လံာ်ဟိၤၡ့ 5:3 - Sgaw Karen Common Bible

³ ကီၢ်အံၣ်စရ့လးမ့ၢ်တၢ်ဒ်လဲၣ်န့ၣ်ယသ့ၣ်ညါယဲလီၤ. အဝဲအိၣ်သဒၢလၢယၤတသ့ဘၣ်. အဝဲအသးတတီတ့ၢ်ဒီးယၤဘၣ်ဒီးအပှၤ ဂီၢ်မုၢ်တဖၣ်တကြၢးလၢကဘူၣ်ထီၣ်ဘါထီၣ်ယၤဘၣ်.

လံာ်ဟိၤၡ့ 5:3 Iomraidhean Croise

လံာ်ယၡါယၤ 7:16

တချုးတၢ်ဆၢကတီၢ်အဝဲန့ၣ်တုၤဒၣ်လဲၣ်န့ၣ်, စီၤပၤခံဂၤလၢအမၤ ပျံၤမၤဖုးသုတဖၣ်အံၤအထံအကီၢ်တဖၣ်ကအိၣ်သယုၢ်သညိဝဲလီၤ.

လံာ်ယၡါယၤ 7:17

ယွၤကဒုးဘၣ်သု, သုပှၤဂီၢ်မုၢ်, ဒီးသုစီၤပၤအဒူၣ်အထၢ ခဲလၢာ်လၢမုၢ်နံၤအကိၢ်အဂီၤတဖၣ်လၢအအၢန့ၢ်ဒံးမုၢ်နံၤလၢ အဟဲတ့ၢ်လံဖဲကီၢ်အံၣ်စရ့လးအဘီအမုၢ်လီၤဖးဒီးကီၢ်ယူဒၤ အကတီၢ်န့ၣ်လီၤ. အဝဲကမၢလီၤကီၢ်အၤၡူၢ်အစီၤပၤဟဲဝဲန့ၣ်လီၤ.

လံာ်ယၡါယၤ 7:5

ကီၢ်စူၤရံ, ဃုာ်ဒီးကီၢ်အံၣ်စရ့လးဒီးအစီၤပၤတဖၣ်ကူၣ်ထီၣ် တ့ၢ်တၢ်အၢတမံၤလီၤ.

လံာ်ဟိၤၡ့ 1:2

ဖဲယွၤကတိၤတၢ်အဆိကတၢၢ်ဒီးအံၣ်စရ့လးခီဖျိစီၤဟိၤၡ့န့ၣ်, အဝဲစံးဘၣ်စီၤဟိၤၡ့, “လဲၤဒီးဒိးတ့ဒိးဖျီနသးတက့ၢ်. နမါကမ့ၢ်ပှၤဃဲသဲမုၣ်တဂၤ, ဒီးနဖိတဖၣ်ကမ့ၢ်ဒ်သိးအီၤန့ၣ်လီၤ. ဒ်န့ၣ်အသိးယပှၤဂီၢ်မုၢ်ကပာ်တ့ၢ်ယၤဒီးကကဲထီၣ်ပှၤအကလုၢ်တတီဘၣ် န့ၣ်လီၤ.”

လံာ်ဟိၤၡ့ 12:1

တၢ်ခဲလၢာ်လၢကီၢ်အံၣ်စရ့လးအပှၤဂီၢ်မုၢ်မၤဝဲစးထီၣ် လၢဂီၤတုၤလၢဟါန့ၣ်မ့ၢ်တၢ်လၢအဘျုးတအိၣ်ဘၣ်ဒီးတၢ်ဟးဂီၤ န့ၣ်လီၤ. တၢ်လီတၢ်ဝ့ၤဒီးတၢ်စုဆူၣ်ခီၣ်တကးအတၢ်ဖံးတၢ်မၤတဖၣ် အါထီၣ်ဝဲလၢအဝဲသ့ၣ်အကျါလီၤ. အဝဲသ့ၣ်မၤလံာ်ဃံၤဃာ်ဒီးကီၢ်အၤ ၡူၢ်ဒီးမၤတၢ်ကူၣ်ဖံးကူၣ်မၤဒီးကီၢ်အဲၤကူပတူးန့ၣ်လီၤ.

လံာ်ဟိၤၡ့ 13:1

လၢအပူၤကွံာ်, ဖဲအ့ဖရဲၣ်အဒူၣ်ကတိၤတၢ်န့ၣ်, အံၣ်စရ့လးအဒူၣ်အဂၤတဖၣ်ပျံၤတၢ်ဖုးတၢ်လီၤ. အဝဲသ့ၣ်ကွၢ်ထီၣ်တၢ်ဆူအ့ဖရဲၣ်အအိၣ်လီၤ. ဘၣ်ဆၣ်ပှၤဂီၢ်မုၢ်မၤတ့ၢ်တၢ်ဒဲးဘးခီဖျိဘါထီၣ်ဘဧၤလး, ဒီးလၢတၢ်အံၤအဃိအဝဲသ့ၣ်ကသံဝဲဒၣ်လီၤ.

လံာ်ဟိၤၡ့ 13:5

ယအံးထွဲကွၢ်ထွဲနၤလၢတၢ်ဃ့ထီအလီၢ်တတီၤ, ပှၢ်မုၢ်ကနၢအပူၤလီၤ.

လံာ်ဟိၤၡ့ 5:11

ကီၢ်အံၣ်စရ့လးတူၢ်ဘၣ်တၢ်မၤနးမၤဖှီၣ်, အဝဲအထံအကီၢ်လၢအမ့ၢ်အတၢ်နီၢ်နီၢ်လီၤမၢ်ကွံာ်ဝဲ, မ့ၢ်လၢအဝဲလဲၤဃု တၢ်မၤစၢၤသပှၢ်ပှၢ်လၢပှၤလၢအဟ့ၣ်အီၤတသ့ဘၣ်အအိၣ်အဃိန့ၣ်လီၤ.

လံာ်ဟိၤၡ့ 5:13

ဖဲကီၢ်အံၣ်စရ့လးထံၣ်ဝဲလၢအဘၣ်ဆူးဘၣ်ဆါ ဒ်လဲၣ်ဒီးကီၢ်ယူဒၤထံၣ်အတၢ်ပူၤလီၢ်ပူၤကျဲဒၣ်ဝဲတဖၣ်န့ၣ် ဒီးကီၢ်အံၣ်စရ့လးလဲၤဝဲဒၣ်ဆူကီၢ်အၤၡူၢ်အအိၣ်လၢကဃ့ တၢ်မၤစၢၤလၢစီၤပၤဖးဒိၣ်အအိၣ်, ဘၣ်ဆၣ်အဝဲဒၣ်ဒုးအိၣ်ဆူၣ်အိၣ်ချ့ထီၣ်အဝဲသ့ၣ်မ့ၢ်ဂ့ၤ, မၤဘျါအဝဲသ့ၣ်အပူၤလီၢ်ပူၤကျဲတဖၣ်မ့ၢ်ဂ့ၤတန့ၢ်ဘၣ်.

လံာ်ဟိၤၡ့ 5:9

တၢ်စံၣ်ညီၣ်အမုၢ်တနံၤန့ၣ်ဟဲဝဲလံ, ဒီးကီၢ်အံၣ်စရ့လးကဘၣ်တၢ် မၤဟးဂီၤအီၤလီၤ. ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, တၢ်အံၤကမၤအသးသပှၢ်တၢၢ်လီၤ.

လံာ်ဟိၤၡ့ 6:10

ယထံၣ်တ့ၢ်တၢ်လီၤပျံၤလီၤဖုးဖးဒိၣ်တမံၤလၢကီၢ်အံၣ်စရ့လးအပူၤ, ယပှၤဂီၢ်မုၢ်မၤဘၣ်အၢလီၤအသးလၢတၢ်ဘါထီၣ်တၢ်ဂီၤတၢ်ဖီၣ် တဖၣ်လီၤ.

လံာ်ဟိၤၡ့ 6:4

ဘၣ်ဆၣ်ယွၤစံးဝဲဒၣ်, ကီၢ်အံၣ်စရ့လးဒီးကီၢ်ယူဒၤဧၢ, ယကမၤတၢ်မနုၤဒီးသုန့ၣ်လဲၣ်. သုတၢ်အဲၣ်ယၤအံၤဟါမၢ်ကွံာ်ချ့ချ့ ကလဲာ်ဒ်မုၢ်ဂီၤအဘှ့ၣ်အသိး, လီၤဂာ်ဒ်ပစီၤထံလၢအလီၤမၢ် ကွံာ်လၢဂီၤထၢၣ်သၢတဂီၤအဆၢကတီၢ်အသိးန့ၣ်လီၤ.

လံာ်ဟိၤၡ့ 8:11

ကီၢ်အံၣ်စရ့လးအပှၤဂီၢ်မုၢ်ဘှီထီၣ်တၢ်လုၢ်လီၢ်လၢကသုးကွံာ် တၢ်ဒဲးဘးဒံးအါ, တၢ်လီၢ်တဖၣ်လၢကမၤတၢ်ဒဲးဘးအဂီၢ်ဒံး အါထီၣ်န့ၣ်လီၤ.

လံာ်ဧၤမိၣ် 3:2

“လၢပှၤကလုာ်ခဲလၢာ်လၢဟီၣ်ခိၣ်ချၢအကျါန့ၣ်, သုမ့ၢ်ပှၤထဲတကလုာ်ဧိၤလၢယသ့ၣ်ညါတ့ၢ်ယဲဒီးအံးထွဲကွၢ်ထွဲ တ့ၢ်န့ၣ်လီၤ. တၢ်န့ၣ်မ့ၢ်တၢ်လၢအဒုးကဲထီၣ်သုတၢ်ကမၣ်လၢတၢ် လီၤပျံၤလီၤဖုးဖးဒိၣ်ဒီးလၢတၢ်န့ၣ်အဃိယဘၣ်စံၣ်ညီၣ်သုလၢ တၢ်န့ၣ်တဖၣ်အဂ့ၢ်လီၤ.”

လံာ်ဧၤမိၣ် 5:12

ယသ့ၣ်ညါသုတၢ်ဒဲးဘးတဖၣ်အၢဝဲသီ ဝဲဆံးဒိၣ်လဲၣ်ဒီးသုမၤတ့ၢ်တၢ်သရူးကမၣ်တဖၣ်ဆံးအါလဲၣ်န့ၣ် လီၤ. သုမၤအၢမၤနးပှၤတီပှၤလိၤ, ဟံးန့ၢ်ခိၣ်ဖးလာ်ဆှိးတဖၣ်ဒီး တြီပှၤဖှီၣ်ဖိယာ်ဖိလၢအကဒိးန့ၢ်တၢ်စံၣ်ညီၣ်တီလၢကွီၢ် ဘျီၣ်တဖၣ်အပူၤန့ၣ်လီၤ.

လံာ်သိၣ်လီၤသီလီၤတၢ် 33:17

စီၤယိၤသးအိၣ်ဒီးဂီၤဖံးဖါတဒုအတၢ်ဂံၢ်တၢ်ဘါ, ဂီၤဖံးဖါလၢအရၢၢ်အစၢၢ်တစုအနၢၤတဖၣ်လီၤ. အဝဲအနၢၤတဖၣ်န့ၣ်မ့ၢ်ဒ်မနၤၡ့ၣ်အကထိတဖၣ် ဒီးအ့ဖရဲၣ်အကလးတဖၣ်အသိးန့ၣ်လီၤ. အဝဲဘျၢၣ်ပှၤကလုာ်တဖၣ်လၢနၢၤတဖၣ်န့ၣ်, ဒီးဆီၣ်လီၤကွံာ်အဝဲသ့ၣ်တုၤလၢဟီၣ်ခိၣ်အကတၢၢ်တဖၣ်န့ၣ်လီၤ.”

ဧ့ၤဘြံၤ 4:13

တၢ်ဘၣ်တ့အိၣ်ခူသူၣ်လၢကစၢ်ယွၤအမဲာ်ညါတသ့နီတမံၤ ဘၣ်. အိၣ်ဘ့ၣ်ဆ့လၢကစၢ်ယွၤလၢပကဘၣ်ဟ့ၣ်ထီၣ် က့ၤတၢ်စံးဆၢလၢပတၢ်ဖံးတၢ်မၤအဂီၢ်တဂၤအမဲာ်ညါခဲလၢာ်လီၤ.

လံာ်လီၣ်ဖျါ 3:15

နမၤတ့ၢ်နဲတၢ်မနုၤလဲၣ်န့ၣ်, ယသ့ၣ်ညါယဲဒၣ်လီၤ. ယသ့ၣ်ညါလၢ နတခုၣ်, ဒီးနတကိၢ်စ့ၢ်ကီးဘၣ်န့ၣ်လီၤ. ယဆၢမးယဲလၢနကခုၣ်, မ့တမ့ၢ်နကကိၢ်လီၤ.