအိၣ်လၢတၢ်မၤစၢၤအဂီၢ်နီတဂၤဘၣ်. နပာ်ခူသူၣ်ကွံာ်နသးလၢပှၤဒီးစူးကွံာ်ညိကွံာ်တ့ၢ်ပှၤလၢပတၢ် ဒဲးဘးတဖၣ်အဃိလီၤ.

လံာ်ယၡါယၤ 9:13

ပှၤအံၣ်စရ့လးဖိတဖၣ်တပီၢ်ယၢ်လီၤက့ၤအသးဘၣ်. ယွၤသ့တၢ်လၢာ်ကစၢ်, စံၣ်ညီၣ်တ့ၢ်လံအဝဲသ့ၣ်ဒၣ်လဲာ်န့ၣ်, အဝဲသ့ၣ်တဟဲက့ၤကဒါက့ၤဆူအအိၣ်ဘၣ်.

လံာ်ယဃ့းစက့လး 22:30

ယဃုထံၣ်ပှၤတဂၤလၢကသ့ဘှီထီၣ်တၢ်ဒူၣ်တခါ, ပှၤတဂၤလၢကသ့ဆၢထၢၣ်ဖဲတၢ်လီၢ်တဖၣ်လၢတၢ်အဒူၣ်တဖၣ်လီၤပှီၢ် တ့ၢ်န့ၣ်, ဒီးဒီဒၣ်ကီၢ်ဖဲယတၢ်သးထီၣ်ကမၤဟးဂီၤအီၤအခါန့ၣ်လီၤ. ဘၣ်ဆၣ်ယတထံၣ်န့ၢ်ပှၤနီတဂၤဘၣ်.

လံာ်ဒၤနံးယ့လး 9:13

ဒီးဟ့ၣ်လီၤပှၤကယဲၢ်တၢ်စံၣ်ညီၣ်ဒ်တၢ်ကွဲးဖျါတ့ၢ်လၢစီၤမိၤၡ့ အတၢ်သိၣ်တၢ်သီအပူၤလီၤ. အိယွၤ, ပကစၢ်ယွၤဧၢ, ခဲကနံၣ်အံၤဒၣ်လဲာ်ပတကျဲးစၢးမၤမုာ်နသးခီဖျိတၢ်ဃၣ်ကွံာ် ပသးလၢပတၢ်ဒဲးဘးတဖၣ်မ့ၢ်ဂ့ၤ, ခီဖျိတၢ်မၤထွဲနတၢ်မ့ၢ်တၢ်တီမ့ၢ်ဂ့ၤဒံးဘၣ်.

လံာ်ဟိၤၡ့ 13:10

နဃ့စီၤပၤတဂၤဒီးပဒိၣ်ပပှၢ်တဖၣ်ဘၣ်ဆၣ်, အဝဲသ့ၣ်မၤပူၤဖျဲးပှၤတကလုာ်ကသ့ဒ်လဲၣ်.

လံာ်ဟိၤၡ့ 5:15

ယကဟးသဒၣ်ကွံာ်ယပှၤဂီၢ်မုၢ်တုၤဒၣ်လၢအဝဲသ့ၣ်တူၢ်ဘၣ် တၢ်နးတၢ်ဖှီၣ်ကလၢဝဲလၢအတၢ်ဒဲးဘးတဖၣ်အဂီၢ်ဒီးဟဲ ဃုက့ၤယၤတစုန့ၣ်လီၤ. ဘၣ်သ့ၣ်သ့ၣ်လၢအဝဲသ့ၣ် အတၢ်နးတၢ်ဖှီၣ်အပူၤန့ၣ်, အဝဲသ့ၣ်ကဂုာ်ကျဲးစၢးဃုထံၣ်ယၤန့ၣ်လီၤ.

လံာ်ဟိၤၡ့ 7:10

ကီၢ်အံၣ်စရ့လးအပှၤဂီၢ်မုၢ်အတၢ်ပာ်ကဖၢလၢသးန့ၣ်ကိးသတြီ ထီၣ်ထီဒါက့ၤအဝဲသ့ၣ်လီၤ. လၢတၢ်မၤအသးခဲလၢာ်တဖၣ်အဃိဒၣ် လဲာ်န့ၣ်, အဝဲသ့ၣ်တဟဲက့ၤကဒါက့ၤဆူယၤ, ယွၤ, အဝဲသ့ၣ်အကစၢ်ယွၤအအိၣ်န့ၣ်ဘၣ်.

လံာ်ဟိၤၡ့ 7:14

အဝဲသ့ၣ်တဃ့ဘါထုကဖၣ်ဆူယအိၣ်နီၢ်နီၢ်လၢတၢ်သးတီအပူၤဘၣ်. မ့မ့ၢ်လၢတၢ်န့ၣ်အလီၢ်, အဝဲသ့ၣ်ကွံာ်လီၤအသးဒီးဟီၣ်တၢ်ယၢၤတၢ်ဒ်ပှၤဘါတၢ်ဂီၤတဖၣ် မၤဝဲအသိးန့ၣ်လီၤ. ဖဲအဝဲသ့ၣ်ဘါထုကဖၣ်တၢ်လၢဘုခ့ဒီးစပံးထံ အဂီၢ်န့ၣ်, အဝဲသ့ၣ်ဂဲာ်လီၤကူးလီၤအသးဒ်ပှၤဘါတၢ်ဂီၤတၢ်ဖီၣ်တဖၣ် အသိးန့ၣ်လီၤ. အဝဲသ့ၣ်တဖၣ်မ့ၢ်ပှၤပူထီၣ်တၢ်တဖၣ်လီၤ.

လံာ်ဟိၤၡ့ 8:4

ယပှၤဂီၢ်မုၢ်ဃုထၢတ့ၢ်စီၤပၤတဖၣ်ဘၣ်ဆၣ်အဝဲသ့ၣ်မၤဝဲဒ်အသးဒၣ်ဝဲလီၤ. အဝဲသ့ၣ်ဃုထၢပာ်ပှၤအခိၣ်တဖၣ်ဘၣ်ဆၣ်တအိၣ်ဒီးယတၢ်ဘၣ်ယသးဘၣ်. အဝဲသ့ၣ်ဟံးထီၣ်အစ့ဒီးအထူဒီးဘှီထီၣ်တၢ်ဂီၤတဖၣ်လၢအတၢ်ဟး ဂီၤဒၣ်ဝဲအဂီၢ်န့ၣ်လီၤ.

လံာ်မံကၤ 2:1

ပှၤလၢအဆိကမိၣ်ထီၣ်တၢ်တတီတလိၤဒီးကူၣ် ထီၣ်တၢ်အၢလၢအလီၢ်မံပူၤတဖၣ်န့ၣ်, လီၤပျံၤလီၤဖုးဆံးဒိၣ်လဲၣ်. တုၤမုၢ်ဆ့ၣ်ဝါထီၣ်ဒီးအဝဲမၤန့ၢ်ဘၣ်တၢ်ခွဲးတၢ်ယာ်တဘျီဃီန့ၣ်, မၤတၢ်အၢဒ်ကူၣ်ကျဲၤပာ်ဝဲအသိးလီၤ.